“我哋上帝嘅话语会永远长存”
“草必枯萎，花必凋谢，但系我哋上帝嘅话语会永远长存。”——以赛亚书40:8
唱诗116，115首
1，2． （甲）如果冇咗圣经，我哋嘅生活会变成点？（乙）乜嘢可以帮助我哋从上帝嘅话语得益？
如果冇咗圣经，你嘅生活会变成点呢？你每日嘅生活就唔会有值得信赖嘅指引。同上帝、生命、未来有关嘅问题，你都唔会揾到满意嘅答案。而且，你唔会知道以往耶和华系点样对待人类嘅。
2 值得庆幸嘅系，我哋唔使面对咁可悲嘅情况。耶和华为我哋提供咗佢嘅话语——圣经，而且保证佢嘅话语会永远长存。使徒彼得曾经引用过以赛亚书40:8。呢节经文强调嘅系圣经里面嘅信息，而唔系我哋实际拥有嘅圣经。（请读彼得前书1:24，25）当然，如果将圣经翻译成我哋能够明白嘅语言，噉我哋得到嘅益处就更大嘞。嗰啲热爱上帝话语嘅人早就已经知道呢个事实。虽然唔容易，但系多个世纪以来都有一啲诚心嘅人竭尽全力翻译同分发圣经。佢哋喺呢方面所作出嘅努力同耶和华嘅旨意一致，就系“要各种各样嘅人都可以得救，确切认识真理”。（提摩太前书2:3，4）
3． 呢篇课文会讨论乜嘢？（请睇吓课文开头嘅图片）
3 喺呢篇课文，我哋会睇吓上帝嘅话语喺以下嘅情况点样保存落嚟:（1）语言嘅改变；（2）政治改变对通用语言嘅影响；（3）圣经翻译工作受到反对。讨论呢啲要点对我哋有乜嘢益处？噉会加深我哋对上帝话语嘅体会，亦都会使我哋更加热爱圣经嘅作者，因为佢为咗我哋嘅益处而赐圣经俾我哋。（弥迦书4:2；罗马书15:4）
语言嘅改变
4． （甲）随住时间过去，语言会发生乜嘢变化？（乙）乜嘢令我哋睇出，耶和华对讲任何语言嘅人都唔偏心？你对呢件事有咩感觉？
4 语言会随住时间嘅过去而发生变化。用词同表达方式嘅改变，可能会令到意思完全唔同。或者你可以谂到一啲例子，表明你嘅语言已经有所改变。写作圣经所用嘅希伯来语同希腊语都经历咗类似嘅情况。现代嘅希伯来语同希腊语已经发生咗好大嘅变化，同圣经时代嘅好唔一样。所以，几乎所有想明白上帝话语嘅人都需要有一个现代嘅圣经译本，连嗰啲识现代希伯来语同希腊语嘅人都唔例外。有啲人认为，要明白圣经原文，就应该学习古希伯来语同古希腊语。不过，佢哋噉样做所得到嘅益处并冇想象中咁大。 * 今日，圣经全书或者部分经卷已经被翻译成差唔多3 000种语言。好明显，耶和华希望“地上……每个国族、部族、语言……嘅人”都有机会从佢嘅话语得益。（请读启示录14:6）噉系咪令我哋更加想亲近呢位仁爱又唔偏心嘅上帝呢？（使徒行传10:34）
5． 点解《英王钦定本》咁重要？
5 圣经有好多唔同语言嘅译本，而呢啲译本嘅语言都会随住时间嘅过去而发生改变。一个圣经译本喺最初出版嗰阵大家都睇得明，但系随住语言嘅变化，对后人嚟讲，呢个译本已经唔再清晰易明。请睇吓一个同英语圣经译本有关嘅例子。圣经《英王钦定本》最初喺1611年发行，系最受欢迎嘅英语译本之一，对英语本身产生咗重大嘅影响。 * 值得留意嘅系，《英王钦定本》唔系好重视使用上帝嘅名。喺呢个译本只有几节经文将上帝嘅名“耶和华”翻译出嚟，而喺希伯来语经卷大多数原本有上帝圣名嘅地方，就用咗“主”（英语全大写“LORD”）嚟代替。之后出版嘅《英王钦定本》希腊语经卷亦都用咗同样嘅方式嚟代替“耶和华”呢个名。事实上，《英王钦定本》使用英语全大写字母嘅呢种翻译方式，反而承认咗上帝圣名喺新约嘅应有地位。
6． 点解我哋好开心有《新世界译本》？
6 好多个世纪之后，《英王钦定本》嘅大部分用词都已经过晒时。其他语言嘅圣经译本亦都有类似嘅情况。所以，我哋真系好开心可以睇到用现代语言翻译嘅《圣经新世界译本》。呢个译本嘅全书或部分经卷以超过150种语言发行，因为噉，今日世上大部分人都可以读到自己母语嘅《新世界译本》。呢个译本翻译得简单易明，使我哋嘅心更容易受上帝话语所打动。（诗篇119:97）更重要嘅系，《新世界译本》恢复咗上帝嘅名喺圣经应有嘅地位。
通用语言
7，8． （甲）喺公元前3世纪，点解有好多犹太人都唔明白希伯来语经卷？（乙）希腊语《七十子译本》系点嚟嘅？
7 有时，政治上嘅变化会影响到社会嘅通用语言。耶和华点样确保呢啲政治变化唔会阻碍人清楚了解佢嘅话语呢？古代嘅一个例子可以帮我哋揾到答案。圣经嘅头39卷书都系由以色列人，即系犹太人写嘅。最初，“上帝将圣言托付咗俾佢哋。”（罗马书3:1，2）但系，到咗公元前3世纪，好多犹太人已经唔明白希伯来语。点解呢？因为亚历山大大帝通过远征扩展咗希腊帝国嘅版图。（但以理书8:5-7，20，21）随住希腊帝国嘅领土不断扩大，希腊语成为咗当时社会嘅通用语言。连一啲分散喺各地嘅犹太人日常都主要用希腊语嚟沟通，结果佢哋就更加难明白希伯来语经卷。点样解决呢个问题呢？
8 大约公元前3世纪中期，已经有人将圣经嘅头五卷书由希伯来语翻译成希腊语。其余嘅希伯来语经卷嘅翻译就喺公元前2世纪完成。后来，呢啲译本被辑录埋一齐就成为我哋所知嘅希腊语《七十子译本》。《七十子译本》系希伯来语经卷被整本翻译为希腊语嘅第一个译本。
9． （甲）《七十子译本》同埋其他早期嘅译本点样影响圣经嘅读者？（乙）你最钟意希伯来语经卷嘅边一个部分？
9 有咗《七十子译本》，讲希腊语嘅犹太人同其他人就能够明白希伯来语嘅经文。你可以想象吓，佢哋能够用自己嘅母语听到读到上帝嘅话语，系几咁激动人心！后来，圣经嘅部分经卷亦被翻译成其他通用语言，例如，古叙利亚语、哥特语、拉丁语。当越来越多人可以用自己嘅语言明白圣经，佢哋就会慢慢钟意阅读圣经。（请读诗篇119:162-165）冇错，虽然通用语言会改变，但系上帝嘅话语就一直保存落嚟。
圣经翻译工作受到反对
10． 喺约翰·威克里夫嘅时代，点解大部分人都接触唔到圣经？
10 有时，有权势嘅人设法唔俾平民拥有圣经。不过，一啲敬畏上帝嘅人挺身而出，想帮助每个人都得到圣经。例如，请睇吓14世纪嘅神学家约翰·威克里夫嘅事例。佢坚信每一个人都能够从上帝嘅话语得益。但系，喺佢嘅时代，英国嘅平民根本冇办法接触到圣经。点解呢？因为当时嘅圣经都系手抄嘅，制作成本好高，所以好多人都买唔起。另外，大部分人都唔识字。当然，佢哋去教堂嗰阵可能听过人朗读经文，但系睇嚟佢哋听唔明。点解会噉呢？因为教堂使用嘅都系拉丁语圣经，而到咗中世纪，平民百姓已经唔识呢种古老嘅语言嘞。噉佢哋点先可以认识到宝贵嘅圣经真理呢？（箴言2:1-5）
约翰·威克里夫同好多人希望人人都拥有自己嘅圣经。你系咪都有同样嘅愿望呢？（请睇第11段）
11． 威克里夫圣经译本产生咗乜嘢影响？
11 被称为威克里夫译本嘅英文圣经译本，喺1382年发行。呢个译本好快就深受威克里夫嘅跟从者欢迎。当时呢啲跟从者称为罗拉德派，佢哋喺英国逐城逐村噉传教，尝试使广大平民百姓可以深入认识上帝嘅话语。好多时，罗拉德派会将威克里夫译本嘅一部分读俾遇到嘅人听，亦都会留低一啲手抄本俾佢哋。佢哋所作嘅努力成为咗一个转折点，再次点燃起人对上帝话语嘅兴趣。
12． 教士对威克里夫同佢嘅工作有咩反应？
12 当时嘅教士有咩反应呢？佢哋憎恨威克里夫、佢嘅译本同佢嘅跟从者，仲猛烈迫害罗拉德派。佢哋到处搜寻威克里夫圣经译本，将揾到嘅所有译本全部销毁。威克里夫死咗之后，教会甚至仲宣判佢系异端分子。当然，惩罚一个死人系唔可能嘅，不过，啲教士居然将威克里夫嘅骸骨挖出嚟焚烧，然后将骨灰揼落斯威夫特河。虽然系噉，教会依然冇办法阻止人阅读同明白圣经。之后几个世纪，喺欧洲同世界各地，好多人开始翻译同分发圣经，目的系使平民百姓都可以从圣经得益。
“教导你使你得益处”
13． 我哋相信乜嘢事实？呢个点样强化我哋嘅信心？
13 圣经系上帝启示嘅，但并唔系话《七十子译本》、威克里夫译本、《英王钦定本》或者其他嘅译本系上帝直接用圣灵启示嘅。不过，我哋回顾各种圣经译本嘅历史，就睇出一个事实:正如耶和华应许嘅噉，佢嘅话语永远长存。呢个有冇强化你对耶和华嘅信心，使你深信佢嘅一切应许必定会实现？（约书亚记23:14）
14． 上帝嘅话语点样加深我哋对佢嘅爱？
14 知道圣经系点样保存落嚟嘅，唔单止强化咗我哋嘅信心，仲加深咗我哋对耶和华嘅爱。 * 点解上帝要提供圣经俾我哋？点解佢要确保佢嘅话语永远长存？因为佢爱我哋，想教导我哋使我哋得益。（请读以赛亚书48:17，18）我哋自然都好想通过爱耶和华同听从佢嘅诫命，回应佢对我哋嘅爱。（约翰一书4:19；5:3）
15． 我哋会喺下一篇课文讨论乜嘢？
15 我哋深爱上帝嘅话语，就会认真谂吓:“我哋可以点样从研读圣经得到最大嘅益处？喺传道嗰阵，我哋可以点样帮助人留意圣经嘅内容？喺台上教导嘅时候，我哋又可以点样将教导嘅重点放喺经文上？”下一篇课文会讨论呢啲问题。
^ 4段 请睇《守望台》2009年11月1日刊“你需要学习希伯来语和希腊语吗？”
^ 5段 好多英语嘅常用俗语都嚟自《英王钦定本》。
