效法耶和华嘅怜恤
“耶和华，耶和华，系有慈悲有怜恤之心嘅上帝”——出埃及记34:6
唱诗142，12首
1． 耶和华点样向摩西表明自己？点解噉样做好重要？
有一次，耶和华向摩西宣告佢嘅名同特质，通过噉样嚟表明佢系点样嘅上帝。佢列出嘅头两种特质就系慈悲同怜恤。（请读出埃及记34:5-7）耶和华本来可以强调佢嘅力量或者智慧。不过，当时摩西希望得到保证，表明耶和华会支持佢，所以耶和华强调咗关于佢愿意帮助自己子民嘅特质。（出埃及记33:13）耶和华先提到呢两种美好嘅特质，系咪令你觉得好温暖呢？呢篇课文会特别讨论怜恤呢种特质。怜恤就系关注、同情其他人嘅困难同苦况，而且渴望减轻佢哋嘅痛苦。
2，3． （甲）乜嘢表明人天生就有怜恤呢种特质？（乙）点解怜恤呢种特质值得我哋关注？
2 因为耶和华有怜恤之心，而人系照上帝嘅形象被创造嘅，所以就算唔认识上帝嘅人，都好自然会关心体恤其他人。（创世记1:27）圣经入面有好多表明人有怜恤之心嘅例子。其中一个例子系，两个妓女喺所罗门面前争边个先至系婴儿嘅亲生母亲。为咗试探佢哋，所罗门下令将婴儿斩开两半。就喺嗰时，婴儿嘅亲生母亲受到怜恤之心推动，即刻放弃自己嘅亲生仔，将佢让俾另一个女人。（列王纪上3:23-27）另一个就系法老嘅女救咗小摩西嘅例子。虽然佢知道呢个系希伯来人嘅细路，理应被处死，不过“佢仲系怜悯呢个细路”，将佢当成自己嘅仔噉抚养。（出埃及记2:5，6）
3 点解怜恤呢种特质值得我哋关注？原因系，圣经鼓励我哋要效法耶和华。（以弗所书5:1）虽然人类天生就有怜恤之心，但系作为亚当嘅后代，我哋唔完美，有自私嘅倾向。有时，我哋好难决定应该先去帮人抑或先顾自己。乜嘢可以帮助我哋培养怜恤之心，多啲关注其他人呢？首先，我哋会睇吓耶和华同其他人点样表现怜恤。然后，我哋会谂吓可以点样效法上帝嘅榜样，同埋点解噉样做对我哋有益。
耶和华——表现怜恤嘅完美榜样
4． （甲）点解耶和华派天使去所多玛？（乙）从罗得一家嘅记载，我哋学到乜嘢？
4 我哋可以喺圣经入面揾到好多耶和华表现怜恤嘅例子。谂吓耶和华为罗得所做嘅事。罗得为人正义，佢因为所多玛同蛾摩拉人嘅无耻行为而“大感痛心”。呢啲人道德败坏，所以耶和华决定毁灭佢哋。（彼得后书2:7，8）上帝派天使去拯救罗得。天使催促罗得同佢嘅家人逃离即将被毁灭嘅城市。“罗得仲系拖延唔走。耶和华怜恤佢，嗰两个人就拉住佢嘅手、佢妻子嘅手同佢两个女嘅手，将佢哋带出去，安置喺城外。”（创世记19:16）呢个记载表明，耶和华清楚明白佢忠仆所面对嘅困难。（以赛亚书63:7-9；雅各书5:11；彼得后书2:9）
5． 上帝嘅话语，例如约翰一书3:17，点样帮助我哋学识向人表现怜恤？
5 耶和华唔单止自己对人表现怜恤，佢都教导佢嘅子民要表现出呢种特质。我哋嚟睇吓耶和华俾以色列人嘅一条律法。呢条律法系同攞人嘅衫嚟做抵押有关嘅。（请读出埃及记22:26，27）一个铁石心肠嘅债主可能会夹硬攞走欠债人嘅衫，令到佢瞓觉嗰时连件可以冚嘅衫都冇。不过，耶和华教导佢嘅子民要避免呢种冷酷无情嘅态度同行为，要佢哋表现怜恤。我哋有冇受到呢条律法背后嘅原则推动，向人表现怜恤呢？弟兄姊妹有困难嗰阵，如果我哋有能力帮佢哋，一定唔会见死不救，袖手旁观。（歌罗西书3:12；雅各书2:15，16；请读约翰一书3:17）
6． 我哋从耶和华对以色列人嘅怜恤可以学到乜嘢？
6 就算以色列人犯咗罪，耶和华仲系以怜恤之心对待佢哋。圣经话:“耶和华佢哋祖先嘅上帝因为怜恤佢嘅子民同佢嘅住处，就一次又一次派使者去警戒佢哋。”（历代志下36:15）虽然有啲人嘅生活方式唔符合上帝嘅要求，但系佢哋将来有可能会悔改，成为耶和华嘅朋友。我哋唔系应该对呢啲人表现怜恤咩？耶和华唔想有任何人喺将来嘅审判被毁灭。（彼得后书3:9）所以，趁上帝仲未毁灭呢个邪恶世界，我哋应该继续传讲佢嘅警告信息，使更多人因佢嘅怜恤而得益。
7，8． 一个家庭点解相信耶和华向佢哋表现怜恤？
7 有好多例子可以表明耶和华向人表现怜恤。我哋嚟睇吓一个家庭嘅经历。喺20世纪90年代初嘅种族冲突期间，一个12岁叫米兰嘅男仔，同父母、弟弟，仲有一啲见证人一齐从波斯尼亚搭巴士去塞尔维亚参加大会。米兰嘅父母打算喺呢个大会受浸。不过，由于种族原因，佢哋全家喺边境俾士兵赶咗落车，而其他弟兄姊妹可以继续起程。负责嘅军官拘留咗呢家人两日之后，用无线电联系上司，问应该点样处置佢哋。当时，军官就企喺呢家人面前，所以全部人都听到回复话:“拉佢哋出去枪毙啦！”
8 就喺军官同下属讲紧嘢嗰阵，两个陌生男子嚟到呢家人面前，细细声噉表明自己系见证人。呢两个弟兄从巴士上嘅其他人嗰度听到佢哋嘅遭遇。两个弟兄吩咐米兰同佢弟弟坐佢哋部车过境，因为士兵唔会检查细路仔嘅证件。佢哋又叫米兰嘅父母兜过边防站嘅后面，行去边境嘅另一边同佢哋会合。米兰听完呢个提议之后，都唔知笑好定喊好。米兰嘅父母问:“你哋觉得佢哋会就噉俾我哋大摇大摆噉离开？”不过，佢哋行出去嘅时候，啲士兵居然乜嘢反应都冇，就好似佢哋隐咗形噉。父母同两个仔喺边境嘅另一边重聚。佢哋继续前往举行大会嘅城市，深信耶和华回应咗佢哋恳切嘅祷告。我哋从圣经入面学到，耶和华未必每次都出手帮助佢嘅子民脱离危险。（使徒行传7:58-60）即使系噉，米兰分享佢嘅感受话:“对我嚟讲，就好似系耶和华派天使嚟遮住士兵嘅眼，救咗我哋。”（诗篇97:10）
9． 耶稣见到群众，佢有乜嘢反应？（请睇吓课文开头嘅图片）
9 我哋可以从耶稣身上学到啲乜嘢呢？佢见到群众，就怜悯佢哋，“因为佢哋俾人剥削，四处流离，好似冇牧人嘅绵羊一样”。睇到佢哋嘅情况，“耶稣就开始教导佢哋好多嘢”。（马太福音9:36；请读马可福音6:34）耶稣同嗰啲唔关心平民百姓嘅法利赛派完全唔同。（马太福音12:9-14；23:4；约翰福音7:49）你系咪都好想同耶稣一样，帮助嗰啲有属灵需求嘅人认识真理呢？
10，11． 系唔系任何情况下都要表现怜恤呢？请解释。
10 噉并唔系话，任何情况下都一定要表现怜恤。喺上文提到嘅圣经例子里面，表现怜恤系好适合嘅。但系，扫罗王自以为表现怜恤嗰阵，其实佢表现嘅系唔服从嘅态度。佢违反上帝嘅命令，唔单止冇杀死上帝子民嘅仇敌亚甲王，仲保留咗最好嘅牲畜。结果，身为以色列君王嘅扫罗俾耶和华弃绝咗。（撒母耳记上15:3，9，15）耶和华系正义嘅审判官，佢洞悉人心，知道喺乜嘢时候唔应该表现怜恤。（耶利米哀歌2:17；以西结书5:11）耶和华好快就会对嗰啲唔服从佢嘅人施行审判。（帖撒罗尼迦后书1:6-10）到时，对嗰啲已经判定为邪恶嘅人，佢一定唔会手下留情。耶和华处决邪恶嘅人，其实就系向正义嘅人表现怜恤，拯救佢哋。
11 当然，我哋冇权去判定一个人嘅生死。反而，我哋而家应该尽己所能去帮助所有人。噉我哋可以点样用实际嘅方法向其他人表现适当嘅怜恤之情？等我哋睇吓几个建议。
培养同表现适当嘅怜恤之情
12． 点样对人表现怜恤之情？
12 喺日常生活中乐于助人。如果我哋效法耶稣，就会对弟兄姊妹同其他人表现怜恤之情。（约翰福音13:34，35；彼得前书3:8）怜恤嘅其中一个意思系“一同受苦”。表现怜恤之情会推使我哋帮助其他人解决难题，减轻佢哋嘅痛苦。我哋要把握机会噉样做！例如，我哋可唔可以帮人做啲家务，甚至为佢哋做一啲琐碎事呢？（马太福音7:12）
通过提供实际嘅帮助向人表现怜恤（请睇第12段）
13． 喺灾难发生之后，上帝嘅子民表现出乜嘢特质？
13 参与赈灾工作。大多数人都好自然会同情嗰啲因灾难而受苦嘅人。众所周知，喺发生灾难嘅时候，耶和华嘅子民好愿意向人伸出援手。（彼得前书2:17）2011年日本发生咗大地震同海啸，一位姊妹就住喺当时嘅重灾区。佢觉得自己得到“好大嘅鼓励同安慰”，因为有好多嚟自海外同日本其他地方嘅志愿人员帮手修理受损嘅物业。佢话:“呢个经历帮助我睇出，耶和华好关心我哋，弟兄姊妹之间亦都互相关心。全世界好多弟兄姊妹都不断为我哋祷告。”
14． 你可以点样帮助患病同年老嘅人？
14 帮助患病同年长嘅人。我哋见到其他人患病同衰老，好自然就会怜恤佢哋。我哋渴望终有一日唔会再有疾病同衰老。所以，我哋祈求上帝嘅王国嚟到。而目前，我哋会尽力帮助嗰啲有需要嘅人。某个作家写咗一件发生喺佢妈妈身上嘅事。佢妈妈患有老年痴呆症，有一日，因为失禁而整污糟咗自己件衫。佢想整翻干净嘅时候，门钟就响嘞。原来系两个经常嚟探访佢嘅见证人。呢两个姊妹问，有乜嘢系佢哋可以帮到手嘅。作家嘅妈妈话:“我有啲尴尬，但真系好需要帮手。”于是，两个姊妹就帮佢清洁。结束之后，佢哋仲为佢冲咗壶茶，陪佢倾计。呢个作家好感激两个姊妹，于是写低咗呢番话:“我真系要向呢啲见证人致敬。佢哋的确将自己所传所教嘅用行动表现出嚟。”你对患病同年老嘅人怀有嘅怜恤之心，系咪会推动你尽己所能去减轻佢哋嘅痛苦呢？（腓立比书2:3，4）
15． 点解我哋应该多啲向人传道？
15 帮助人认识耶和华。睇到好多人嘅难题同忧虑，推使我哋好想帮佢哋认识耶和华，教导佢哋明白上帝同佢嘅王国会点样造益全人类。另一个方法就系，帮助佢哋睇出上帝嘅标准有实用嘅智慧，可以应用喺生活上。（以赛亚书48:17，18）你有冇付出努力，多啲向人传道呢？传道工作的确可以荣耀耶和华，又可以向人表现怜恤。（提摩太前书2:3，4）
怜恤之心可以造益自己！
16． 乐于表现怜恤嘅人可以点样造益自己？
16 精神科专家话，表现怜恤可以使人身心健康，有良好嘅人际关系。你向经历痛苦嘅人提供帮助，就会感到快乐同变得更乐观，而且可以减少孤独感同消极嘅谂法。冇错，向人表现怜恤的确可以造益自己。（以弗所书4:31，32）基督徒尽力帮助其他人，就会有清白嘅良心，因为佢哋知道，噉样做同圣经嘅原则一致。乐于助人嘅态度可以使我哋成为更好嘅父母、配偶同朋友。嗰啲经常对人表现怜恤嘅人，喺佢哋有需要嘅时候，往往都比较容易得到其他人嘅帮助同支持。（请读马太福音5:7；路加福音6:38）
17． 点解你想培养同表现怜恤之情？
17 虽然表现怜恤可以为自己带嚟益处，不过呢个唔系我哋要培养怜恤之心嘅主要原因。最重要嘅系，我哋真心渴望效法同荣耀耶和华上帝，因为佢系爱心同怜恤嘅源头。（箴言14:31）愿我哋竭尽全力效法耶和华嘅完美榜样，通过表现怜恤，加深弟兄姊妹之间嘅感情，同所有人和睦共处。（加拉太书6:10；约翰一书4:16）
