“佢加力量俾疲倦嘅人”
2018年全年经文:“仰望耶和华嘅人必重新得力。”——以赛亚书40:31
1. 我哋要面对乜嘢压力?耶和华一定会因为乜嘢而高兴?(请睇吓课文开头嘅图片)
你一定会同意,喺呢个事物制度下,人嘅生活充满难题。好多弟兄姊妹患有严重嘅疾病。另外,有啲弟兄姊妹虽然上咗年纪,不过佢哋仲要照顾年老嘅亲人。而有啲就要辛苦工作,唔系想追求奢侈嘅生活,而只系为咗提供家人嘅基本需要。我哋知道大多数人唔只系面对一个难题,而系同时要面对好几个!呢啲唔单止使佢哋要应付经济上嘅压力,仲要消耗好多时间同精力。虽然系噉,你对上帝嘅应许确信不疑,坚信会有一个美好嘅将来。睇到你表现嘅信心,耶和华一定会非常高兴!
2. 我哋从以赛亚书40:29得到乜嘢鼓励?但系,我哋可能会有乜嘢错误嘅谂法?
2 有时,你会唔会觉得生活压力大到令你唞唔到气?如果有嘅话,你唔系唯一一个。圣经提到,古代嘅忠仆经常觉得自己冇办法再坚持落去。(列王纪上19:4;约伯记7:7)不过,佢哋并冇放弃,而系继续祈求耶和华赐佢哋力 量。耶和华冇令佢哋失望,“佢加力量俾疲倦嘅人”。(以赛亚书40:29)可惜嘅系,今日上帝嘅一啲子民认为应付生活压力嘅最好方法就系“暂停事奉耶和华,唞吓先”。佢哋觉得基督徒嘅活动系一种负担而唔系福分。所以,佢哋唔再研读上帝嘅话语、参加聚会同传道,就好似撒但所希望嘅一样。
3. (甲)我哋点样做就可以挫败撒但嘅阴谋?(乙)呢篇课文会讨论乜嘢?
3 魔鬼唔想我哋全心投入基督徒嘅活动,因为佢知道如果我哋噉做,信心就会得到强化。当你身心疲倦、情绪低落嘅时候,千祈唔好远离耶和华。要尽力亲近佢,因为佢会“使你哋坚定刚强”。(彼得前书5:10;雅各书4:8)呢篇课文会讨论,有乜嘢情况会使我哋喺事奉耶和华方面缓慢落嚟,同埋我哋可以点样运用圣经原则去应付呢啲情况。首先嚟睇吓以赛亚书40:26-31嘅经文,留意耶和华点样强化我哋。
仰望耶和华嘅人会重新得力
4. 我哋从以赛亚书40:26学到乜嘢?
4 请读以赛亚书40:26。从来冇人可以数到整个宇宙到底有几多星星。科学家相信单系银河系就可能有大约4000亿粒恒星。不过,耶和华为每一粒星都起咗名。我哋从中可以学到乜嘢?对于冇生命嘅创造物,耶和华都咁重视,更何况系你呢!你唔系好似机械人噉按住程式去做,而系真心爱佢,好想为佢服务!(诗篇19:1,3,14)仁爱嘅父亲完全了解你,“就连[你]嘅头发都全部数过”。(马太福音10:30)诗篇执笔者亦都向我哋保证:“耶和华知道无过嘅人所经历嘅事”。(诗篇37:18)冇错,耶和华知道你面对嘅所有考验,佢会赐你力量帮助你喺每个考验下都能够保持忍耐。
5. 点解我哋可以确信耶和华一定能够赐我哋力量?
5 请读以赛亚书40:28。耶和华系一切力量嘅来源。请考虑吓佢供应咗几多能量俾太阳。科学家戴维·博丹尼斯话:“太阳每秒释放出嘅能量相当于[几十亿个原子]弹一齐爆发嘅威力。”另一个研究人员计算出太阳“一秒内产生嘅能量足以供应人类20万年嘅需要”!既然耶和华能够供应能量俾太阳,噉我哋需唔需要怀疑佢俾唔到我哋足够嘅力量去应付任何难题?
6. 点解话耶稣嘅轭系容易负嘅?呢个同我哋有乜嘢关系?
6 请读以赛亚书40:29。事奉耶和华为我哋带嚟好大嘅喜乐。耶稣对佢嘅门徒讲:“你哋要负起我嘅轭”。佢继续话:“你哋嘅生命就会得享安舒。我嘅轭系容易负嘅,我嘅担子系轻省嘅。”(马太福音11:28-30)有时参加聚会或者出传道之前,我哋可能会觉得筋疲力尽。但系,结束之后我哋有乜嘢感觉呢?我哋充满力量,准备好应付生活嘅挑战。耶稣嘅轭的确系容易负嘅!
7. 请举例说明马太福音11:28-30所讲嘅有几真实。
7 一个叫凯拉嘅姊妹患有慢性疲劳综合症、抑郁症同偏头痛。佢有时觉得连参加聚会都好困难。但系有一次,佢作出努力去参加周末嘅聚会,之后佢话:“嗰次公众演讲嘅内容同灰心有关。演讲嘅内容同表达方式深深打动咗我,令我感动到流眼泪。呢个提醒我,参加聚会非常重要。”作出努力参加聚会为凯拉带嚟非常大嘅喜乐!
8,9. “我几时软弱,几时就大有力量。”保罗呢句话系乜嘢意思?
8 请读以赛亚书40:30。无论我哋几咁有才干,只系靠自己嘅能力所成就到嘅事始终好有限。呢个系我哋每个人都必须承认嘅。虽然使徒保罗好有才干,但系佢都冇能力做到佢想做嘅一切。当保罗同上帝讲佢对自己好失望嘅时候,耶和华对佢讲:“我嘅力量喺人软弱嘅时候就显得完美。”保罗明白到呢点之后话:“我几时软弱,几时就大有力量。”(哥林多后书12:7-10)佢讲嘅话系乜嘢意思?
9 保罗意识到,冇耶和华嘅帮助,佢做到嘅就好有限。喺佢软弱嘅时候,上帝嘅圣灵可以使佢有充足嘅力量。唔单止系噉,圣灵仲可以使保罗成就到一啲佢自己做唔到嘅事。同样,有耶和华嘅帮助,我哋都会大有力量!
10. 耶和华点样帮助大卫应付挑战?
10 诗篇执笔者大卫多次体验到圣灵点样作用喺佢身上。佢唱道:“靠你嘅帮助,我能够冲击敌军;靠上帝嘅力量,我能够攀登城墙。”(诗篇18:29)有啲难题就好似一幅墙噉阻碍我哋,而我哋净系靠自己嘅能力系冇办法跨越嘅。我哋需要耶和华加强我哋嘅力量。
11. 圣灵点样帮助我哋应付难题?
11 请读以赛亚书40:31。一只鹰唔系单靠自己嘅力量就能够展翅高飞。佢要借助热气流先可以飞得更高、更悭力。所以,我哋面对艰巨任务嗰时,要向鹰学习。祈求耶和华通过圣灵呢个“帮助者”赐力量俾我哋。(约翰福音14:26)我哋好庆幸,可以24小时随时随地向耶和华求助。当我哋同弟兄姊妹发生摩擦,就特别需要上帝嘅帮助。但系弟兄姊妹之间点解会发生矛盾?
12,13. (甲)点解基督徒之间会产生矛盾?(乙)有关耶和华,我哋从约瑟嘅事例学到乜嘢?
12 由于我哋都唔完美,所以彼此之间会产生矛盾。有时弟兄姊妹嘅言行可能会冒犯到我哋,或者我哋嘅言行有时激嬲咗佢哋。呢个可以成为我哋一个严峻嘅考验。虽然我哋嘅同工都唔完美,但系耶和华依然好爱佢哋。尽力同弟兄姊妹保持团结,并肩工作,就表明我哋忠于耶和华。
耶和华冇离弃约瑟,佢亦都唔会离弃你(请睇第13段)
13 约瑟嘅例子表明耶和华有时会容许佢嘅忠仆遭受考验。约瑟年轻嘅时候,俾同父异母嘅哥哥卖咗去埃及做奴隶。(创世记37:28)耶和华睇到 所发生嘅一切,佢因为自己正义嘅仆人约瑟受到唔公平嘅对待而感到心痛。不过,佢并冇干预事情嘅发展。后来,约瑟俾波提乏嘅妻子诬告强奸而被韫咗入监,耶和华依然冇插手干预。但系耶和华有冇舍弃约瑟呢?冇,相反:“耶和华使佢所做嘅事,尽都亨通。”(创世记39:21-23)
14. 我哋“放下愤怒”,就可以得到乜嘢益处?
14 请考虑另一个例子。好少人会好似大卫一样受到咁多恶待。不过,大卫冇容许怨恨嘅情绪喺心里面滋长,佢话:“你要放下 愤怒,离弃烈怒;唔好气愤,噉样只会作恶。”(诗篇37:8)“放下愤怒”最重要嘅原因系因为我哋想效法耶和华,“佢冇按照我哋嘅罪处置我哋”。(诗篇103:10)但系“放下愤怒”亦都为我哋带嚟其他益处。怒气会引发健康问题,例如高血压、呼吸困难。怒气亦都可以影响肝脏、胰脏,甚至引起消化系统嘅问题。一个人发嬲嘅时候,头脑一般都唔清晰,所以佢所讲所做嘅容易伤害其他人。呢个可能会使佢感到内疚、自责,甚至长期抑郁。相反,圣经话“心里平静为身体带嚟生命”。(箴言14:30)如果弟兄姊妹伤害咗我哋,噉我哋应该点样同佢哋和好?我哋实践圣经明智嘅劝告,就可以赢得弟兄。
当弟兄姊妹令我哋失望
15,16. 有人得罪我哋嘅时候,我哋可以点做?
15 请读以弗所书4:26。世界嘅人对我哋冷酷无情,我哋唔会觉得意外。但系弟兄姊妹或者家人嘅言行伤害咗我哋,我哋就会特别难过。我哋可能对呢件事耿耿于怀,冇办法忘记。我哋会唔会俾怨恨嘅情绪喺心里长期滋长?抑或我哋会听从圣经嘅劝告,尽快解决问题?件事拖得越耐,我哋就越难同弟兄姊妹和好。
16 假如一个弟兄得罪咗你,而你又放唔低呢件事,噉你可以点样同对方和好?首先,要向耶和华恳切祷告。祈求佢帮助你同弟兄可以好好倾吓。要紧记,佢都系耶和华嘅朋友。(诗篇25:14)耶和华好爱自己嘅朋友,仁慈噉对待佢哋,佢都希望我哋噉样对待弟兄姊妹。(箴言15:23;马太福音7:12;歌罗西书4:6)之后,谂吓可以同弟兄讲乜嘢。唔好断定弟兄系专登伤害你嘅。或者呢个只系一个误会,又或者你误解咗当时嘅情况。分析吓自己喺呢件事上有冇做得唔啱嘅地方。你可以同对方讲:“可能我太过敏感,不过寻日你同我讲嘅时候,我觉得……”如果谈话嘅结果唔系你所期望嘅,你可以揾另一个机会再同对方倾。继续为你嘅弟兄祷告,祈求耶和华赐福俾佢。同时,亦都祈求耶和华帮助你留意弟兄嘅美好特质。无论结果点样,耶和华都一定好开心睇到你为咗赢得你嘅弟兄而作嘅努力。
当内心受到以往嘅罪折磨
17. 我哋犯咗严重嘅罪之后,耶和华用乜嘢方法帮助我哋恢复同佢嘅关系?点解我哋应该好好运用呢个安排?
17 有啲人觉得自己唔配事奉耶和华,因为佢哋之前犯咗严重嘅罪。罪咎感会夺去我哋嘅喜乐、和平,使我哋失去力量。大卫王俾罪咎感折磨,佢噉样讲:“我缄默不言嘅时候,终日哀号,骨头朽烂。你嘅手昼夜重重压住我。”大卫用耶和华喜悦嘅方式去处理问题,“我终于向你承认我嘅罪……你就赦免我嘅罪过。”(诗篇32:3-5)如果你犯咗严重嘅罪,耶和华乐意帮助你 恢复同佢嘅关系。但系你需要接受佢通过会众提供嘅帮助。(箴言24:16;雅各书5:13-15)千祈唔好拖延,因为呢个关乎到你能唔能够得享永生!如果你犯嘅罪喺好耐之前就已经得到宽恕,但系你嘅良心依然受到责备,噉你可以点做呢?
18. 保罗嘅例子点样帮助嗰啲感到自责嘅人?
18 使徒保罗曾经都因为以往嘅过犯而灰心沮丧。佢承认:“我喺使徒当中系最细嘅,根本唔配称为使徒,因为我曾经迫害过上帝嘅会众。”但系,保罗亦都话:“凭住上帝嘅分外恩典,我先成为今日嘅我。”(哥林多前书15:9,10)耶和华并冇追究保罗以前所做嘅事,佢亦都希望保罗宽恕自己,唔好过度自责。如果你真心悔改,承认自己嘅过犯,你就可以肯定耶和华会向你表现慈悲。要接受耶和华嘅宽恕,相信佢真系已经原谅咗你!(以赛亚书55:6,7)
19. 2018年嘅全年经文系乜嘢?点解呢个咁适当?
19 呢个事物制度越接近终结,生活压力就会越大。但系,我哋可以肯定,“[上帝]加力量俾疲倦嘅人,赐充足嘅能力俾软弱嘅人”,佢可以赐你所需嘅力量,帮助你忠心事奉佢。(以赛亚书40:29;诗篇55:22;68:19)喺2018年,每当我哋去聚会所参加聚会,都会睇到呢一年嘅全年经文。呢节经文提醒我哋一个重要嘅真理,就系:“仰望耶和华嘅人必重新得力。”(以赛亚书40:31)