1,2．（甲）從古到今，乜嘢聖經原則一直指引住耶穌嘅門徒？（乙）敵人想迫我哋點做？（丙）佢哋有冇成功呢？請解釋。

 耶穌企喺管治猶太人嘅最高審判官彼拉多面前，講出一個原則，呢個原則一直指引住真正跟從佢嘅人。耶穌話：“我嘅王國唔屬於呢個世界。如果我嘅王國屬於呢個世界，我嘅臣下就要戰鬥，等我唔致於被交俾猶太人。但係，我嘅王國實在唔係源於呢個世界嘅。”（約翰福音18:36）後來，彼拉多處決咗耶穌。不過，反對者嘅勝利係好短暫嘅，因為耶穌冇幾耐就復活咗。强大嘅羅馬帝國企圖消滅基督嘅門徒，不過，都係白費心機嘅，因為基督徒已經將王國嘅信息傳遍當時嘅天下。（歌羅西書1:23）

² 上帝嘅王國喺1914年建立之後，歷史上一啲最有勢力嘅軍事强國妄圖消滅上帝嘅子民，但係冇一個成功。好多政府同政治黨派試圖迫我哋支持佢哋，但係我哋冇屈服而分裂。今日，上帝嘅子民幾乎遍布世界唔同嘅國家。不過，我哋依然團結合一，組成咗一個名副其實嘅國際弟兄團體，喺政治方面嚴守中立。我哋嘅團結有力噉表明，上帝嘅王國正喺度統治緊，亦都證明君王耶穌基督一直指引我哋，不斷熬煉同埋保護我哋。等我哋懷住“唔屬於世界”嘅決心，一齊睇吓耶穌喺現代點樣指引、熬煉同保護我哋，同時回顧一下，耶穌幫我哋得到嘅一啲振奮人心嘅勝訴。（約翰福音17:14）

3,4．（甲）上帝嘅王國誕生之後發生咗咩事？（乙）對於中立嘅問題，上帝嘅子民係咪一向都有清晰嘅了解呢？請解釋。

³ 上帝嘅王國誕生之後，天上跟住就爆發咗一場戰爭，撒但被掟到地上。（請讀啟示錄12:7-10,12）地上亦 都爆發咗戰爭，呢場戰爭考驗到上帝嘅子民保持中立嘅決心，但係佢哋下定決心要跟從耶穌嘅榜樣唔屬於世界。不過最初，佢哋唔係好清楚應該點樣做，先至係唔屬於世界。

⁴ 例如，1904年出版嘅第六卷《千禧年黎明》 a鼓勵基督徒避免參戰，但係如果一個基督徒被徵召入伍，就應該盡力申請做一啲非戰鬥性嘅工作。如果佢申請唔成功，俾人派去打仗，都唔可以殺人。英國嘅赫伯特·西尼爾喺1905年受浸，佢講起嗰時嘅情況話：“當時啲弟兄唔係好清楚，一個基督徒當兵，淨係做非戰鬥性嘅工作，究竟啱唔啱呢？”

5．關於當兵嘅問題，《守望台》1915年9月1日刊（英語）點樣解釋？

⁵ 關於基督徒當兵，《守望台》1915年9月1日刊（英語）進一步解釋咗呢個問題。就《聖經嘅研討》提出嘅建議，呢期《守望台》指出：“基督徒當兵，就算淨係做非戰鬥性嘅工作，噉唔算妥協咩？呢一點值得探討。”但係，如果基督徒唔着軍裝，唔服兵役，就會被槍斃，佢應該點做呢？文章話：“我哋可以選擇向人表明自己忠於和平嘅君王耶穌，拒絶違反佢嘅命令，亦都可以選擇效忠世上嘅君主，支持佢哋，等人以為我哋離棄咗天上君王嘅教誨。其實兩者嘅結果都可能係死於槍下。噉我哋寧願選擇前者，選擇為忠於天上嘅君王而死。”雖然呢番話講得好有力，但文章最後嘅結論係：“我哋只係提出建議，而唔係夾硬要人噉樣做。”

6．你從赫伯特·西尼爾嘅例子學到乜嘢？

⁶ 有啲弟兄了解到應該採取咩立場，佢哋決定點都唔服兵役。前面提過嘅赫伯特·西尼爾話：“我認為，將彈藥喺船上搬落嚟［非戰鬥性嘅工作］同上子彈冇咩分别。”（路加福音16:10）赫伯特因為良心拒絶服兵役，結果要坐監。佢同另外四個弟兄一齊韞咗喺英國嘅里士滿監獄，嗰度一共有16個依良心拒服兵役嘅人，包括其他教派嘅信徒。呢啲人後來被稱為“里士滿十六傑”。赫伯特同其他拒絶服兵役嘅人俾人秘密送到法國前線，喺嗰度被判槍決。當佢哋排成一排準備犧牲嗰陣，行刑隊冇開槍，軍方仲下令將佢哋嘅刑罰減為10年有期徒刑。

7．二戰爆發嗰時，上帝嘅子民已經清楚了解到乜嘢呢？

 ⁷ 第二次世界大戰爆發嗰時，耶和華嘅子民已經清楚保持中立意味住乜嘢，同埋效法耶穌嘅榜樣就應該點樣做。（馬太福音26:51-53；約翰福音17:14-16；彼得前書2:21）例如，1939年11月1日刊嘅《守望台》（英語）刊登咗一篇重要嘅文章，題為《中立》。文章指出：“今日，同耶和華立約嘅子民必須遵守一項規定，就係喺各國嘅戰爭當中嚴守中立。”西蒙·克拉克後來喺紐約布魯克林總部服務，佢提到呢篇文章話：“我睇出，上帝嘅子民應該要同所有人和平共處，即使戰爭期間都唔例外。”呢篇文章真係好合時，幫助上帝嘅子民做好準備，面對前所未有嘅攻擊嗰陣，都能够忠於上帝嘅王國。

8,9．使徒約翰嘅預言點樣應驗？

⁸ 使徒約翰預告，上帝嘅王國喺1914年誕生之後，大龍魔鬼撒但會從口裏吐出水嚟，好似洪水咁猛， 企圖消滅所有擁護上帝王國嘅人。 b（請讀啟示錄12:9,15）約翰嘅預言點樣應驗呢？由上世紀20年代開始，反對好似浪潮噉向上帝嘅子民湧埋嚟。第二次世界大戰期間，克拉克弟兄同好多北美洲嘅弟兄一樣，因為忠於上帝嘅王國而坐監。喺戰爭期間，因為信仰拒絶參戰俾人韞喺美國聯邦監獄嘅人當中，有超過三分之二係耶和華見證人。

⁹ 無論上帝王國嘅子民住喺邊個國家，魔鬼同埋佢啲爪牙都諗盡辦法迫佢哋捨棄忠義。無論喺非洲、歐洲定係美國，都有弟兄被告上法庭，或者俾人帶到去假釋裁決委員會。由於堅決保持中立，佢哋俾人捉去坐監、俾人打，或者虐待到殘廢。喺德國，上帝嘅子民唔肯嗌“救星希特勒萬歲”，亦都拒絶參戰，所以面對極大嘅壓力。喺納粹時代，估計有6000個耶和華見證人俾人韞喺集中營，超過1600個德裔同非德裔嘅耶和華見證人被虐待致死。即使係噉，魔鬼絶對冇可能對上帝嘅子民造成永久嘅傷害。（馬可福音8:34,35）

10．（甲）“地”象徵乜嘢？（乙）“地”點樣幫助上帝嘅子民？

¹⁰ 使徒約翰嘅預言透露，“地”會幫助上帝嘅子民，將反對嘅“河水”吞咗。“地”象徵世上比較明白事理又有權勢嘅人或者團體。預言點樣應驗呢？二戰結束之後嘅幾十年期間，好多時“地”會採取行動，保護忠於彌賽亞王國嘅人。（請讀啟示錄12:16） 例如，有啲好有影響力嘅法院維護咗耶和華見證人嘅權利，容許佢哋唔服兵役，同埋唔參加國家主義有關嘅活動。關於拒絶服兵役，等我哋嚟睇吓耶和華點樣幫助佢嘅子民，喺法律上得到嘅一啲重大勝利。（詩篇68:20）

11,12．（甲）西庫雷拉弟兄同斯利門諾斯弟兄，要面對乜嘢考驗？（乙）結果點樣？

¹¹ 美國 安東尼·西庫雷拉有5個兄弟姐妹，父母係耶和華見證人。佢15歲受浸，21歲嗰陣向徵兵局登記自己係神職人員。兩年之後，即係1950年，佢申請將登記嘅身份改為依良心拒服兵役嘅人。雖然美國聯邦調查局嘅報告入面冇任何負面嘅資料，但係司法部唔接受佢重新 登記嘅身份。經過一連串訴訟之後，美國最高法院受理咗西庫雷拉弟兄嘅案件，而且推翻下級法院嘅裁決，判西庫雷拉弟兄勝訴。呢項裁決成咗先例，使美國其他公民可以依良心拒服兵役。

¹² 希臘 1983年，雅科沃斯·斯利門諾斯因為拒絶着軍裝，被判違抗命令而坐監。佢獲釋後，申請會計師證嘅時候俾人拒絶，理由係佢有案底。佢向希臘法院申訴，但係一直敗訴，於是佢上訴到歐洲人權法院。2000年，由17位法官組成嘅歐洲人權法院大法庭裁定雅科沃斯勝訴，呢單案成咗反歧視案嘅先例。之前，希臘有超過3500個弟兄因為保持中立而坐過監，留有案底。裁決作出之後，希臘通過一條法令，撤銷咗對呢啲弟兄嘅刑事起訴。另外，裁決作出前幾年已經通過一條法令，就係批准所有希臘公民可以選擇做社會服務代替服兵役。後來希臘修改憲法，使呢條法令再次得到確立。

13,14．你從斯蒂芬諾同巴亞特揚嘅案件學到乜嘢？

¹³ 保加利亞 1994年，19歲嘅伊瓦伊洛·斯蒂芬諾被徵召入伍。佢拒絶參軍，亦拒絶從事軍隊入面嘅非戰鬥性工作，結果被判入獄18個月。佢向法院上訴，理由係自己有權依良心拒服兵役。結果，歐洲人權法院受理咗呢單案。2001年，歐洲人權法院開庭之前，保加利亞政府向伊瓦伊洛·斯蒂芬諾提出和解。政府撤銷對伊瓦伊洛·斯蒂芬諾嘅指控，仲容許所有保加利亞公民，選擇做社會服務代替服兵役。 c

¹⁴ 亞美尼亞 2001年，瓦漢·巴亞特揚到咗服兵役嘅法定年齡。 d佢依良心拒服兵役，結果被判入獄兩年半。佢向亞美尼亞法院上訴，但係次次都失敗。2002年9月，佢開始喺監獄服刑，不過10個半月之後就獲釋。喺服刑期間，佢向歐洲人權法院上訴，法院受理咗呢單案。但係，喺2009年10月27日，法院判佢敗訴。睇嚟呢項裁決對國内面對同樣情況嘅弟兄，係一個沉重嘅打擊。不過，歐洲人權法院大法庭重審呢單案。2011年7月7日，大法庭判瓦漢·巴亞特揚勝訴。呢次係歐洲人權 法院首次承認，基於宗教理由依良心拒服兵役嘅人享有思想、良心同宗教嘅自由，呢種權利應該受到保障。呢項裁決唔單止維護咗耶和華見證人嘅權利，亦都維護咗歐洲委員會成員國數以億萬計人民嘅人權。 e

15．點解耶和華嘅子民唔參加任何同國家主義有關嘅儀式呢？

¹⁵ 耶和華嘅子民忠於彌賽亞王國，所以拒絶服兵役，亦都會用尊重嘅態度向人表明，我哋唔參加任何同國家主義有關嘅儀式。二戰爆發之後，國家主義嘅浪潮席捲全球。好多國家都要求人民宣誓、唱國歌、向國旗敬禮，表示效忠祖國。無論如何，我哋都要專一愛戴耶和華。（出埃及記20:4,5）結果，迫害好似洪水噉向我哋 湧埋嚟。但係，耶和華再次用“地”將一啲反對嘅“河水”吞咗。請睇吓耶和華通過耶穌幫助我哋喺法律上得到嘅幾場重大勝利。（詩篇3:8）

16,17．（甲）莉蓮同威廉面對乜嘢難題？（乙）你從佢哋嘅例子學到乜嘢？

¹⁶ 美國 1940年，關於邁納斯維爾學區訴戈比蒂斯案，美國最高法院作出裁決，以8票對1票判耶和華見證人敗訴。12歲嘅莉蓮·戈比塔斯 f同10歲嘅弟弟威廉為咗忠於耶和華上帝，唔肯向國旗敬禮或者宣誓效忠祖國，結果俾學校開除。呢單案件上訴到美國最高法院，法院認定學校嘅做法符合憲法，有助於“國家統一”。呢項裁決引發一場迫害嘅大風暴。耶和華見證人兒童接二連三噉俾學校開除，好多耶和華見證人都俾老闆炒咗，有啲仲俾暴民襲擊。《國家之榮》（英語）一書指出：“由1941年到1943年，耶和華見證人喺美國受到嘅迫害，係20世紀以來最猛烈嘅宗教迫害。”

¹⁷ 上帝嘅仇敵得到嘅勝利只係好短暫嘅。1943年，最高法院受理咗另一單同戈比蒂斯案類似嘅案件，就係西弗吉尼亞州教育局訴巴尼特案。呢次最高法院判耶和華見證人勝訴。喺美國嘅歷史上，最高法院首次喺咁短時間内改變態度。呢項裁決作出之後，美國公開迫害耶和華見證人嘅行為明顯減少。而且美國所有公民嘅人權，都進一步得到保障。

18,19．（甲）點解巴勃羅·巴羅斯能够緊守忠義呢？（乙）事奉耶和華嘅人可以點樣效法佢嘅榜樣？

¹⁸ 阿根廷 1976年，8歲嘅巴勃羅·巴羅斯同7歲嘅胡戈·巴羅斯唔肯參加升旗儀式，俾學校開除。開除之前，女校長大力噉推巴勃羅，又打佢個頭，仲罰巴勃羅同埋胡戈放學之後留堂一個鐘，想迫佢哋兩兄弟參加升旗儀式。巴勃羅諗翻起嗰次經歷，話：“如果唔係耶和華幫我，喺咁大壓力下，我根本冇可能緊守忠義。”

¹⁹ 喺法庭上，法官支持校方開除巴勃羅同胡戈。案件上訴到阿根廷最高法院。1979年，最高法院推翻下級法院嘅裁決，指出：“根據憲法，人民有學習權（第14條），國家有責任向人民提供小學程度嘅教育（第5條）。校方施行嘅懲罰［開除學籍］同憲法有抵觸。”呢次勝訴令大約1000個耶和華見證人兒童受益。學校唔再開除 耶和華見證人兒童，有啲就恢復學籍，好似巴勃羅同胡戈噉，可以返翻學校。

20,21．羅埃爾同愛米莉嘅案件點樣强化你嘅信心？

²⁰ 菲律賓 1990年，9歲嘅羅埃爾·恩布拉倫格 g同10歲嘅姐姐愛米莉，仲有超過65個耶和華見證人兒童，因為唔肯向國旗敬禮而俾學校開除。佢哋嘅爸爸萊昂納多嘗試同校方解釋，不過冇用。情況越來越差，於是萊昂納多向最高法院上訴。但係，萊昂納多冇錢請律師，成家人就向耶和華熱切禱告，尋求佢嘅指引。喺嗰段日子，兩個細路一直俾人嘲笑。萊昂納多冇咩法律知識，所以佢覺得係冇可能打贏呢場官司嘅。

²¹ 後來，事情有轉機，費利諾·加納爾願意代表呢家人出庭，佢曾經喺國内數一數二嘅律師事務所做律 師。接呢單案件嗰時，加納爾已經成為耶和華見證人，亦都冇喺以前間律師事務所度做。最高法院嘅法官一致裁定耶和華見證人勝訴，宣布學校下達嘅退學令無效。再一次，嗰啲試圖迫上帝子民捨棄忠義嘅人又失敗喇。

22,23．（甲）點解我哋能够打贏咁多場重要嘅官司呢？（乙）我哋嘅國際弟兄團體可以團結和諧，證明咗乜嘢？

²² 點解耶和華嘅子民能够贏到咁多場重要嘅官司呢？我哋一嚟冇政治嘅影響力，二嚟又要面對勢力强大嘅反對者發動嘅猛烈攻擊，不過喺一個又一個國家，一個又一個法庭，都有正義感嘅法官挺身保護我哋，佢哋作出嘅裁決成為憲法嘅先例。毫無疑問，基督一直做我哋嘅後盾，幫助我哋獲得勝利。（請讀啟示錄6:2）點解我哋要打呢啲官司呢？我哋唔係為咗司法改革，而係為咗可以唔受阻礙，繼續為君王耶穌基督服務。（使徒行傳4:29）

²³ 政治鬥爭搞到成個世界都四分五裂，根深蒂固嘅仇恨扭曲咗成個人類社會。但係，君王耶穌基督一直賜福俾我哋，幫助我哋嚴守中立。雖然撒但千方百計要分裂我哋，使我哋屈服，但係就一敗塗地。上帝嘅王國已經將幾百萬愛好和平嘅人召集起嚟，佢哋都“唔再學習戰事”。世上竟然有一個咁團結和諧嘅國際弟兄團體，真係一個奇迹，呢個確實證明上帝嘅王國統治嘞！（以賽亞書2:4）