教導聖經真理
“耶和華啊……你話語嘅要旨係真理”——詩篇119:159,160
1,2． （甲）耶穌一生中最重要嘅工作係乜嘢？點解？（乙）我哋想更好噉成為“上帝嘅同工”就必須點樣做？
耶穌基督既係一個木匠，亦都係上帝嘅僕人。（馬可福音6:3；羅馬書15:8）佢喺呢兩方面都做得好完美。作為一個木匠，佢識得使用各種工具，將原木整成木製品。作為王國真理嘅導師，佢精通上帝嘅話語，而且喺教導方面好有技巧。所以，即使係平民百姓，都可以明白佢所教嘅聖經真理。（馬太福音7:28；路加福音24:32,45）耶穌喺30歲嘅時候，放低佢木匠嘅工具，因為佢知道做上帝嘅僕人更加重要。佢話，上帝派佢嚟地上嘅一個原因就係要佢宣揚王國嘅好消息。（馬太福音20:28；路加福音3:23；4:43）耶穌將傳道工作視為生活嘅重心，亦都希望其他人同佢一齊執行呢項工作。（馬太福音9:35-38）
2 我哋可能唔係木匠，不過我哋都係好消息嘅傳道員。聖經將傳道員稱為“上帝嘅同工”，所以傳道係同上帝有關嘅一項非常重要嘅工作。（哥林多前書3:9；哥林多後書6:4）我哋承認，耶和華“話語嘅要旨係真理”。（詩篇119:159,160）因為呢個原因，我哋喺傳道嘅時候好想“正確噉運用真理嘅話語”。（請讀提摩太後書2:15）所以，我哋繼續努力提高運用聖經嘅技巧。聖經就係我哋用嚟教導人關於耶和華、耶穌同埋王國真理嘅最主要嘅工具。為咗幫助我哋更好噉執行傳道工作，耶和華嘅組織仲為我哋設計咗一啲有用嘅工具，並放喺我哋嘅教導工具箱入面。我哋應該學識點樣善用呢啲工具。
3． 做傳道工作嗰時，我哋嘅焦點應該係乜嘢？喺呢方面，使徒行傳13:48點樣幫助我哋？
3 可能你會諗，點解要叫做“教導工具箱”而唔係“傳道工具箱”。“傳道”意味住宣揚一個信息，而“教導”就主要係幫助人明白信息嘅内容，推動人將自己學到嘅實踐出嚟。只要可以繼續傳道，我哋嘅焦點就應該係建立聖經課程同埋教導人聖經真理。呢個意味住，我哋要熱切尋找所有“秉性適宜得永生嘅人”，同埋幫助佢哋成為基督徒。（請讀使徒行傳13:44-48）
4． 我哋點知道邊個係“秉性適宜得永生嘅人”？我哋點樣可以揾到佢哋？
4 我哋點樣知道一個人係咪“秉性適宜得永生”呢？喺1世紀，揾到呢啲人嘅唯一方法就係向人作見證。所以，我哋都要按照耶穌嘅吩咐去做，“無論入邊一座城、邊一個村，都要揾出邊個係配得嘅人”。（馬太福音10:11）我哋唔期望嗰啲虛偽、傲慢或者對屬靈嘅事唔感興趣嘅人會對好消息有好嘅反應。我哋想揾嘅，係嗰啲誠實、謙卑同埋渴求真理嘅人。我哋可以將呢項工作，比作木匠努力去揾好嘅木材嚟製作傢具、門、軛或者其他物品。佢一旦揾到合適嘅木材，就會帶住工具箱，運用佢嘅技術將原木整成各樣物件。我哋努力幫助誠心正意嘅人成為門徒嗰時，都必須噉樣做。（馬太福音28:19,20）
5． 關於教導工具箱，我哋需要知道乜嘢？請舉例。（請睇吓課文開頭嘅圖片）
5 工具箱入面嘅每件工具都有特别嘅用途。請諗吓，耶穌作為木匠，會有啲乜嘢工具呢？ *佢嘅工具箱當中，可能有啲工具係用嚟量度同定位嘅；有啲就用嚟切割木材或者喺木料上鑽窿、刨削、雕鑿；仲有一啲可以用嚟測量零件嘅水平同垂直度或者固定零件。同樣，我哋嘅教導工具箱入面嘅每一種工具都有特别嘅用途。而家等我哋嚟了解吓點樣使用呢啲有用嘅工具。
用嚟介紹我哋嘅工具
6,7． （甲）你曾經點樣使用網站名片？（乙）會衆聚會邀請單起到乜嘢作用？
6 網站名片。呢啲細小而有效嘅工具可以用嚟向人介紹我哋自己同埋引導人上我哋嘅網站。人上過我哋嘅網站就會對我哋有更多認識，仲有可能會申請聖經課程。已經有超過40萬人通過jw.org網站提交咗聖經課程嘅申請，而申請人數每日就有數以百計之多！你可以隨身帶一啲網站名片，喺日常活動中把握機會向人作見證。
7 會衆聚會邀請單。邀請單所寫嘅話表明，耶和華見證人誠意邀請其他人一齊學習聖經真理。可以通過乜嘢方式呢？就係我哋嘅聚會或者聖經課程。呢份邀請單唔單止表明我哋嘅身份，亦都向嗰啲“自覺有屬靈需要嘅人”提出學習嘅邀請。（馬太福音5:3）當然，無論對方願唔願意接受一個聖經課程，我哋都會歡迎佢哋嚟參加聚會。佢哋參加呢啲安排就可以睇出，自己得到嘅係真正嘅聖經教育。
8． 點解我哋應該努力邀請人至少一次參加我哋嘅聚會？請舉例。
8 我哋要繼續邀請人參加我哋嘅聚會。點解噉樣做好重要？佢哋只要嚟一次就有機會睇出，我哋嘅聚會有豐富嘅屬靈供應，同大巴比倫嘅情況完全唔同。（以賽亞書65:13）美國嘅一對夫婦雷伊同琳達，好多年前就留意到呢一點。佢哋相信上帝，覺得自己有屬靈嘅需要，於是打算去教堂。不過，佢哋嘅城市入面有好多唔同派别嘅教會，去邊個先至啱呢？佢哋打算去匀城市入面嘅所有教堂，加入符合以下兩個條件嘅教會：第一，佢哋喺呢個教會可以有所得益；第二，教會成員嘅衣着要同自稱事奉上帝嘅人相稱。幾年之後，佢哋已經去過晒市入面嘅每一個教會，但結果令佢哋好失望，因為佢哋乜嘢都學唔到，而且教會成員嘅衣着都好唔端莊。佢哋去完列表上嘅最後一個教會之後，琳達返去做自己嘅工作，雷伊就返屋企。喺路上，雷伊經過一個王國聚會所，佢諗：“點解唔入去了解吓呢？”結果，呢次係佢所有經歷當中最好嘅一次！王國聚會所入面嘅所有人都好友善、好熱情，而且衣着端莊。雷伊坐喺前排，好欣賞佢所學到嘅！情形就好似使徒保羅所提到嘅一個人噉。呢個人第一次嚟到基督徒嘅聚會，然後話：“上帝真係喺你哋當中。”（哥林多前書14:23-25）從此以後，雷伊每個星期日都參加聚會，後來又參加每個週中聚會。琳達亦都開始參加。雖然佢哋已經七十幾歲，不過都接受咗聖經課程，後來仲受浸。
打開話題嘅工具
9,10． （甲）點解話傳單好容易使用？（乙）請解釋點樣使用《上帝嘅王國係乜嘢呢？》呢份傳單。
9 傳單。我哋有8份好好用嘅傳單用嚟同人打開話題。自從2013年開始發行以來，呢啲傳單已經印刷咗差唔多5億份。呢啲傳單都係用同一種格式設計嘅，只要你學識使用其中一份，就會識得使用其他嘅。你可以點樣運用傳單同人打開話題呢？
10 我哋用《上帝嘅王國係乜嘢呢？》呢份傳單作為例子。你可以請人睇吓傳單正面嘅問題，跟住問對方：“你有冇諗過上帝嘅王國係乜嘢呢？你覺得呢個王國係……？”然後，睇吓佢會選擇三個答案當中嘅邊一個。唔使講出佢嘅選擇啱唔啱，打開傳單入面嘅“聖經話”，同對方分享精選嘅經文但以理書2:44同以賽亞書9:6。如果可以嘅話，繼續同對方討論。最後，指出“試諗吓”標題下面嘅問題：“上帝王國統治嗰陣，人會過點樣嘅生活呢？”噉樣就已經為你同對方嘅下一次交談建立咗基礎。再次見面嗰陣，你就可以同對方討論《嚟自上帝嘅好消息》第7課。呢本册子都係我哋開始聖經課程嘅其中一個工具。
激發興趣嘅工具
11． 我哋嘅雜誌係為咗乜嘢目的而設計嘅？關於呢啲雜誌，我哋應該知道乜嘢？
11 雜誌。《守望台》同《警醒！》係世界上印刷量同語言數量最多嘅期刊！由於世界各地嘅人都有機會閲讀呢啲雜誌，所以雜誌嘅封面主題係經過精心設計嘅，目的係引起所有人嘅興趣。我哋可以善用呢啲工具，激發人認真諗吓生活中一啲真正重要嘅問題。不過，我哋首先要知道呢啲雜誌係為邊啲人設計嘅。
12． （甲）《警醒！》係為邊啲人出版嘅？出版主旨係乜嘢？（乙）你最近運用呢個工具取得乜嘢成果？
12 《警醒！》係為嗰啲唔係咁熟識聖經或者冇聖經知識嘅人而設計嘅。呢啲人可能對基督嘅教導一無所知，亦都可能唔相信宗教，唔清楚聖經有乜嘢實用嘅價值。《警醒！》嘅一個主要目標係，幫助讀者相信上帝的確存在。（羅馬書1:20；希伯來書11:6）另一個目標係幫助讀者建立信心，相信聖經“真真正正係上帝嘅話語”。（帖撒羅尼迦前書 2:13）2018年嘅三期《警醒！》嘅封面主題分别係“踏上幸福之路”、“12個祕訣讓你擁有幸福的家”同埋“如何面對喪親之痛”。
13． （甲）《守望台》公衆版主要為邊啲人設計？（乙）你最近運用呢個工具取得乜嘢成果？
13 《守望台》公衆版主要係向嗰啲尊重上帝同佢話語嘅人解釋聖經真理。呢啲人可能已經有一啲聖經知識，不過仲未確切認識聖經嘅教導。（羅馬書10:2；提摩太前書2:3,4）2018年嘅三期《守望台》公衆版嘅封面主題分别係“聖經過時了嗎？”、“你的未來會怎樣？”同埋“上帝真的關心你嗎？”。
推動人嘅工具
14． （甲）我哋可以點樣使用教導工具箱入面嘅四個影片？（乙）你最近同人分享呢啲影片取得乜嘢成果？
14 影片。喺耶穌嘅日子，木匠只係使用手動工具。不過，今日嘅木工就有電動工具，例如鋸、鑽、打磨機、打釘機等等。除咗印刷出版物之外，我哋而家亦都向人播放好多精美嘅影片。其中四個放喺我哋嘅傳道工具當中嘅影片係：《點解要學習聖經？》、《你可以點樣學習聖經？》、《王國聚會所嘅聚會係點樣嘅？》同埋《耶和華見證人係點樣嘅人呢？》。呢啲影片長度少於2分鐘，適合用於初次交談。其他時間長啲嘅影片可以向續訪同埋時間比較多嘅人播放。呢啲實用嘅工具可以推動人學習聖經同埋參加聚會。
15． 一啲人用自己嘅母語睇完我哋嘅影片之後有乜嘢反應？請舉例。
15 舉個例，有個從密克羅尼西亞搬嚟嘅女人，佢嘅母語係雅浦語。我哋嘅一個姊妹俾佢睇雅浦語嘅《點解要學習聖經？》呢個短片。當影片開始播放嗰時，呢個女人話：“呢個就係我嘅母語。真係難以置信！我聽得出影片入面嘅口音係嚟自我嘅島嗰邊嘅。佢講嘅係我嘅語言！”之後，佢話會上jw.org網站睇佢語言嘅所有書刊同影片。（參考使徒行傳2:8,11）請睇吓另一個經驗。一個喺美國嘅姊妹將一個影片嘅鏈接發俾佢姪仔。呢個影片係用佢姪仔嘅母語播放嘅。佢姪仔睇完影片之後，發郵件同佢講：“我對邪惡力量控制世界嗰部分好有興趣。而家，我已經申請咗一個聖經課程。”佢姪仔生活喺一個我哋嘅工作受到限制嘅國家！
教導真理嘅工具
16． 請解釋每本册子嘅用途： （甲）《嚟聽上帝嘅話得享永生》 （乙）《嚟自上帝嘅好消息》（丙）《誰在遵行上帝的旨意》
16 册子。有啲人閲讀能力有限，又或者組織冇出版佢哋語言嘅書刊。你可以點樣教導佢哋認識聖經真理呢？我哋有一個專門為呢啲人設計嘅工具，就係《嚟聽上帝嘅話得享永生》册子。 *另外，如果想開始聖經課程，我哋亦都有一個非常好嘅工具，就係《嚟自上帝嘅好消息》册子。你可以俾人睇吓册子背面列出嘅14個問題，問吓佢對邊個話題最有興趣，跟住就可以開始學習同嗰個話題有關嘅課文。你有冇喺續訪嘅時候用過呢個方法？我哋嘅工具箱入面嘅第三本册子係《誰在遵行上帝的旨意》。呢本册子嘅設計目的係，幫助學生認識上帝嘅組織。如果想了解每次討論聖經嗰時可以點樣使用呢本册子，可以參考2017年3月嘅《傳道與生活聚會手册》。
17． （甲）用嚟教導聖經學生嘅兩本書分别有乜嘢作用？（乙）一個人就算已經受浸都應該點樣做？點解？
17 書籍。你用册子開始一個聖經課程之後，亦都可以隨時轉用《聖經點講？》呢本書。呢個工具可以幫助人更加了解聖經嘅基本真理。學完呢本書之後，如果學生喺屬靈上不斷進步，就可以繼續用《常在上帝的愛裏》書嚟學習。呢個工具可以幫助學生知道點樣喺生活上應用聖經嘅原則。請記住，一個人就算已經受浸，都應該學完呢兩本書。噉樣做，佢哋喺真理嘅根基就會更加穩固。（請讀歌羅西書2:6,7）
18． （甲）提摩太前書4:16鼓勵我哋喺教導人聖經真理嗰時點樣做？點解？（乙）我哋使用教導工具箱嗰時應該有乜嘢目標？
18 作為耶和華見證人，我哋有義務傳講“好消息嘅真理”，噉樣可以幫助人得到永生。（歌羅西書1:5；請讀提摩太前書4:16）我哋有一個教導工具箱，入面裝滿我哋所需要嘅工具。（請睇附欄“ 教導工具箱”）願我哋盡可能善用呢啲工具。我哋可以自己決定幾時同埋用邊個工具嚟向感興趣嘅人傳道。不過請記住，我哋嘅目的唔係只係分發刊物。我哋唔應該將刊物留俾嗰啲對好消息冇興趣嘅人。我哋嘅目標係幫助嗰啲誠心正意、謙卑同埋有屬靈需要嘅人，即係“秉性適宜得永生嘅人”，成為基督嘅門徒。（使徒行傳13:48；馬太福音 28:19,20）
^ 16段 如果一個人識嘅字唔多，你可以用《嚟聽上帝嘅話》嚟同佢討論。呢本册子大多數係圖片。
