人物生平
耶和華大大祝福我嘅決定
當我哋靜靜噉將傳單攝入地區入面嘅最後幾户人家嘅門底嗰時，太陽先啱啱出嚟。當時係1939年，我哋半夜就起身，開咗超過一個鐘嘅車，去到美國密蘇里州西南部一個叫做喬普林嘅小城市。我哋一做完呢個地區就即刻上車，然後開去下一個集合地點，喺嗰度等其他車隊到達。你可能會諗，點解我哋嗰個朝早天未光就開始傳道，同埋點解咁快就離開。我之後會話俾你知。
我父母弗雷德·莫洛漢同埃德娜都係基督徒。1934年我出世嗰陣，佢哋已經成為聖經研究者（耶和華見證人）20年嘞。我好感激佢哋幫助我自細就培養自我犧牲嘅精神。我哋一家人生活喺堪薩斯州東南部嘅帕森斯。我哋會衆幾乎所有成員都係受膏基督徒。我哋全家都經常參加聚會，經常向人傳講上帝王國嘅好消息。星期六下午我哋一般會去街上向人作見證，當時叫公衆場所見證。有時傳道結束之後我哋覺得有啲攰，不過喺呢個時候爸爸會帶我哋去食雪糕，幫助我哋恢復精神。
我哋會衆人數唔多，但係傳道地區就好大，包括幾個小鎮同附近嘅好多農場。我哋拜訪農夫嘅時候，經常會用我哋嘅書刊嚟交換當地出産嘅蔬菜同新鮮嘅雞蛋，有時仲會換到雞添。因為爸爸已經事先為書刊作咗捐款，所以呢啲食物可以幫補我哋一家。
傳道運動
我父母得到一部用嚟傳道嘅留聲機。雖然我仲細，唔識得點樣用，不過就好開心喺爸爸媽媽做續訪以及同人討論聖經嗰時幫手播放盧述福弟兄嘅演講。
我同爸爸媽媽一齊喺播音車前面
爸爸改裝咗我哋嘅1936年型福特，喺車頂裝咗個大喇叭。呢部車喺傳講王國好消息方面好有用。通常我哋會先放一段音樂嚟吸引人嘅注意，跟住就播放一個聖經演講。演講結束之後，我哋會向感興趣嘅人分發書刊。
喺堪薩斯州嘅切里韋爾小鎮，爸爸將播音車開入城鎮嘅公園，因為有好多人鍾意喺星期日去嗰度放鬆一下。不過，跟住警察就過嚟同爸爸講，播音車唔可以開入公園，只能够喺公園外面。爸爸好合作。為咗等啲人可以繼續聽到聖經嘅信息，於是爸爸將部車開去公園附近嘅一條街，繼續播放節目。對我嚟講，每次同爸爸、哥哥傑里遇到噉樣嘅情況都好興奮。
20世紀30年代後期，為咗快速將好消息傳遍一啲受到猛烈反對嘅地區，我哋參加咗一個叫做“突襲”嘅特别運動。我哋會喺天光之前起身（就好似喺密蘇里州喬普林所做嘅噉），快速將傳單或者小册子攝入住户嘅門底。之後，我哋會喺郊區碰頭，睇吓有冇人俾警察拘捕咗。
喺嗰個年代，另一個激動人心嘅部分就係宣傳遊行。為咗宣傳上帝嘅王國，我哋身上會掛住標語牌，排成一條隊，喺城市入面遊行。我記得，有一次弟兄姊妹嚟我哋嘅鎮遊行，佢哋身上掛住“宗教係個網羅同騙局”嘅標語牌。佢哋從我哋屋企出發，喺鎮入面行咗大約1.6公里（1英里），然後返到我哋屋企。慶幸嘅係，佢哋遊行期間冇受到反對，不過就有好多好奇嘅人嚟圍觀。
早期嘅大會
我哋全家經常從堪薩斯州去到德克薩斯州參加大會。爸爸喺密蘇里－堪薩斯－德克薩斯鐵路公司返工（亦都稱為M-K-T或者Katy鐵路），所以我哋可以用爸爸嘅職員身份，一齊坐火車去探親戚同參加大會。我嘅舅父弗雷德．維斯馬爾同舅母厄拉利住喺德克薩斯州嘅坦普爾。舅父弗雷德喺20世紀初就學習聖經並受浸，當時佢仲係個年輕人。佢亦都同兄弟姐妹，包括我媽媽，分享自己學到嘅真理。佢曾經喺德克薩斯州中部擔任帶務僕人（現稱分區監督），當地好多弟兄姊妹都識得佢。佢性格樂觀，待人親切，所以大家同佢一齊都好開心。佢喺傳講王國真理方面好熱心，所以我喺年輕嘅時候受到佢好好嘅影響。
1941年，我哋一家人坐火車去密蘇里州嘅聖路易斯參加大會。所有嘅年輕人都受到邀請，一齊坐喺運動場嘅一個特别區域聆聽盧述福弟兄嘅演講，題目係“君王嘅兒女”。喺演講最後嘅部分，盧述福弟兄同佢嘅助手親自將《兒童》呢本新書送俾我哋每個年輕人作為禮物。超過1萬5000個年輕人得到呢份屬靈賞賜。
1943年4月，我哋參加咗喺堪薩斯州科菲維爾舉行嘅區域大會，主題為“採取行動”。雖然呢個大會規模唔大，但係好重要。大會宣布，所有會衆都會開始一個新安排，就係神治傳道訓練班。大會又發行咗一本喺訓練班使用嘅册子，入面有52課。喺同一年，我發表咗自己第一次嘅學生演講。呢次大會對我嚟講亦都好特别，因為我同另外幾個人喺附近農場入面一個好凍嘅水池度受浸。
投身伯特利服務
1951年，我高中畢業。我要為自己嘅將來作一啲決定。哥哥傑里之前喺伯特利服務過，而我亦都好想投身伯特利服務。於是，我好快就向布魯克林辦公室提交咗申請表。冇幾耐，我就受到邀請，喺1952年3月10日開始我嘅伯特利服務。呢個決定幫助我喺屬靈上不斷進步。
我希望可以喺印刷廠參與製作書刊同雜誌嘅工作，不過我受到委派做餐廳服務員，之後喺廚房工作。雖然我冇機會去印刷廠，但係我好開心可以喺廚房工作，亦都從中學到好多。廚房嘅工作時間同其他部門唔一樣，所以日頭我可以有一段安靜嘅時間喺伯特利嘅圖書館做個人研讀。噉樣做强化咗我嘅信心，幫助我喺屬靈上更加成熟，亦都使我更加決心盡己所能留喺伯特利為耶和華服務。傑里喺1949年離開伯特利，同帕特里夏結婚，住喺伯特利附近。佢哋經常幫助同鼓勵我呢個伯特利新人。
我到咗伯特利之後冇幾耐，組織開始喺伯特利挑選更多弟兄，將佢哋加入伯特利講者嘅名單。名單上嘅弟兄會喺嗰一年被委派去布魯克林322公里（200英里）範圍内嘅會衆發表公衆演講，同會衆嘅弟兄姊妹一齊傳道。我有榮幸成為當中嘅一位。我第一次嘅公衆演講長達一個鐘，成個過程我都好緊張。一般我都係坐火車去探訪會衆。我好記得1954年冬天嘅一個星期日晏晝，我上咗一部返紐約嘅火車，諗住可以喺傍晚返到伯特利。不過，半路突然發生一場好猛烈嘅暴風雪，火車嘅電動引擎發生短路而斷咗電。最後，火車喺星期一朝早5點先至到達紐約火車站。我搭地鐵返布魯克林，即刻開始廚房嘅工作，不過就遲咗少少。我喺故障列車上成晚都冇得休息，真係好攰。雖然遇到噉樣嘅情況，但係可以為當地嘅弟兄姊妹服務，而且認識咗好多新朋友，我覺得好開心好值得。
喺WBBR播音室準備播放節目
我喺伯特利服務嘅最初幾年，受邀請參加WBBR電台嘅廣播節目。播音室喺哥倫比亞山道124號二樓。我嘅委派，就係喺每週嘅其中一個廣播節目入面扮演其中一個討論聖經嘅人。喺伯特利服務多年嘅麥克米倫弟兄經常參與呢啲電台節目。我哋經常親切噉叫佢做麥克弟兄。對我哋呢啲年輕嘅伯特利成員嚟講，佢喺事奉耶和華方面係好好嘅榜樣。
我哋喺傳道嗰時分發傳單，推廣WBBR電台
1958年，我嘅工作有所調整，經常有機會接觸基列學校嘅畢業生。我嘅任務係幫助呢啲熱心嘅弟兄姊妹獲得所需嘅簽證，同埋為佢哋安排行程。喺嗰個年代，機票好貴，所以只有少數畢業生會搭飛機。大部分要去非洲同遠東服務嘅弟兄姊妹會搭貨船。商用噴氣機服務出現之後，機票價格就平咗好多。冇幾耐，大部分嘅特派傳道員都搭飛機去佢哋嘅委派地區。
喺畢業禮之前，將基列畢業證書擺埋一齊
大會旅程
1960年，我負責為1961年嘅國際大會安排從美國去歐洲嘅包機。我亦都喺紐約坐包機去德國漢堡參加大會。大會結束之後，我同另外三個伯特利嘅弟兄租咗部車，去意大利參觀羅馬分部辦事處。我哋又去咗法國，之後穿過比利牛斯山脈，去到見證工作受禁制嘅西班牙。我哋將一啲書刊包裝成禮物送俾巴塞羅那嘅弟兄姊妹。我哋見到佢哋嘅時候都非常激動！我哋最後開車去到阿姆斯特丹，搭飛機返翻紐約。
大約一年之後，我亦都負責為指定嘅代表安排行程，幫助佢哋去世界各地參加一系列特别嘅國際大會。呢個就係1963年嘅“永遠好消息”大會。583個代表跨越全球，去到歐洲、亞洲同南太平洋地區出席大會，之後又去夏威夷嘅檀香山（火奴魯魯），最後去加利福尼亞州嘅帕薩迪納。佢哋亦都有一個特别嘅行程，就係去參觀黎巴嫩同約旦呢兩個同聖經有關嘅國家。我哋嘅部門負責安排航班、預訂酒店同埋辦理所需嘅簽證。
新嘅旅途同伴
喺另一方面，1963年對我嚟講亦都非常重要。我同莉拉·羅杰斯喺呢一年嘅6月29日結婚。佢嚟自密蘇里州，已經喺伯特利服務咗3年。婚禮結束一個星期之後，我同莉拉就一齊參加環球旅程，參觀咗希臘、埃及同黎巴嫩。我哋喺貝魯特搭飛機，用咗好短嘅時間就去到約旦。因為我哋嘅工作喺約旦受限制，而且當局已經事先聲明，耶和華見證人攞唔到入境簽證，所以我哋好好奇，去到嗰度會發生乜嘢事。令我哋覺得驚喜嘅係，我哋一到達，就見到一班人企喺機場客運大樓樓頂，舉住一個寫住“歡迎耶和華見證人！”嘅標語牌。可以親眼目睹聖經所描述嘅地方真係激動人心！我哋參觀咗古代族長生活嘅地方。耶穌同使徒都喺呢啲地方傳道過，基督教亦都係從呢啲地方開始傳播到全世界嘅。（使徒行傳13:47）
55年來，莉拉一直都係我嘅好伴侶，忠貞噉同我一齊執行我哋嘅委派。我哋嘅工作喺西班牙同葡萄牙受禁制嘅時候，我哋去咗呢兩個國家幾次。我哋有機會鼓勵弟兄姊妹，將書刊同其他需要嘅嘢帶俾佢哋。我哋甚至可以去到西班牙加的斯一座古老嘅軍事堡壘，探訪囚禁喺入面嘅弟兄姊妹。能够同呢啲弟兄姊妹交談，喺屬靈上强化佢哋，使我内心充滿喜樂。
我哋同傑里·莫洛漢、帕特里夏一齊參加1969年“地上嘅和平”大會
1963年以來，我有榮幸受委派為非洲、澳大利亞、南美、遠東、夏威夷、新西蘭同埋波多黎各嘅大會代表安排行程。莉拉同我一齊參加咗好多難以忘懷嘅大會，包括1989年喺波蘭華沙嘅大會。好多嚟自俄羅斯嘅弟兄姊妹，第一次有機會參加咁大型嘅大會。我哋仲結識咗幾個因為信仰而曾經韞咗喺蘇聯監獄好多年嘅弟兄姊妹。
可以參觀世界各地嘅分部辦事處，强化同鼓勵伯特利家庭成員同特派傳道員，係我好大嘅殊榮。我哋上一次探訪韓國分部嘅時候，有機會同50個被韞喺水原市監獄嘅弟兄見面。呢啲弟兄都表現出積極嘅態度，而且期待將來重獲自由之後繼續事奉耶和華。同佢哋見面真係大大鼓勵咗我哋！（羅馬書1:11,12）
增長所帶嚟嘅喜樂
1943年我受浸嗰時，全球大約有10萬個傳道員。今日，喺240個國家或地區已經有超過800萬人嘞。咁多年來，我見到耶和華點樣賜福俾佢嘅子民，使佢哋不斷增長。呢個好大程度上要歸功於嗰啲帶頭傳道嘅基列畢業生。多年以來，我有機會同佢哋當中嘅好多人接觸，幫助佢哋去到自己受委派嘅地方。呢個真係使我得到好大嘅喜樂！
我好慶幸自己年輕嘅時候就已經決定擴大服務，到伯特利工作。喺人生嘅每一段歷程，耶和華都賜俾我豐厚嘅福分。除咗伯特利服務所帶嚟嘅喜樂之外，幾十年來，我同莉拉有幸喺布魯克林嘅幾個會衆參與傳道工作，而且喺呢啲會衆結交咗好多畢生嘅摯友。
喺莉拉嘅支持下，我可以繼續喺伯特利服務。雖然我而家已經超過84歲，但仲係可以做有意義嘅工作，協助處理分部嘅信件。
今日嘅我同莉拉
瑪拉基書3:18話：“你哋必定再次睇出義人同惡人、事奉上帝嘅人同唔事奉上帝嘅人之間有乜嘢分别。”可以成為耶和華奇妙組織嘅一分子，亦都睇出事奉耶和華嘅人同唔事奉耶和華嘅人有乜嘢區别，真係好大嘅喜樂。隨住時間一日一日噉過去，我哋睇到撒但統治嘅世界變得越來越差，好多人對未來失去希望，覺得生活冇咩樂趣。但係，嗰啲愛耶和華、事奉耶和華嘅人，即使喺呢個難以應付嘅非常時期，都可以享有快樂嘅人生，對未來有穩確嘅希望。我哋能够傳講上帝王國嘅好消息係無比嘅殊榮！（馬太福音24:14）我哋都渴望上帝嘅大日子到嚟。好快，上帝嘅王國會用樂園取代呢個世界。到時，上帝承諾嘅所有福分都會實現，包括完美嘅身心同永遠嘅生命。耶和華嘅忠心僕人會喺呢個地球上永遠享有快樂嘅生活。
