講真實嘅話
“要彼此講真實嘅話”——撒迦利亞書8:16
1,2． 帶俾人類最大傷害嘅可能係乜嘢？邊個用呢樣嘢嚟傷害人類？
電話、電燈泡、汽車同埋冰箱呢啲發明可以令我哋嘅生活更加便利，而煙草、火藥、地雷同埋核彈等等，就會對我哋造成傷害。不過，喺呢啲嘢出現之前好耐，世上就已經存在一樣可能係有史以來帶俾人類最大傷害嘅嘢。係乜嘢呢？就係謊言！如果一個人為咗呃人而講出一啲佢明知係假嘅事，噉佢所講嘅就係謊言嘞。邊個講咗世上第一個謊言？就係魔鬼撒但。耶穌將佢稱為“謊話之父”。（請讀約翰福音8:44）撒但幾時開始講大話？
2 呢件事發生喺幾千年前。當時，上帝創造咗一個好靚嘅樂園，將第一對夫婦亞當同夏娃安置喺入面，使佢哋享有美好嘅生活。跟住，魔鬼就登場嘞。佢明知上帝吩咐呢對夫婦唔可以食“辨識善惡樹”嘅果，亦都知道佢哋違反呢條誡命就會死，不過佢仲係通過一條蛇同夏娃講：“你哋一定唔會死［呢個就係第一個謊言］。只不過上帝知道你哋食咗嘅話，嗰一日你哋嘅心眼就會打開，你哋會好似上帝一樣，能够辨識善惡。”（創世記2:15-17；3:1-5）
3． 點解話，撒但講大話係居心不良？撒但嘅大話導致乜嘢後果？
3 撒但講大話可以話係居心不良，因為佢清楚知道，如果夏娃相信佢，食咗辨識善惡樹嘅果，就一定會死。最終，亞當同夏娃都違背咗耶和華嘅誡命，因為罪而死去。（創世記3:6；5:5）更慘嘅係，呢種罪“傳［咗］俾所有人”。事實上，“死亡一直作王管轄人，即使人所犯嘅罪同亞當所犯嘅唔同，亦要受死所管轄”。（羅馬書5:12,14）上帝希望人類享有完美、永遠嘅生命。不過而家，每個人都難免一死，人能够活到“七十歲，特别强壯嘅可能活到八十歲”就已經唔錯嘞，而且人生通常都充滿“煩惱痛苦”。（詩篇90:10）撒但嘅謊言帶嚟幾咁悲慘嘅後果！
4． （甲）呢篇課文會討論乜嘢問題？（乙）根據詩篇15:1,2，點樣嘅人先可以成為耶和華嘅朋友？
4 耶穌話，撒但“冇喺真理中企穩，因為真理唔喺佢入面”。而家，撒但依然冇喺真理入面，佢繼續“迷惑……普天下嘅人”。（啟示錄12:9）我哋當然唔想俾撒但迷惑。所以，我哋會喺呢篇課文討論三個問題：撒但點樣迷惑人類？點解好多人都講大話？我哋可以點樣做一個“講真話”嘅人，一直同耶和華保持親密嘅關係？（請讀詩篇15:1,2）
撒但點樣迷惑人類
5． 今日撒但點樣迷惑人？
5 使徒保羅知道，我哋可以避免俾“撒但趁機勝過我哋，因為我哋唔係唔知道佢嘅陰謀”。（哥林多後書2:11）我哋知道，成個世界，包括錯誤嘅宗教、腐敗嘅政治同埋貪婪嘅商業制度，都喺撒但嘅控制之下。（約翰一書5:19）撒但同佢嘅邪靈會用“大話”嚟影響世上有權勢嘅人。（提摩太前書4:1,2）好多大型企業都通過虛假嘅廣告欺騙消費者，向人推銷一啲有害嘅産品。
6,7． （甲）點解話欺騙人嘅宗教領袖罪大惡極？（乙）你聽過邊啲錯誤嘅宗教道理？
6 好多宗教領袖用錯誤嘅宗教道理欺騙人，佢哋真係罪大惡極。點解噉講呢？因為一個人接受咗某啲錯誤嘅教導，做出上帝所憎恨嘅行為，就可能會失去永生。（何西阿書4:9）喺耶穌嘅日子，宗教領袖就係噉樣誤導咗好多人。所以，耶穌當面對佢哋講：“抄經士同法利賽派啊，你哋呢啲虛偽嘅人有禍喇！因為你哋橫越海洋陸地，要一個人歸信，喺佢歸信嘞，你哋就使佢比你哋加倍有罪，更應該揼入欣嫩谷［永遠嘅毁滅］。”（馬太福音23:15）耶穌强烈譴責嗰啲宗教領袖，話佢哋係從佢哋嘅父魔鬼呢個“殺人兇手”嗰度嚟嘅。（約翰福音8:44）
7 今日世上有好多宗教，呢啲宗教嘅領袖有好多唔同嘅銜頭，例如牧師、神父、拉比、祭司、大師、道長等等。佢哋同1世紀嘅宗教領袖一樣，“以唔正義嘅手段壓制”上帝嘅話語，又“用虛謊取代上帝嘅真理”。（羅馬書1:18,25）佢哋提倡錯誤嘅道理，例如“一次得救永遠得救”、靈魂不死、投胎轉世，同埋愚昧噉認為上帝會寬容同性戀以及同性婚姻。
8． 我哋期望政治領袖講出邊個宣布？我哋應該有點樣嘅反應？
8 政治領袖亦都用謊言誤導人。佢哋將會講嘅一個謊言就係“和平安全嘞”。不過好快，“突如其來嘅毁滅就即時臨到佢哋”。呢個事物制度已經搖搖欲墜，但政治領袖所講嘅話就掩飾咗呢個真相。我哋千祈唔好俾佢哋呃到！因為我哋“清楚知道，耶和華嘅日子臨到，就好似賊喺夜晚嚟到一樣”。（帖撒羅尼迦前書5:1-4）
點解好多人都講大話
9,10． （甲）點解人會講大話？講大話會引起乜嘢後果？（乙）關於耶和華，我哋應該記住乜嘢？
9 一個新發明或者新産品流行起嚟，就會被大量生産。講大話亦都係噉。散播謠言喺今日嘅社交當中變得越來越普遍，所以唔係只係嗰啲有影響力嘅人先至會呃人。巴塔查爾吉喺佢嘅文章“點解我哋講大話”（英語）裏面指出：“好多人都認為，講大話係一種根深蒂固嘅人類特性。”人經常會通過講大話嚟保護或者抬高自己。佢哋為咗掩飾自己嘅錯誤同行為，或者想喺經濟同其他方面謀取個人利益就講大話。文章話，有啲人“無論喺大事抑或小事上，對陌生人、同事、朋友同埋親人隨口都講得出大話”。
10 講大話會導致乜嘢後果呢？會失去人嘅信任、破壞人同人之間嘅關係。請想像吓，如果一個妻子對丈夫不忠，佢為咗掩飾自己嘅行為就欺騙丈夫，呢個一定會令佢丈夫大受打擊。或者，一個人可能私下虐待妻子同兒女，但喺其他人面前就扮到好似一個模範家主噉。不過，我哋唔好忘記，對耶和華嚟講“萬物都係赤露敞開嘅”，所以呢啲人喺佢面前根本隱藏唔到自己嘅秘密。（希伯來書4:13）
11． 我哋從亞拿尼亞同撒非拉嘅事例學到乜嘢？（請睇吓課文開頭嘅圖片）
11 聖經提到，公元1世紀嘅一對基督徒夫婦受撒但影響，竟然够膽欺騙耶和華。呢對夫婦就係亞拿尼亞同撒非拉。佢哋賣出一啲財産，但只係將一部分嘅錢交俾使徒。佢哋想會衆嘅人覺得自己好慷慨，就專登呃使徒，話已經捐出咗全部資財。不過，耶和華清楚知道佢哋所做嘅一切，亦都因此懲罰佢哋。（使徒行傳5:1-10）
12． 嗰啲不知悔改、蓄意講惡毒謊言嘅人會被掟到邊度？點解？
12 耶和華對謊言有乜嘢睇法呢？所有好似撒但噉不知悔改、蓄意講惡毒謊言嘅人同撒但一樣，都會被“掟到有硫磺烈火嘅湖入面”。（啟示錄20:10；21:8；詩篇5:6）因為喺耶和華睇嚟，“行事虛謊”同其他嘅可憎行為係一樣嘅。（啟示錄22:15）
13． 我哋知道耶和華係點樣嘅上帝？知道呢一點，我哋受到推動點樣做？
13 我哋知道，“上帝同世人唔同，一定唔會講大話”。事實上，佢係“唔可能講大話”嘅上帝。（民數記23:19；希伯來書6:18）聖經話，“耶和華恨惡……講大話嘅舌頭”。（箴言6:16,17）為咗得蒙上帝悦納，我哋就一定要按照佢嘅標準做一個誠實嘅人。噉樣，我哋就唔會“互相講大話”。（歌羅西書3:9）
“彼此講真實嘅話”
14． （甲）我哋點樣將自己同錯誤宗教分别開嚟？（乙）請解釋路加福音6:45嘅原則。
14 真基督徒將自己同錯誤宗教分别開嚟嘅一個方法係乜嘢？就係“彼此講真實嘅話”。（請讀撒迦利亞書8:16,17）保羅指出，我哋要通過“真實嘅言語”，“事事表明自己係上帝嘅僕人”。（哥林多後書6:4,7）耶穌話：“人心裏充滿乜嘢，佢嘅口就講出乜嘢。”（路加福音6:45）所以，一個真正誠實嘅人，喺大小事上對陌生人、同事、朋友同埋親人都會講真話。我哋可以點樣表明自己凡事誠實？請睇以下嘅例子。
你睇唔睇得出呢個年輕姊妹嘅生活有乜嘢問題？（請睇第15、16段）
15． （甲）點解做雙面人係唔明智嘅？（乙）乜嘢可以幫助年輕人抵抗不良嘅同輩壓力？（請睇腳注）
15 年輕人，你係咪好想同輩接納你呢？噉你就要小心，千祈唔好做雙面人。有啲人同家人或者弟兄姊妹喺一齊嗰時就表現得好屬靈，不過同世俗嘅年輕人交往或者上社交網站嗰陣就係另一個樣。佢哋可能會講粗口、着一啲唔端莊嘅衫、聽低俗嘅音樂、濫用酒精或藥物、偷偷地拍拖，甚至做出一啲更加唔好嘅事。佢哋喺父母、弟兄姊妹同埋耶和華面前戴住面具做人，所以佢哋嘅生活其實就係一個謊言。（詩篇26:4,5）耶和華清楚知道佢哋只係喺“口頭上尊重［佢］，但係心就遠離［佢］”。（馬可福音7:6）箴言話：“你嘅心唔好羨慕罪人，要終日敬畏耶和華。”但願我哋每個人都按照呢句話去做。（箴言23:17） *
16． 申請某種形式嘅特别服務嗰時，誠實嘅人會點做？
16 可能你好想做先驅或者參與某種形式嘅特别全時服務，例如伯特利服務。喺申請期間，所有同個人健康、選擇嘅娛樂以及道德情況有關嘅問題，你都應該如實回答。（希伯來書13:18）如果你曾經做過一啲耶和華憎恨或者令自己良心不安嘅事，但係又冇同長老傾過，噉你應該點做呢？要向佢哋尋求幫助，噉你先可以懷住清白嘅良心事奉耶和華。（羅馬書9:1；加拉太書6:1）
17． 喺王國工作受限制嘅地區，我哋被當局問到有關弟兄姊妹嘅問題嗰時應該點做？
17 如果喺你嘅地區，王國嘅工作受到政府限制，噉你被當局問到一啲有關弟兄姊妹嘅問題嗰時，你有冇必要將自己知道嘅話晒俾佢哋知呢？聖經話：“有靜默嘅時候，有講話嘅時候”。（傳道書3:1,7）耶穌俾羅馬統治者審問嘅時候，運用咗呢個原則，所以佢有時乜嘢都冇回答。（馬太福音27:11-14）同樣，喺類似嘅情況下，我哋最好保持謹慎，噉樣就唔會將弟兄姊妹置於危險當中。（箴言10:19；11:12）
幾時保持沉默，幾時講出真相，你會點樣決定？（請睇第17、18段）
18． 當長老向我哋了解關於弟兄姊妹嘅事嗰陣，我哋應該點做？
18 如果你知道會衆入面有人犯咗嚴重嘅罪，你應該點做呢？長老有責任保持會衆嘅道德潔淨，可能會問你同呢件事有關嘅問題。呢個時候，你會點做呢？聖經話：“實話實説嘅，談論正義嘅事”。（箴言12:17；21:28）所以，就算呢件事涉及到你嘅好朋友或親人，你都有責任要將全部嘅事實話俾長老知，而唔應該有所隱瞞或者加以歪曲。長老有權知道事實。全面了解事情之後，佢哋就能够用最好嘅方式去幫助犯錯嘅人，使佢可以恢復同耶和華嘅關係。（雅各書5:14,15）
19． 下一篇課文會討論乜嘢？
19 詩篇執筆者大衛向耶和華禱告話：“你喜愛嘅，係人嘅内心真誠信實。”（詩篇51:6）大衛清楚知道，一個人内心誠實先至係真正誠實。真基督徒喺生活嘅每方面都“要彼此講真實嘅話”。向其他人傳講上帝嘅真理，係區分真基督徒同錯誤宗教嘅另一個方法。下一篇課文會集中討論，我哋傳道嗰陣可以點樣教導人上帝嘅真理。
^ 15段 請睇《青年人所提出的問題——有實效的答案》第2册15章“我怎樣才能抗拒同輩壓力？”同16章“我是個‘雙面人’嗎？”。
