1918——百年回首
“1918年會有乜嘢事發生?”呢個係《守望台》(英語)1918年1月刊開頭所講嘅一句話。雖然當時第一次世界大戰依然喺歐洲進行得如火如荼,不過年初所發生嘅事睇嚟會為聖經研究者同當時嘅世界帶嚟好嘅轉變。
世界呼籲和平
1918年1月8日,伍德羅·威爾遜總統喺美國國會發表咗一個演講,提出咗十四點原則,並認為呢啲原則會帶嚟“公平同恆久嘅和平”。佢建議各國之間終止秘密外交、裁減軍備並建立一個國際聯合機構嚟造益大小嘅國家。後來,佢提出嘅“十四點和平原則”成為結束第一次世界大戰嘅《凡爾賽條約》同埋國際聯盟成立嘅基礎。
反對者落敗
雖然上一年嘅情況動盪不安, *不過,通過守望台聖經書社年會上所發生嘅事,聖經研究者似乎睇到和平嘅曙光。
呢次會議喺1918年1月5日舉行。會議期間,有幾個已經俾伯特利革職嘅男子企圖得到組織嘅控制權。理查德·巴伯係一位忠心嘅周遊監督,佢為呢個會議做開始嘅禱告。總結咗上年嘅工作報告之後,就開始每年一度嘅董事會選舉。巴伯弟兄推薦約瑟夫·盧述福同另外六位弟兄。然後,一個支持反對者嘅律師提名另外七個人,其中包括嗰幾個已經俾伯特利革職嘅人。佢哋最終落敗。盧述福弟兄同另外六位忠心嘅弟兄獲得大多數股東嘅支持,以壓倒性嘅票數當選董事會成員。
好多出席呢次會議的弟兄都話,呢次係“佢哋參加過嘅會議當中,得到最多祝福”嘅一次。不過,開心之後冇幾耐,佢哋就要面對考驗嘞。
對《完成嘅奧秘》一書嘅反應
幾個月以來,聖經研究者向人分發咗《完成嘅奧秘》呢本書。誠心正意嘅讀者對書入面所講嘅聖經真理有好好嘅反應。
克里斯特係加拿大嘅一個周遊監督,佢曾經聽一對讀過《完成嘅奧秘》嘅夫婦講,佢哋只係用咗五個星期就接受咗真理。克里斯特話:“先生同太太都全心接受真理,喺屬靈上有驚人嘅進步。”
有個男子得到呢本書之後,就馬上同佢嘅朋友分享。佢俾書入面嘅信息深深打動,亦都可以講佢係俾本書打中咗。呢個男子話:“我喺第三街行緊嘅時候,膊頭突然間俾一啲嘢打中。我以為係嚿磚頭,原來係《完成嘅奧秘》。我攞返屋企,睇晒成本書。……後來我先知道,
原來本書係一個傳教士發嬲嗰陣從窗口掟落街嘅。……我好肯定,無論佢付出幾多努力改變人嘅信仰,成果都及唔上佢呢次所做嘅。因為佢掟呢本書,反而使更多人揾到一個穩確嘅希望。……多得呢個咁憤怒嘅傳教士,我哋而家可以讚美上帝。”唔鍾意呢本書嘅,唔係只有呢個傳教士。1918年2月12日,加拿大政府一口斷定呢本書有煽動性,亦都包含反戰嘅言論,所以將呢本書列為禁書。之後冇幾耐,美國政府亦都跟住噉樣做。政府特工搜查咗紐約賓夕法尼亞州同加利福尼亞州嘅伯特利宿舍同辦公室。1918年3月14日,美國司法部將《完成嘅奧秘》列為禁書,話印刷同發行呢本書會妨礙佢哋喺戰爭中所作嘅努力,違反咗間諜法。
監禁!
1918年5月7日,司法部獲得批准,拘捕咗喬瓦尼·狄撤卡、喬治·費希爾、亞歷山大·麥克米倫、羅伯特·馬丁、弗雷德里克·羅比森、約瑟夫·盧述福、威廉·范安伯同埋克萊頓·伍德沃思。佢哋被控“非法而且蓄意唔服從、唔忠於[國家],並煽動他人拒絶喺美國嘅陸海軍服兵役”。佢哋嘅審訊從1918年6月3日開始,不過基本上可以肯定,佢哋會被定罪。點解?
美國司法部部長指控佢哋違反咗間諜法。呢個間諜法係一個“反宣傳嘅有效武器”。1918年5月16日,國會否決咗一條法案嘅修正案,而呢條修正案本來可以保護嗰啲發行“講事實,有良好動機,有合理目的”嘅出版物嘅人。《完成嘅奧秘》係佢哋討論嘅焦點。關於呢一點,美國國會嘅官方記錄話:“喺呢類型嘅宣傳當中,其中一本最危險嘅書就係《完成嘅奧秘》。……呢本書唯一嘅作用係,令士兵質疑戰爭嘅原因,而且激化……對[强制性服兵役]草案嘅抵觸情緒。”
1918年6月20日,陪審團認為八個弟兄喺所有指控上都有罪。第二日,法官作出咗判決。佢話:“被告大力提倡以及四處傳播嘅宗教宣傳……比一個師嘅德國軍隊構成更加大嘅危險。……應該將呢啲人判以重刑。”兩個星期之後,呢八個弟兄被韞入喬治亞州亞特蘭大嘅聯邦監獄,刑期從10年到20年不等。
傳道工作繼續進行
喺呢段時期,聖經研究者受到猛烈嘅反對。聯邦調查局(FBI)徹底調查咗佢哋嘅活動,記錄
咗數以千計嘅文檔。呢啲記錄顯示,我哋嘅弟兄決心繼續傳道。佛羅里達州奧蘭多嘅郵政局局長寫咗一封信俾FBI。呢封信話:“[聖經研究者]主要喺晚黑逐家逐户傳道。……睇嚟,無論受到乜嘢反對,佢哋都要繼續傳道。”
作戰部門嘅一個上校寫信俾調查局,報告後來成為中央長老團成員嘅弗德烈克·法蘭兹弟兄嘅活動。上校報告話:“法蘭兹……一直都好積極噉售賣成千本《完成嘅奧秘》。”
另一位後來成為中央長老團成員嘅查爾斯·費克爾,面對猛烈嘅迫害。當局因為佢分發《完成嘅奧秘》而逮捕佢,又監視佢嘅個人信件。佢喺馬里蘭州嘅巴爾的摩坐咗一個月監,當時有人幫佢起咗個花名,叫“嚟自奧地利嘅敵人”。佢向審訊員勇敢作見證嘅時候,諗起保羅喺哥林多前書9:16節講嘅話:“我唔宣揚好消息就有禍嘞!” *
除咗熱心傳道之外,聖經研究者為咗解救被韞喺亞特蘭大嘅弟兄而熱切噉發起一項請願行動。安娜·加德納話:“我哋一直都有做嘢。弟兄被韞入監之後,我哋就努力揾人簽名請願。我哋逐家逐户,攞到成千上萬個簽名!我哋話俾啲人知,呢啲弟兄都係真正嘅基督徒,佢哋都係含冤入獄嘅。”
大會
喺呢段艱難時期,經常有大會舉行,喺屬靈上强化弟兄團體。《守望台》報道:“喺呢一年,召開咗……超過四十場大會。……呢啲大會都取得咗輝煌嘅成績。以前,所有大會都會喺大約夏秋交替嘅時候舉行,不過呢一年就每個月都有大會。”
誠心正意嘅人依然對好消息作出響應。喺俄亥俄州克利夫蘭嘅一個大會,大約有1200人參加,42人受浸。受浸嘅人當中有一個細路仔,佢“好感激上帝,亦都對獻身受浸好有體會,令好多比佢年長嘅人都覺得自愧不如”。
接住落嚟會點?
1918年就嚟結束,不過聖經研究者對未來嘅好多事都唔確定。布魯克林嘅部分房産被出售,總部搬咗去賓夕法尼亞州嘅匹兹堡。當帶頭嘅弟兄仲喺監獄嘅時候,下一次嘅股東會議定喺1919年1月4日舉行。接住落嚟會點?
我哋嘅弟兄冇放棄工作。佢哋充滿信心噉決定咗下一年,即係1919年嘅全年經文。呢節經文話:“凡為攻擊你而造嘅武器,都一定會失去功用。”(以賽亞書54:17)之後將會發生一場戲劇性嘅改變,而呢場改變會加强佢哋嘅信心,使佢哋得到力量去執行前頭嘅偉大工作。