你有冇全心接納耶和華嘅思想？
“要更新思想而改變自己”——羅馬書12:2
1,2． 我哋喺屬靈上不斷成長，就會學識點樣做？請舉例。
一個小朋友收到禮物嗰陣，父母會同佢講：“要同人講聲多謝呀。”小朋友照住做，因為父母叫佢噉樣做。小朋友逐漸成長，慢慢開始明白點解父母覺得向人表示感激係好重要嘅。而家，佢識得主動去衷心感謝人。點解？因為感恩之心已經成為佢自己思想嘅一部分。
2 同樣，我哋啱啱認識真理嗰時就知道，服從耶和華嘅一啲基本要求係好重要嘅。不過，隨住我哋喺屬靈上不斷成長，我哋更加了解耶和華嘅思想，例如佢鍾意乜嘢、唔鍾意乜嘢，同埋佢係點樣睇事情嘅。我哋識得用耶和華嘅方式推理，按照佢嘅觀點嚟行事同做決定，就表明我哋全心接納佢嘅思想嘞。
3． 點解我哋有時唔容易培養耶和華嘅思想？
3 學習用耶和華嘅方式思考會係一件快樂嘅事，但亦都可能會係一個挑戰。我哋唔完美嘅傾向有時會妨礙我哋用耶和華嘅觀點嚟睇事情。例如，我哋可能好難理解耶和華對道德潔淨、唯物主義、傳道工作、濫用血或者其他事情嘅觀點。我哋可以點樣做呢？我哋點樣先可以喺培養耶和華嘅思想方面不斷進步？培養耶和華嘅思想點樣幫助我哋喺而家同將來作出明智嘅決定？
點樣培養上帝嘅思想
4． 我哋可以點樣“更新思想”？
4 請讀羅馬書12:2。使徒保羅喺呢節經文提到，我哋點樣做就可以用耶和華嘅觀點嚟睇事情。我哋從上一篇課文學到，為咗避免“俾呢個制度同化”，我哋必須拒絶採納世俗嘅觀點同精神。不過，保羅亦都提到我哋要“更新思想”。點樣更新呢？就係通過研讀聖經嚟領悟上帝嘅思想，沉思上帝嘅思想，同埋令自己嘅思想同上帝嘅保持一致。
5． 研讀同簡單嘅閲讀有乜嘢唔同？
5 研讀唔係簡單噉閲讀，亦都唔係只係注重研究問題嘅答案。我哋研讀嗰陣可以問吓自己：“關於耶和華、佢嘅道路，同埋佢嘅思想，我從啱啱讀到嘅内容學到乜嘢？”或者，我哋嘗試去明白點解上帝要譴責某件事或者吩咐人去做某件事。我哋亦都可以認真諗吓，喺生活同思想方面，自己需要作出邊啲調整。雖然我哋唔一定每次研讀都會考慮晒呢啲問題，不過用一半嘅時間嚟沉思讀過嘅内容，就會從中得到唔少益處。（詩篇119:97；提摩太前書4:15）
6． 我哋沉思上帝嘅話語，就會發生乜嘢改變？
6 我哋經常沉思上帝嘅話語，就會發生乜嘢令人驚訝嘅改變呢？我哋“察驗”到耶和華嘅思想係完美嘅。我哋沉思嘅時候，開始明白佢對事情嘅睇法，最終亦都同意佢嘅觀點。我哋嘅思想不斷被“更新”，逐漸形成一種新嘅思維模式。噉樣，我哋就係全心接納耶和華嘅思想，將佢嘅思想變成自己嘅。
思想影響行動
7,8． （甲）耶和華對物質事物有乜嘢睇法？（請睇吓課文開頭嘅圖片）（乙）如果我哋採納耶和華嘅觀點，噉對我哋嚟講乜嘢係最重要嘅呢？
7 我哋嘅思想唔單止影響我哋對事物嘅感覺，亦都會影響我哋嘅行動。（馬可福音7:21-23；雅各書2:17）我哋通過一啲例子可以更好噉理解呢一點。例如，福音書嘅記載清楚向我哋表明耶和華對物質事物嘅睇法。約瑟同馬利亞唔係好富有，但係上帝親自揀選佢哋養育佢嘅愛子。（利未記12:8；路加福音2:24）耶穌出世嘅時候，馬利亞“將嬰兒……放喺飼槽入面，因為客店冇地方俾佢哋住宿”。（路加福音2:7）其實，只要耶和華願意，佢可以用各種方式為自己啱啱出世嘅兒子提供更好更舒適嘅住宿環境。不過對耶和華嚟講，耶穌可以喺一個良好嘅屬靈環境下得到照顧同成長係更重要嘅。
8 通過耶穌誕生嘅聖經記載，我哋可以睇出耶和華對物質事物嘅睇法。有啲父母堅持要為兒女提供最好嘅物質條件，甚至不惜犧牲兒女嘅屬靈健康。不過好明顯，耶和華覺得屬靈嘅事先至係最重要嘅。你有冇採納耶和華嘅觀點呢？你嘅行動表明乜嘢？（請讀希伯來書13:5）
9,10． 我哋可以點樣表明，喺絆倒人方面我哋同耶和華有一樣嘅睇法？
9 另一個例子係上帝對絆倒其他人嘅睇法。耶穌話：“邊個使呢啲信我嘅一個小子跌倒，就不如攞一塊驢推嘅大磨石掛喺自己條頸，投入大海好過啊。”（馬可福音9:42）耶穌用咗好强烈嘅語氣嚟講呢番話！因為耶穌完美噉反映出天父嘅特質，所以我哋可以肯定，如果一個人嘅行為絆倒咗一個基督徒，噉耶和華對呢個人都會有同樣强烈嘅感覺。（約翰福音14:9）
10 我哋係咪同耶和華、耶穌有一樣嘅睇法呢？我哋有冇用佢哋嘅觀點嚟睇事情？我哋嘅行為表明乜嘢？例如，我哋鍾意某種風格嘅服飾打扮，不過呢類型嘅打扮可能會令會衆嘅一啲人覺得不安，或者會令其他人産生不道德嘅念頭。我哋會唔會仁愛噉顧及信徒同工嘅感受，放棄呢類型嘅服飾打扮呢？（提摩太前書2:9,10）
11,12． 我哋培養自制，恨耶和華所恨，可以點樣保護自己？
11 第三個例子就係，耶和華憎恨不義嘅事。（以賽亞書61:8）耶和華知道我哋唔完美，天生就有一啲錯誤嘅傾向。不過，佢勉勵我哋要同佢一樣憎恨不義嘅事。（請讀詩篇97:10）沉思耶和華憎恨惡事嘅原因，可以幫助我哋全心接受佢嘅觀點，亦都使我哋更有力量抗拒錯誤嘅行為。
12 我哋同耶和華一樣憎恨惡事，亦都有助於我哋辨别出聖經冇具體提及嘅某啲錯誤行為。例如，一種叫做膝上舞嘅淫穢行為喺世界各地越來越普遍。有啲人可能覺得，膝上舞唔係同其他人發生性關係，所以冇咩問題。 * 不過，耶和華係咪都係噉諗呢？要記得，耶和華憎恨所有形式嘅惡事。所以，我哋要培養自制，恨耶和華所恨，噉樣就可以遠離惡行。（羅馬書12:9）
預先考慮可能會發生嘅事
13． 點解我哋要預先諗吓，耶和華嘅思想可以點樣影響我哋未來所做嘅決定？
13 我哋研讀嘅時候最好諗吓，耶和華嘅思想可以點樣幫助我哋喺未來做明智嘅決定。我哋如果已經預先做好準備，噉就算遇到一個要即時做決定嘅情況，都知道應該點樣做。（箴言22:3）等我哋嚟睇吓聖經嘅一啲例子。
14． 我哋從約瑟拒絶波提乏嘅妻子呢件事學到乜嘢？
14 當波提乏嘅妻子勾引約瑟嗰陣，約瑟即刻拒絶。我哋從中可以睇出，約瑟已經考慮過耶和華對婚姻嘅睇法，就係希望人忠於配偶。（請讀創世記39:8,9）約瑟回答波提乏嘅妻子嘅時候，話：“我點可以做出咁大嘅惡事，得罪上帝呢？”呢個表明，佢已經有耶和華嘅觀點。我哋又點樣呢？如果有同事向你調情，你會點樣做呢？假如有人用手機發一啲露骨嘅色情信息或者圖片俾你，你又點做呢？ *如果我哋喺呢啲問題上已經明白而且採納耶和華嘅觀點，亦都事先諗好自己會點樣做，噉忠於耶和華就容易得多嘞。
15． 我哋點樣做就可以好似三個希伯來青年噉，喺壓力下對耶和華保持忠貞？
15 請諗吓沙得拉、米煞、亞伯尼哥呢三個希伯來青年嘅例子。尼布甲尼撒王要求佢哋崇拜佢所立嘅金像嗰時，佢哋堅決噉拒絶咗。佢哋對王嘅清晰回答表明，佢哋已經思考過繼續忠於耶和華就須要點做。（出埃及記20:4,5；但以理書3:4-6,12,16-18）假如老闆叫你捐款支持一個同錯誤宗教有關嘅慶祝活動，你會點樣做？與其等到呢啲情況發生先至考慮，不如而家就諗吓耶和華對呢啲問題有乜嘢睇法。如果你事先考慮過耶和華嘅諗法，噉有類似情況發生嗰陣，你就可以好似嗰三個希伯來青年噉，更容易講正確嘅話同做正確嘅事。
你有冇做個人研讀、填寫一份具有法律效力嘅醫療文件，並同你嘅醫生傾吓？（請睇第16段）
16． 清楚了解耶和華嘅思想，可以點樣幫助我哋為緊急醫療問題做好準備？
16 預先沉思耶和華嘅觀點，亦都可以幫助我哋喺遇到緊急醫療問題嘅時候對耶和華保持忠貞。雖然我哋堅決拒絶輸入全血或者血嘅四種主要成分，不過某啲涉及到血嘅療法，就要每個基督徒根據聖經原則同耶和華嘅觀點自己做決定。（使徒行傳15:28,29）我哋最好喺幾時做呢啲決定呢？當然唔係去到醫院嗰時，因為到時我哋可能要忍受身體上嘅痛苦同埋要面對壓力，好難即時作出明智嘅決定。我哋最好而家就做好個人研讀、填寫一份表明我哋個人意願而且具有法律效力嘅醫療文件，亦都揾自己嘅醫生傾吓。 *
17-19． 點解我哋而家就應該了解耶和華對事情嘅睇法？我哋要預先為乜嘢情況做好準備？請舉例。
17 最後請諗吓，彼得勸耶穌“應該愛惜自己”嗰時點解耶穌可以迅速作出回應。耶穌顯然已經沉思過上帝對自己嘅旨意，同埋有關自己喺地上生活以及死去嘅預言。呢個强化咗佢對耶和華保持忠貞以及為我哋所有人作出犧牲嘅決心。（請讀馬太福音16:21-23）
18 今日，上帝希望佢嘅子民同佢培養親密嘅關係，並盡力向人宣揚王國嘅好消息。（馬太福音6:33；28:19,20；雅各書4:8）不過，可能有啲人會好似彼得勸耶穌噉，出於好意建議我哋對自己好啲。例如，老闆升你職又加你好多人工，不過呢個職位會影響你嘅屬靈活動，噉你會點做呢？又或者你讀緊書，有機會離開屋企接受額外嘅教育。呢陣時，你會唔會多啲禱告同埋做個人研讀，請教家人或者長老，然後再做決定？如果你而家就了解耶和華對呢啲事嘅睇法，全心接受耶和華嘅思想，噉就最好不過嘞。就算以後有類似嘅事發生，可能對你嚟講都已經唔再係乜嘢誘惑。你會清楚知道自己應該點樣做，因為你已經決定一直全心事奉耶和華。
19 你可能仲諗到有其他突發事件會考驗你對耶和華嘅忠貞。當然，我哋冇辦法為每一件可能會發生嘅事都做好準備。但係，如果我哋做個人研讀嘅時候沉思上帝嘅思想，噉任何情況下我哋都會更容易記起自己學過嘅知識，並運用呢啲知識做明智嘅決定。所以，我哋做研讀嗰陣要留意耶和華對事情嘅睇法，全心接受佢嘅思想，亦都要諗吓佢嘅思想喺而家同將來點樣幫助我哋做明智嘅決定。
耶和華嘅思想同你嘅未來
20,21． （甲）點解我哋喺新世界享有嘅自由係相對嘅？（乙）我哋而家可以享有點樣嘅生活？
20 我哋熱切期待新世界到嚟。我哋大多數人都希望可以喺地上嘅樂園享有永生。喺王國嘅統治下，我哋會從而家呢個制度所遭受嘅痛苦得到釋放。喺新世界，我哋亦都有自由根據自己嘅喜好同願望嚟作出選擇。
21 當然，呢種自由唔係毫無限制嘅。謙遜嘅人會根據耶和華嘅律法同思想嚟判斷是非對錯。結果，佢哋滿心喜樂，大享平安。（詩篇37:11）即使嗰個時候仲未嚟到，我哋而家都可以全心接納耶和華嘅思想，從而得享喜樂。
^ 12段 膝上舞就係一個衣着暴露或者半裸嘅舞女坐喺顧客大腿上做出挑逗性動作嘅一種行為。根據實際情況，呢種行為可能會構成須要採取司法行動嘅性不道德行為。參與呢類活動嘅基督徒應該向長老尋求幫助。（雅各書5:14,15）
^ 14段 利用手機傳送嘅淫穢簡訊、照片或者影片稱為色情短信。根據具體情況，有可能要對傳送色情短信嘅人採取司法行動。喺某啲案例當中，參與傳送色情短信嘅未成年人，會被檢控為性侵犯者。想了解更多嘅信息，請上jw.org網站閲讀““青年人問：傳送色情短信——我該知道甚麼？”（點擊“聖經與生活”>“青少年”），或者請睇《警醒！》2013年11月刊4-5頁“怎樣幫助兒女遠離色情短信”。
^ 16段 我哋嘅出版物討論過相關嘅聖經原則。例如，請睇《常在上帝的愛裏》第215-218頁。
