“要買真理，唔好賣出”
“要買真理，唔好賣出；智慧、管教、悟性亦都只可買不可賣。”——箴言23:23
1,2． （甲）乜嘢係我哋最寶貴嘅？（乙）我哋珍視邊啲真理？點解？（請睇吓課文開頭嘅圖片）
你一生中最寶貴嘅係乜嘢？你願唔願意用佢嚟交換另一樣價值冇咁高嘅嘢呢？對已經獻身俾耶和華嘅人嚟講，答案好簡單。我哋所擁有嘅嘢當中，最寶貴嘅就係同耶和華嘅關係，而我哋一定唔會用佢嚟交換其他嘢。我哋好珍視聖經真理，因為聖經真理使我哋同天父有更親密嘅關係。（歌羅西書1:9,10）
2 耶和華係偉大嘅導師，佢通過佢嘅話語聖經教導我哋好多寶貴嘅真理。佢幫助我哋認識佢各種美好嘅特質；佢向我哋透露自己名字嘅重要意義；佢深愛人類，為人類獻出自己嘅愛子作為贖價；佢話俾我哋知同彌賽亞王國有關嘅事；佢使受膏基督徒有希望去天上，亦都使“另外嘅綿羊”有希望喺地上樂園享永生；（約翰福音10:16）佢仲教導我哋點樣行事為人。對我哋嚟講，呢啲真理真係好寶貴，唔單止幫助我哋親近創造主，仲使我哋嘅人生充滿意義。
3． 耶和華會唔會要求我哋俾錢買真理？
3 耶和華係慷慨嘅上帝，佢甚至不惜犧牲自己愛子嘅生命嚟救贖人類。如果耶和華知道一個人正喺度尋求真理，佢就會伸出援手，幫助呢個人揾到真理。上帝絶對唔會要求我哋俾錢買真理。有一次，一個叫西門嘅男子俾錢使徒彼得，想買賜人聖靈嘅權柄。彼得譴責佢話：“你嘅銀子同你一齊消滅喇！你居然以為上帝白白俾人嘅恩賜，係可以用錢買嘅。”（使徒行傳8:18-20）既然係噉，聖經提到嘅“買真理”，究竟係乜嘢意思呢？
“買”真理係乜嘢意思？
4． 關於真理，我哋喺呢篇課文會學到乜嘢？
4 請讀箴言23:23。如果唔付出努力，我哋就唔能够從上帝嘅話語揾到真理。想得到真理，我哋就一定要作出必要嘅犧牲。正如箴言執筆者所講，我哋一旦“買”真理，即係學咗“真理”，就要小心，千祈唔好“賣出”，即係放棄真理。等我哋嚟討論吓，“買”真理係乜嘢意思，同埋我哋為咗得到真理可能要付出乜嘢代價。噉樣，我哋就會對真理有更深刻嘅體會，强化自己唔會“賣出”真理嘅決心。接住落嚟，我哋會睇吓，點解耶和華嘅真理遠比世上嘅任何事物更有價值。
5,6． （甲）點解話，我哋唔需要用錢買真理？請舉例。（乙）真理點樣造益我哋？
5 即使有啲嘢係免費嘅，但係想得到嘅話，就要有所付出先至得。箴言23:23翻譯成“買”嘅希伯來語詞，亦都有“得到”嘅意思。呢兩個詞都表示，一個人為咗得到一樣佢認為有價值嘅嘢，就要付出努力或者某啲代價。不過，噉樣唔等於一定要俾錢。為咗明白我哋可以點樣買真理，不妨諗吓一個例子。有間超市宣傳話可以免費試食香蕉，不過呢啲香蕉會唔會自動出現喺我哋嘅餐檯上面呢？當然唔會。要食就要去超市攞。呢啲香蕉係咪免費嘅呢？冇錯，係免費嘅。不過，我哋想得到就要付出努力，花時間去超市。同樣，我哋唔需要用錢買真理，但係就要付出努力先可以得到真理。
6 請讀以賽亞書55:1-3。耶和華通過以賽亞進一步講明買真理嘅意思。喺呢段經文入面，耶和華將佢嘅話語比作水、奶同酒。正如一杯清涼嘅水喺夏天可以令人身心舒暢，同樣，上帝嘅話語都可以令我哋重新得力。牛奶好有營養，可以促進兒童生長發育，耶和華嘅話語亦可以使我哋得到滋養，幫助我哋喺靈性上成長。耶和華嘅話語都好似酒。喺邊方面呢？喺聖經入面，好多時酒同喜樂有關。（詩篇104:15）所以，耶和華叫佢嘅子民“買酒”，即係向我哋保證，我哋按照佢嘅話語生活就可以得享快樂。（詩篇19:8）耶和華用呢啲比喻嚟幫助我哋明白，我哋學習並應用聖經嘅原則可以點樣得益，而我哋作出嘅努力，就係我哋買真理所付出嘅代價。而家，等我哋嚟睇吓，為咗買真理要喺邊五方面作出犧牲或者調整。
你付出咗乜嘢嚟買真理？
7,8． （甲）點解我哋要用時間嚟買真理？（乙）一個年輕嘅聖經學生付出乜嘢努力？結果點樣？
7 時間。呢個係所有買真理嘅人都一定要付出嘅。聆聽王國嘅信息、閲讀聖經同聖經出版物、做個人研讀、預習資料並參加會衆聚會都需要花時間。我哋要做呢啲事，就要“買盡時機”，減少其他冇咁重要嘅活動。（請讀以弗所書5:15,16）我哋掌握基本嘅聖經知識需要付出幾多時間呢？呢個要視乎情況而定。我哋可以無限噉學習耶和華嘅智慧、作為同埋行事方式。（羅馬書11:33）《守望台》嘅創刊號將真理比作“一朵小花”，又話：“請唔好只係滿足於一朵小花。如果揾到一朵就滿足嘅話，噉就揾唔到更多嘞。要不斷噉揾，不斷噉摘。”我哋可以問吓自己：“我嘅真理花束有幾大扎呢？”就算我哋有無窮無盡嘅生命，都可以一直學習關於耶和華嘅知識。今日，我哋應該善用時間，情況允許嘅話就盡可能買多啲真理。我哋嚟睇吓一個渴求真理嘅人嘅例子。
8 真理子 *去咗美國紐約市讀書。有一日，一個先驅姊妹做逐家逐户傳道嗰時遇到佢。雖然佢當時已經有信仰，但仲係開始同先驅姊妹學習聖經。佢好鍾意所學到嘅真理，於是向先驅姊妹提出，想一個星期學習兩次。真理子一邊返學一邊打工，雖然生活好忙，不過佢決定即刻參加會衆聚會。為咗買盡時機學習聖經真理，佢停止參加某啲社交活動。佢付出好大努力，結果喺屬靈上進步得好快。唔到一年，佢就受浸。受浸六個月之後，佢就開始做先驅。當時係2006年。而家，佢仍然緊守先驅崗位，為耶和華服務。
9,10． （甲）買真理點樣影響我哋對物質財富嘅睇法？（乙）一個年輕女子放棄咗乜嘢前途？佢對自己嘅選擇有乜嘢睇法？
9 物質財富。為咗買真理，我哋可能不得不放棄一份高收入嘅工作或者事業。彼得同安得烈原本以打漁為生，後來耶穌邀請佢哋做“得人嘅漁夫”，佢哋就即刻“揼低個網”。（馬太福音4:18-20）當然，今日好多學習聖經嘅人都有責任照顧家人，唔能够馬上揼低自己嘅工作，話走就走。（提摩太前書5:8）不過通常嚟講，一個人接受真理之後就會改變對物質財富嘅睇法，調整自己嘅生活重心。耶穌清楚提到呢一點，話：“你哋唔好再為自己喺地上積存財寶，……要為自己喺天上積存財寶”。（馬太福音6:19,20）我哋嚟睇吓一個年輕女子嘅榜樣。
10 瑪麗亞喺讀書之前就已經好鍾意打高爾夫球。佢喺高中嗰時，高爾夫球越打越好，結果得到大學嘅獎學金。高爾夫球係佢嘅生命，佢嘅目標就係成為一個職業高爾夫球手，通過呢個工作嚟賺大錢。後來，瑪麗亞開始學習聖經。佢好鍾意學習聖經，亦都運用學到嘅真理，喺生活上作出調整。佢話：“我越按照聖經嘅標準調整自己嘅態度同生活方式，就變得越快樂。”瑪麗亞意識到自己好難同時追求屬靈目標同物質財富。（馬太福音6:24）佢之前嘅人生目標係成為職業高爾夫球手，可以名利雙收。不過，最後佢選擇買真理。佢而家係一個先驅，佢話而家享有嘅係“最開心、最有意義嘅生活”。
11． 買真理對我哋嘅人際關係有乜嘢影響？
11 人際關係。我哋選擇按照聖經真理生活之後，我哋同親友嘅關係就可能會發生改變。點解？耶穌為門徒禱告話：“求你用真理使佢哋成聖，你嘅話語就係真理。”（約翰福音17:17）“使佢哋成聖”亦都可以理解為“使佢哋分别開嚟”。我哋一旦接受真理，就唔再好似大多數人噉按照呢個世界嘅標準嚟行事為人，噉真理就會使我哋同世界分别開嚟。其他人覺得我哋同佢哋唔一樣，因為我哋嘅價值觀已經改變。我哋會按照聖經真理生活。雖然我哋唔想造成分裂，但有啲朋友或者家人可能會同我哋保持距離，甚至反對我哋嘅新信仰。呢個一啲都唔出奇，因為耶穌講過：“人嘅仇敵就係自己嘅家人。”（馬太福音10:36）耶穌亦都向我哋保證，無論我哋為真理作出幾多犧牲，得到嘅回報一定遠遠超過我哋付出嘅。（請讀馬可福音10:28-30）
12． 為咗買真理，一個猶太裔男子付出咗乜嘢代價？
12 一個猶太裔商人叫阿倫，佢自細受到嘅教導話，上帝嘅名係唔可以讀出嚟嘅。不過，阿倫渴求真理。有一日，一個見證人向佢示範，如果喺上帝嘅名嘅四個希伯來語輔音字母中加入元音，噉上帝嘅名就有可能讀成“耶和華”。阿倫知道之後好興奮，即刻去會堂話俾拉比知。不過，拉比嘅反應就令阿倫好意外。佢哋冇因為聽到關於上帝聖名嘅真理而開心，反而向阿倫吐口水，將佢趕出會堂。阿倫同家人嘅關係亦都變得好緊張。不過佢無所畏懼，繼續買真理。後來，阿倫成為一個耶和華見證人，決心一生忠貞事奉耶和華。就好似阿倫噉，為咗按真理行事，即使社會地位或者家庭關係可能會發生變化，我哋都願意接受。
13,14． 為咗買真理，我哋嘅思想行為要作出點樣嘅改變？請舉例。
13 唔敬虔嘅思想行為。為咗接受真理同埋按照聖經嘅道德標準生活，我哋要樂意調整自己嘅思想同行為。關於呢點，請留意彼得喺書信入面點講。佢話：“你哋既然係順從嘅孩子，就唔好再受以往無知嘅時候所懷嘅慾望所支配，仿照當時嘅樣式處世為人；要……喺一切行為上聖潔。”（彼得前書1:14,15）對生活喺道德敗壞嘅哥林多城嘅人嚟講，買真理就意味住佢哋嘅生活方式要作出好大嘅調整。（哥林多前書6:9-11）同樣，為咗買真理，今日好多人都棄絶咗上帝所憎恨嘅行為。彼得進一步提醒當時嘅基督徒話：“你哋過去隨住列國嘅人嘅心意做事，耽於無恥嘅行為、貪慾、縱酒、狂歡、競飲、違法拜偶像嘅事，所花嘅時間已經够嘞。”（彼得前書4:3）
14 德文同賈絲明有好多年都過住縱酒嘅生活。雖然德文係一個專業嘅簿記員，但佢因為濫用酒精而冇辦法長期工作。而賈絲明係一個好容易發嬲同鍾意暴力嘅人，呢個好多人都知道。有一日，賈絲明飲醉酒，喺路上遇到兩個特派傳道員。佢哋主動提出喺跟住嗰個星期去賈絲明住嘅地方探訪佢，同佢討論聖經。不過，當兩個特派傳道員去到嗰陣，賈絲明同德文都飲醉咗。佢哋冇諗到呢兩個特派傳道員會咁關心佢哋，居然上門探訪佢哋。下一次嘅情況就唔同晒嘞。自從第一次學習以來，賈絲明同德文就好勤力學習聖經，亦都開始將所學到嘅實踐出嚟。唔到三個月，佢哋就決心唔再飲酒，之後成為合法夫妻。村入面好多人都留意到賈絲明同德文嘅改變，結果佢哋亦都想學習聖經。
15． 為咗買真理，其中一樣最難撇棄嘅可能係乜嘢？點解？
15 唔敬虔嘅傳統習慣。有啲人一旦知道一啲傳統習慣係耶和華唔鍾意嘅，就唔再做嘞。但係，對某啲人嚟講，噉樣做並唔容易，因為佢哋嘅家人、同事或者朋友對某啲傳統有好强烈嘅感覺，例如同拜祭死去嘅親人有關嘅習俗。（申命記14:1）聖經嘅一啲勇敢榜樣可以幫助我哋作出改變。請睇吓以弗所早期嘅基督徒為咗取悦耶和華點樣做。
16． 有啲以弗所人為咗買真理就點樣做？
16 喺古代嘅以弗所，施行魔法係好普遍嘅事。有啲曾經施行過魔法嘅人歸信基督教之後點樣做？聖經話：“好多慣行魔法嘅人將書帶嚟，堆喺一齊，當衆燒毁。佢哋計算書嘅價值，先知道總共值五萬塊銀子。噉樣，耶和華嘅話語日益興旺，大有能力，節節得勝。”（使徒行傳19:19,20）佢哋放棄嘅書的確好值錢，但佢哋忠貞嘅表現可以得到上帝無價嘅賜福。
17． （甲）為咗買真理，我哋可能要付出乜嘢代價？（乙）下一篇課文會討論乜嘢問題？
17 為咗買真理，你付出咗乜嘢代價？我哋所有人都要付出時間嚟收集真理之花；有啲人為咗買真理願意放棄賺大錢嘅機會；有啲人嘅人際關係發生改變；好多人須要改變自己嘅思想行為同傳統習慣。我哋相信，為咗換取聖經真理而付出嘅任何代價都係值得嘅。真理帶俾我哋最寶貴嘅財産，就係同耶和華嘅親密關係。我哋沉思自己認識真理之後得到嘅所有福分，就好難想像點解會有人居然願意賣出真理。點解會有噉嘅事發生呢？我哋點樣可以避免犯咁大嘅錯誤？下一篇課文會討論呢啲問題。
^ 8段 課文當中有啲人名係化名。
