讀者來函
喺乜嘢意義上嚟講,使徒保羅“被接到三重天”同埋“被接到樂園”?(哥林多後書12:2-4)
喺哥林多後書12:2,3,保羅話某個人“被接到三重天”。呢個人係邊個?保羅喺寫俾哥林多會衆嘅信入面强調,上帝正任用佢做使徒。(哥林多後書11:5,23)接住,佢就提到“主所賜嘅異象同啟示”。因為保羅喺上下文並冇提及到其他弟兄,按理嚟講,佢係得到異象同啟示嘅人。(哥林多後書12:1,5)
所以,好可能保羅就係嗰個“被接到三重天”同埋“被接到樂園”嘅人。(哥林多後書12:2-4)佢用“啟示”呢個詞,表明上帝透露咗將來會發生嘅事。
保羅所講嘅“三重天”係指乜嘢?
喺聖經入面,“天”可以指實際嘅天空。(創世記11:4;27:28;馬太福音6:26)但係“天”亦都有其他意思。有時可以指人類嘅統治權。(但以理書4:20-22)有時亦都可以指上帝嘅統治權,例如上帝通過佢嘅王國所施行嘅統治。(啟示錄21:1)
保羅睇見嘅“三重天”,係乜嘢意思呢?喺聖經入面,某啲説話或字眼重複三次係表示深度或强度,目的係要達到强調嘅效果。(以賽亞書6:3;以西結書21:27;啟示錄4:8)所以,睇嚟保羅係用“三重天”嚟强調一種至高無上嘅統治形式,就係耶穌基督同14萬4000個受膏君王一齊統治嘅彌賽亞王國。(請睇《洞悉聖經》下册390,396頁)正如使徒彼得所寫嘅,我哋正按照上帝嘅應許等待“新天”。(彼得後書3:13)
保羅所講嘅“樂園”又係指乜嘢呢?
“樂園”呢個詞同樣有唔同嘅意思:(1)從人類最初嘅家園嚟睇,“樂園”可以指將來喺地上嘅實際樂園。(2)“樂園”亦都可以指上帝嘅子民將來喺新世界享有嘅屬靈情況。(3)“樂園”仲可以指天上嘅美好情況,即係啟示錄2:7所講嘅“上帝樂園”。——請睇《守望台》2015年7月15日刊8頁8段。
保羅喺哥林多後書12:4講自己嘅經歷嗰時所指嘅,可能都包含以上三方面嘅意思。
總結:
哥林多後書12:2提到嘅“三重天”,睇嚟係指耶穌基督同14萬4000人統治嘅彌賽亞王國,即係“新天”。(彼得後書3:13)
上帝王國稱為“三重天”,係要强調王國係一種至高無上嘅統治形式。
保羅喺異象入面“被接到樂園”。呢個“樂園”睇嚟係指(1)將來喺地上嘅實際樂園;(2)即將到來而又更加廣闊嘅屬靈樂園;(3)同新世界同時存在嘅天上嘅“上帝樂園”。
所以,新世界係新天同新地嘅結合。呢個會係一個新安排,包括天上嘅王國政府同埋喺地上樂園事奉耶和華嘅人類。