人物生平
耶和華真係厚待我哋
我同太太丹妮爾啱啱喺酒店登記完,接待員就同我講:“先生,麻煩你打個電話俾邊防警察啦。”幾個鐘之前,我哋到達西非一個叫加蓬嘅國家。當時係20世紀70年代,耶和華見證人嘅工作喺呢個國家受到禁制。
丹妮爾一向都好機智,佢即刻細細聲同我講:“唔使打電話俾邊防警察,佢哋已經到咗嘞。”就喺嗰陣時,有部警車駛埋嚟停喺酒店門口。幾分鐘之後,我同太太就被拘捕嘞。多得丹妮爾提醒我,等我有機會將啲重要嘅文件交俾另一個弟兄。
警察押送我哋去差館嘅途中,我諗到自己有個咁勇敢、咁愛上帝嘅太太,真係好大嘅福分。丹妮爾同我經常彼此幫助,互相扶持,今次亦都唔例外。等我話俾你知,點解我哋會去探訪嗰啲傳道工作受到限制嘅國家。
仁愛嘅耶和華幫助我認識真理
1930年,我喺法國北部一個叫克魯瓦嘅小鎮出世,家人都係好虔誠嘅天主教徒。全家人每個星期都會去做彌撒,爸爸仲好積極參與教會嘅活動。但係,我就快14歲嗰時,有件事令我睇出教會原來好虛偽。
第二次世界大戰期間,德軍佔領咗法國。神父喺教堂講道嗰時,經常鼓勵人支持親納粹嘅維希政府,令我哋好反感。同好多法國人一樣,我哋偷偷地聽BBC電台播放盟軍嘅新聞。後來,神父突然改變立場,安排彌撒感謝天主,慶祝對抗納粹嘅盟軍喺1944年9月嘅勝利。睇到神父咁虛偽,我覺得好震驚。呢件事削弱咗我對神職人員嘅信心。
大戰結束之後冇幾耐,我爸爸就去世嘞。嗰時,我家姐已經結咗婚,住喺比利時,所以我要照顧媽媽。我揾到份唔錯嘅工作。老闆同佢啲仔都係虔誠嘅天主教徒。喺佢哋間公司打工,雖然睇嚟前程無限,但好快我就要面對一個考驗。
我家姐茜薇成為耶和華見證人之後,喺1953年嚟探我哋。佢好熟練噉運用聖經幫我睇出天主教有好多教義都係唔正確嘅,例如地獄永火、三位一體、靈魂不死。起初,我反駁佢,話佢用
嘅唔係天主教聖經。不過,好快我就睇出佢講嘅係真理。後來,佢拎啲舊嘅《守望台》雜誌俾我睇,嗰晚返到睡房我就睇晒啲雜誌。我好快睇出耶和華見證人所講嘅係真理。不過,如果我企喺耶和華嗰邊,恐怕就會冇咗份工。有幾個月,我繼續自己研讀聖經同《守望台》嘅文章。最後我決定去王國聚會所參加聚會。會衆充滿愛心,令我好感動。我同一位好有經驗嘅弟兄學習聖經6個月之後,就喺1954年9月受浸。冇幾耐之後,我媽媽同細妹都成為耶和華見證人,我真係好開心。
參與全時服務,全心依賴耶和華
1958年,我有機會參加紐約嘅國際大會。但係喺大會之前幾個星期,我媽媽就去世。由紐約返嚟之後,我唔使再照顧家人,於是辭職,開始做先驅。後來,我同一位好熱心嘅先驅姊妹丹妮爾·德利訂婚,之後喺1959年5月結婚。
丹妮爾一開始全時服務,就搬去離屋企好遠嘅布列塔尼。嗰度係鄉村地方,啲人都虔信天主教,所以佢要有好大勇氣先可以喺嗰度傳道。佢要踩單車去探訪地區嘅人。佢同我一樣,深信時勢緊急,末日可能好快就會嚟到。(馬太福音25:13)我哋能够堅守全時服務嘅崗位,係因為丹妮爾好有自我犧牲嘅精神。
我哋結咗婚幾日就收到委派,去做分區探訪工作。我哋要適應過簡單嘅生活。我哋探訪嘅第一群會衆有14位傳道員。啲弟兄好窮,唔可以請我同太太去佢哋屋企住。於是,佢哋將床褥放喺王國聚會所嘅講台度,我哋就喺嗰度瞓覺。雖然張床唔係咁舒服,不過對條腰好好!
我哋探訪會衆嗰時用嘅車
我哋嘅生活好忙碌,但係丹妮爾好快就適應咗探訪會衆嘅工作。好多時,我突然要同長老開會,噉佢就坐喺架車裏面等我,而佢從來都冇埋怨過。我哋只係做咗兩年嘅分區探訪工作,但係從中學到,夫妻之間要坦誠溝通,彼此幫助,互相扶持。噉樣做非常重要。(傳道書4:9)
喜獲新委派
1962年,我哋受邀請到紐約布魯克林,參加第37屆基列學校,呢一屆嘅課程為期10個月。喺接受培訓嘅100位學生當中,只有13對夫婦,所以我能够同太太一齊參加,真係好大嘅殊榮。我哋有機會同一啲弟兄交往,佢哋都係信心嘅典範,例如弗德烈克·法蘭兹弟兄、尤利塞斯·格拉斯弟兄同埋亞歷山大·麥克米倫弟兄。到而家我仲記得呢啲美好嘅回憶。
好開心可以一齊參加基列學校培訓
接受培訓嗰時,導師鼓勵大家要培養善於觀察嘅能力。所以,有時星期六下晝上完堂之
後,我哋會去紐約市觀光。到咗星期一,導師就會考吓我哋,睇大家記唔記得自己觀察到嘅嘢。我哋嘅導遊係一位伯特利成員。好多時,星期六傍晚,我哋返到宿舍嘅時候已經攰到不得了。但導遊仲會問一啲問題,等我哋記得要點,可以應付測驗。有個星期六,我哋喺紐約市行咗成個晏晝,參觀咗天文台,了解吓流星同隕石。之後就去美國自然歷史博物館,知道咗短吻鱷同其他鱷魚有咩分别。返到伯特利之後,導遊就問:“流星同隕石有乜嘢分别呀?”丹妮爾好攰,將隕石當成鱷魚,就答佢話:“哦,隕石啲牙長啲!”去非洲探訪忠心嘅弟兄姊妹,我哋真係好高興
畢業之後,我哋被派去法國分部,真係覺得好意外。我哋喺分部服務咗超過53年。喺1976年,我被委任做分部委員會協調人,同時要去非洲同中東探訪嗰啲傳道工作受到限制或者禁止嘅國家。有一次,我哋去加蓬,遇到文章開頭提到嘅經歷。我冇諗過會得到呢啲委派,老實講,有時我覺得自己能力不足。但係有丹妮爾喺身邊支持我,所以我能够完成各種各樣嘅委派。
1988年,巴黎舉行“上帝的公平”區域大會,我為西奧多·傑拉斯弟兄嘅演講做傳譯
一齊面對嚴峻嘅考驗
我哋一入伯特利,就已經好鍾意嗰度嘅生活。喺參加基列之前,丹妮爾只係用咗5個月就學識英文。後來,佢幫組織翻譯書刊,而且係一位優秀嘅翻譯員。喺伯特利工作,令我哋感到心滿意足,而參與會衆嘅活動,就令我哋喜樂倍增。我仲好記得,有一晚同丹妮爾搭巴黎嘅地鐵返伯特利嗰時已經好夜,雖然好攰但係好開心,因為啱啱同一啲進步良好嘅學生討論完聖經。不過後來,丹妮爾嘅身體突然差咗,雖然佢好想做多啲,但係就力不從心。
喺1993年,醫生診斷丹妮爾患咗乳癌。結果佢要接受手術同化療。喺治療過程中佢捱咗好多苦。15年之後,醫生再次診斷佢患咗癌症,呢次癌細胞擴散得好快。不過佢好鍾意做翻譯工作,當病情一穩定落嚟,就繼續盡力做翻譯。
即使丹妮爾要同病魔搏鬥,但係我哋從來都冇諗過要離開伯特利。不過繼續喺伯特利生活都會有一啲挑戰,尤其係有啲弟兄姊妹唔知道丹妮爾嘅病情。(箴言14:13)甚至喺佢七十幾歲嘅時候,人哋都睇唔出佢有癌症,因為丹妮爾氣質優雅,又有甜美嘅笑容。佢冇覺得自己好可憐,反而仲盡力去幫其他人。佢知道,願意聽人哋嘅心聲,會幫助佢哋減輕内心嘅苦楚。(箴言17:17)丹妮爾冇話自己可以俾人專業嘅心理輔導,佢只係同人分享自己嘅經歷,幫咗唔少姊妹積極面對癌症。
我哋仲要面對新嘅挑戰。後來,丹妮爾唔可以繼續全職做翻譯工作,於是佢就盡力揾多箴言18:22)
啲方法嚟幫輕吓我。我做咗分部委員會協調人37年,真係多得佢嘅支持。佢的確為我做咗好多嘢。舉個例,佢有時會煮好啲午餐,或者去飯堂攞定食物,等我哋可以喺自己間房食,噉就可以每日都一齊放鬆吓。(應付每日嘅憂慮
丹妮爾一直都係一個非常樂觀同熱愛生命嘅人。後來佢第三次患上癌症。我哋覺得好無奈。佢接受咗一連串嘅化療同埋放射治療,身體變得好虛弱,有時連行路都冇力。我太太曾經係一位優秀嘅翻譯員,而家就連講句話都好辛苦。見到佢噉樣,我真係好心痛。
雖然我哋覺得好迷惘,但仲係不斷禱告,深信耶和華一定唔會俾我哋受苦超過我哋能够忍受嘅。(哥林多前書10:13)耶和華通過佢嘅話語鼓勵我哋,伯特利嘅醫護人員悉心照顧我哋,弟兄姊妹滿懷愛心噉支持我哋。我同太太真係感激不盡。
我哋經常向耶和華禱告,求佢指引我哋揾到適當嘅治療方法。有一次,我哋揾唔到任何療法。每次丹妮爾化療之後都失去知覺,連治療咗佢23年嘅醫生都解釋唔到原因,亦都提供唔到其他治療方案。所以我哋要自己揾辦法,結果會係點真係唔知道。後來,有另一位癌症專科醫生同意治療丹妮爾。我同太太覺得係耶和華打開出路,等我哋可以應付憂慮。
我哋學會每日只係盡力應付當日嘅挑戰,噉就能够應付憂慮。耶穌都講過:“一日嘅煩惱已經够一日擔當嘞。”(馬太福音6:34)保持積極,培養幽默,都好重要。記得有一次,丹妮爾有兩個月唔使做化療,佢笑笑口噉同我講:“你睇,我從來都未試過好似而家咁精神呀!”(箴言17:22)雖然佢有病痛,但仲係好鍾意滿懷信心噉高聲練習新嘅王國詩歌。
由於丹妮爾為人樂觀,佢鼓勵到我積極面對各種挑戰。我哋結咗婚57年嘞,坦白講,我生活上嘅好多方面都係由佢悉心照顧㗎。佢甚至連炒蛋都唔想教我!後來佢嘅病情越來越嚴重,噉我就要學識洗碗、洗衫同埋煮簡單嘅食物。初初,我都打爛咗幾隻杯㗎。不過,我好高興可以為佢做翻啲嘢,令佢開心 *。
對耶和華嘅忠貞之愛深懷感激
回顧翻以往,雖然要面對健康同衰老嘅難題,能够做嘅真係好有限,但係我從中學到好多嘢。第一,無論幾忙都好,記得要珍惜自己心愛嘅配偶。趁仲有精力,就要把握機會,善用時間去照顧深愛嘅人。(傳道書9:9)第二,唔好因為嗰啲唔係咁重要嘅事而過度憂慮。其實我哋每日都享有好多福分,過度憂慮可能就會身在福中不知福。(箴言15:15)
諗翻起同太太一齊從事全時服務嗰段時光,我深知耶和華賜咗好多福分俾我哋,仲超過我哋嘅想像添。同詩篇執筆者一樣,我的確感受到“耶和華已經厚待”我嘞。(詩篇116:7)
^ 32段 丹妮爾·博克埃特姊妹喺呢篇文章定稿之前去世,享年78歲。