效法挪亞、但以理、約伯嘅信心同服從嘅態度
“挪亞、但以理、約伯……只能因自己嘅正義救自己嘅性命。”——以西結書14:14
1,2．（甲）點解沉思挪亞、但以理同約伯嘅榜樣可以使我哋得到鼓勵？（乙）以西結喺乜嘢情況下寫低以西結書14:14嘅經文？
你係咪面對緊健康、經濟之類嘅難題或者遭受緊猛烈嘅迫害？有時你會唔會覺得，喺為耶和華服務方面好難保持喜樂？如果係噉，沉思挪亞、但以理同約伯嘅榜樣可以使你得到鼓勵。佢哋都係唔完美嘅人，亦都面對過我哋而家面對緊嘅挑戰，有啲挑戰甚至令佢哋嘅生命受到威脅。雖然係噉，佢哋依然保持忠貞，所以上帝將佢哋視為信心同服從嘅好榜樣。（請讀以西結書14:12-14）
2 公元前612年，以西結喺巴比倫寫低咗呢篇課文嘅主題經文。 *（以西結書1:1;8:1）叛道嘅耶路撒冷好快就要面臨預言所講嘅毁滅，而呢場毁滅就發生喺公元前607年。當時只有少數人好似挪亞、但以理同約伯噉，因為信賴同服從上帝而得以生還。（以西結書9:1-5）耶利米、巴錄、以伯米勒同利甲人係其中嘅一啲人。
3．呢篇課文會討論乜嘢？
3 今日嘅情況都一樣，嗰啲好似挪亞、但以理同約伯一樣被耶和華視為無可指責嘅人，先可以喺現行制度終結嘅時候得以生還。（啟示錄7:9,14）等我哋嚟睇吓，點解耶和華認為呢啲男子係正義嘅好榜樣。我哋逐一討論嗰時，會留意（1）佢面對乜嘢挑戰？（2）我哋可以點樣效法佢嘅信心同服從嘅態度？
挪亞——900年來一直表現信心同服從嘅態度！
4,5．挪亞面對過乜嘢挑戰？點解佢嘅忍耐咁出衆？
4 挪亞面對嘅挑戰。喺挪亞曾祖父以諾嘅時代，人已經變得非常邪惡，佢哋甚至講出“令人震驚嘅話抨擊上帝”。（猶大書14,15）暴力事件不斷增加，到挪亞嘅日子，“暴行遍及全地”。邪惡嘅天使化身為人，娶咗地上嘅女子為妻，佢哋嘅後代都係殘暴嘅巨人。（創世記6:2-4,11,12）但係，挪亞就與衆不同。“挪亞就蒙耶和華恩待。……喺嗰一代人當中純全無疵。挪亞與上帝同行。”（創世記6:8,9）
5 請諗吓以上嘅經文點樣談及挪亞。首先，今日大部分人嘅壽命只有七八十年，不過喺洪水嚟到之前，挪亞為耶和華服務嘅時間遠遠超過一般人嘅壽命，佢喺嗰個時代生活咗差唔多600年！（創世記7:11）另外，同今日情況唔一樣嘅係，當時仲未有會衆，冇弟兄姊妹喺挪亞身邊鼓勵同幫助佢，就連佢嘅親生兄弟姐妹都冇喺屬靈上支持佢。 *
6．挪亞喺邊方面表現勇氣？
6 挪亞唔係但求自己道德清白就够，佢仲勇敢“傳講正義”，公開表明佢對耶和華上帝有信心。（彼得後書2:5）使徒保羅話：“佢憑住噉樣嘅信心定咗世人嘅罪”。（希伯來書11:7）由於係噉，挪亞經常面對嘲笑同反對，甚至俾人以暴力恐嚇。但係佢並冇“戰兢懼怕人”。（箴言29:25）因為耶和華使佢有勇氣。
7．挪亞建造方舟嗰時要面對乜嘢挑戰？
7 挪亞忠心事奉耶和華500年之後，耶和華吩咐佢建造一隻方舟嚟拯救人類同保全一啲動物嘅性命。（創世記5:32;6:14）對挪亞嚟講，要完成一個規模咁龐大嘅項目，難度非常之高！挪亞亦都知道噉樣做會引起好多人嘅嘲笑同反對。不過，佢依然表現信心，凡耶和華吩咐嘅，“佢都照住做”。（創世記6:22）
8．挪亞深信耶和華喺邊方面照顧佢同家人？
8 挪亞嘅另一個挑戰係照顧家人嘅物質需要。洪水之前，人要付出額外嘅努力先可以種出糧食，而挪亞亦都唔例外。（創世記5:28,29）雖然係噉，佢冇容許物質嘅事使自己分心，反而將事奉耶和華放喺生活嘅首位。甚至喺建造方舟嘅四五十年期間，佢依然專心事奉耶和華。喺洪水之後，佢又繼續熱心服務咗350年。（創世記9:28）喺表現信心同服從方面，挪亞的確係我哋嘅好榜樣！
9,10．（甲）我哋可以點樣效法挪亞嘅信心同服從嘅態度？（乙）如果你決心服從上帝嘅吩咐，就可以深信乜嘢？
9 我哋可以點樣效法挪亞嘅信心同服從嘅態度。要維護上帝嘅正義，唔屬於撒但嘅世界，而且將王國嘅事務放喺生活首位。（馬太福音6:33；約翰福音15:19）當然，我哋嘅生活方式並唔會贏得呢個世界嘅認可。事實上，喺某啲地區，由於我哋謹守上帝嘅律法，例如喺婚姻同埋性方面遵守上帝定立嘅道德標準，結果好多人對我哋有負面嘅評價。（請讀瑪拉基書3:17,18）不過，我哋同挪亞一樣，只會敬畏耶和華上帝，唔會畏懼人。我哋知道唯獨耶和華先可以俾我哋永遠嘅生命。（路加福音12:4,5）
10 噉你呢？當其他人嘲笑你、批評你，又或者經濟壓力對你嘅信心造成考驗嘅時候，你會唔會繼續“與上帝同行”？如果你效法挪亞嘅信心同服從嘅態度，就可以深信耶和華一定會照顧你。（腓立比書4:6,7）
但以理——喺充滿罪惡嘅地方表現信心同服從嘅態度
11．但以理同佢三個同伴喺巴比倫要面對乜嘢挑戰？（請睇吓課文開頭嘅圖片）
11 但以理面對嘅挑戰。但以理被擄到充滿偶像崇拜同通靈術嘅巴比倫城。巴比倫人睇唔起猶太人，仲嘲笑猶太人同佢哋嘅上帝耶和華。（詩篇137:1,3）呢個一定會使但以理同其他愛耶和華嘅猶太人大感痛心！但以理同佢三個同伴哈拿尼雅、米沙利同亞撒利雅都成為咗衆人嘅焦點，因為佢哋受到訓練，日後可以為王服務。佢哋嘅食物都係指定嘅，而其中有啲係耶和華唔希望佢子民食嘅。但以理唔想俾“御膳同御酒玷污自己”。（但以理書1:5-8,14-17）
12．（甲）但以理表現乜嘢美好特質？（乙）喺耶和華眼中，但以理係點樣嘅人？
12 但以理因為才幹出衆而得到一啲特權，呢個可能為佢帶嚟其他嘅挑戰。（但以理書1:19,20）佢冇變得驕傲自大，反而保持謙卑同謙遜，經常將功勞歸俾耶和華。（但以理書2:30）但以理年輕嘅時候，耶和華已經將佢視為正義嘅榜樣，亦都將佢同挪亞、約伯相提並論。喺但以理九十幾歲嗰時，上帝嘅一位天使好親切噉同佢講：“但以理啊，你係極可貴嘅人。”（但以理書10:11）但以理冇辜負耶和華對佢嘅信任，至死都保持忠貞同服從。
13．猶太人點樣因但以理而得福？
13 由於但以理得到耶和華嘅幫助，所以佢可以喺巴比倫同米底亞-波斯做高官。（但以理書1:21;6:1,2）有可能係耶和華指引事態嘅發展，所以佢嘅子民可以因但以理而得福，就好似約瑟喺埃及、以斯拉同末底改喺波斯嘅情況一樣。 *（但以理書2:48）你可以想像吓，包括以西結在内嘅猶太人，見到耶和華用呢種方式拯救佢哋，一定深感安慰！
耶和華好珍視嗰啲對佢保持忠貞嘅人（請睇第14,15段）
14,15．（甲）我哋同但以理嘅情況有乜嘢相似嘅地方？（乙）今日嘅父母可以點樣效法但以理嘅父母？
14 我哋可以點樣效法但以理嘅信心同服從嘅態度。今日，我哋居住嘅呢個世界喺道德同屬靈方面都非常墮落。大巴比倫，即係世上所有嘅錯誤宗教，影響住整個世界嘅風氣，聖經話佢已經成為“邪靈嘅住處”。（啟示錄18:2）所以，呢個世界嘅人會覺得我哋好另類，甚至因為噉而嘲笑我哋。（馬可福音13:13）好似但以理一樣，我哋都要親近耶和華我哋嘅上帝。如果我哋表現謙卑，信賴同服從耶和華，佢就會將我哋視為珍寶。（哈該書2:7）
15 今日嘅父母都可以效法但以理嘅父母。佢哋可以點樣做？但以理細個嗰時，猶大國到處都有惡人惡事。雖然係噉，但以理仲係可以培養對上帝嘅愛。當然，佢唔係一出世自然就會愛耶和華。呢個反映出但以理受過良好嘅家庭教育。（箴言22:6）但以理呢個名嘅意思係“我嘅審判者係上帝”，證明佢嘅父母都敬畏上帝。所以做父母嘅要耐心教導兒女，千祈唔好放棄。（以弗所書6:4）另外，要同佢哋一齊禱告，亦都要為佢哋禱告。如果父母將聖經真理刻喺兒女心上，就一定會得到耶和華所賜嘅厚福。（詩篇37:5）
約伯——無論富有抑或貧窮都表現信心同服從嘅態度
16,17．約伯經歷乜嘢轉變？
16 約伯面對嘅挑戰。約伯嘅一生跌宕起伏。遭遇考驗之前，佢“喺東方人當中……係最尊大嘅”。（約伯記1:3）佢好富有，好多人都認識佢、敬重佢。（約伯記29:7-16）但係，佢冇變得高傲自大或者覺得自己唔需要上帝。上帝稱佢為“我嘅僕人”，仲話佢“為人正直，敬畏上帝，遠離惡事”。（約伯記1:8）
17 喺短時間内，約伯嘅生活發生咗極大嘅轉變。佢失去一切，變得灰心絶望，甚至覺得生不如死。而事情嘅起因就係，毁謗者撒但指控約伯出於自私嘅理由事奉上帝。（請讀約伯記1:9,10）耶和華並冇將呢個問題置之不理，而係俾機會約伯證明自己係忠義嘅，表明佢崇拜上帝嘅動機純正、毫無私心。
18．（甲）約伯嘅忠義點樣令你印象深刻？（乙）耶和華對待約伯嘅方式顯示佢係點樣嘅上帝？
18 撒但用咗一連串惡毒嘅計謀攻擊約伯，令約伯以為佢所遭遇嘅事都係上帝促成嘅。（約伯記1:13-21）跟住，三個所謂嘅朋友用尖酸刻薄嘅話打擊佢，話佢一定係罪有應得！（約伯記2:11;22:1,5-10）不過，約伯依然對耶和華保持忠貞。雖然約伯曾經講話魯莽，但係耶和華明白佢要忍受嘅痛苦。（約伯記6:1-3）耶和華睇到，雖然撒但猛烈攻擊約伯，仲一再使佢受惡言中傷，令佢灰心絶望，但係約伯始終都冇因為噉而背棄上帝。之後，耶和華賜福俾約伯，使佢嘅財富比考驗之前多一倍，又使佢多活140年。（雅各書5:11）呢篇課文嘅主題經文係以西結喺約伯死去幾個世紀之後寫嘅。我哋從中可以睇出，考驗過後，約伯仲係繼續全心事奉耶和華。
19,20．（甲）我哋可以點樣效法約伯嘅信心同服從嘅態度？（乙）我哋可以點樣效法耶和華向人表現體恤之情？
19 我哋可以點樣效法約伯嘅信心同服從嘅態度。無論處於乜嘢情況，願我哋繼續將耶和華放喺生活嘅首位，全心信賴同服從佢。其實我哋比約伯更加有理由噉樣做，因為我哋而家更了解撒但同佢嘅奸計。（哥林多後書2:11）我哋真係好感激耶和華通過約伯記使我哋知道點解佢容許苦難發生。我哋從但以理嘅預言得知，上帝嘅王國係由耶穌基督統治嘅一個真實政府。（但以理書7:13,14）呢個王國好快就會永遠消除所有嘅苦難。
20 我哋從約伯嘅經歷亦都學到，我哋要體恤嗰啲遇到難題嘅基督徒同工。有時，一啲弟兄姊妹可能會好似約伯噉講出一啲消極嘅話。（傳道書7:7）雖然係噉，我哋與其喺心入面審判佢哋，不如運用洞悉力，向佢哋表現體恤之情。噉樣做就係效法我哋仁愛嘅天父耶和華。（詩篇103:8）
耶和華“使你哋堅定剛强”
21．彼得前書5:10點樣喺挪亞、但以理同約伯嘅經歷中反映出嚟？
21 雖然挪亞、但以理、約伯生活喺唔同嘅時代，面對唔同嘅情況，但係佢哋喺考驗下都忍耐到底。佢哋一生嘅經歷使我哋諗起使徒彼得嘅話：“你哋受過短暫嘅苦楚之後，有豐富分外恩典嘅上帝，……必定親自完成你哋所受嘅訓練，使你哋堅定剛强。”（彼得前書5:10）
22．下一篇課文會討論乜嘢？
22 耶和華通過彼得嘅話向我哋保證，佢會使我哋堅定剛强。我哋都好想接受耶和華嘅訓練，使自己變得更加剛强，喺信仰上堅定不移。所以，我哋好想效法挪亞、但以理、約伯嘅信心同服從嘅態度。喺下一篇課文我哋會學到，佢哋保持忠義嘅主要原因係，佢哋真正認識耶和華。凡耶和華要求嘅，佢哋“都能領悟”。（箴言28:5）我哋都一樣可以做得到。
^ 2段 以西結喺公元前617年被擄到巴比倫。佢喺被擄嘅“第六年”，即係公元前612年寫低咗以西結書8:1-19:14。
^ 5段 挪亞嘅父親拉麥敬畏上帝，不過佢喺洪水嚟到5年前就已經去世。喺渡過大洪水而生還嘅人當中，並冇挪亞嘅母親同兄弟姐妹。如果洪水發生嗰時佢哋仲在世，噉佢哋一定係俾洪水毁滅咗。
