表現好客精神使人快樂！
“你哋要好客，彼此款待，唔好發牢騷。”——彼得前書4:9
1．公元1世紀嘅基督徒面對乜嘢情況？
公元62至64年期間，使徒彼得寫信俾“分散喺本都、加拉太、卡帕多西亞、亞細亞同庇推尼各地寄居”嘅弟兄姊妹。（彼得前書1:1）呢啲生活喺小亞細亞嘅弟兄姊妹有唔同嘅文化背景。當時，佢哋正遭受反對，俾人再三詆毁，面對“如火嘅考驗”。佢哋生活喺一個非常時期，好需要得到鼓勵同指引。彼得話：“萬物嘅終結近嘞。”冇錯，不出十年，耶路撒冷就受到毁滅。乜嘢幫助公元1世紀嘅弟兄姊妹渡過呢個艱難時期？（彼得前書4:4,7,12）
2,3．點解彼得鼓勵弟兄姊妹要表現好客精神？（請睇吓課文開頭嘅圖片）
2 彼得鼓勵當時嘅弟兄話：“你哋要好客，彼此款待”。（彼得前書4:9）譯作“好客”嘅希臘語詞嘅意思係“喜愛或者仁慈噉對待陌生人”。不過請留意，彼得鼓勵弟兄姊妹要向嗰啲已經認識、一齊共事嘅人表現好客，“彼此款待”。點解彼得鼓勵佢哋噉樣做？
3 噉樣做會拉近佢哋之間嘅關係。不妨諗吓你自己嘅經歷。有人邀請你去佢屋企作客嗰陣，你係咪覺得好開心，係咪留下咗美好嘅回憶？你款待會衆嘅朋友之後，彼此嘅友誼係咪更加深厚？如果我哋想深入認識弟兄姊妹，一個好方法就係，向佢哋表現好客精神。喺彼得嘅日子，隨住情況越來越嚴峻，弟兄姊妹就更需要有親密嘅關係。今日，生活喺“最後嘅日子”嘅基督徒都需要噉樣做。（提摩太後書3:1）
4．呢篇課文會討論乜嘢？
4 我哋可以點樣把握機會表現好客精神？乜嘢會妨礙我哋表現好客以及我哋可以點樣克服？乜嘢可以幫助我哋成為一個好嘅客人？
把握機會，表現好客
5．我哋喺聚會嗰陣可以點樣表現好客精神？
5 喺聚會：耶和華同佢嘅組織邀請我哋參加聚會。我哋都好想效法耶和華，歡迎所有參加聚會嘅人，特别係新人。（羅馬書15:7）佢哋都係耶和華嘅客人，所以無論佢哋有點樣嘅衣着打扮，我哋都應該主動歡迎。（雅各書2:1-4）如果一個新人睇嚟冇人照顧，你可唔可以邀請佢同你一齊坐？如果你話俾佢知聚會嘅進程或者幫助佢查找經文，佢一定會好感激你。呢個係“努力表現好客精神”嘅好方法。（羅馬書12:13）
6．我哋應該邀請邊啲人？
6 款待人：喺聖經時代，人表現好客嘅方法通常係邀請人到屋企食飯。（創世記18:1-8；士師記13:15；路加福音24:28-30）邀請人共享美食，就係想同人建立友好和睦嘅關係。我哋應該邀請邊啲人？主要係會衆嘅弟兄姊妹。呢個世界嘅情況會變得越來越差，所以我哋需要同弟兄姊妹有和睦嘅關係，互相扶持，以忠貞相待。2011年，中央長老團將美國伯特利家庭《守望台》研究班嘅時間由下午6:45改到下午6:15。點解要調整？宣布話，如果聚會早啲結束，伯特利成員就更容易互相表現好客精神。後來，其他分部辦事處都照住噉做。呢個安排使伯特利成員之間嘅關係更加親密。
7,8．我哋可以點樣向到訪會衆嘅人表現好客精神？
7 當分區監督、分部代表或者其他會衆嘅講者到訪我哋會衆嘅時候，就係我哋表現好客精神嘅好機會。（請讀約翰三書5-8）你可唔可以請佢哋食啲甜點或者食餐飯呢？
8 美國嘅一個姊妹回憶話：“咁多年來，我同先生有機會喺屋企款待好多講者同佢哋嘅妻子。每次交往都好開心，不過最重要嘅係，喺屬靈上我哋得到好大嘅鼓勵。我哋從來都冇後悔噉樣做。”
9,10．（甲）我哋可以向邊啲人提供住宿？（乙）就算自己間屋唔大，係咪都可以向人提供住宿呢？請舉例。
9 提供住宿：喺古代，家主經常會為可靠嘅訪客提供住宿。（約伯記31:32；腓利門書22）喺我哋嘅日子都需要噉做。分區監督探訪會衆嘅時候，往往需要住宿嘅地方。參加培訓班嘅學員同參與建築工程嘅志願者亦都一樣。嗰啲因為自然災害而無家可歸嘅人又點呢？喺住所建好之前，佢哋需要有個地方安頓落嚟。我哋唔應該覺得，只有嗰啲屋企好大嘅人先可以提供幫助，話唔定之前佢哋已經幫過好多人。就算自己間屋唔大，你都可以向人提供住宿。
10 一個韓國弟兄曾經為訓練班嘅學員提供住宿，佢回憶話：“當時我啱啱結婚，同太太住喺一間細屋，所以一開始都有啲猶疑。不過，我哋有機會同訓練班嘅學員一齊住，真係好開心。學員當中有啲夫婦因為事奉耶和華同追求屬靈目標，享有好大嘅喜樂。我哋呢對新婚夫婦，見到佢哋嘅榜樣都受到鼓勵。”
11．點解需要向嗰啲新嚟會衆嘅人表現好客？
11 幫助新嚟會衆嘅人：可能有啲弟兄姊妹會從其他地方搬到你嘅地區。佢哋過嚟可能係因為想擴大服務，或者佢哋係先驅，受委派嚟協助你嘅會衆。佢哋啱啱嚟到，人生路不熟，為咗適應新嘅地區、會衆、語言或者文化，需要作出調整。邀請佢哋一齊交往，可以幫助佢哋結交新朋友同埋適應新環境。
12．乜嘢經驗表明，好客唔需要好隆重？
12 表現好客唔需要好隆重。（請讀路加福音10:41,42）一個弟兄回憶佢同太太一開始做特派傳道員嘅日子，話：“嗰陣時我哋好年輕，冇經驗，又經常想念家人。有一晚，太太因為思鄉而特别灰心。我盡力安慰佢，但係冇用。大約晚黑七點半，有人敲門。開門之後，我哋見到一個聖經學生企喺門口，手上拎住三個橙。原來，佢過嚟係想歡迎新嚟嘅特派傳道員。我哋邀請佢入屋，斟咗杯水俾佢，後來又沖埋茶同熱朱古力。我哋唔識斯瓦希里語，而佢又唔識英語。不過，呢次開心嘅經歷就成為我哋同當地弟兄姊妹建立友誼嘅開始。”
跨越障礙，表現好客
13．表現好客精神可以帶嚟乜嘢益處？
13 你係咪有所顧慮，所以冇向人表現好客？如果係噉，你就可能錯失咗同朋友共度快樂時光或者建立長久友誼嘅機會。表現好客係消除孤獨感嘅一個好方法。不過，點解有啲人唔係好想向人表現好客精神？可能有以下幾個原因。
14．如果冇咩時間同弟兄姊妹交往，我哋可以點樣做？
14 時間同精力：耶和華嘅子民負有好多唔同嘅職責，佢哋嘅生活通常都比較忙碌。有啲人覺得，自己冇咩時間同精力向人表現好客。如果你有同樣嘅情況，就可能需要檢查吓自己嘅時間安排。為咗有時間可以同弟兄姊妹交往，你能唔能够作出一啲調整？聖經鼓勵基督徒要表現好客精神。（希伯來書13:2）所以，我哋好應該抽出時間向人表現好客。不過噉樣做，你就可能需要減少一啲冇咁重要嘅活動。
15．有啲人想表現好客，不過擔心乜嘢？
15 對自己嘅睇法：你係咪曾經想向人表現好客，但係又覺得自己冇呢個能力？有啲人比較内向，擔心唔知同客人講啲咩好，又或者擔心客人會覺得悶。另一啲人經濟有限，認為自己冇能力好似會衆其他人噉樣款待客人。其實，只要間屋乾淨企理，俾到客人賓至如歸嘅感覺就足够嘞。
16,17．點樣做可以減輕招待客人所産生嘅顧慮？
16 一諗到要招呼客人，可能令你感到緊張，但其實唔係只有你先有噉嘅感覺。一個英國嘅長老承認：“為招呼客人做準備會令人焦慮。不過，為事奉耶和華而做嘅任何事所帶嚟嘅益處同滿足感會遠遠勝過所有憂慮。只係同客人坐低，一齊飲吓咖啡傾吓計，我就已經好享受嘞。”對客人表現個人關注一直都係個好方法。（腓立比書2:4）好多人都鍾意同人分享自己嘅經歷。同弟兄姊妹一齊交往嘅時候，就係聽佢哋講述自己經歷嘅最好機會。另一個長老話：“邀請會衆嘅朋友嚟屋企交往，可以幫助我更加了解佢哋，使我有機會知道佢哋嘅事，特别係佢哋點樣認識真理。”你仁愛噉關注客人，肯定可以營造出開心愉快嘅氣氛。
17 一個先驅姊妹經常提供自己嘅屋企俾各種訓練班嘅學員住，佢承認：“一開始我有啲擔心，因為我屋企好簡陋，啲家私都係二手嘅。一個導師嘅太太所講嘅話令我好安心。佢話同先生一齊做探訪工作嗰時，最開心就係住喺嗰啲屬靈嘅弟兄姊妹屋企嘅時光。呢啲弟兄姊妹唔一定擁有好多物質嘅嘢，但係同我哋有共同嘅目標——全心事奉耶和華，保持過簡樸嘅生活。呢個使我記起，媽媽喺我細個嗰時講過嘅話：‘只食一碟素菜而彼此相愛’。”（箴言15:17）你唔需要擔心，愛心可以激發你嘅好客精神。
18,19．表現好客點樣幫助我哋消除對其他人嘅負面睇法？
18 對其他人嘅睇法：你係咪對會衆某個人反感？如果你對一個人有負面嘅睇法，但又唔採取行動去改善，噉呢種睇法就會一直延續落去。某個人傷害過你而你好難放低，或者你唔鍾意某個人嘅性格，呢啲都可能會妨礙你向佢哋表現好客精神。
19 聖經話，如果我哋表現好客精神，甚至同敵人嘅關係都可以改善。（請讀箴言25:21,22）如果一個人對你有成見，邀請佢作客可以減輕你哋之間嘅摩擦或者軟化佢嘅態度。噉樣做，你就有機會睇到佢嘅美好特質，明白耶和華點解吸引佢認識真理。（約翰福音6:44）出於愛心嘅邀請，可能會使你哋嘅關係開始得到改善。你點樣做就可以表明你嘅動機的確出於愛心？一個方法係聽從腓立比書2:3嘅勸勉。經文鼓勵我哋“要謙卑，睇其他人比自己優越”。我哋應該揾出並學習弟兄姊妹比我哋優越嘅地方，例如佢哋嘅信心、堅忍、勇氣，或者其他基督徒特質。我哋多啲諗吓佢哋嘅美好特質，就會更加愛佢哋，更樂意對佢哋表現好客精神。
做一個好嘅客人
主人通常會為佢哋嘅客人做好準備（請睇第20段）
20．我哋接受咗邀請，點解應該守約？
20 詩篇執筆者大衛問：“耶和華啊，邊個能够喺你嘅聖幕中作客？”（詩篇15:1）佢問完呢個問題之後就指出，做耶和華嘅客人需要具備嘅其中一個屬靈特質就係言出必行。大衛話：“佢發咗誓，就算吃虧，都唔反悔。”（詩篇15:4）我哋接受咗一個邀請，就唔應該隨便取消。主人可能已經做好晒準備，如果我哋唔去，佢所作嘅努力都會白費。（馬太福音5:37）有啲人取消一個邀請係為咗接受另一個睇嚟更好嘅邀請。噉樣做係咪有愛心同尊重他人呢？我哋應該懷住感激之心接受主人為我哋所提供嘅。（路加福音10:7）如果我哋真係遇到無法避免嘅情況，唔能够遵守約定，仁慈體貼嘅做法就係盡快通知主人。
21．尊重當地習慣點樣幫助我哋成為好嘅客人？
21 尊重當地嘅習慣亦都好重要。喺某啲文化，參加一個交往最好要先受到主人嘅邀請，但有啲文化，就算冇受到邀請都可以；有啲地方，主人會將最好嘅食物俾客人食先，而另一啲地方就大家同時享用；某啲地區，客人通常要帶食物參加交往，而某啲地區，主人覺得客人最好乜嘢都唔帶；有啲文化，客人拒絶第一第二次邀請係禮貌嘅表現，而有啲文化，拒絶就等於冇感激之心。無論點都好，我哋應該盡力使主人覺得邀請我哋係一件開心嘅事。
22．“要好客，彼此款待”呢個勸告點解咁重要？
22 彼得話：“萬物嘅終結近嘞。”（彼得前書4:7）我哋將會面對世上前所未見嘅大患難。隨住壓力不斷增加，我哋需要同弟兄姊妹培養深厚嘅愛。我哋比以往嘅基督徒更加需要聽從彼得嘅勸告。佢話：“你哋要好客，彼此款待”。好客精神使我哋開心愉快，係我哋生活必不可少嘅一部分，直至永恆。（彼得前書4:9）
