你有冇幫助兒女符合資格受浸？
“你點解遲延呢？起嚟受浸啦！”——使徒行傳22:16
1．喺兒女受浸之前，基督徒父母需要確認乜嘢？
布洛茜姆·勃蘭特描述佢決定受浸嗰段時間嘅情況話：“幾個月以來，我一直同父母講，我想受浸。之後，佢哋經常同我傾吓呢個問題，想確定我係咪真係明白受浸係個嚴肅嘅決定。我終於喺1934年12月31日受浸。呢日係我人生中意義重大嘅一日。”今日，身為父母嘅基督徒同樣都好關心點樣幫助兒女做明智嘅決定。如果兒女遲遲唔受浸，佢哋同耶和華嘅關係就會受到損害。（雅各書4:17）當然，喺兒女受浸之前，父母需要確認兒女已經做好準備，可以負起基督徒嘅責任。
2．（甲）一啲分區監督留意到乜嘢問題？（乙）呢篇課文會討論乜嘢？
2 有啲分區監督留意到，一啲喺真理中長大嘅年輕人到咗十幾二十歲仲未受浸。呢啲年輕人大多數都已經參加聚會同傳道工作，甚至已經將自己睇成係耶和華見證人。不過，佢哋因為某啲原因唔想獻身受浸。咩原因呢？因為有啲基督徒父母建議佢哋嘅兒女遲啲先受浸。喺呢篇課文，我哋會討論有邊四種諗法會妨礙基督徒父母幫助兒女繼續進步，符合資格受浸。
咁細受得浸未㗎？
3．布洛茜姆嘅父母擔心乜嘢？
3 布洛茜姆嘅父母擔心自己嘅女年紀仲細，未真正明白受浸嘅意義同埋受浸係幾咁嚴肅嘅事。呢種諗法係可以理解嘅。噉父母點知道兒女係咪已經做好準備，將自己嘅一生獻俾耶和華？
4．耶穌喺馬太福音28:19,20嘅吩咐可以點樣幫助父母教導兒女？
4 請讀馬太福音28:19,20。正如上一篇課文所講，聖經冇規定一個人要到咗某個年齡先可以受浸。不過，父母都應該認真諗吓幫助人成為基督門徒嘅意義。馬太福音28:19提到要使人做門徒，呢句話喺希臘語意味住，要將幫助人成為門徒作為施行教導嘅目標。一個人要成為耶穌嘅門徒，就應該學習同明白耶穌嘅教導，並且決心遵守。所以，基督徒父母都應該定立目標，從兒女嬰兒時期開始就教導佢哋，幫助佢哋將來獻身受浸成為基督嘅門徒。當然，一個嬰兒未符合受浸嘅資格。不過聖經表明，就算係小朋友，都能够理解同熱愛聖經真理。
5,6．（甲）關於受浸，我哋通過同提摩太有關嘅記載學到乜嘢？（乙）有辨識力嘅父母可以點樣有效噉幫助自己嘅兒女？
5 提摩太喺年輕嘅時候就已經確信自己學到嘅係真理。使徒保羅話提摩太從嬰兒時期就開始學習聖經真理。雖然提摩太嘅爸爸唔係一個事奉上帝嘅人，不過猶太裔嘅媽媽同外婆就幫助提摩太培養對上帝話語嘅愛。結果，提摩太對真理有堅定嘅信心。（提摩太後書1:5；3:14,15）佢二十歲左右就已經受到委派，可以同保羅一齊參與海外傳道工作。（使徒行傳16:1-3）
6 當然，每個小朋友都唔一樣，唔可能喺同樣嘅年紀達到同樣嘅成熟程度。有啲細細個就已經心智成熟，有受浸嘅願望；有啲就可能要等年紀再大啲先考慮受浸。所以，有辨識力嘅父母唔會逼兒女受浸，反而會一步一步幫助兒女喺屬靈上進步。兒女跟從箴言27:11（請讀）嘅原則去做，就會使父母嘅心歡喜。父母要謹記，佢哋嘅目標係要幫助兒女成為基督嘅門徒。如果父母有呢個目標，好自然就會諗：“我嘅仔女係咪已經有足够嘅知識可以獻身受浸？”
有冇足够嘅知識？
7．一個人係咪需要熟識聖經嘅每個細節先可以受浸？請解釋。
7 喺家庭中，父母作為兒女嘅導師，都希望兒女清楚明白真理，從而為獻身打好基礎。呢個並唔係話，一個人決定獻身受浸之前，一定要熟悉聖經嘅每個細節。事實上，所有門徒喺受浸之後都應該繼續學習聖經真理。（請讀歌羅西書1:9,10）噉到底一個人要有幾多聖經知識先可以受浸？
8,9．我哋從保羅同獄卒嘅記載學到乜嘢？
8 父母可以從公元1世紀嘅一個家庭經歷嘅事受到啟發。（使徒行傳16:25-33）大約公元50年，保羅喺第二次海外傳道旅程期間探訪咗腓立比。喺嗰度，保羅同西拉因為俾人誣告而被捕入獄。當晚，一場强烈嘅地震使監獄嘅門都打開晒。獄卒以為囚犯全部逃走咗，於是想自殺。保羅制止咗獄卒之後，同西拉一齊向獄卒一家作咗美好嘅見證。獄卒一家接受咗同耶穌有關嘅真理之後，即刻採取乜嘢行動？佢哋冇拖延，馬上受浸。我哋從呢個記載學到乜嘢？
9 呢個獄卒可能係一個退役嘅羅馬士兵，佢並唔熟悉聖經。所以，如果佢想成為基督徒，就需要學習基本嘅聖經真理，明白成為上帝嘅子民意味住乜嘢，仲要下定決心遵從耶穌嘅教導。佢喺短時間内學到嘅只係一啲基本嘅聖經知識，但呢啲知識足以打動佢嘅心，推使佢馬上受浸。毫無疑問，佢受浸之後會繼續吸收聖經知識。同樣，如果兒女已經有基本嘅聖經知識，明白獻身嘅意義，又想受浸，噉父母應該點做呢？父母可以建議兒女同會衆嘅長老傾吓，睇吓自己係咪符合受浸嘅資格。 *同其他基督徒一樣，兒女受浸之後都要繼續學習聖經知識，加深對上帝旨意嘅理解，直到永遠。（羅馬書11:33,34）
有冇得到最好嘅教育？
10,11．（甲）有啲父母有乜嘢諗法？（乙）乜嘢先至係兒女最好嘅保護？
10 為咗使兒女有機會接受高等教育，可以揾一份有前途嘅工作，有啲父母會建議兒女最好遲啲先受浸。噉樣做可能係為兒女着想，不過可唔可以幫助兒女得到真正嘅成功？更重要嘅係，噉樣做係咪同聖經原則一致？耶和華嘅話語鼓勵我哋點樣做？（請讀傳道書12:1）
11 要謹記，世界同世界嘅一切都係同耶和華嘅思想對立嘅。（雅各書4:7,8；約翰一書2:15-17；5:19）同耶和華有親密嘅關係就係兒女最好嘅保護，使佢哋可以免受撒但、呢個世界同世俗思想嘅影響。如果父母最重視嘅係世俗嘅追求，就可能會令到兒女分唔清乜嘢先至係真正重要嘅。噉樣，最終只會危害佢哋同耶和華嘅關係。仁愛嘅基督徒父母，你哋係咪真係希望由呢個世界嚟教導自己嘅兒女乜嘢係成功嘅人生？只有將耶和華放喺生活嘅首位，我哋先會得到真正嘅喜樂同成功。（請讀詩篇1:2,3）
如果犯咗嚴重嘅罪點算呢？
12．點解有啲父母唔鼓勵兒女受浸？
12 一個基督徒母親解釋佢點解唔鼓勵自己嘅女受浸，話：“講起嚟真係好慚愧，主要係因為有開除嘅安排。”有啲父母同呢個姊妹有類似嘅諗法，佢哋覺得，等兒女年紀再大啲先至受浸會比較好，噉兒女就唔會因為心智未成熟而做錯事。（創世記8:21；箴言22:15）佢哋可能以為，只要自己嘅兒女一日未受浸，就唔會被開除。點解話呢個係自欺欺人嘅諗法？（雅各書1:22）
13．一個人遲遲唔受浸，係咪就唔需要向耶和華交賬呢？請解釋。
13 當然，基督徒父母唔想兒女喺心智成熟之前獻身受浸，呢個諗法係可以理解嘅。不過，如果以為兒女未受浸就唔需要向耶和華交賬就大錯特錯嘞。點解噉講？兒女唔係受咗浸先至要向耶和華交賬。如果兒女已經明白耶和華嘅是非標準，噉佢就要為自己嘅行為負責。（請讀雅各書4:17）所以，明智嘅父母唔會阻止兒女受浸，反而會盡力做個好榜樣。父母應該從兒女嬰兒時期開始就教導佢哋愛耶和華嘅崇高道德標準。（路加福音6:40）呢種愛會推動兒女緊守耶和華嘅正義標準，避免犯嚴重嘅罪。呢個對兒女嚟講係最好嘅保護。（以賽亞書35:8）
其他人能够提供幫助
14．長老可以點樣配合父母，幫助佢哋嘅兒女定立受浸嘅目標？
14 會衆嘅長老可以配合父母，積極向年輕人談論屬靈嘅目標。一個姊妹喺六歲嗰時同查爾斯·羅素弟兄有過一次難忘嘅交談。姊妹話：“佢用咗15分鐘同我討論我嘅屬靈目標。”結果點呢？呢個姊妹後來成為先驅，而且堅守崗位超過70年！冇錯，積極嘅言詞同鼓勵嘅説話的確能够對人産生深遠嘅影響。（箴言25:11）長老亦都可以根據小朋友嘅年紀同能力，適當俾佢哋一啲任務，使佢哋可以同父母一齊參與同王國聚會所有關嘅工作。
15．會衆嘅弟兄姊妹可以用乜嘢方法鼓勵年輕人？
15 會衆嘅弟兄姊妹可以適當噉向年輕人表現個人關注，留意佢哋屬靈上嘅進步。你有冇留意到某個年輕人喺聚會發表咗衷心嘅評論，或者有份擔任節目？你有冇聽講佢喺學校把握機會向人作見證，或者成功抵抗誘惑？呢個時候，要真心稱讚佢。不妨喺聚會前後同會衆嘅年輕人傾吓計，真誠噉關心佢哋。噉樣，佢哋就可以感受到自己係“大群會衆”嘅一分子。（詩篇35:18）
幫助兒女符合資格受浸
16,17．（甲）受浸點樣影響我哋嘅未來？（乙）所有基督徒父母都希望體驗乜嘢喜樂？（請睇吓課文開頭嘅圖片）
16 按照“耶和華嘅意思”將兒女撫養成人，係基督徒父母莫大嘅殊榮。（以弗所書6:4；詩篇127:3）古代以色列人嘅兒女，一出世就屬於一個獻咗身俾耶和華嘅國族。不過，今日嘅基督徒兒女唔一樣。換句話嚟講，即係兒女唔會自然繼承到父母對耶和華同真理嘅愛。兒女一出世，父母就應該以幫助佢哋成為基督徒為目標，鼓勵佢哋獻身受浸，事奉耶和華。呢個係生死攸關嘅事。一個人獻身、受浸同埋忠心事奉上帝，就有機會喺將臨嘅大患難得救。（馬太福音24:13）
父母應該立下目標，幫助兒女成為基督嘅門徒（請睇第16,17段）
17 布洛茜姆·勃蘭特決定受浸嗰時，佢嘅父母好想確認佢係咪已經做好準備，踏出人生中最重要嘅一步。當佢哋相信自己嘅女已經做好準備，就全力支持佢。喺布洛茜姆受浸前一晚，佢爸爸做咗一件感人嘅事。布洛茜姆回憶話：“爸爸叫我哋一齊跪低，然後做咗個禱告。佢同耶和華講，知道自己嘅寶貝女決心將一生獻俾耶和華，自己真係好開心。”事隔六十幾年之後，布洛茜姆對嗰晚發生嘅事仍然記憶猶新。佢話：“我永遠都唔會忘記嗰個晚上！”願所有父母都可以見到自己嘅兒女獻身受浸事奉耶和華，體驗到呢種喜樂同滿足。
^ 9段 父母可以同兒女一齊討論《年輕人所提出的問題——有實效的答案》第2册304-310頁，亦都可以參考《王國傳道月報》2011年4月刊2頁嘅“問題欄”。
