人物生平
耶和華從來都冇撇棄我!
喺希特勒發表演講之後,有四個女仔負責向佢獻花,我係其中一個。點解會揀我?我爸爸好積極參與納粹黨嘅活動,亦都係當地納粹黨一位高官嘅司機。我媽媽係一個好虔誠嘅天主教徒,佢好想我做修女。雖然深受兩邊嘅影響,不過最終我既冇加入納粹黨亦都冇做修女。等我話俾你知點解。
我喺奧地利嘅格拉茨長大。七歲嘅時候,我就去咗一間教會學校受訓。不過,我睇到神父同修女有苟且嘅性關係,覺得好震驚。所以唔到一年,媽媽就俾我離開呢間學校。
之後,我去咗寄宿學校。有一晚,格拉茨受到猛烈嘅轟炸。於是,爸爸帶住我逃去施拉德明鎮避難。我哋一過咗條橋,條橋就被炸毁咗。另一次,有啲戰機飛過我哋花園,向我同婆婆開槍。直到大戰結束,教會同政府似乎都俾唔到人真正嘅希望。
學習信賴耶和華
1950年,我媽媽開始同一位耶和華見證人學習聖經。佢哋討論嘅時候,我會喺旁邊聽。有時,我仲會跟媽媽去參加聚會。媽媽確信耶和華見證人所教嘅係真理,後來喺1952年受浸。
嗰時,本地會衆就好似一個婆婆讀書會。後來,我哋有機會參加另一群會衆嘅聚會,嗰度有好多年輕人,同我哋嗰個婆婆讀書會完全唔同!返到格拉茨,我就開始參加所有聚會,好快我都深信自己所學到嘅係真理。我亦都睇出,耶和華會支持佢嘅僕人,而且唔會令佢哋失望。即使我哋獨自面對緊一啲睇嚟冇辦法解決嘅問題,佢都會幫助我哋。(詩篇3:5,6)
我好想同其他人分享聖經真理。一開始,我先同兄弟姐妹傳道。我四個姐姐都係教書嘅,當時佢哋已經搬咗出去住。我會去姐姐住嘅村莊探佢哋,鼓勵佢哋學習
聖經。後來,所有兄弟姐妹都學習聖經,最終都成為耶和華見證人。我開始逐家逐户傳道嘅第二個星期,就遇到一位三十幾歲嘅太太,之後同佢討論聖經。佢繼續進步,跟住獻身受浸,後來佢先生同兩個仔都成為見證人。同呢位太太討論聖經大大强化咗我嘅信心。點解呢?冇人正式同我討論過聖經,所以我更加需要為每一課做好充分嘅準備。即係話,喺教導學生之前,我要先教導自己。呢個真係幫助我對聖經真理有更深入嘅理解。1954年4月,我受浸表明自己已經獻身俾耶和華。
“受迫害,但冇被撇棄”
1955年,我參加咗分别喺德國、法國同英國舉行嘅國際大會。喺倫敦,我有機會認識艾伯特·史勞德弟兄。佢係基列聖經學校嘅導師,後來佢成為中央長老團成員。參觀大英博物館嗰陣,史勞德弟兄向我哋介紹一啲有上帝希伯來語名字嘅聖經手抄本,同埋解釋佢哋嘅重要性。呢個深深打動咗我,令我更加愛耶和華同聖經真理。所以,我下定決心要積極傳講上帝嘅話語。
1956年1月1日,我開始做正規先驅。四個月之後,我被委派到奧地利嘅米斯特爾巴赫做特别先驅。當時,呢個鎮仲未有其他見證人。不過,我要面對一個特别嘅挑戰。我同我嘅先驅同伴有好大嘅差異。我未滿19歲,喺城市長大;佢25歲,嚟自鄉村。我鍾意遲啲瞓晏啲起身,佢就鍾意早睡早起。不過我哋實踐聖經原則,彼此包容,結果我哋可以好開心噉一齊做先驅。
後來,我哋要面對另一啲艱難嘅情況,甚至要面對迫害,但係我哋冇“被撇棄”。(哥林多後書4:7-9)有一次,我哋喺一條偏僻嘅村莊傳道,村民特登放啲狗出嚟。好快,我同同伴就俾啲大狗圍住。佢哋對住我哋不停噉吠,想咬我哋。我哋都捉實對方嘅手。我禱告話:“耶和華啊,如果啲狗真係要咬我哋,就俾我哋死快啲啦!”啲狗差唔多走到埋嚟,突然間停喺度,擺吓條尾就走咗嘞。我哋覺得耶和華真係保護咗我哋。之後,我哋就向整條村傳道。令我哋開心嘅係,村民都好樂意聽我哋傳講嘅信息。可能佢哋覺得好意外,因為啲狗居然冇咬我哋,或者見我哋經歷咗噉嘅事都堅持向佢哋傳道。有啲村民後來亦都成為咗耶和華見證人。
我哋仲經歷咗另一件好得人驚嘅事。有一日,我哋嘅房東飲醉咗,返到嚟仲話
要殺我哋,又話我哋騷擾周圍嘅鄰居。佢太太嘗試令佢冷靜落嚟,但係唔成功。我哋喺樓上聽到佢講嘅嘢,就即刻攞啲凳頂住道門,拿拿冧執埋行李。我哋一開門就見到房東企喺樓梯度,揸住把菜刀。所以我哋就即刻拎住啲行李,從後門嘅小路逃走,之後再冇返過去。我哋去酒店訂咗間房,喺嗰度住咗差唔多一年,呢個為我哋嘅傳道工作帶嚟好大嘅益處。點解?呢間酒店位於市中心,所以我哋嘅聖經學生鍾意嚟呢度學習。冇幾耐,我哋就喺房入面,舉行書籍研究班同每個星期嘅《守望台》研讀,大約有15人參加。
我哋留喺米斯特爾巴赫超過一年,跟住就被委派到格拉茨東南部嘅費爾德巴赫,呢度亦都冇會衆。我有一個新嘅先驅同伴,我哋住喺一間簡陋木屋二樓嘅房仔。因為啲木之間有罅,風經常會吹入嚟,所以我哋要用報紙塞住啲罅。我哋仲要去井度打水。但係呢一切都係值得嘅,因為幾個月後,當地就成立咗一個小組。一個家庭嘅30個成員同我哋討論聖經,結果佢哋都成為耶和華見證人!
呢啲經歷强化咗我對耶和華嘅信心,知道佢唔會撇棄嗰啲追求王國嘅人。即使冇人可以幫到我哋,耶和華都一定會支持我哋。(詩篇121:1-3)
受耶和華“正義嘅右手”扶持
1958年,我申請參加喺紐約洋基體育場同馬球場舉行嘅國際大會。奧地利分部就問我想唔想參加第32屆基列學校。我點可以拒絶呢個福分呢?我即刻話:“好啊!”
喺基列受訓期間,我坐喺馬丁·普辛格弟兄隔籬。佢喺納粹集中營經歷過嚴峻嘅考驗,後來成為中央長老團嘅成員。上課嘅時候,馬丁有時會細細聲問我,“呢句話喺德語係咩意思啊?”
課程過咗一半之後,内森·諾爾弟兄就宣布我哋嘅委派。我嘅委派係去巴拉圭。因為當時我太年輕,所以我需要爸爸嘅批准先可以入境。得到批准後,我喺1959年3月抵達巴拉圭。我被委派到亞松森,住喺嗰度嘅海外傳道員之家,同一個新同伴一齊服務。
冇幾耐,我遇到一個喺第30屆基列學校畢業嘅海外傳道員(現稱特派傳道員),佢叫韋爾特·布賴特。之後,我哋就結咗婚,共同面對生活上嘅挑戰。每當我哋遇到一啲棘手嘅難題,都會一齊讀耶和華喺以賽亞書41:10所作嘅應許:“你唔使怕,因為我與你同在。你唔需要四顧張望,因為我係你嘅上帝,我要使你堅强。”呢節經文向我哋保證,只要我哋盡力對上帝保持忠貞,將佢嘅王國放喺首位,佢就一定唔會令我哋失望。
之後,我哋被委派去靠近巴西邊境嘅一個地區。嗰度嘅教士慫恿一啲年輕人向本來就需要維修嘅海外傳道員之家掟石頭。後來,韋爾特同一個警察局長討論聖經。局長派警員喺我哋屋企附近守衛咗一個星期,之後我哋就冇再受到騷擾嘞。跟住,我哋就搬咗去巴西邊境嗰邊一個更合適嘅住宅。噉樣做對我哋嘅工作好有利,因為我哋喺巴拉圭同巴西都可以舉行聚會。我哋離開呢個地區之前,當地已經有兩群細會衆。
耶和華繼續扶持我
我嘅醫生曾經話我冇生育能力,所以喺1962年我知道自己有咗嘅時候,就覺得好意外!我哋決定喺佛羅里達州嘅荷李活定居,住喺韋爾特嘅家人附近。有好多年,情況都唔容許我同韋爾特做先驅,因為我哋需要照顧家人。雖然係噉,我哋繼續將追求王國放喺生活首位。(馬太福音6:33)
1962年11月,我哋抵達佛羅里達州嗰時,覺得好驚訝,因為本地嘅黑人弟兄同白人弟兄受到當時嘅種族歧視影響而要分開聚會,分開傳道。但係耶和華冇種族偏見,所以冇幾耐,唔同種族嘅弟兄姊妹就聚集埋一齊崇拜耶和華。我哋清楚睇出呢個安排得到耶和華嘅指引,因為而家呢個地區已經有幾十群會衆。
令我傷心嘅係,2015年韋爾特因為腦癌而去世。55年來,佢一直係一個好好嘅丈夫,佢深愛耶和華亦都幫咗好多弟兄姊妹。我好期待喺佢復活之後見翻佢,到時佢會恢復健康嘅身體。(使徒行傳24:15)
我好開心能够全時為耶和華服務超過40年,得到好多喜樂同福分。例如,韋爾特同我親眼睇到我哋嘅136個聖經學生受浸。當然,我哋都面對過艱難嘅情況,但係我哋從來都冇用呢啲事作為藉口停止事奉耶和華。相反,我哋努力親近佢,深信佢會喺最適當嘅時候用佢嘅方式解決問題。佢的確噉樣做!(提摩太後書4:16,17)
我真係好掛住韋爾特,但係先驅工作可以幫助我保持積極。我發覺同其他人討論聖經,分享復活嘅希望,對我特别有幫助。我從自己一生嘅經歷睇出,耶和華從來都冇撇棄我。就好似佢所應許嘅一樣,佢一直鼓勵我,使我堅强,亦都“用正義嘅右手”捉緊我。(以賽亞書41:10)