“要聽從管教，增長智慧”
“我兒啊，……要聽從管教，增長智慧”——箴言8:32,33
1．我哋可以點樣得到智慧？智慧點樣幫助我哋？
耶和華係智慧嘅源頭，佢慷慨噉賜智慧俾人。雅各書1:5話：“上帝慷慨賜百物俾所有人，而且唔責難人，所以你哋邊個缺乏智慧，就應該不斷祈求上帝”。接受上帝嘅管教，就係我哋得到上帝智慧嘅一個方法。上帝嘅智慧可以保護我哋，使我哋喺道德同屬靈上免受傷害。（箴言2:10-12）噉樣嘅話，我哋就“可以常在上帝嘅愛裏……指望得享永生”。（猶大書21）
2．我哋可以點樣對上帝嘅管教培養感激之心？
2 因為受唔完美嘅身心、成長背景同其他因素影響，我哋有時好難接受或者以正確嘅觀點看待管教。不過，當我哋體驗到上帝嘅管教所帶嚟嘅益處，就會明白上帝有幾咁愛我哋。箴言3:11,12話：“我兒啊，耶和華嘅管教你唔好拒絶，……因為耶和華責備佢所愛嘅人”。冇錯，我哋可以確信耶和華所做嘅都係為咗我哋嘅益處着想。（請讀希伯來書12:5-11）因為上帝好了解我哋，佢嘅管教總係適當嘅，而且正係我哋需要嘅。呢篇課文會分析四方面嘅管教：（1）自律，（2）父母嘅管教，（3）會衆嘅管教，（4）比管教更令人痛苦嘅事。
自律就係有智慧
3．父母點樣幫助兒女培養自律？請舉例。
3 自律或者自我約束嘅意思包括，為咗改善自己嘅行為同思想而加以克制自己。我哋唔係天生就識得自我約束，而係需要學習嘅。試諗吓，一個小朋友啱啱開始學踩單車嘅時候，父母會喺旁邊扶住。不過，小朋友慢慢識得點樣保持平衡之後，父母就會試吓放手。等到小朋友已經學識點樣踩，父母就會完全放手。同樣，父母“照耶和華嘅意思”不斷耐心噉訓練同管教兒女，就係幫助兒女培養自律同智慧。（以弗所書6:4）
4,5．（甲）點解自律係“新品格”嘅一個重要部分？（乙）點解我哋就算“跌倒七次”都唔應該放棄？
4 同樣嘅原則都適用於嗰啲想親近耶和華嘅成年人。一個新近受浸嘅基督徒可能喺某程度上能够表現自律，但係佢靈性仲未成熟。佢開始穿上“新品格”，努力效法基督，就會變得更加成熟。（以弗所書4:23,24）自律係“新品格”嘅一個重要部分，可以幫助我哋學識“摒棄唔敬虔嘅心同世俗嘅慾望，喺現行嘅制度本住健全嘅思想、正義、敬虔而活”。（提多書2:12）
5 我哋所有人都有犯罪嘅傾向。（傳道書7:20）如果我哋做錯事，噉係咪話我哋自律能力不足或者根本唔能够自律呢？唔一定。箴言24:16話：“義人跌倒七次，都必起嚟”。乜嘢可以幫助我哋重新企起嚟？唔係靠個人嘅意志力，而係倚靠上帝嘅聖靈。（請讀腓立比書4:13）聖靈嘅果實包括自制呢種同自律相似嘅特質。
6．喺研讀聖經方面，我哋可以點樣做得更好？（請睇吓課文開頭嘅圖片）
6 懇切禱告、研讀聖經同埋沉思亦都可以幫助我哋培養自律。但係，如果你覺得學習聖經唔容易，或者唔鍾意研讀聖經，可以點做呢？唔好灰心。只要你願意接受耶和華嘅幫助，佢就會幫你對佢嘅話語“養成切望之心”。（彼得前書2:2）首先，要向耶和華禱告，懇求佢幫助你表現自律，學習佢嘅話語。然後，要採取同禱告一致嘅行動。可能一開始嗰時，每次嘅研讀時間唔需要好長。慢慢，研讀對你嚟講就唔再係一件咁難嘅事，而且你仲可以樂在其中！你會發現，安靜噉沉思耶和華嘅寶貴思想其實係一種享受。（提摩太前書4:15）
7．自律點樣幫助我哋達成屬靈目標？
7 自律可以幫助我哋達成屬靈目標。一個弟兄發覺自己喺屬靈方面冇以前咁熱心，於是定立做正規先驅嘅目標。佢點樣表現自律，並從中得益？佢研讀同先驅有關嘅文章，而且為自己嘅目標禱告。噉樣做强化咗佢嘅靈性，使佢更加渴望做先驅。情況允許嘅時候，佢就報名做輔助先驅。結果點樣呢？佢冇俾任何事妨礙自己，始終將目光集中喺自己嘅屬靈目標之上。過咗一段時間，佢終於成為一個正規先驅。
照耶和華嘅意思管教兒女
兒女唔係一出世就識得分辨是非對錯；佢哋需要受到訓練（請睇第8段）
8-10．乜嘢幫助基督徒父母教導兒女事奉耶和華？請舉例。
8 基督徒父母有一個寶貴嘅殊榮，就係“照耶和華嘅意思管教”兒女，將佢哋撫養成人。（以弗所書6:4）喺今日嘅世界，呢個的確唔容易。（提摩太後書3:1-5）當然，兒女唔係一出世就識得分辨是非對錯。所以，父母都需要教導同管教兒女，訓練佢哋嘅良心。（羅馬書2:14,15）一位聖經學者解釋，譯作“管教”嘅希臘語詞嘅意思亦都包括“培育兒女”，即係幫助兒女成為有責任感嘅人。
9 如果父母懷住愛心管教兒女，兒女就會有安全感。佢哋會明白，自由唔等於完全冇限制，自己所做嘅事會帶嚟唔同嘅結果。所以，基督徒父母運用耶和華嘅智慧嚟養育兒女非常重要。唔同文化背景嘅人會用唔同嘅方法嚟教導兒女，或者佢哋嘅教導方式會隨住時代而改變。不過，如果父母聽從上帝嘅智慧，就唔需要只係靠自己嘅聰明或者經驗。
10 我哋可以學習挪亞嘅榜樣。耶和華吩咐挪亞建造方舟嗰陣，挪亞根本唔可能倚靠自己嘅經驗，因為佢從來都冇建造過方舟。佢必須倚賴耶和華，“照住”耶和華嘅指引去做。（創世記6:22）結果點樣？方舟使挪亞全家得救！挪亞係一個成功嘅家主，因為佢信賴耶和華嘅智慧。佢將三個仔教得好好，又為佢哋立下好榜樣。喺嗰個充滿邪惡嘅時代，噉樣做真係一啲都唔容易。（創世記6:5）
11．父母嘅榜樣喺訓練兒女方面有幾重要？
11 作為父母，你可以點樣“照住”做呢？就係要聽從耶和華。你按照上帝嘅話語同組織嘅指引去做，就係請耶和華幫助你教導兒女。噉樣，好可能兒女日後會感激你。一個弟兄話：“我非常感謝父母用耶和華嘅方式嚟教導我。佢哋盡己所能打動我嘅心。我喺屬靈上嘅進步，大部分都有賴於佢哋嘅努力。”雖然父母盡力教導兒女，有啲兒女仲係可能會離開耶和華。不過，只要父母盡咗自己最大嘅努力，就可以良心無愧。佢哋可以期待，兒女有朝一日會返嚟耶和華身邊。
12,13．（甲）如果兒女被開除，基督徒父母可以點樣表明佢哋服從上帝？（乙）一個家庭點樣因為服從耶和華而得益？
12 兒女被開除對某啲父母嚟講係好大嘅考驗。一個姊妹嘅女被會衆開除之後離開咗屋企。呢個姊妹承認：“為咗可以同自己嘅女同埋孫女喺埋一齊，我就嘗試喺組織出版物入面揾漏洞。”不過，佢先生仁慈噉幫助佢睇出，佢哋已經唔需要為自己嘅女負責，只需要繼續忠於耶和華。
13 後來，佢哋嘅女重新被接納為會衆成員。姊妹話：“而家個女幾乎日日都打電話或者發信息俾我！而且，佢深深尊重我同先生，因為佢知道我哋服從上帝。我哋一家人嘅關係非常親密。”如果你嘅兒女被會衆開除，你會唔會“全心信賴耶和華”，而唔係“依靠自己嘅聰明”？（箴言3:5,6）要記住，耶和華嘅管教反映出佢無與倫比嘅智慧同愛心。千祈唔好忘記，耶和華為我哋所有人，包括你嘅兒女，犧牲咗佢嘅愛子。上帝唔希望任何一個人遭受毁滅。（請讀彼得後書3:9）所以，基督徒父母，你哋要繼續信賴耶和華嘅管教同指引。即使服從會帶嚟痛苦，都要聽從上帝嘅管教，唔好背道而馳。
喺會衆
14．耶和華通過“忠信睿智嘅管家”所提供嘅教導，點樣使我哋得益？
14 耶和華承諾會照顧、保護、同教導基督徒會衆。佢通過多種方式噉樣做。例如，佢委派佢嘅愛子照顧會衆，而耶穌又委派“忠信睿智嘅管家”為我哋提供適時嘅屬靈食物。（路加福音12:42）呢啲屬靈食物以唔同嘅形式使我哋得到有價值嘅教導同管教。有冇一個演講或者一篇文章，幫助你改變咗自己嘅思想同行為？你會為自己所作嘅調整感到開心，因為你正接受緊耶和華嘅塑造同管教。（箴言2:1-5）
15,16．（甲）我哋喺會衆可以點樣通過“作為恩賜”嘅長老得益？（乙）我哋可以點樣使長老工作得更加喜樂？
15 基督亦都賜下“作為恩賜”嘅長老嚟照顧會衆。佢哋會仁愛噉牧養上帝嘅羊群。（以弗所書4:8,11-13）我哋可以點樣從呢啲寶貴恩賜得益？我哋可以效法長老嘅信心同榜樣，而且留意佢哋基於聖經嘅勸告。（請讀希伯來書13:7,17）請謹記，長老好愛我哋，希望我哋喺屬靈上不斷成長。如果長老留意到我哋錯過聚會，或者唔再熱心傳道，佢哋一定會盡快嚟幫助我哋。佢哋會用心聽我哋講，然後仁愛噉鼓勵我哋，根據聖經向我哋提出明智嘅勸告。你有冇將呢啲幫助視為耶和華向你表達嘅愛？
16 長老要俾我哋勸告並唔容易。你覺得，要向企圖隱瞞自己嚴重過犯嘅大衛王提出勸告，先知拿單會有乜嘢感覺？（撒母耳記下12:1-14）彼得係十二使徒之一，佢曾經公然裝假，唔同非猶太裔嘅信徒一齊食飯。你覺得使徒保羅要糾正彼得嗰陣，又有乜嘢感覺呢？（加拉太書2:11-14）所以，你可以點樣減輕會衆長老嘅擔子？要謙卑，使人容易親近你，亦都要懷有感激之心。要將長老嘅幫助睇成係上帝對你嘅愛。噉樣唔單止可以造益你，亦都會使長老工作得更加喜樂。
17．一個姊妹點樣得到會衆長老仁愛嘅幫助？
17 一位姊妹因為以往嘅經歷覺得自己好難愛耶和華，變得好抑鬱。佢話：“我知道自己需要同長老傾吓。佢哋冇責備或者批評我，反而鼓勵同强化我。每次聚會結束之後，無論長老幾忙都好，至少會有一位過嚟關心我。過去嘅經歷令我覺得自己唔配得到上帝嘅愛，不過耶和華一次又一次通過會衆同長老向我表明佢嘅愛。我祈求耶和華幫助我永遠留喺佢身邊。”
比管教更令人痛苦嘅事
18,19．有乜嘢事比管教更令人痛苦？請舉例。
18 你可能覺得受管教係一件痛苦嘅事，不過拒絶上帝嘅管教會令自己更痛苦。（希伯來書12:11）請睇吓該隱同西底家王嘅例子。耶和華見到該隱憎恨亞伯，甚至想殺死佢，就勸告該隱話：“你點解發嬲？點解咁沮喪呢？你如果去行善，唔係可以受顯揚咩？但係你如果唔去行善，罪就埋伏喺門口，要趁機捉住你。你能够制伏罪咩？”（創世記4:6,7）該隱冇接受耶和華嘅管教，殺死咗弟弟，結果餘生都要承擔惡果。（創世記4:11,12）如果該隱聽從耶和華，就唔會經歷咁大嘅痛苦。
19 西底家係一個軟弱邪惡嘅君王。佢統治期間，耶路撒冷嘅人民陷於水深火熱之中。先知耶利米多次告誡西底家要離棄惡行，但係西底家拒絶呢啲管教，最終悲劇收場。（耶利米書52:8-11）耶和華一定唔希望我哋承受呢啲不必要嘅痛苦！（請讀以賽亞書48:17,18）
20．接受同拒絶上帝管教嘅人分别有點樣嘅未來？
20 今日，世上好多人都嘲笑甚至無視上帝嘅管教。不過好快，呢啲拒絶耶和華管教嘅人就會承受更痛苦嘅後果。（箴言1:24-31）所以，我哋“要聽從管教，增長智慧”。正如箴言4:13所講，“要持守管教，不可放鬆，謹守不忘，因為呢個就係你嘅生命”。
