事奉賜人自由嘅上帝耶和華
“耶和華嘅靈喺邊度，邊度就有自由。”——哥林多後書3:17
1,2．（甲）點解使徒保羅時代嘅人關注自由同奴隸一類嘅話題？（乙）保羅指出邊個係真正自由嘅源頭？
早期嘅基督徒生活喺羅馬帝國統治之下。當時羅馬帝國嘅人都對自己嘅法律同司法制度，以及所享有嘅自由感到自豪。不過，羅馬帝國大部分權力同輝煌成就都係建立喺奴隸嘅血汗之上。曾經有一段時期，羅馬百分之三十嘅人口都係奴隸。當時大多數人，包括基督徒，肯定非常關注自由同奴隸呢一類嘅話題。
2 使徒保羅喺佢嘅書信入面多次提及自由。雖然當時嘅人熱衷追求社會或者政治嘅改革，但係呢啲並唔係保羅傳道嘅目的。保羅冇倚靠世上嘅機構或統治者嚟追求自由，而係同基督徒同工一齊努力傳道，向人傳講上帝王國嘅好消息，幫助人認識耶穌基督獻出嘅寶貴贖價。保羅向信徒同工指出真正自由嘅源頭係邊個。喺寫俾哥林多會衆嘅第二封信入面，保羅清楚提到：“耶和華係靈。耶和華嘅靈喺邊度，邊度就有自由。”（哥林多後書3:17）
3,4．（甲）喺哥林多後書3:17之前，保羅談及乜嘢？（乙）我哋想享有嚟自耶和華嘅自由，就必須點樣做？
3 保羅喺哥林多後書提到，因為摩西之前喺西奈山上企喺耶和華嘅天使面前，所以佢從山上落嚟嘅時候面上顯出榮光。以色列人見到摩西面上發光就好驚，於是摩西用帕子蒙住自己嘅面。（出埃及記34:29,30,33；哥林多後書3:7,13）保羅話：“不過人歸附耶和華，帕子就被除去。”（哥林多後書3:16）保羅噉樣講係咩意思呢？
4 正如上一篇課文所講，唯有創造萬物嘅耶和華先至有絶對同毫無限制嘅自由。即係話，喺耶和華面前，同埋喺“耶和華嘅靈”所在之處就有自由。為咗享有呢種自由並從中得益，我哋就必須“歸附耶和華”，同佢有親密嘅關係。以色列人喺曠野嘅時候，冇用屬靈嘅觀點去睇耶和華為佢哋所做嘅事。佢哋嘅内心同頭腦就好似俾帕子蒙住噉，結果從埃及得到釋放之後，就用啱啱得到嘅自由嚟滿足自己嘅慾望。（希伯來書3:8-10）
5．（甲）耶和華嘅靈帶俾我哋邊種自由？（乙）點解話，一個人就算被囚禁或者奴役都能够享有耶和華所賜嘅自由？（丙）我哋需要諗吓邊啲問題？
5 耶和華嘅靈所帶嚟嘅自由，唔單止使人擺脱實際嘅奴役，仲可以成就人冇辦法做到嘅事，就係擺脱罪同死亡嘅奴役，以及脱離錯誤宗教同習俗嘅束縛。（羅馬書6:23；8:2）呢個真係無與倫比嘅自由！就算一個人被囚禁或者奴役，佢都能够享有呢種自由。（創世記39:20-23）袁迺慰姊妹同金海露弟兄由於信仰嘅緣故被監禁多年。你可以喺JW電視網聽佢哋講述自己嘅經歷。（點擊“訪談同經歷”>“忍受逆境”）請諗吓：我哋可以點樣表明自己珍視呢種自由？我哋可以點樣明智運用呢種自由？
珍視上帝所賜嘅自由
6．乜嘢表明以色列人對耶和華所賜嘅自由冇感激之心？
6 如果我哋知道一份貴重禮物嘅真正價值，就會向送禮嘅人表達感激之情。耶和華拯救咗以色列人，但係佢哋並冇感激為佢哋帶嚟自由嘅上帝。離開埃及短短幾個月之後，佢哋就開始懷念埃及嘅食物，對上帝大發怨言，甚至想返翻埃及。佢哋將“魚……黃瓜、西瓜、韭葱、洋葱、大蒜”睇得比有自由崇拜真神耶和華更加重要。難怪耶和華對佢哋發怒。（民數記11:5,6,10；14:3,4）呢個真係我哋嘅前車之鑒！
7．保羅嘅行動點樣同哥林多後書6:1所講嘅一致？我哋可以點樣效法佢？
7 使徒保羅勸勉基督徒，唔好將耶和華通過佢嘅愛子耶穌賜俾我哋嘅自由視為理所當然。（請讀哥林多後書6:1）身為唔完美嘅人，保羅係罪同死亡嘅奴隸，呢個令佢嘅良心飽受煎熬。不過，佢懷住感激之情話：“感謝上帝通過我哋嘅主耶穌基督救咗我！”點解佢噉樣講？佢解釋話：“因為聖靈使人享有同基督耶穌聯合嘅生命，聖靈嘅律法釋放咗你，令你擺脱罪同死嘅律法。”（羅馬書7:24,25；8:2）同保羅一樣，我哋唔應該忘記，係耶和華幫助我哋擺脱罪同死亡嘅奴役。通過贖價，我哋能够以清白嘅良心，喜樂噉事奉耶和華。（詩篇40:8）
你追求個人利益定係善用自由為耶和華作更多嘅服務？（請睇第8-10段）
8,9．（甲）關於點樣運用自由，使徒彼得提出乜嘢勸告？（乙）有啲人點樣濫用自己嘅自由？
8 除咗表示感激之外，我哋都應該謹記，千祈唔好濫用自己寶貴嘅自由。使徒彼得提醒我哋，唔好用我哋嘅自由作為順應肉體慾望嘅藉口。（請讀彼得前書2:16）呢個提醒令我哋諗起，以色列人喺曠野嘅下場。今日，我哋面對嘅危險可能比以色列人嘅更加多。撒但同佢嘅世界喺飲食、娛樂、衣着打扮等方面都使我哋受到好多誘惑。精明嘅廣告商經常用俊男美女做宣傳，令我哋覺得必須要買一啲自己根本唔需要嘅嘢。我哋好容易就會落入呢啲圈套，濫用自己嘅自由！
9 彼得嘅勸告亦都適用喺生活嘅其他重要方面，例如教育、工作或事業。今日好多人都鼓勵年輕人追求高等教育。外界統計嘅數據往往顯示，大學畢業生嘅收入同高中畢業生嘅收入有好大差異，所以好多年輕人以為接受高等教育就可以揾到高收入、令人羡慕嘅工作。另外，佢哋考慮到自己所作嘅決定會對將來産生深遠嘅影響，所以佢哋可能覺得接受高等教育係一個唔錯嘅選擇。佢哋同父母應該謹記乜嘢？
10．我哋運用自由為個人嘅事做決定嘅時候，應該謹記乜嘢？
10 有啲人認為，既然呢個係個人嘅決定，只要自己良心覺得冇問題，就可以自由噉做自己想做嘅事。佢哋可能諗到，保羅喺食物呢件事上對哥林多基督徒講嘅話，“我嘅自由何必受人哋嘅良心妄斷呢？”（哥林多前書10:29）雖然，喺接受教育同就業方面我哋有自由自己做決定，但係要記住，我哋嘅自由係相對嘅。我哋所作嘅決定會帶嚟唔同嘅結果。由於呢個原因，保羅話：“凡事都可以做，但唔係樣樣都有益處。凡事都可以做，但唔係樣樣都强化人。”（哥林多前書10:23）所以，我哋雖然有自由為個人嘅事做決定，不過唔應該只係考慮自己嘅意願，仲要留意其他更重要嘅事。
明智運用自由事奉上帝
11．耶和華出於乜嘢目的使我哋得到釋放？
11 彼得提醒我哋唔好濫用自由，而係要善用自由“做上帝嘅奴隸”。所以，耶和華通過耶穌使我哋得到釋放，脱離罪同死嘅勞役，目的係想我哋用自己嘅一生事奉佢。
12．挪亞一家為我哋立下點樣嘅榜樣？
12 用我哋嘅時間同精力全心事奉耶和華，就係運用自由嘅最好方法。噉樣我哋就會得到保護，唔會專注於追求世俗目標或者只顧滿足個人慾望。（加拉太書5:16）請睇吓族長挪亞同佢家人嘅例子。佢哋生活喺一個充滿暴力同不道德嘅世界。但係，佢哋並冇受周圍嗰啲只顧滿足自己慾望嘅人影響。佢哋善用自由，喺耶和華吩咐嘅事上保持忙碌，建造方舟、為自己同動物儲存食物以及向人發出警告。“挪亞就噉樣做。凡係上帝吩咐佢嘅，佢都照住做。”（創世記6:22）結果挪亞同家人能够活着渡過大洪水。（希伯來書11:7）
13．耶穌將自己接獲嘅乜嘢任務交託俾門徒？
13 今日，耶和華吩咐我哋要做乜嘢？作為耶穌嘅門徒，我哋清楚知道上帝交託嘅任務就係向人傳道。（請讀路加福音4:18,19）今日，大多數人依然俾現行制度嘅神蒙蔽住心眼，受宗教、經濟同政治制度勞役。（哥林多後書4:4）跟從耶穌嘅榜樣，幫助人認識同崇拜賜人自由嘅上帝耶和華，係我哋嘅殊榮。（馬太福音28:19,20）不過，做呢個工作一啲都唔容易。喺某啲地方，人對我哋傳講嘅信息冇興趣，甚至對我哋充滿敵意。既然耶和華吩咐我哋傳道，噉我哋應該諗吓：“我可以點樣善用自己嘅自由為耶和華作出更多服務？”
14,15．上帝嘅好多忠僕點樣擴大傳道服務？（請睇吓課文開頭嘅圖片）
14 好多弟兄姊妹意識到而家時勢緊迫，於是簡化生活，參與全時傳道工作，呢個的確令人大受鼓勵。（哥林多前書9:19,23）佢哋有啲喺自己嘅地區服務，有啲就搬去需求更大嘅地區。喺過去五年，有超過25萬個弟兄姊妹開始做正規先驅，而家全球嘅正規先驅人數已經超過110萬。有咁多人善用自由事奉耶和華，真係振奮人心！（詩篇110:3）
15 乜嘢幫助呢啲弟兄姊妹明智運用自己嘅自由？過去30年來，約翰同朱迪思喺唔同嘅國家服務過。佢哋記得，1977年先驅訓練班啱啱開始嘅時候，學員都受到鼓勵搬去需求更大嘅地區服務。為咗專心追求呢個目標，約翰換咗好多份工作，噉佢哋就可以保持過簡單嘅生活。後來，佢哋去咗國外服務。喺國外，佢哋面對好多困難，例如要學習新語言，適應唔同嘅文化，亦都要忍受惡劣嘅氣候。不過佢哋發現，只要向耶和華禱告，全心信賴佢，就可以幫助自己克服困難。佢哋對咁多年來嘅海外服務有咩感受？約翰話：“我覺得自己全心投入嘅工作係最有意義嘅。對我嚟講，耶和華越來越真實，就好似一個仁愛嘅父親噉。雅各書4:8話：‘你哋要親近上帝，上帝就會親近你哋。’而家我更加明白呢節經文嘅意思。我知道，我已經揾到自己一直夢寐以求、令人心滿意足嘅生活。”
16．成千上萬嘅弟兄姊妹點樣明智噉運用佢哋嘅自由？
16 好多人都好似約翰同朱迪思噉長期從事全時服務。但係，有啲人受環境所限，只能够參與短期嘅全時服務。雖然係噉，好多人都盡力參與組織喺世界各地嘅志願建築工作。例如，紐約沃威克建造新嘅世界總部嗰時，大概有2萬7000個弟兄姊妹調整自己嘅生活嚟參與呢項工作，有啲做咗兩個星期，有啲一年，有啲甚至時間更長。為咗喺沃威克工作，好多弟兄姊妹作出好大嘅犧牲。佢哋善用自己嘅自由嚟讚美同榮耀賜人自由嘅上帝耶和華，的確係我哋嘅好榜樣！
17．如果我哋善用自由，將來就可以享有乜嘢福分？
17 我哋好開心可以認識耶和華，而且享有正確崇拜所帶嚟嘅自由。願我哋所作嘅決定表明自己珍視呢種自由。我哋應該竭盡全力為耶和華服務，而唔係濫用佢賜俾我哋嘅自由。耶和華嘅預言應驗嗰陣，我哋就可以得享佢應許嘅福分。佢話：“受造嘅衆生都獲得釋放，唔再受腐敗所奴役，反而得享上帝兒女榮耀嘅自由”。（羅馬書8:21）
