年輕人，你係咪盡力追求屬靈目標？
“要將你嘅事交託俾耶和華，你嘅計劃就能够成功。”——箴言16:3
1-3．（甲）所有年輕人面對乜嘢情況嗰時會感到迷茫？請用比喻説明。（請睇吓課文開頭嘅圖片）（乙）乜嘢可以幫助年輕基督徒作出明智嘅決定？
假設，你要坐長途巴士去好遠嘅地方參加一個重要活動。喺巴士站，你見到人山人海，又有好多唔同嘅巴士，你可能會覺得有啲迷茫。好在你清楚知道自己嘅目標，就係要揾到可以到達目的地嘅巴士。但係，如果你求其上一部巴士，又唔知部巴士去邊度，噉就好容易行錯方向。
2 生命就好似一個長途旅程，而今日嘅年輕人就好似嗰啲要坐巴士嘅乘客。由於面前有好多機會同選擇，所以好多時佢哋會感到不知所措。年輕人，如果你清楚知道自己嘅人生目標係乜嘢，就更加容易做決定嘞。你應該選擇邊個方向呢？
3 呢篇課文會回答呢個問題，亦都會鼓勵你喺生活各方面力求取悦耶和華。呢個意味住，喺教育、就業、家庭責任等方面都要聽從耶和華嘅指引，即係要追求屬靈目標。年輕人全心事奉耶和華，就可以確信自己會得到耶和華嘅賜福，享有一個成功嘅人生。（請讀箴言16:3）
點解要定立屬靈目標？
4．呢篇課文會討論乜嘢？
4 自細就定立屬靈目標係明智嘅。點解？我哋會分析三個原因。頭兩個原因會幫助你睇出，努力追求屬靈目標可以點樣强化自己同耶和華嘅關係；第三個原因强調自細定立屬靈目標所帶嚟嘅益處。
5．定立屬靈目標嘅主要原因係乜嘢？
5 定立屬靈目標嘅主要原因係，向耶和華表明我哋感激佢對我哋表現嘅愛同佢為我哋所做嘅一切。詩篇執筆者話：“我眼中嘅美事，就係感謝耶和華，……耶和華啊，你使我因你嘅作為而歡喜；我因你手所做嘅事而歡呼。”（詩篇92:1,4）年輕人都應該認真諗吓，耶和華賜俾你嘅一切——生命、信仰、聖經、會衆、未來美好嘅希望。只要你將屬靈嘅事放喺第一位，就可以更加親近上帝，亦都表明你感激上帝賜俾你咁多福分。
6．（甲）追求屬靈目標點樣加深我哋同耶和華嘅關係？（乙）自細就可以定立乜嘢目標？
6 第二個原因係，你一旦開始努力追求屬靈目標，耶和華就會記住你所做嘅善工。你同耶和華嘅關係會因此變得更加親密。使徒保羅承諾話：“上帝係正義嘅，絶對唔會忘記你哋所做嘅工作同你哋為佢嘅名所顯嘅愛心”。（希伯來書6:10）無論你年紀幾細，都可以定立屬靈目標。克莉斯汀10歲嘅時候，就決心要經常閲讀現代忠僕嘅人物生平。托比12歲嗰陣計劃喺受浸之前讀晒成本聖經。馬克西姆同妹妹諾愛米受浸嘅時候分别係11歲同10歲。之後，佢哋兩個都立下目標去伯特利服務。為咗幫助自己繼續努力追求呢個目標，佢哋將伯特利申請表貼喺屋企嘅牆上。你都可以諗吓，邊啲屬靈目標對你嚟講係重要嘅，然後努力去追求。（請讀腓立比書1:10,11）
7,8．（甲）定立屬靈目標可以點樣幫助人更加容易作出決定？（乙）點解一個姊妹當初放棄讀大學？
7 第三個原因係，自細定立目標可以幫助我哋喺生活嘅其他事上作出明智嘅決定。青少年要喺教育、就業同其他事上做決定，呢個就好似一個人喺十字路口要選擇行邊條路。如果你知道邊條路可以去到目的地，就好容易作出選擇。同樣，如果你知道自己嘅目標係乜嘢，就更加容易作出正確嘅決定。箴言21:5話：“勤奮人計劃周詳，必致成功”。你越早定立屬靈目標，就越快達到。達瑪莉絲喺十幾歲嘅時候就要做一個重要決定。我哋嚟睇吓佢嘅經歷。
8 達瑪莉絲學習成績優秀。佢完成基本學業之後，本來可以得到一筆獎學金去大學主修法律。但係，佢放棄咗呢個機會，選擇喺銀行工作。點解？達瑪莉絲話：“我好細個就決心要做先驅，呢個意味住我唔會揾一份全職工作。如果得到法律學位，我可能會賺好多錢，不過就好難做部分時間嘅工作。”達瑪莉絲而家已經做咗20年先驅，佢有冇對自己十幾歲嗰時定立嘅目標同所作嘅決定感到後悔？佢繼續話：“喺銀行工作嘅時候，我經常要同律師打交道。如果我讀法律，我嘅工作就可能係佢哋而家做緊嘅工作。佢哋好多人都工作得唔開心。相反，我嘅先驅目標幫助我唔需要過度為世俗工作煩惱。多年來，為耶和華服務使我得到好大嘅喜樂。”
9．點解會衆嘅年輕人值得我哋衷心稱讚？
9 世界各地嘅會衆有好多年輕人都值得我哋衷心稱讚。佢哋信賴耶和華，全心追求屬靈目標。呢啲年輕人喺生活上得到好多喜樂，同時亦都學會點樣喺教育、就業、家庭生活等事上跟從耶和華嘅指引。所羅門王話：“你要全心信賴耶和華，……喺你所行嘅一切事上都要留意佢，佢必修直你嘅路。”（箴言3:5,6）基督徒會衆嘅年輕人喺耶和華眼中非常寶貴。耶和華好愛佢哋，仲會保護、指引同祝福佢哋。
做好準備向人作見證
10．（甲）點解我哋應該重視傳道工作？（乙）我哋可以點樣有效噉做傳道工作？
10 一個喺生活上盡力取悦耶和華嘅年輕人特别重視傳道工作。耶穌基督話“好消息必須先傳遍萬國萬族”。（馬可福音13:10）傳道工作係當務之急，所以我哋應該以呢個工作為生活重心。你可唔可以定立目標，用更多時間傳道？你可唔可以考慮做先驅？如果你做傳道工作唔係做得好喜樂，噉可以點樣做？你可以點樣更有效噉作見證？兩個基本方法可以幫到你：好好準備；唔好放棄同人分享聖經信息。之後你可能會意外噉發現，原來做傳道係咁開心嘅。
你點樣為作見證做準備？（請睇第11,12段）
11,12．（甲）年輕人可以點樣做好準備向人作見證？（乙）一個年輕人喺學校點樣把握機會作見證？
11 首先，你可以諗吓同學通常會問啲咩問題，然後事先做好準備，睇吓點樣回答佢哋。例如，佢哋可能會問：“你點解相信上帝存在？”喺我哋嘅網站jw.org有一啲文章可以回答呢個問題。你可以點擊“聖經與生活”>“青少年”，喺入面揾出“我為甚麽相信有上帝呢？”呢張學習單。學習單可以幫助你用自己嘅話回答呢個問題。你可以運用入面嘅三節經文同人推理——希伯來書3:4；羅馬書1:20；詩篇139:14。你可以用呢啲學習單為唔同嘅問題做好準備。（請讀彼得前書3:15）
12 只要有機會，你就可以鼓勵同學自己瀏覽jw.org。盧卡就係噉樣做嘅。有一次上課嘅時候，老師同大家討論唔同嘅宗教。盧卡留意到，教科書上一啲對耶和華見證人嘅描述唔正確。雖然盧卡一開始有啲猶疑，但佢最後都鼓起勇氣請求老師俾機會佢澄清呢啲錯誤，結果得到批准。盧卡唔單止有機會解釋佢嘅信仰，亦都向全班介紹咗我哋嘅網站。之後，老師仲向全班同學布置功課，叫佢哋自己睇白板動畫片“不用拳頭也可以打敗惡霸！”。盧卡好開心自己向大家作咗一個美好嘅見證。
13．情況唔順利嘅時候，點解我哋唔應該放棄？
13 人生嘅旅途唔會總係一帆風順。（提摩太後書4:2）難題出現嘅時候，千祈唔好放棄你嘅目標。卡塔琳娜17歲嗰陣嘅目標係，向每一個同事作見證。卡塔琳娜多次受到一個同事侮辱，但係佢都冇放棄自己嘅目標。喺唔順利嘅情況下，卡塔琳娜都保持良好嘅品行，使另一個同事漢斯留低深刻嘅印象。結果，漢斯開始睇我哋嘅出版物，學習聖經，後來仲受咗浸。卡塔琳娜因為搬咗屋，所以唔知道後來發生嘅事。13年後，佢同屋企人喺聚會嘅時候得知，發表演講嘅弟兄竟然係漢斯。可想而知，卡塔琳娜有幾咁驚喜！由於卡塔琳娜冇放棄向同事傳道嘅目標，結果得到非常大嘅成果！
千祈唔好分心
14,15．（甲）面對壓力嘅時候，年輕人應該謹記乜嘢？（乙）年輕人可以點樣應付同輩壓力？
14 呢篇課文鼓勵你下定決心，用自己嘅一生全心事奉耶和華，努力追求屬靈目標。可能你身邊有啲年輕人只係顧住吃喝玩樂，仲叫埋你一齊去。你應該清楚表明自己嘅立場唔會改變。請諗吓課文開頭巴士嘅比喻，你會唔會因為見到某部巴士上嘅乘客玩得好開心就貿貿然上車？千祈唔好因為同輩壓力而分心。
15 有幾個方法可以幫助你應付同輩壓力。例如，避開容易受到誘惑嘅環境；（箴言22:3）謹記向同伴壓力屈服會導致乜嘢後果；（加拉太書6:7）承認自己需要指引，謙卑噉向父母同靈性成熟嘅弟兄姊妹請教。（請讀彼得前書5:5,6）
16．一個弟兄嘅經歷點樣表明謙卑嘅態度會帶嚟益處？
16 謙卑嘅態度推使克里斯托夫接受明智嘅勸告。克里斯托夫受浸之後冇幾耐，就開始經常去一間健身室做運動。健身室嘅一啲年輕人邀請佢加入佢哋嘅運動俱樂部。克里斯托夫同一個長老講呢件事。長老叫克里斯托夫喺做決定之前諗吓一啲潛在嘅危險，例如會唔會受競爭精神影響。不過，克里斯托夫都係加入咗俱樂部。一段時間過後，佢發現佢參加嘅運動有啲暴力，而且仲好危險。佢又同幾個長老講呢件事，之後佢哋都根據聖經向佢提出勸告。克里斯托夫話：“耶和華通過長老俾咗我好好嘅建議。雖然我之前冇即刻接受，但係最終我都聽從咗耶和華嘅勸告。”你有冇謙卑噉接受明智嘅勸告？
17,18．（甲）耶和華希望年輕人過點樣嘅生活？（乙）有啲成年人後悔乜嘢？年輕人可以點樣避免呢種情況？請舉例。
17 “年輕人，你年輕嘅時候要歡樂。趁年少嘅日子，你嘅心即管好好享受。”（傳道書11:9）耶和華的確希望年輕人開心快樂。呢篇課文强調咗年輕人獲得快樂嘅一個方法，就係全心追求屬靈目標，做任何計劃之前要先考慮耶和華嘅睇法。你越早噉樣做，就越早體會到耶和華嘅指引、保護同賜福。要沉思耶和華通過佢嘅話語聖經俾你嘅明智勸告，亦都要聽從聖經嘅教導，“趁年輕嘅日子，就要將你偉大嘅創造主謹記在心”。（傳道書12:1）
18 青春嘅歲月好短暫。年輕人好快會長大成人。好多成年人都後悔自己年輕嗰陣追求咗錯誤嘅目標，或者根本冇定立任何目標。如果年輕人盡力追求屬靈目標，無論而家定係將來，佢哋都會為自己嘅決定感到心滿意足。麥婭娜十幾歲嘅時候喺運動方面表現出色，所以受到邀請參加冬季奧運會。不過，佢選擇投身全時傳道工作。30年後，麥婭娜依然緊守崗位，同丈夫一齊從事全時服務。佢話：“名譽、榮耀、權勢、財富都不過係過眼雲煙，冇乜價值。事奉上帝同埋幫助人親近上帝先至係真正崇高同永恆嘅目標。”
19．趁年輕嘅時候就定立屬靈目標會有乜嘢益處？
19 會衆嘅年輕人確實配得稱讚。你哋成功應付挑戰，決心用自己嘅一生去事奉耶和華。你哋定立屬靈目標，而且以傳道工作為生活重心。你哋下定決心唔受世界嘅事影響而分心。你哋嘅工作係有價值嘅。弟兄姊妹好愛你哋，一定會全力支持你哋。只要你哋全心信賴耶和華，你哋嘅計劃就會成功。
