效法耶和華——鼓勵人嘅上帝
“願稱頌歸於［上帝］……我哋遭遇各樣患難嘅時候，上帝都安慰 *我哋”——哥林多後書1:3,4
耶和華鼓勵古代嘅忠僕
2．耶和華點樣鼓勵挪亞？
2 耶和華嘅忠僕挪亞生活喺一個不敬虔嘅世界。當時，到處充斥住暴力同變態嘅性行為，而事奉耶和華嘅只有挪亞一家。呢一切可能會令挪亞變得灰心。（創世記6:4,5,11；猶大書6）不過耶和華使佢鼓起勇氣，繼續堅持“與上帝同行”。（創世記6:9）耶和華話俾挪亞知，佢準備要毁滅當時嘅邪惡世界，亦都講明挪亞要採取乜嘢行動先可以保全一家人嘅性命。（創世記6:13-18）耶和華向挪亞表明，自己係鼓勵人嘅上帝。
3．約書亞得到乜嘢鼓勵？（請睇吓課文開頭嘅圖片）
3 後來，約書亞要完成一個艱巨嘅任務，就係帶領上帝嘅子民進入應許之地，征服當地嘅國家。約書亞的確有理由感到恐懼，因為呢啲國家擁有强大嘅軍隊。於是耶和華差派摩西去强化佢。上帝話：“你要任命約書亞，鼓勵佢，强化佢，因為佢要喺民衆前面過河，帶領佢哋承受你所觀看嘅土地。”（申命記3:28）進入應許之地之前，耶和華親自鼓勵約書亞話：“我唔係吩咐過你咩？你要勇敢堅强，唔好恐懼，亦都唔好驚慌，因為無論你去到邊度，你嘅上帝耶和華都與你同在。”（約書亞記1:1,9）呢番話真係鼓舞人心！
4,5．（甲）耶和華點樣鼓勵佢古代嘅子民？（乙）耶和華點樣鼓勵佢嘅愛子？
4 耶和華唔係只係鼓勵個别嘅人，亦都會鼓勵佢嘅全體子民。被擄到巴比倫嘅猶太人好需要得到鼓勵，所以耶和華同佢哋講：“你唔使怕，因為我與你同在。你唔需要四顧張望，因為我係你嘅上帝，我要使你堅强。我一定會幫助你，一定會用正義嘅右手扶持你。”（以賽亞書41:10）早期同今日嘅基督徒都得到上帝同樣嘅保證。（請讀哥林多後書1:3,4）
5 耶穌自己都受到天父嘅鼓勵。喺受浸嘅時候，耶穌聽到天上發出聲音話：“呢個係我嘅兒子，係我所愛嘅，係我所悦納嘅。”（馬太福音3:17）耶穌一定從天父所講嘅話得到好大嘅鼓勵去執行地上嘅傳道工作！
耶穌點樣鼓勵人
6．銀元嘅比喻點樣鼓勵人？
6 耶穌效法天父嘅榜樣。喺預言呢個事物制度嘅終結嗰陣，耶穌講咗銀元嘅比喻。比喻入面嘅主人稱讚每一個忠心嘅奴隸話：“又良善又忠信嘅奴隸，你做得好！你喺好少嘅事上忠信。我要委派你管理好多嘅事。嚟分享你主人嘅喜樂喇。”（馬太福音25:21,23）耶穌嘅話大大鼓勵咗佢嘅門徒繼續忠心事奉耶和華！
7．耶穌點樣鼓勵佢嘅使徒，特别係彼得？
7 耶穌嘅使徒經常爭論，佢哋當中邊個最大，不過耶穌耐心噉鼓勵佢哋要謙卑自抑，要服事人而唔係受人服事。（路加福音22:24-26）彼得多次令耶穌失望。（馬太福音16:21-23；26:31-35,75）不過耶穌冇放棄彼得，而係鼓勵佢，仲吩咐佢去强化弟兄姊妹。（約翰福音21:16）
古代嘅忠僕點樣鼓勵人
8．希西家點樣鼓勵將領同猶大子民？
8 耶穌喺鼓勵人方面為我哋立下完美嘅榜樣。其實喺佢嚟到地上之前，耶和華嘅忠僕就已經意識到鼓勵人係好重要嘅。受到亞述人恐嚇嘅時候，希西家召集佢嘅將領同猶大子民，鼓勵佢哋。結果，“人民因［佢］嘅話都剛强起嚟”。（請讀歷代志下32:6-8）
9．喺鼓勵人方面，我哋從約伯記學到乜嘢？
9 雖然約伯自己都需要受到鼓勵，不過佢亦都教導人點樣鼓勵其他人。佢三個朋友嘅安慰“使［約伯］苦惱”。約伯同佢哋講，如果佢哋互換立場，佢“會開口鼓勵［佢哋］，講啲話安慰［佢哋］，減輕［佢哋］嘅痛楚”。（約伯記16:1-5）最終，約伯從以利户同耶和華嗰度得到鼓勵。（約伯記33:24,25；36:1,11；42:7,10）
10,11．（甲）點解耶弗他嘅女需要受到鼓勵？（乙）今日我哋可以鼓勵邊啲人？
10 喺古代嘅例子當中，另一個需要鼓勵嘅人就係耶弗他嘅女。同亞捫人交戰之前，士師耶弗他發誓話，如果耶和華使佢獲得勝利，佢就會將第一個從屋企出嚟迎接佢嘅人獻俾耶和華。結果，第一個出嚟迎接耶弗他，為佢慶祝勝利嘅竟然係佢嘅獨生女。耶弗他内心悲痛，但係佢信守承諾，將佢嘅女送去示羅嘅聖幕。（士師記11:30-35）
11 雖然耶弗他噉樣做一啲都唔容易，但係對佢嘅女嚟講就更加難嘞。耶弗他嘅女願意順從父親嘅決定，終生喺聖幕服務。（士師記11:36,37）呢個意味住，佢要放棄結婚生子，而佢嘅家族將會後繼無人。佢比任何人更需要得到安慰同鼓勵。聖經記載話：“之後，喺以色列有個規例：以色列嘅女子年年都去稱讚基列人耶弗他嘅女，每年四日。”（士師記11:39,40）好多獨身嘅基督徒善用自己嘅恩賜，更加專心做“主嘅事”，佢哋唔係應該受到稱讚同鼓勵咩？（哥林多前書7:32-35）
使徒點樣鼓勵弟兄姊妹
12,13．彼得點樣强化弟兄姊妹？
12 喺犧牲前嘅嗰一晚，耶穌同使徒彼得講：“西門，西門，撒但一直要篩你哋好似篩小麥噉。但係我已經為你懇切祈求，免得你信心盡失。你回頭之後，要强化你嘅弟兄。”（路加福音22:31,32）
使徒嘅書信大大鼓勵咗1世紀嘅基督徒。今日，我哋仍然可以從中得到鼓勵（請睇第12-17段）
13 彼得係早期基督徒會衆嘅支柱。（加拉太書2:9）佢喺五旬節以及之後所立下嘅勇敢榜樣鼓勵咗佢嘅弟兄姊妹。喺佢傳道生涯結束之前，佢寫信俾基督徒同工話：“我略略寫咗一啲話俾你哋，目的係鼓勵你哋，並且懇切作證呢個係上帝真正嘅分外恩典。你哋要喺呢個恩典上堅立不移”。（彼得前書5:12）彼得受聖靈啟示而寫嘅書信鼓勵咗當時嘅基督徒。我哋而家正等待耶和華實現佢嘅應許，的確需要噉樣嘅鼓勵！（彼得後書3:13）
14,15．使徒約翰寫嘅書信點樣鼓勵我哋？
14 使徒約翰亦都係早期基督徒會衆嘅支柱。約翰喺佢嘅福音書入面生動記載咗耶穌嘅傳道事迹。從古至今，基督徒從呢啲記載得到好大嘅鼓勵。只有約翰福音提到，耶穌話愛係真基督徒嘅標誌。（請讀約翰福音13:34,35）
15 我哋喺約翰嘅三封書信亦都可以揾到更多嘅真理寶石。如果我哋因為犯錯而感到灰心，“耶穌嘅血……除淨我哋嘅所有罪”呢句話，唔係令我哋大感安舒咩？（約翰一書1:7）如果我哋仲係不斷自責，讀到“上帝比我哋嘅心大”呢句話嗰陣，我哋唔係對上帝充滿感激之情咩？（約翰一書3:20）只有約翰寫到，“上帝就係愛”。（約翰一書4:8,16）佢第二第三封書信鼓勵基督徒要繼續“按真理行事”。（約翰二書4；約翰三書3,4）
16,17．使徒保羅點樣鼓勵早期嘅基督徒？
16 喺鼓勵弟兄姊妹方面，使徒保羅係傑出嘅榜樣。睇嚟喺公元1世紀，大多數使徒都依然留喺耶路撒冷——中央長老團嘅所在地。（使徒行傳8:14；15:2）猶地亞嘅基督徒向嗰啲受猶太教影響而相信只有一位上帝嘅人傳講基督嘅信息。另一方面，使徒保羅就受聖靈差遣，向希臘-羅馬世界嗰啲信奉多神嘅人傳道。（加拉太書2:7-9；提摩太前書2:7）
17 保羅喺相當於今日嘅土耳其、希臘同意大利嘅廣大地區向非猶太人傳道，亦都喺呢啲地區建立基督徒會衆。呢啲新近歸信嘅基督徒“喺自己同胞手中受苦”，所以好需要受到鼓勵。（帖撒羅尼迦前書2:14）大約公元50年，保羅寫信俾成立冇幾耐嘅帖撒羅尼迦會衆，話：“我哋每次喺禱告入面提到你哋所有人，都會感謝上帝，……不斷記念你哋出於信心嘅行為、本住愛心嘅勞苦、對我哋主耶穌基督抱住希望而産生嘅忍耐。”（帖撒羅尼迦前書1:2,3）保羅亦都勸勉佢哋“要不斷彼此鼓勵，互相强化”。（帖撒羅尼迦前書5:11）
中央長老團點樣鼓勵人
18．公元1世紀嘅中央長老團點樣鼓勵腓力？
18 公元1世紀，耶和華通過中央長老團鼓勵所有基督徒，亦都包括喺會衆帶頭嘅弟兄。傳福音者腓力向撒馬利亞人傳講好消息嘅時候，佢得到中央長老團嘅全力支持。中央長老團差派其中兩個成員彼得同約翰，為當地嘅新信徒禱告，使佢哋得到聖靈。（使徒行傳8:5,14-17）腓力同新信徒一定從中央長老團嘅支持得到好大嘅鼓勵！
19．中央長老團發出嘅信點樣影響早期嘅基督徒會衆？
19 後來，中央長老團需要作出一個重大決定。非猶太裔嘅基督徒係咪要同猶太人一樣按照摩西律法接受割禮？（使徒行傳15:1,2）喺聖靈嘅指引下，負有職責嘅弟兄根據聖經推理，決定基督徒唔需要接受割禮。之後中央長老團寫信解釋説明佢哋嘅決定，亦都派出代表將信送到各群會衆。結果點樣？“［弟兄姊妹］讀到信上鼓勵嘅話，非常高興。”（使徒行傳15:27-32）
20．（甲）今日嘅中央長老團點樣鼓勵全球嘅基督徒同工？（乙）下一篇課文會回答乜嘢問題？
20 今日，耶和華見證人嘅伯特利家庭成員、特别全時傳道員乃至整個國際弟兄團體都受到中央長老團嘅鼓勵。結果，好似1世紀嘅基督徒噉，弟兄姊妹都因為受到鼓勵而深感喜樂！另外，為咗鼓勵嗰啲離開真理嘅人重返上帝嘅組織，2015年中央長老團出版咗《回到耶和華身邊》呢本册子。噉係咪只有負有職責嘅弟兄先至要效法耶和華鼓勵人呢？下一篇課文會回答呢個問題。
^ 2段 亦都可以譯作“鼓勵”。
