屬靈大豐收!
耶穌預告佢嘅門徒喺最後嘅日子會享有豐盛嘅收穫。(馬太福音9:37;24:14)請睇吓,佢嘅話點樣以一種獨特嘅方式喺烏克蘭外喀爾巴阡州嘅一個地區應驗。呢個地區嘅三個相鄰城鎮就有50群會衆同超過5400個傳道員。 *耶和華見證人嘅數目佔呢三個城鎮人口嘅四分之一!
呢個地區嘅人對我哋嘅傳道工作有乜嘢反應?本地一個叫瓦西里嘅弟兄話:“呢度嘅人好尊重聖經,重視公正,家庭關係緊密,而且樂於助人。”佢又話:“佢哋唔一定會同意我哋嘅信仰,但係你同佢哋分享聖經信息嘅話,佢哋都會留心聆聽。”
當地嘅弟兄姊妹面對嘅挑戰好特别,因為傳道員同人口嘅比率非常高。例如,某個會衆有134個傳道員,但係佢哋嘅傳道地區只有50户人!喺噉嘅情況下,傳道員作出乜嘢調整?
好多弟兄姊妹樂意作出犧牲,去需求更大嘅地區傳道。一個90歲嘅弟兄叫約納什,佢話:“喺我哋會衆嘅傳道地區,傳道員同住户嘅比例係1:2。我平時會喺自己條村傳道,以前身體好嘅時候,會去160公里(100英里)以外嘅一個未分配俾任何會衆嘅地區用匈牙利語傳道。”要幫助其他地區,傳道員就需要有自我犧牲嘅精神。約納什話:“為咗可以搭上火車,我早上四點就要起身。我會一直傳道到傍晚六點先至坐火車返屋企。每個星期我都會去兩三次。”佢覺得自己付出嘅努力有冇價值?佢話:“我從呢種傳道方式得到好大嘅喜樂,亦都好開心可以幫助一個偏遠家庭認識真理。”
當然,唔係當地會衆嘅每個人都可以去偏遠地區傳道,不過所有傳道員,包括年老嘅弟兄姊妹,都努力將好消息傳遍整個地區。2017年,呢三個城鎮一齊舉辦耶穌受難紀念聚會。當時出席人數幾乎係傳道員人數嘅兩倍,即係當地總人口嘅一半。毫無疑問,無論我哋喺邊度服務,都可以“多做主嘅工作”。(哥林多前書15:58)
^ 2段 呢幾個城鎮分别係格利博基波季克、上沃季亞涅同尼日尼亞阿普什。