年輕人——要喺信仰上站穩，抵抗魔鬼
“要穿戴上帝所賜嘅全副盔甲，使你哋能够站穩，可以抵抗魔鬼嘅奸計。”——以弗所書6:11
1,2．（甲）點解年輕嘅基督徒能够成功對抗邪惡靈體？（請睇吓課文開頭嘅圖片）（乙）呢篇課文會討論乜嘢？
使徒保羅將基督徒嘅生活比作士兵嘅格鬥。當然，我哋作戰嘅對象唔係人而係撒但同邪靈。雖然敵人係我哋睇唔到嘅，但係佢哋的確存在。撒但同邪靈係經驗豐富、技巧純熟嘅戰士。我哋喺呢場格鬥中似乎好難打贏佢哋，如果我哋係缺乏經驗嘅年輕人，睇嚟就更難取勝。年輕嘅基督徒點樣先可以戰勝呢啲力量超凡嘅邪惡靈體？事實表明，年輕人“靠住主嘅大能大力”能够得勝，而且不斷得到勝利！除咗倚靠上帝嘅力量，佢哋仲要穿上作戰嘅裝備。就好似受到良好訓練嘅士兵噉，佢哋需要“穿戴上帝所賜嘅全副盔甲”。（請讀以弗所書6:10-12）
2 保羅講呢個比喻嘅時候，可能聯想到羅馬士兵嘅盔甲。（使徒行傳28:16）呢篇課文會分析點解呢個比喻好貼切，亦都會討論，年輕人為咗穿上全副屬靈盔甲所面對嘅挑戰同得到嘅益處。
你嘅全副屬靈盔甲着好未？
“用真理束腰”
3,4．點解話聖經真理好似羅馬士兵嘅腰帶？
3 請讀以弗所書6:14。羅馬士兵嘅腰帶可以幫助士兵固定上半身厚重嘅盔甲。腰帶上有金屬片，可以保護腰部。腰帶亦都有堅固嘅金屬扣，用嚟扣住刀劍同匕首。士兵束緊腰帶，就能够站穩，滿懷信心噉投入戰鬥。
4 我哋從上帝話語學到嘅真理就好似腰帶噉，能够保護我哋免受錯誤教導嘅影響。（約翰福音8:31,32；約翰一書4:1）我哋對聖經真理嘅愛越深，就越容易穿上屬靈嘅“胸甲”——按照上帝嘅正義標準生活。（詩篇111:7,8；約翰一書5:3）我哋對真理有清晰嘅理解，就可以滿懷信心對抗我哋嘅敵人。（彼得前書3:15）
5．點解我哋應該講真話？
5 如果我哋將聖經真理好似腰帶噉緊緊束上，我哋就會喺生活上努力實踐聖經嘅教導，同時喺所有事上都會向人講真話。點解我哋唔應該講大話？因為謊言係撒但最成功嘅武器之一。謊言會令講嘅人同埋相信嘅人都受到傷害。（約翰福音8:44）所以，即使我哋唔完美，都要盡力避免講大話。（以弗所書4:25）噉樣做並唔容易。18歲嘅亞碧嘉話：“有時講真話似乎冇咩價值，特别係你講一個大話就可以擺脱困境嘅時候。”噉點解佢仲係盡力講真話？佢話：“只要我講真話，我喺耶和華面前就有一個清白嘅良心。父母同朋友亦都會信任我。”23歲嘅維多利亞話：“你講真話，為自己嘅信仰辯護，可能會俾人欺負。不過，你一定會得到好多益處：你越來越有自信，同耶和華嘅關係更加親密，亦都贏得親友嘅尊重。”冇錯，任何時候都要“用真理束腰”，噉樣做大有價值。
真理嘅腰帶（請睇第3-5段）
“用正義當做胸甲”
6,7．點解將正義比作胸甲？
6 1世紀嘅羅馬士兵所佩戴嘅胸甲係由一塊塊金屬板條互相重疊而成嘅。呢啲板條可以按照士兵嘅身形而彎曲，並用金屬鈎扣固定喺皮帶上。士兵上半身嘅其餘部分都會用好多金屬板條嚟覆蓋。雖然板條甲喺某程度上會限制士兵嘅活動，而且需要士兵經常檢查板條係咪牢固，但係呢種盔甲可以保護到士兵嘅心臟同其他重要部位免受刀劍或者飛箭所傷。
7 耶和華嘅正義標準能够保護我哋嘅内心，就好似胸甲可以保護士兵嘅心臟。（箴言4:23）一個士兵唔會將製造胸甲所需要嘅優質金屬換成劣質金屬，同樣我哋絶對唔會用自己嘅標準取代耶和華嘅正義標準。（箴言3:5,6）相反，我哋必須經常檢查耶和華賜俾我哋嘅“胸甲”係咪依然堅固噉保護住我哋嘅心。
8．點解我哋要堅守耶和華嘅標準？
8 你係咪有時會覺得耶和華嘅正義標準使你有壓力或者限制咗你嘅自由？21歲嘅丹尼爾話：“因為我按照聖經標準生活，老師、同學就取笑我。有一段時間，我失去自信甚至感到沮喪。”佢點樣恢復過嚟？佢話：“最後，我睇出按照耶和華嘅標準生活嘅益處。我嘅一啲‘朋友’開始吸毒，有啲就退學。見到佢哋嘅生活變成噉，我真係好難過。耶和華的確保護我哋。”15歲嘅麥迪遜話：“堅守耶和華嘅標準，唔去參加一啲同輩認為過癮、刺激嘅活動，使我内心好掙扎。”佢點樣做？佢話：“我提醒自己，我肩負住耶和華嘅名，呢啲誘惑只不過係撒但攻擊我嘅手段。每取得一場勝利，我就更加有自信。”
正義嘅胸甲（請睇第6-8段）
“用和平嘅好消息當鞋着喺腳上，預備行路”
9-11．（甲）基督徒要着上嘅鞋係指乜嘢？（乙）乜嘢幫助我哋更容易向人作見證？
9 請讀以弗所書6:15。一個羅馬士兵唔能够赤住腳去作戰。佢哋嘅鞋係用三層皮革製成嘅，既堅固又舒服，幫助佢哋企得更穩。
10 正如羅馬士兵着上鞋先可以作戰，基督徒着上比喻性嘅鞋就能够傳講和平嘅信息。（以賽亞書52:7；羅馬書10:15）即使係噉，我哋把握機會向人作見證係需要勇氣嘅。20歲嘅阿博話：“我以前好怕同同學作見證，覺得好尷尬。睇翻轉頭，我都唔知點解當時自己會噉樣諗。而家我好開心自己有勇氣向同輩作見證。”
11 好多年輕人都發覺，如果佢哋提前為傳道做好準備，就會更容易同人分享好消息。你可以點樣做準備？16歲嘅朱莉婭話：“我經常會放一啲雜誌喺書包度。我耐心聽同學表達佢哋嘅意見同信仰，跟住諗吓有乜嘢可以幫到佢哋。只要我做好準備，就可以同佢哋分享一啲對佢哋特别有幫助嘅資料。”23歲嘅梅肯琪話：“如果你仁慈、耐心噉聆聽對方講話，就會知道佢面對緊乜嘢難題。我盡可能睇晒組織為年輕人提供嘅資料，噉樣我就可以幫助人喺聖經或者jw.org網站揾出對佢哋有用嘅資料。”正如呢啲年輕人所講嘅，你越努力為傳道做準備，你腳上嘅鞋就越穩固。
着上鞋（請睇第9-11段）
“用信心當做大盾牌”
12,13．撒但射出嘅“火箭”係指乜嘢？
12 請讀以弗所書6:16。羅馬士兵使用嘅“大盾牌”係長方形嘅，可以遮擋從肩到膝嘅部位，保護佢免受武器同飛箭襲擊。
13 撒但用乜嘢“火箭”攻擊你？可能係一啲誣衊耶和華嘅話。撒但好想令你覺得上帝根本唔關心你，唔愛你。19歲嘅依達要對抗自卑心理。佢話：“我經常覺得耶和華唔愛我，唔想做我嘅朋友。”佢點樣應付呢種攻擊？依達話：“聚會大大加强我嘅信心。以前我只係坐喺度冇發表任何評論，心諗冇人想聽我嘅評論。而家我為聚會做好準備，每次都努力回答兩三個問題。噉樣做唔容易，不過評論之後感覺好咗好多。弟兄姊妹亦都經常鼓勵我。每次聚會結束後我都覺得耶和華好愛我。”
14．依達嘅經歷强調咗乜嘢事實？
14 依達嘅經歷强調咗一個重要事實：士兵嘅盾牌有固定嘅尺寸，但係我哋信心盾牌嘅大小就在於我哋嘅選擇。（馬太福音14:31；帖撒羅尼迦後書1:3）我哋强化自己嘅信心真係非常重要！
信心嘅大盾牌（請睇第12-14段）
“用救恩當做頭盔”
15,16．點解話得救嘅希望好似一個頭盔？
15 請讀以弗所書6:17。羅馬士兵佩戴嘅頭盔可以保護頭部、頸部同面部。有啲頭盔仲有把手，方便士兵拎喺手上。
16 正如頭盔保護士兵嘅頭部，“得救嘅希望”可以保護我哋嘅思想。（帖撒羅尼迦前書5:8；箴言3:21）得救嘅希望能够使我哋定睛注視上帝嘅應許，用正確嘅觀點去睇問題。（詩篇27:1,14；使徒行傳24:15）但係，如果我哋想自己嘅“頭盔”發揮作用，就一定要戴喺頭上，而唔係拎喺手上。
17,18．（甲）撒但用乜嘢方法誘使我哋除低自己嘅頭盔？（乙）我哋可以點樣表明自己冇被撒但嘅詭計所騙？
17 撒但用乜嘢方法誘使我哋除低自己嘅頭盔？請留意佢點樣引誘耶穌。撒但肯定知道耶穌會統治全人類。不過，喺耶和華指定嘅時間到嚟之前，耶穌要一直等待，仲要喺痛苦中死去。撒但同耶穌講，只要耶穌向佢做一個崇拜嘅舉動就可以即刻成為世界嘅統治者。（路加福音4:5-7）同樣撒但知道，耶和華承諾喺新世界會賜好多奇妙嘅福分俾我哋，不過我哋必須等待呢啲應許實現，其間可能會遭受好多苦難。撒但誘惑我哋，想我哋而家就專注於享受生活，先追求物質財富。撒但唔希望我哋將追求王國放喺生活嘅首位。（馬太福音6:31-33）
18 20歲嘅琪安娜同好多年輕基督徒一樣並冇上當受騙。佢話：“我知道上帝嘅王國係解決我哋所有難題嘅唯一希望。”呢個穩確嘅希望點樣影響佢而家嘅諗法同埋喺生活上所做嘅決定？呢個希望幫助佢謹記，呢個世界所提供嘅一切都係暫時嘅，與其喺事業上努力拼搏，不如善用時間同精力為耶和華服務。
救恩嘅頭盔（請睇第15-18段）
“聖靈嘅劍，就係上帝嘅話語”
19,20．我哋可以點樣更有效噉運用上帝嘅話語？
19 1世紀嘅羅馬士兵使用嘅劍大約有50厘米（20英寸）長，係為格鬥而設計嘅。士兵之所以能够靈活運用手中嘅劍，係因為佢哋每日都練劍。
20 保羅將上帝嘅話語比作耶和華賜俾我哋嘅劍。無論為自己嘅信仰辯護抑或要調整自己嘅思想，我哋都必須學識有技巧噉運用上帝嘅話語。（哥林多後書10:4,5；提摩太後書2:15）你可以點樣提高自己嘅技巧？21歲嘅塞巴斯蒂安話：“我閲讀聖經嗰陣，讀完一章就抄低一節經文。我將自己鍾意嘅經文都摘錄埋一齊。呢個方法使我覺得自己嘅思想更接近耶和華嘅思想。”之前提到嘅丹尼爾話：“閲讀聖經嘅時候，我會抄低一啲喺傳道上幫到人嘅經文。我發覺，當人睇出你對聖經充滿熱情，而且盡力幫助佢哋，佢哋就會有好好嘅反應。”
聖靈嘅劍（請睇第19-20段）
21．點解唔需要害怕撒但同邪靈？
21 我哋可以從本文提到嘅年輕人身上學到，唔需要過度害怕撒但同邪靈。雖然佢哋確實好强大，但並唔係不可戰勝嘅。佢哋唔會永遠存在，喺基督千年統治期間會被囚禁，完全傷害唔到人，等到千年統治之後就會徹底被毁滅。（啟示錄20:1-3,7-10）我哋清楚認識仇敵嘅戰略同意圖，同埋喺耶和華嘅幫助下，就能够喺信仰上站穩，抵抗魔鬼！
