耶和華深愛“懷住忍耐結出果實”嘅人
“落喺好泥土上嘅，就係人……懷住忍耐結出果實。”——路加福音8:15
1,2．（甲）弟兄姊妹喺反應冷淡嘅地區堅持傳道，我哋從中點樣得到鼓勵？（請睇吓課文開頭嘅圖片）（乙）關於喺自己“本鄉”傳道，耶穌點樣講？（請參考腳注）
塞爾吉奧同奧琳達係美國一對八十幾歲嘅先驅夫婦。佢哋最近由於腳痛而行動不便，不過每日朝早依然會準時七點行到鎮上一個繁忙嘅廣場，幾十年如一日。佢哋喺巴士站附近一個固定嘅地方向路過嘅人介紹聖經出版物。就算好多人唔理會佢哋，佢哋仲係緊守崗位，並向經過嘅人微笑。中午時分，佢哋就慢慢行翻屋企。第二日朝早，佢哋又同樣七點到達呢個廣場。呢對忠貞嘅夫婦每個星期有6個朝早都會喺呢個廣場努力傳講王國信息，一年四季都冇中斷過。
2 世界各地有好多忠貞嘅弟兄姊妹都好似塞爾吉奧同奧琳達噉，即使自己本地嘅傳道地區反應冷淡，佢哋幾十年來都堅持傳道。如果你都有同樣嘅情況，我哋真係好想衷心稱讚你，因為你保持忍耐。 *你堅定不移噉事奉耶和華，可以鼓勵到好多人，包括經驗豐富嘅信徒同工。請留意以下一啲分區監督所講嘅話。“每次同呢啲忠貞嘅弟兄姊妹一齊傳道，佢哋嘅榜樣使我更加熱心。”“佢哋嘅忠貞使我更有勇氣，堅持不懈噉做傳道工作。”“佢哋嘅榜樣深深打動我嘅心。”
3．呢篇課文會討論邊三個問題？點解？
3 呢篇課文會討論三個問題：點解我哋有時可能會感到灰心？我哋點樣先可以結出果實？乜嘢會幫助我哋懷住忍耐結出果實？呢啲問題嘅答案可以加强我哋嘅信心，推動我哋繼續努力執行耶穌交託嘅傳道工作。
點解我哋可能會感到灰心？
4．（甲）保羅對猶太人嘅惡劣反應有乜嘢感覺？（乙）點解保羅有呢種感覺？
4 如果你因為傳道地區反應冷淡而感到灰心，可能你就會更加明白使徒保羅嘅感受。喺大約30年嘅傳道生涯中，保羅幫助過好多人成為基督嘅門徒。（使徒行傳14:21；哥林多後書3:2,3）不過，有好多猶太人拒絶接受真理，有啲人甚至迫害佢。（使徒行傳14:19;17:1,4,5,13）保羅對呢啲惡劣反應有乜嘢感覺？佢坦率噉話：“我喺基督面前講嘅係真話，……我心裏真係大大憂愁，痛苦不絶”。（羅馬書9:1-3）點解保羅有噉樣嘅感覺？佢全心投入傳道工作，深切關注猶太人，向佢哋傳道。所以，保羅見到猶太人拒絶接受上帝嘅慈悲而感到痛心。
5．（甲）乜嘢推使我哋向周圍嘅人傳道？（乙）點解有時我哋感到灰心一啲都唔出奇？
5 同保羅一樣，我哋向人傳道係因為我哋關心人，好想幫助人。（馬太福音22:39；哥林多前書11:1）我哋親身體驗到，事奉耶和華係最好嘅生活方式。我哋好想幫助其他人睇出，佢哋其實可以過更美好嘅生活。所以，我哋不斷鼓勵人學習耶和華嘅真理同旨意，噉樣做就好似同對方講：“我哋好想送一份寶貴嘅禮物俾你，請你接受。”如果對方拒絶呢份禮物，我哋一定會覺得好傷心。有呢種感覺唔係因為缺乏信心，而係表明我哋全心投入傳道工作。所以，就算有時感到灰心，我哋都會保持忍耐。伊琳娜做咗先驅超過25年，佢話：“做傳道工作的確唔容易，不過冇其他工作更值得我去做。”
我哋可以點樣結出果實？
6．我哋會討論乜嘢問題？
6 點解可以肯定，無論我哋喺邊度都可以結出果實？為咗回答呢個重要問題，等我哋嚟分析吓耶穌喺談及“結出果實”時所講嘅兩個比喻。（馬太福音13:23）第一個比喻同葡萄樹有關。
7．（甲）“培植嘅人”、“葡萄樹”同“枝子”分别指邊個？（乙）我哋需要揾出乜嘢問題嘅答案？
7 請讀約翰福音15:1-5,8。請留意，耶穌對使徒講：“你哋不斷多結果實，表明自己係我嘅門徒，我嘅父親就因此得榮耀嘞。”耶穌將耶和華比喻為“培植嘅人”，將自己比喻為“真葡萄樹”，又將佢嘅門徒比喻為“枝子”。 *噉跟從基督嘅人需要結出乜嘢果實？喺呢個比喻當中，耶穌冇直接講出係乜嘢果實，但係佢提供咗一個細節幫助我哋揾出答案。
8．（甲）點解比喻所講嘅結出果實唔係指幫助人成為基督徒？（乙）點解話耶和華係仁愛嘅上帝？
8 耶穌提到，“凡唔結果實嘅”枝子都會被天父剪除。換句話嚟講，我哋只有結出果實先會被耶和華視為忠僕。（馬太福音13:23;21:43）喺呢個比喻當中，結出果實唔可能係指幫助人成為門徒。（馬太福音28:19）否則，因為地區反應冷淡而冇幫到任何人成為基督徒嘅忠心弟兄姊妹，就係比喻當中冇出産嘅枝子嘞。噉樣當然唔合理！我哋唔能够强迫人成為基督徒。耶和華係仁愛嘅上帝，佢永遠都唔會叫我哋做一啲超出我哋能力範圍嘅事。佢吩咐我哋做嘅，都係我哋力所能及嘅。（申命記30:11-14）
9．（甲）我哋執行乜嘢工作就係結出果實？（乙）同結出果實有關嘅另一個比喻係乜嘢？
9 “結出果實”係乜嘢意思？果實指嘅顯然係我哋每個人都能做得到嘅事。耶和華吩咐佢所有嘅忠僕要執行乜嘢工作？就係傳講王國嘅好消息。 *（馬太福音24:14）耶穌嘅另一個比喻可以證實呢一點。接住落嚟，我哋會討論撒種人嘅比喻。
10．（甲）種子同土壤分别指乜嘢？（乙）小麥會結出乜嘢？
10 請讀路加福音8:5-8,11-15。喺撒種人嘅比喻當中，耶穌話種子就係“上帝嘅話語”，指嘅係王國信息。土壤代表一個人嘅内心情況。落喺好泥土上嘅種子生根發芽，茁壯成長，跟住就“結出百倍嘅果實”。如果呢棵係小麥，噉結出嘅果實係乜嘢？係咪好多細細棵嘅小麥？當然唔係。呢棵小麥只會結出新嘅種子，假以時日種子再成長為小麥。從比喻睇出，一粒種子可以結出一百粒種子。呢個同我哋嘅傳道工作有乜嘢關係？
我哋點樣“懷住忍耐結出果實”？（請睇第11段）
11．（甲）撒種人嘅比喻同我哋傳道工作有乜嘢關係？（乙）我哋點樣結出新嘅王國種子？
11 多年前，我哋通過一啲見證人或者我哋嘅基督徒父母聽到上帝王國嘅信息。呢個就好比，佢哋將一粒王國種子撒喺我哋心上。佢哋好開心見到我哋接受王國信息，正如比喻中嘅種子撒喺好嘅泥土上。結果，王國信息好似種子噉生根發芽，茁壯成長，最終結出果實。小麥結出嘅係種子而唔係整棵小麥，所以我哋結出果實指嘅就係向人傳講王國信息，而唔係幫助咗幾多人成為基督徒。 *我哋點樣結出新嘅王國種子？向人傳講王國信息，將我哋内心嘅種子撒播出去。（路加福音6:45;8:1）我哋不斷宣揚王國信息，就係“懷住忍耐結出果實”。
12．（甲）我哋通過葡萄樹同撒種人嘅比喻學到乜嘢？（乙）呢啲比喻點樣使你得到鼓勵？
12 我哋通過葡萄樹同撒種人呢兩個比喻學到乜嘢？我哋係咪能够結出果實，唔係取決於地區嘅人對好消息嘅反應，而係取決於我哋自己嘅信心。保羅都有同樣嘅睇法，佢話：“各人必照自己嘅勞苦得自己嘅獎賞。”（哥林多前書3:8）耶和華獎賞我哋所根據嘅唔係我哋嘅工作成績，而係我哋為工作付出嘅努力。做咗20年先驅嘅瑪蒂爾達話：“知道耶和華會按照我嘅努力嚟獎賞我，真係令我感到喜樂。”
我哋可以點樣懷住忍耐結出果實？
13,14．根據羅馬書10:1,2，點解保羅冇放棄向反應冷淡嘅人傳道？
13 乜嘢可以幫助我哋懷住忍耐結出果實？請睇翻保羅嘅例子。因為猶太人對王國嘅信息反應冷淡，所以保羅曾經都有灰心嘅感覺。雖然係噉，保羅始終冇放棄向佢哋傳道。請留意，喺寫俾羅馬基督徒嘅信入面，保羅對嗰啲唔接受真理嘅猶太人有乜嘢感覺。佢話：“我心裏祝願嘅，向上帝懇切祈求嘅，就係要以色列人得救。我可以為佢哋作證，佢哋對上帝有熱心，不過唔係按照確切嘅知識。”（羅馬書10:1,2）保羅因為乜嘢原因而堅持傳道？
14 第一，保羅受到“［佢］心裏祝願嘅”所推動。佢熱切希望猶太人可以得救。（羅馬書11:13,14）第二，保羅“［為佢哋］向上帝懇切祈求”。佢懇求上帝幫助每個以色列人接受王國嘅信息。第三，保羅知道“佢哋對上帝有熱心”。佢睇到佢哋善良嘅一面，將來佢哋可能會事奉耶和華。保羅知道，熱心嘅猶太人如果得到正確嘅引導，就可以成為熱心嘅基督徒，好似佢自己噉。
15．我哋可以點樣效法保羅？請舉例。
15 我哋可以點樣效法保羅？第一，要繼續懷住真誠嘅態度努力尋找“秉性適宜得永生嘅人”。第二，禱告懇求耶和華打開尋求真理嘅人嘅心。（使徒行傳13:48;16:14）西爾婭娜做咗先驅差唔多30年，佢話：“我傳道之前都會向耶和華禱告，求佢幫助我對住户懷有積極嘅態度。”我哋都可以懇求耶和華差派天使指引我哋揾出嗰啲誠心正意嘅人。（馬太福音10:11-13；啟示錄14:6）做咗先驅超過30年嘅羅伯特話：“天使清楚知道住户嘅情況，同天使一齊工作真係令人興奮。”第三，要留意傳道對象嘅優點。卡爾係一位受咗浸超過50年嘅長老，佢話：“我可以從一啲迹象睇出對方係真誠嘅，例如佢面帶微笑，外表和藹可親，或者提出問題嘅時候態度誠懇。”冇錯，我哋都可以好似保羅噉懷住忍耐結出果實。
“唔好停手”
16,17．（甲）我哋從傳道書11:6學到乜嘢？（乙）我哋嘅傳道工作會對嗰啲留意我哋嘅人産生乜嘢影響？請舉例。
16 即使睇嚟好多人對王國信息無動於衷，我哋都唔應該低估撒種工作所帶嚟嘅影響。（請讀傳道書11:6）好多人雖然唔接受好消息，但係會留意我哋。我哋衣着得體、言行有禮、笑容親切，可能會令佢哋印象深刻。有時，一啲對我哋有負面睇法嘅人，後來都因為我哋嘅良好行為而改變態度。課文開頭提到嘅塞爾吉奧同奧琳達，真係有過噉樣嘅經歷。
17 塞爾吉奧話：“因為患病，我哋有段時間唔可以去嗰個廣場。後來我哋又繼續喺嗰度傳道，有啲經過嘅人問我哋：‘你哋冇事呀嘛？我哋好掛住你哋呀。’”奧琳達面帶微笑補充話：“巴士司機向我哋招手，有啲司機仲大聲對我哋講：‘做得好！’佢哋仲問我哋攞雜誌添。”令呢對夫婦感到意外嘅係，一個男子嚟到見證手拉車旁邊，送咗一扎花俾佢哋，感謝佢哋所做嘅一切。
18．點解我哋決心要“懷住忍耐結出果實”？
18 的確，只要我哋繼續撒播王國種子，“唔好停手”，就係執行“對所有國族作見證”呢項重要任務。（馬太福音24:14）無論如何，我哋都可以因為自己蒙耶和華悦納而深感喜樂。耶和華深愛嗰啲“懷住忍耐結出果實”嘅人！
^ 2段 連耶穌都承認，喺自己“本鄉”傳道唔容易。四本福音書都記載咗呢點。（馬太福音13:57；馬可福音6:4；路加福音4:24；約翰福音4:44）
^ 7段 雖然比喻當中嘅枝子係指受膏基督徒，但係上帝所有嘅忠僕都可以從呢個比喻得益。
^ 9段 雖然“結出果實”亦都可以指培養“聖靈嘅果實”，不過本文同下一篇課文關注嘅係“用嘴唇所獻嘅果實”，即係王國傳道工作。（加拉太書5:22,23；希伯來書13:15）
^ 11段 喺另一啲場合，耶穌亦都用撒種同收割嚟比喻幫助人成為基督徒嘅工作。（馬太福音9:37；約翰福音4:35-38）
