佢本來可以得到上帝嘅悦納
我哋事奉耶和華，一定希望得蒙佢悦納。耶和華會悦納並賜福點樣嘅人？喺聖經時代，有啲人雖然曾經犯下嚴重嘅罪但依然得到上帝嘅嘉許，而另一啲人即使喺某啲方面表現出良好嘅特質，不過最終都得唔到上帝嘅認可。所以，我哋可能會問，“我哋想得蒙上帝悦納，關鍵在於乜嘢？”猶大王羅波安嘅事例可以幫助我哋揾到答案。
一個失敗嘅開始
所羅門係羅波安嘅父親，佢統治咗以色列40年。（列王紀上11:42）所羅門喺公元前997年去世。之後，羅波安從耶路撒冷去到示劍登基作王。（歷代志下10:1）所羅門智慧出衆係衆所周知嘅，羅波安繼承王位嘅時候會唔會因為噉而覺得有壓力呢？好快，佢就要證明自己係咪有足够嘅智慧解決棘手嘅問題。
以色列人覺得受到壓迫，於是派人向羅波安提出佢哋嘅請求，話：“你父親使我哋擔負重軛，而家如果你減輕你父親加喺我哋身上嘅苦役同重軛，我哋就事奉你。”（歷代志下10:3,4）
羅波安可能覺得左右為難。如果佢滿足民衆嘅要求，減輕佢哋嘅重擔，噉就意味住佢自己、王室成員以及官員可能要減少一啲奢侈嘅享受。另一方面，如果佢拒絶，噉民衆就可能會發動叛亂。佢點樣做？佢首先向曾經做過所羅門參謀嘅長老徵求意見，跟住又去揾一啲同佢年紀差唔多嘅年輕人商議。最後，羅波安採納咗年輕人嘅建議，決定要嚴厲對待佢嘅子民，回覆話：“我要加重你哋嘅軛，使你哋擔負更重嘅軛；我父親用鞭子責打你哋，而我就要用蠍子鞭責打你哋。”（歷代志下10:6-14）
你從呢件事吸取到乜嘢教訓？一啲年長嘅人靈性成熟，我哋聽取佢哋嘅意見係明智之舉。佢哋亦都有豐富嘅經驗，或者可以預料到一個決定會有點樣嘅結果，從而向我哋提出好嘅建議。（約伯記12:12）
“佢哋就聽從耶和華嘅話”
羅波安召集佢嘅軍隊，想鎮壓呢場叛亂，不過耶和華通過示瑪雅先知同佢講：“你哋唔可以上去同你哋嘅弟兄以色列人交戰。你哋各自返屋企啦，因為呢件事係出於我嘅。”（列王紀上12:21-24） *
唔可以開戰？要聽從耶和華嘅吩咐容唔容易呢？羅波安作為君王，之前已經講過要“用蠍子鞭”懲罰佢嘅子民，如果佢咁快就對呢場公然嘅叛亂作出讓步，民衆會點諗呢？（參考歷代志下13:7）不過最後，羅波安同佢嘅軍隊仲係“聽從耶和華嘅話，照耶和華嘅話返去屋企”。
我哋從中學到乜嘢？就算會成為人哋嘅笑柄都要聽從耶和華嘅吩咐，噉樣做非常明智。我哋服從上帝，就可以得到佢嘅悦納同賜福。（申命記28:2）
羅波安呢次服從上帝，放棄攻打北方十部族，之後得到乜嘢福分？佢喺自己統治下嘅猶大同便雅憫部族建造城市，亦都重建並“大大鞏固”咗好多座城。（歷代志下11:5-12）更重要嘅係，有一段時間佢遵守耶和華嘅律法。當時，以色列國嘅十部族喺耶羅波安嘅統治下都崇拜偶像，不過佢哋當中有好多人都支持羅波安，去耶路撒冷表明自己擁護正確崇拜。（歷代志下11:16,17）羅波安因為服從上帝，而使自己嘅王權得以鞏固。
羅波安嘅罪同悔改
羅波安喺佢嘅王權穩定之後，做咗啲出人意料嘅事。佢竟然違反耶和華嘅律法信奉異教！點解會噉？佢母親係亞捫人，所以好可能佢係受母親影響。（列王紀上14:21）無論原因係乜嘢，成個國族都跟隨咗佢嘅行徑。所以，耶和華容許埃及王示撒入侵猶大。好多城儘管已經得到鞏固，但仲係被埃及人攻佔！（列王紀上14:22-24；歷代志下12:1-4）
後來，示撒攻到羅波安所在嘅耶路撒冷城，形勢就更加緊迫。呢個時候，示瑪雅先知向羅波安同衆領袖宣告耶和華嘅信息：“你哋既然離棄我，我亦必離棄你哋，將你哋交喺示撒嘅手。”羅波安對耶和華嘅管教有乜嘢反應？聖經話：“以色列嘅衆領袖同王就謙卑自抑，話：‘耶和華係正義嘅。’”因為噉，耶和華拯救耶路撒冷同羅波安免受毁滅。（歷代志下12:5-7,12）
之後，羅波安繼續統治南方嘅猶大國。佢喺去世之前立咗亞比雅做繼承人，為咗避免其他兒子爭奪王位，就送咗好多禮物俾佢哋。（歷代志下11:21-23）羅波安喺呢件事上所做嘅，表明佢比年輕時更有智慧。
好定係壞？
羅波安的確做咗一啲好事，但佢仲係得唔到上帝嘅悦納。聖經總結佢嘅一生話：“羅波安行惡”。點解？因為“佢冇立定心意尋求耶和華”。（歷代志下12:14）
同大衛王唔一樣，羅波安冇同耶和華培養親密嘅關係
請諗吓呢個評價嘅含意：羅波安有時服從耶和華，亦都為耶和華嘅子民做咗啲貢獻。但係，羅波安冇同耶和華培養親密嘅關係，冇熱切渴望取悦佢。另外，佢唔再做啱嘅事，轉而崇拜假神。你可能會諗：“羅波安聽從上帝嘅管教，會唔會只係因為其他人叫佢噉樣做，而唔係佢真心渴望取悦上帝？”（歷代志下11:3,4；12:6）後來，佢又再行惡。佢同佢嘅爺爺大衛王真係有好大嘅分别！大衛亦都犯過錯，但係佢一生都愛耶和華，熱心擁護正確崇拜，真誠噉為自己嘅過犯悔改。（列王紀上14:8；詩篇51:1,17；63:1）
我哋從羅波安身上可以學到好多。我哋為家人提供生活所需同埋追求有價值嘅事，係值得稱讚嘅。不過，如果想得到上帝嘅悦納，我哋就要以佢喜悦嘅方式崇拜佢，同佢保持親密嘅關係。
我哋不斷努力加深對耶和華嘅愛，就可以達到呢個目標。正如想一團火繼續燃燒就必須添加燃料，我哋希望自己對上帝嘅愛繼續燒旺，就要經常研讀佢嘅話語，沉思所讀嘅内容，並且不斷禱告。（詩篇1:2；羅馬書12:12）我哋愛耶和華，就會努力喺一切事上取悦佢，犯錯嘅時候亦都會真心悔改，懇求耶和華寬恕我哋。我哋唔想效法羅波安，而會繼續堅定不移噉擁護正確崇拜。（猶大書20,21）
^ 9段 因為所羅門嘅不忠，上帝已經預告以色列會分裂。（列王紀上11:31）
