發出亮光，榮耀耶和華
“你哋嘅光亦應該喺人前照耀，噉樣人就可以睇見你哋嘅善行，將榮耀歸於你哋嘅天父。”——馬太福音5:16
1．我哋因乜嘢事而特别喜樂？
上帝嘅子民正發出亮光照耀整個世界。見到耶和華嘅子民不斷增加，我哋感到非常振奮！喺過去嘅一年，我哋主持超過一千萬個聖經課程。千百萬對聖經感興趣嘅人參加咗耶穌受難紀念聚會，了解到耶和華點樣通過贖價向人類表現愛心。（約翰一書4:9）
2,3．（甲）乜嘢妨礙唔到我哋 “如同明光照耀”？（乙）呢篇課文會討論同馬太福音5:14-16有關嘅乜嘢問題？
2 耶和華嘅子民遍布世界各地，使用嘅語言各不相同。不過，呢個妨礙唔到我哋團結起嚟讚美天父耶和華。（啟示錄7:9）無論我哋講乜嘢語言或者生活喺邊度，都能够“喺世人當中如同明光照耀”。（腓立比書2:15）
3 我哋努力傳道，促進團結同埋不斷守望，就能够為耶和華帶嚟榮耀。呢篇課文會討論，我哋喺呢三方面點樣發出亮光。（請讀馬太福音5:14-16）
幫助人崇拜耶和華
4,5．（甲）除咗傳道之外，我哋仲可以點樣發出亮光？（乙）我哋友善嘅態度可以帶嚟乜嘢好結果？（請睇吓課文開頭嘅圖片）
4 《守望台》1925年6月1日刊（英語）有一篇題目為“黑暗中嘅亮光”嘅文章話：“一個人除非喺黑暗中努力發出亮光，否則喺剩餘嘅日子，佢好難對主保持堅定嘅信心。”呢篇文章跟住解釋話：“佢必須向所有人傳講好消息，發出亮光，自己都要跟從呢啲亮光而行。”顯然，我哋傳講好信息並幫助人成為基督徒就係發出亮光。（馬太福音28:19,20）另外，我哋可以通過自己嘅行為榮耀耶和華。住户同其他人都會留意到我哋嘅言行舉止。我哋友善嘅微笑同真誠嘅問候可以幫助佢哋睇出，我哋係點樣嘅人以及我哋崇拜點樣嘅上帝。
5 耶穌對門徒講：“你哋入嗰一家嘅時候，要向家裏嘅人問好。”（馬太福音10:12）喺耶穌同使徒當時嘅傳道地區，人邀請陌生人去自己屋企作客係好平常嘅事。不過喺現代，好多地方都冇噉嘅習慣。通常，好多人見到陌生人敲自己嘅門都會覺得緊張或者好煩。但係，如果我哋嘅態度親切友善，住户就會放鬆好多，冇咁反感。好多弟兄姊妹發覺，做公衆場所見證嘅時候，向路人微笑同打招呼會更容易吸引對方留意我哋嘅書刊，待人親切友善亦都有助於我哋打開話題。
6．一對年長嘅夫婦點樣擴大佢哋嘅傳道工作？
6 英國一對年長嘅夫婦因為健康問題，唔能够經常參與逐家逐户傳道。佢哋屋企附近有間學校，好多家長會嚟接小朋友放學。為咗向呢啲家長作見證，佢哋就喺屋企外面擺咗張台，用嚟展示聖經書刊。好多家長出於好奇都攞咗《青年人所提出的問題——有實效的答案》第1、2册同其他册子。後來，會衆一個先驅姊妹亦都加入佢哋嘅傳道。由於呢對夫婦待人真誠，先驅姊妹態度友善，結果一個家長受到吸引，接受咗聖經課程。
7．你可以點樣幫助自己地區嘅難民？
7 近年來，好多國家都有大量嘅難民湧入。你可以點樣幫助自己地區嘅難民認識耶和華同佢嘅旨意？首先，學習用佢哋嘅語言向佢哋打招呼。JW Language應用程式係一個幫助你學習外語嘅好工具。跟住，學幾句可以引起佢哋興趣嘅傳道介紹詞。然後，向佢哋介紹jw.org網站，以及佢哋母語嘅影片同書刊。（申命記10:19）
8,9．（甲）我哋喺週中聚會得到乜嘢實際嘅幫助？（乙）父母可以點樣幫助仔女喺聚會發表評論？
8 耶和華仁愛噉通過傳道與生活聚會向我哋提供實用嘅指引，幫助我哋做續訪同主持聖經課程嘅時候更有自信，使我哋嘅傳道工作更有成效。
9 好多啱啱開始參加聚會嘅人，見到我哋嘅仔女積極參與評論，都對此留低咗深刻嘅印象。做父母嘅，要教仔女用自己嘅話嚟發表評論，幫助佢哋發出亮光。佢哋簡單、發自内心嘅評論可能會激發新近感興趣嘅人睇出呢個就係真理。（哥林多前書14:25）
促進團結
10．家庭崇拜點樣幫助一家人更加團結？
10 我哋喺家庭同會衆促進團結亦都係發出亮光。父母應該定期舉行家庭崇拜。好多人喺家庭崇拜嘅時候會收睇每個月嘅JW電視網節目。睇完之後，一家人可以抽啲時間討論吓點樣應用其中嘅要點。父母要記住，小朋友同青少年嘅需要唔一樣，主持家庭崇拜嗰陣可能要用唔同嘅方法嚟引導兒女。父母要善用研讀資料，使家庭嘅每個成員從家庭崇拜得益。（詩篇148:12,13）
關懷年長嘅弟兄姊妹可以彼此强化（請睇第11段）
11-13．我哋所有人可以點樣喺會衆促進團結，並幫助其他人發出亮光？
11 年輕人喺會衆可以點樣促進團結並鼓勵其他人發出亮光？如果你係一個年輕嘅基督徒，可唔可以立下目標，多啲關注年長嘅弟兄姊妹？你可以用尊重嘅態度問吓佢哋多年以來事奉耶和華嘅經歷。噉樣做，無論你定係佢哋都會受到强化，更加積極去發出真理嘅亮光。我哋每個人都可以立下目標，歡迎所有嚟王國聚會所參加聚會嘅人。你可以用友善嘅笑容向佢哋打招呼，或者幫助佢哋揾座位。你亦都可以介紹其他人俾佢哋認識，使佢哋有賓至如歸嘅感覺。
12 如果你受委派負責主持傳道前聚會，你可以為年長嘅弟兄姊妹作適當嘅安排。你可以考慮吓，有冇適合佢哋嘅傳道地區。有時，你都可以為佢哋安排一個比佢哋年輕嘅傳道同伴，使佢哋得到實際嘅幫助。有啲弟兄姊妹受健康或其他個人情況所限，唔能够為耶和華做好多。無論弟兄姊妹年輕抑或年長，有經驗抑或冇經驗，我哋都可以關心體諒佢哋。噉佢哋就可以得到鼓勵，繼續熱心傳講好消息。（利未記19:32）
13 以色列人一齊喜樂噉崇拜耶和華。詩篇執筆者對此有感而發，話：“睇吓！弟兄團結同住，幾咁美善，幾咁可喜！”（請讀詩篇133:1,2）呢種團結就好似聖膏油噉，令人身心愉悦又倍感安舒。我哋可以定下目標，喺弟兄姊妹當中主動促進團結。如果你已經噉樣做，就真係值得稱讚嘞。你可唔可以“開闊心胸”，繼續加深對弟兄姊妹嘅認識？（哥林多後書6:11-13）
14．你可以點樣向鄰居發出亮光？
14 你可唔可以作出更多努力向人發出聖經真理嘅亮光？你仁慈嘅言行可以吸引鄰居認識真理。我哋可以諗吓：“鄰居對我有點樣嘅評價？我有冇使家居物業保持整潔，令隔籬鄰舍覺得舒服？我可唔可以主動幫助其他人？”你同其他見證人交談嘅時候，不妨多啲請教佢哋，睇吓佢哋親切友善噉對待自己嘅親人、鄰居、同事或者同學得到乜嘢美好嘅結果。你可能會聽到好多鼓舞人心嘅經歷。（以弗所書5:9）
不斷守望
15．點解不斷守望好重要？
15 我哋想繼續發出亮光，就要清楚明白我哋正生活喺乜嘢日子。耶穌多次勸勉佢嘅門徒“要不斷守望”。（馬太福音24:42；25:13；26:41）如果我哋覺得“大患難”好遙遠，唔會喺自己有生之年嚟到，就會對傳道工作缺乏緊迫感。（馬太福音24:21）我哋有噉樣嘅態度，發出嘅光就會變得暗淡，甚至完全消失。
16,17．你可以點樣不斷警醒守望？
16 隨住呢個非常時期嘅情況不斷惡化，我哋所有人都要不斷守望。耶和華一定會喺適當嘅時候採取行動。（馬太福音24:42-44）我哋喺最後嘅日子要表現耐心，時刻警醒。要每日研讀上帝嘅話語，不斷禱告。（彼得前書4:7）另外，亦都可以留意嗰啲喜樂噉不斷守望，發出亮光嘅弟兄姊妹嘅忠貞榜樣。我哋可以閲讀弟兄姊妹嘅生平事迹，例如刊登喺《守望台》2012年4月15日刊18-21頁嘅一篇文章，題目為“七十年來抓緊‘猶太人的衣袍’”。
17 要經常參加可以强化我哋靈性嘅活動同交往。噉樣，我哋就可以得到好大嘅喜樂，亦都會覺得日子過得好充實。（以弗所書5:16）耶和華嘅子民喺過去一百年成就咗好多事。今日，我哋有更多嘅屬靈工作要做。喺耶和華嘅指引下，王國取得越來越多嘅成就，超出我哋嘅想像。我哋嘅亮光的確越照越明！
牧養探訪使我哋有機會從上帝嘅話語得到智慧（請睇第18、19段）
18,19．點解話會衆嘅長老係耶和華嘅恩賜？請舉例。
18 雖然我哋唔完美，但係耶和華都俾機會我哋事奉佢。佢為咗幫助我哋，“將人賜下，作為恩賜”。經文所講嘅恩賜，就係會衆嘅長老。（請讀以弗所書4:8,11,12）我哋接受牧養探訪嘅時候，要把握機會向長老學習，聽取佢哋嘅勸告。
19 喺英國，兩個長老向一對喺婚姻方面遇到難題嘅基督徒夫婦提供幫助。姊妹覺得丈夫喺屬靈方面冇帶好頭，而弟兄就覺得自己教導技巧唔好，並承認冇經常舉行家庭崇拜。長老請呢對夫婦諗吓耶穌點樣悉心照顧門徒，留意門徒嘅需要。長老勸勉丈夫，喺照顧家人方面要效法耶穌嘅榜樣，亦都鼓勵妻子要有耐心。長老又俾咗佢哋一啲實際嘅建議，幫助佢哋學識點樣一齊合作，同兩個仔女舉行家庭崇拜。（以弗所書5:21-29）後來，長老稱讚丈夫作出努力，鼓勵佢要繼續堅持並倚靠聖靈做一個好家主。長老仁愛噉關懷、支持呢個家庭，幫助佢哋發出亮光。
20．你發出亮光會有乜嘢好結果？
20 詩篇執筆者話：“凡敬畏耶和華、遵行佢嘅道嘅人幾咁有福！”（詩篇128:1）你幫助人認識上帝，主動促進團結，不斷守望，就係發出自己嘅亮光嘞。噉樣，你就會越來越快樂。你良好嘅行為亦都可以使其他人受到推動，將榮耀歸於天父。（馬太福音5:16）
