效法耶和華表現仁慈同體恤
“關懷寒微人嘅人真係有福！”——詩篇41:1
1． 真基督徒點樣彼此表現愛心？
世界各地嘅真基督徒都屬於同一個屬靈大家庭，佢哋互相表現愛心。（約翰一書4:16,21）雖然有時弟兄姊妹會為同工作出好大嘅犧牲，不過大多數情況下，佢哋之間嘅愛心主要係通過一啲小事表現出嚟嘅，例如體貼嘅言詞或者善意嘅行為。如果我哋仁慈、體貼噉對待其他人，就係“效法上帝”嘞。（以弗所書5:1）
2． 耶穌點樣效法天父向人表現愛心？
2 耶穌十全十美噉效法天父。佢話：“你哋所有辛苦勞碌、擔子沉重嘅人啊，嚟我呢度啦，我要使你哋得到安舒。……因為我性情温和，心裏謙卑。”（馬太福音11:28,29）如果我哋效法基督“關懷寒微人”，就可以使上帝嘅心歡喜，而自己亦都會感到快樂。（詩篇41:1）呢篇課文會討論，我哋喺家庭、會衆同傳道工作上可以點樣關心、體恤人。
體恤家人
3． 丈夫可以點樣體恤妻子？（請睇吓課文開頭嘅圖片）
3 喺一個家庭入面，丈夫應該帶頭對家人表現體恤。（以弗所書5:25; 6:4）例如，聖經勸勉做丈夫嘅，要“按情理”對待妻子。即係話，丈夫要體恤妻子，盡力理解妻子嘅感受。（彼得前書3:7）我哋了解一個人，先可以更好噉關心佢。一個通情達理嘅丈夫會將妻子睇成係同自己互為補足嘅另一半。雖然妻子喺好多方面同自己唔同，不過佢唔會覺得自己比妻子優越。（創世記2:18）丈夫會體恤妻子嘅感受，用尊重嘅態度對待妻子。加拿大嘅一個姊妹講到自己嘅丈夫，話：“佢好重視我嘅感覺，從來都唔會講：‘你唔好噉諗啦。’佢會耐心、認真噉聽我傾訴。如果我嘅觀點唔係好啱，佢會温和噉幫助我調整自己嘅諗法。”
4． 喺對待其他異性方面，丈夫應該點樣顧及妻子嘅感受？
4 丈夫如果凡事顧及妻子嘅感受，就唔會同其他女子調情，唔會對佢哋産生唔恰當嘅感情，喺上網或者使用社交網站嘅時候亦都會實踐同樣嘅原則。（約伯記31:1）冇錯，丈夫應該對妻子保持忠貞，唔單止係因為愛妻子，亦都因為愛耶和華同憎恨惡事。（請讀詩篇19:14；97:10）
5． 妻子可以點樣對丈夫表現體恤？
5 如果丈夫效法佢哋嘅頭耶穌基督，妻子就更容易“深深尊敬”丈夫。（以弗所書5:22-25,33）妻子尊敬丈夫嘅話，噉丈夫忙於處理屬靈事務或者一啲重要問題嘅時候，妻子就會體貼丈夫，努力理解佢嘅感受。英國一位結咗婚嘅弟兄話：“有時，我太太會從我嘅神情舉止睇出，我喺度諗緊一啲事。跟住，佢會應用箴言20:5嘅原則。有必要嘅話，佢會等到適合嘅時候先至問我發生咗乜嘢事。如果呢件事唔係機密嘅話，我會同佢一齊傾吓。”
6． 我哋可以點樣鼓勵小朋友？噉樣可以使佢哋得到乜嘢益處？
6 如果父母互相體貼對方，就可以為兒女樹立良好嘅榜樣。父母有義務教導自己嘅兒女關心其他人。例如，父母可以教導佢哋，唔應該喺王國聚會所跑嚟跑去；食飯交往嘅時候，要禮讓年長嘅人。當然，會衆嘅所有人都可以喺呢方面幫助基督徒父母。如果一個小朋友好貼心噉為我哋做咗啲事，例如幫手開門，我哋就應該稱讚佢哋。噉樣，佢哋就會覺得好開心，深深體驗到“施與比接受更快樂”。（使徒行傳20:35）
喺會衆“彼此關注”
7． 耶穌對一個聾人點樣表現體恤？我哋從中學到乜嘢？
7 有一次，耶穌喺德卡波利斯境内嘅時候，“有人帶咗一個有言語障礙嘅聾人嚟見［佢］”。（馬可福音7:31-35）耶穌冇喺衆人面前醫治佢，而係將佢帶到一邊。耶穌點解噉樣做？可能耶穌察覺到，喺一大班人面前，呢個男子會因為自己殘障而覺得唔自在，於是就私下醫治佢。當然，我哋唔能够施行奇迹醫治人。不過，我哋能够體貼同尊重我哋嘅信徒同工，顧及佢哋嘅需要同感受，而且應該噉樣做。使徒保羅話：“要彼此關注，激發愛心，促進善行。”（希伯來書10:24）耶穌明白而且體恤嗰個聾人嘅感受，佢真係我哋嘅好榜樣！
8,9． 我哋點樣做，就表明我哋體恤年老、體弱嘅弟兄姊妹？請舉例。
8 體恤年老、體弱嘅人。基督徒會衆嘅標誌係愛心，而唔係效率。（約翰福音13:34,35）呢種愛心推動我哋盡己所能幫助年老、傷殘嘅同工參加基督徒聚會同傳道。即使佢哋做到嘅好有限，我哋都應該幫助佢哋。（馬太福音13:23）米高因為行動不便，生活離唔開輪椅，佢好感激家人同傳道小組嘅弟兄姊妹俾咗佢好多幫助。佢話：“全靠佢哋嘅幫助，我可以參加大部分嘅聚會同埋經常參與傳道工作。我特别鍾意做公衆場所見證。”
9 好多伯特利家庭都有年老、體弱嘅成員。仁愛嘅監督會體恤佢哋嘅情況，安排佢哋通過寫信或者打電話嚟作見證。比爾係一位86歲嘅弟兄，佢會寫信俾偏遠地區嘅人，向佢哋作見證。佢好鍾意用呢種方式傳道。差唔多90歲嘅南茜話：“我唔覺得寫信係一個無關緊要嘅工作。呢個係傳道嘅一種方式，都可以幫助人認識真理！”1921年出生嘅伊茜爾話：“病痛係我生命嘅一部分。有時，我連着件衫都覺得好辛苦。”雖然係噉，伊茜爾好開心可以做電話見證，仲揾到一啲好好嘅續訪。85歲嘅芭芭拉話：“因為我健康情況好差，好難經常出去傳道。不過，我通過電話見證可以同人傾計。多謝你吖，耶和華！”唔到一年，一群寶貴嘅年長弟兄姊妹就用咗1228個鐘嚟傳道，寫咗6265封信，打咗超過2000個電話，分發咗6315份出版物！我哋確信，佢哋付出嘅努力一定令耶和華嘅心歡喜。（箴言27:11）
10． 我哋可以點樣幫助弟兄姊妹從基督徒聚會充分得益？
10 喺基督徒聚會嘅時候表現體恤。我哋好想弟兄姊妹可以從聚會充分得益。如果我哋關心佢哋，為佢哋嘅益處着想，噉可以點樣做呢？一個方法就係，準時到達聚會嘅地方，噉我哋就唔會不必要噉使人分心。當然，因為一啲意外嘅情況，有時我哋會遲到，呢個係可以理解嘅。不過，如果我哋養成遲到嘅習慣，噉我哋就應該認真諗吓噉樣會對弟兄姊妹造成乜嘢影響，同埋我哋點樣做先至係關心佢哋。請記住，邀請我哋參加聚會嘅係耶和華同佢嘅愛子。（馬太福音18:20）佢哋的確配受我哋深深嘅尊敬！
11． 點解有份擔任節目嘅弟兄應該實踐哥林多前書14:40嘅原則？
11 哥林多前書14:40話：“凡事都要規規矩矩，按照安排去做。”如果我哋體恤弟兄姊妹，就會按照呢個聖經指引去做。喺聚會當中有份擔任節目嘅弟兄應該遵守每個環節嘅指定時間。噉樣做，唔單止係體恤下一個講者，亦都係體恤其他嘅弟兄姊妹。請諗吓，如果聚會遲咗結束，可能會對其他人造成乜嘢影響。有啲弟兄姊妹返屋企嘅路途好遠，有啲就可能要趕巴士趕地鐵，亦都有啲同工因為不信配偶嘅要求而要盡快返屋企。
12． 點解我哋應該“用愛心格外敬重”辛勤工作嘅長老？（請睇附欄“ 對帶頭嘅弟兄表現尊重”）
12 屬靈嘅牧人為會衆辛勞噉工作，亦都熱心參與傳道，我哋好應該“用愛心格外敬重佢哋”。（請讀帖撒羅尼迦前書5:12,13）你一定好感激長老為你付出嘅一切。我哋感激長老，就會同佢哋通力合作，支持佢哋嘅工作，“因為佢哋時刻看守［我哋］嘅生命，要向上帝交賬”。（希伯來書13:7,17）
喺傳道工作上表現體恤
13． 我哋從耶穌對待人嘅方式學到乜嘢？
13 關於耶穌，以賽亞預言話：“壓傷嘅蘆葦，佢唔折斷；將殘嘅麻芯，佢唔熄滅。”（以賽亞書42:3）耶穌對人嘅呢種愛，推使佢關心其他人。有啲人灰心軟弱，就好似“壓傷嘅蘆葦”同“將殘嘅麻芯”噉。耶穌好理解佢哋嘅感受，温和、耐心噉關懷佢哋。所以，連小朋友都好鍾意同佢一齊。（馬可福音10:14）當然，我哋冇耶穌噉樣嘅洞察力同教導能力，不過我哋仲係可以對傳道地區嘅人表現體恤，亦都應該噉樣做。我哋同佢哋交談嘅時候，都應該要考慮吓交談嘅方式同時間。
14． 點解我哋應該留意我哋同人交談嘅方式？
14 我哋應該點樣同人交談？喺今日呢個世界嘅商業、政治同宗教制度下，無數人“俾人剝削，四處流離”。（馬太福音9:36）結果，好多人變得憤世嫉俗，灰心絶望。我哋同人交談所使用嘅言詞同語氣都應該表現出仁慈同憐恤。的確，好多人之所以想聽我哋傳講嘅信息，唔單止係因為我哋識得運用聖經嚟推理，亦都因為我哋體貼有禮，真誠噉關心佢哋。
15． 我哋傳道嘅時候，可以用乜嘢實際嘅方式體恤人？
15 向人作見證嗰時，我哋可以用唔同嘅方法體恤人。其中一個就係向人提出問題。我哋應該用心諗吓，向人提問嘅時候，可以點樣表現仁慈同尊重嘅態度。喺某個地區，當地嘅好多人性格内向，容易怕醜。所以，一個喺呢個地區傳道嘅先驅弟兄就學識點樣提出唔會令人尷尬嘅問題，包括當地人可能會答唔到或者答錯嘅問題。例如，佢唔會問“你知唔知上帝嘅名係乜嘢？”或者“你知唔知乜嘢係上帝嘅王國？”反而，佢會換一種方式嚟問，類似係“我從聖經學到，上帝有一個名。我可唔可以俾你睇吓？”當然，一個方法未必適用於每一種情況，因為每個人嘅文化、背景、個性都唔一樣。不過，無論乜嘢時候，我哋都應該懷住體恤同尊重嘅態度對待其他人。為咗做到呢一點，我哋就要深入了解佢哋。
16,17． （甲）如果我哋體恤住户，就會喺乜嘢時候去探訪佢哋？（乙）如果我哋體恤住户，就會點樣考慮逗留嘅時間？
16 我哋應該喺乜嘢時間探訪傳道對象？我哋逐家逐户傳道嗰陣，可能住户冇諗過我哋會嚟，因為佢哋並冇邀請我哋。我哋應該喺住户方便交談嘅時間去探訪佢哋。（馬太福音7:12）例如，你傳道地區嘅人係咪鍾意喺週末瞓晏啲呢？如果係噉，你可以先向路人作見證，或者參與公衆場所見證，又或者先去續訪嗰啲早起身嘅人。
17 你應該逗留幾耐？好多人都好忙，所以初次拜訪嗰時最好唔好傾咁耐。與其長時間逗留，不如作一啲簡短嘅討論。（哥林多前書9:20-23）如果住户留意到我哋體貼佢哋，喺佢哋忙緊嘅時候唔會逗留太耐，噉我哋下次探訪嘅時候佢哋會更加願意聽。我哋傳道嘅時候表現出聖靈嘅果實，噉我哋就真係“上帝嘅同工”嘞。好可能，耶和華就係通過我哋表現嘅特質嚟吸引人認識真理。（哥林多前書3:6,7,9）
18． 我哋關心、體恤其他人，就可以得到乜嘢福分？
18 所以，喺家庭、會衆以及傳道工作上，我哋都應該努力關心、體恤其他人。噉無論而家定係將來，我哋都可以得享好多福分。正如詩篇41:1,2所講：“關懷寒微人嘅人真係有福！喺佢遭禍嘅日子，耶和華要救佢脱險。 ……佢喺地上必稱為有福嘅人。”
