事奉“快樂嘅上帝”嘅人幾咁有福
“有耶和華作為上帝嘅人幾咁有福！”——詩篇144:15
1． 點解耶和華見證人係一群快樂嘅人？（請睇吓課文開頭嘅圖片）
耶和華見證人係一群快樂嘅人。無論係聚會或者大會前後，定係交往嘅時候，佢哋當中都一定充滿歡聲笑語。點解佢哋咁快樂？最主要嘅原因係，佢哋認識“快樂嘅上帝”耶和華，亦都事奉同努力效法佢。（提摩太前書1:11；詩篇16:11）耶和華上帝係快樂之源，佢希望我哋快樂，亦都賜俾我哋好多福分，使我哋有理由感到喜樂。（申命記12:7；傳道書3:12,13）
2,3． （甲）快樂係乜嘢？（乙）邊啲情況會令我哋好難保持快樂？
2 你係咪一個快樂嘅人？你希唔希望自己更加快樂？一本著名嘅詞典將快樂定義為“一種比較持久嘅幸福感，程度深淺有别，從人對生活大致滿意到深感喜樂滿足不等；感到幸福快樂嘅人都希望現狀能够持續落去。”聖經表明，嗰啲同耶和華有親密關係嘅人先至會享有真正嘅快樂。喺今日嘅世界，想過快樂嘅生活的確一啲都唔容易。點解？
3 生活中有好多事會奪去我哋嘅喜樂，可能係離婚、失業、親友去世或者被開除。如果屋企人經常嘈交，同學或同事嘲笑我哋，或者我哋因為信仰而受迫害，甚至坐監，我哋就好難保持喜樂。健康惡化，患上慢性病或抑鬱症，同樣都會令我哋失去喜樂。但係，“快樂嘅、獨一嘅掌權者”耶穌基督好想為人帶嚟安慰同快樂。（提摩太前書6:15；馬太福音11:28-30）即使撒但嘅世界充滿各種患難同難題，不過耶穌喺登山寶訓當中提到嘅幾種特質可以幫助我哋保持快樂。
靈性堅强係快樂嘅要訣
4,5． 我哋可以點樣得到並保持快樂？
4 耶穌講嘅第一種特質尤其重要。佢話：“自覺有屬靈需要嘅人有福嘞，因為天上嘅王國係佢哋嘅。”（馬太福音5:3）我哋點樣表明自覺有屬靈需要呢？我哋吸收靈糧，服從上帝嘅誡命，將崇拜上帝放喺生活首位，就表明我哋自覺有屬靈需要嘞。噉樣做，我哋會更加快樂，對上帝即將實現嘅應許更加有信心，亦都因為盼望得着聖經預言嘅各種“福樂”而有力量保持忍耐。（提多書2:13）
5 同耶和華建立穩固嘅關係，係獲得恆久快樂嘅一個重要因素。使徒保羅受聖靈啟示寫道：“要靠主［耶和華］常常喜樂。我再講，要喜樂！”（腓立比書4:4）為咗享有同耶和華嘅寶貴友誼，我哋就要向佢尋求智慧。聖經話：“人揾到智慧，能明辨事理，就有福嘞。人持守智慧，智慧就係佢哋嘅生命樹；緊守智慧嘅，必稱為有福嘅人。”（箴言3:13,18）
6． 恆久快樂嘅基礎係乜嘢？
6 不過，為咗得到恆久嘅快樂，我哋唔單止要閲讀上帝嘅話語，仲要將學到嘅實踐出嚟。耶穌强調咗實踐嘅重要性，佢話：“你哋既然知道呢啲事，如果遵行，就有福嘞。”（約翰福音13:17；請讀雅各書1:25）呢個係滿足我哋屬靈需要同埋得到恆久快樂嘅關鍵。不過，有好多事都可以奪去我哋嘅快樂，噉我哋點樣先可以得到幸福快樂呢？等我哋繼續分析吓，耶穌喺登山寶訓所講嘅話。
使我哋更加快樂嘅特質
7． 哀慟嘅人點樣得到幸福快樂？
7 “哀慟嘅人有福嘞，因為佢哋會得到安慰。”（馬太福音5:4）有啲人可能會諗：“嗰啲傷心嘅人又點會快樂呢？”耶穌指嘅唔係所有傷心嘅人。就算係邪惡嘅人，喺“難以應付嘅非常時期”都一樣會因為面對壓力而感到悲傷。（提摩太後書3:1）不過，佢哋只係為自己嘅境況同遭遇悲傷，呢個唔會使佢哋親近耶和華，所以佢哋唔可以從呢種悲傷得到幸福快樂。耶穌諗到嘅，一定係嗰啲有屬靈需要嘅人。佢哋見到周圍好多人冇聽從上帝嘅吩咐，唔想按照上帝嘅正義標準生活，就感到悲傷。佢哋意識到自己有罪，亦都明白係因為人唔完美，所以導致周圍嘅情況咁惡劣。耶和華留意呢啲悲傷嘅人有真誠嘅態度，就通過聖經安慰佢哋，使佢哋可以喺生活中得到快樂。（請讀以西結書5:11；9:4）
8． 性情温和點樣促進喜樂？
8 “性情温和嘅人有福嘞，因為佢哋會承受大地作為産業。”（馬太福音5:5）性情温和點樣促進喜樂呢？有啲人認識真理之後，就作出改變。可能佢哋以前脾氣暴躁、對人粗魯無禮或者鍾意同人嘈交。不過而家，佢哋穿上“新品格”，表現出“憐恤之情、仁慈、謙卑、温和、耐心”呢啲美好嘅特質。（歌羅西書3:9-12）結果，佢哋成為滿懷愛心嘅人，同人和睦共處，得享快樂嘅生活。上帝嘅話語亦都保證，呢啲人“必得着大地”。（詩篇37:8-10,29）
9． （甲）喺乜嘢意義上，性情温和嘅人“會承受大地作為産業”？（乙）點解“對正義如飢似渴嘅人”可以得到快樂？
9 點解話，性情温和嘅人會“承受大地作為産業”？耶穌嘅受膏弟兄會作為君王同祭司管理地球，到時，佢哋就會承受大地作為産業嘞。（啟示錄20:6）另外，千百萬人唔會去天上，佢哋同樣會承受大地作為産業。佢哋會恢復完美，永遠喺地球上過和平幸福嘅生活。雖然呢兩群人嘅希望唔同，但佢哋都可以得享快樂，因為佢哋都係“對正義如飢似渴嘅人”。（馬太福音5:6）喺新世界，佢哋對正義嘅渴求會得到滿足。（彼得後書3:13）上帝最終會將所有邪惡消滅淨盡。到時，正義嘅人將會得享幸福快樂，佢哋唔再因為壞人壞事而感到悲傷。（詩篇37:17）
10． 慈悲係乜嘢意思？
10 “慈悲嘅人有福嘞，因為佢哋會得蒙慈悲。”（馬太福音5:7）翻譯成“慈悲”嘅希伯來語詞意思係“因懷住温情而火熱，顯出熱烈嘅情感；……憐恤”。呢個詞喺希臘語都有同樣嘅意思，表示對其他人有憐憫之心。不過，聖經所講嘅慈悲唔單止係一種深厚嘅温情，仲包括積極噉採取行動幫助對方。
11． 關於‘表現慈悲，我哋從好心嘅撒馬利亞人嘅比喻學到乜嘢？
11 請讀路加福音10:30-37。耶穌通過好心嘅撒馬利亞人嘅比喻，生動噉描述咗表現慈悲係乜嘢意思。撒馬利亞人同情、憐憫一個受苦嘅人，就採取積極嘅行動去幫助佢。講完呢個比喻之後，耶穌就話：“你都去照樣做喇。”所以，我哋都可以問吓自己：“我有冇照住做呢？我有冇效法好心嘅撒馬利亞人？我有冇向受苦嘅人表現慈悲，積極採取行動幫助佢哋？例如，我可唔可以為寡婦、年長嘅同工或者父母唔係信徒嘅年輕人提供實際嘅幫助？我可唔可以主動‘安慰憂鬱嘅人’？”（帖撒羅尼迦前書5:14；雅各書1:27）
我哋主動幫助其他人，大家都會感到快樂（請睇第12段）
12． 向人表現慈悲點樣使我哋得到快樂？
12 表現慈悲點樣使我哋得到快樂？我哋慈悲待人，就可以從施與得享喜樂。另外，我哋知道自己所做嘅會令耶和華嘅心歡喜，亦都會感到快樂。（使徒行傳20:35；請讀希伯來書13:16）大衛王談及表現慈悲嘅人，話：“耶和華要守護佢，保全佢嘅生命。佢喺地上必稱為有福嘅人。”（詩篇41:1,2）如果我哋向人表現慈悲同憐恤，耶和華亦都會慈悲對待我哋，賜俾我哋恆久嘅快樂。（雅各書2:13）
“心地純潔嘅人”會快樂
13,14． 心地純潔同快樂之間有乜嘢關係？
13 耶穌話：“心地純潔嘅人有福嘞，因為佢哋會睇見上帝。”（馬太福音5:8）我哋想心地純潔，就要棄絶不潔嘅慾望，使思想保持潔淨。如果我哋希望自己嘅崇拜可以得蒙耶和華悦納，就必須噉樣做。（請讀哥林多後書4:2；提摩太前書1:5）
14 嗰啲心地純潔嘅人會同耶和華享有親密嘅關係。耶和華話：“洗淨自己袍服嘅人幾咁有福！”（啟示錄22:14）佢哋喺乜嘢意義上“洗淨自己袍服”呢？受膏基督徒“洗淨自己袍服”意味住，喺耶和華眼中，佢哋係潔淨嘅。佢哋會得到不朽嘅生命，喺天上享有永恆嘅快樂。有希望喺地上生活嘅大群人，亦都被上帝視為正義嘅人，可以成為上帝嘅朋友。聖經話：“佢哋用綿羊羔嘅血將自己嘅袍洗潔白嘞。”（啟示錄7:9,13,14）
15,16． 心地純潔嘅人可以點樣睇見上帝？
15 既然“冇人睇見［上帝］，仲能够存活”，噉心地純潔嘅人又點可以睇見上帝呢？（出埃及記33:20）譯作“睇見”嘅希臘語詞嘅意思係，“用頭腦睇見、領悟、認識”。一個人確切認識上帝，而且欣賞上帝嘅美好特質，佢就會“心眼明亮”，喺比喻嘅意義上睇見上帝。（以弗所書1:18）耶穌完美噉反映出上帝嘅特質，所以佢話：“邊個睇見我，就係睇見父親。”（約翰福音14:7-9）
16 另外，我哋體驗到上帝點樣幫助我哋，就可以“睇見”上帝。（約伯記42:5）耶和華承諾會賜福俾嗰啲盡力保持純潔，而且忠心為佢服務嘅人。“睇見”亦都意味住，我哋定睛注視將來嘅奇妙福分。當然，受膏基督徒復活之後會得到天上嘅獎賞。到時，佢哋就可以親眼睇見上帝。（約翰一書3:2）
逆境之下保持快樂
17． 點解促進和睦嘅人會快樂？
17 耶穌又話：“促進和睦嘅人有福嘞”。（馬太福音5:9）主動促進和睦嘅人可以得享快樂。耶穌嘅門徒雅各話：“正義嘅果實要喺和睦嘅情況下先能够撒種，而且係促進和睦嘅人先能够享有嘅。”（雅各書3:18）如果我哋好難同某個弟兄姊妹或者家人相處，我哋可以祈求上帝幫助我哋促進和睦。噉樣，耶和華就會用佢嘅聖靈幫助我哋表現基督徒嘅美好特質，使我哋得享快樂。耶穌强調我哋要主動促進和睦，佢話：“你將禮物帶到祭壇嘅時候，如果喺嗰度諗起有弟兄對你不滿，就要將禮物留喺壇前，先去同弟兄講和，返嚟再將禮物獻上。”（馬太福音5:23,24）
18,19． 點解基督徒受到迫害仍然保持喜樂？
18 “人因為我嘅緣故侮辱你哋，迫害你哋，用各種邪惡嘅話誣衊你哋，你哋就有福嘞。”耶穌嘅呢番話係乜嘢意思呢？耶穌接住又話：“要歡喜雀躍，因為你哋喺天上嘅獎賞係大嘅。喺你哋之前嘅先知，人都係噉樣迫害佢哋。”（馬太福音5:11,12）使徒俾人拷打，又受到警告話唔可以傳道，不過佢哋離開公議會嗰時，個個都“歡歡喜喜”。當然，佢哋感到喜樂，唔係因為鍾意俾人鞭打，而係“因為有榮幸配得為［耶穌］嘅名受辱”。（使徒行傳5:41）
19 當耶和華嘅現代子民為耶穌嘅名受苦，或者面對嚴峻嘅考驗嗰時，都依然懷住喜樂保持忍耐。（請讀雅各書1:2-4）我哋同使徒一樣，遭受苦難同面對迫害嘅時候唔會感到開心。不過，只要我哋喺患難中對耶和華保持忠義，佢就會使我哋堅毅剛强，有力量忍耐落去。喺1944年8月，極權政府嘅官員將亨里克·多爾尼克同佢哥哥關入集中營。不過，呢啲官員話：“我哋根本冇辦法説服佢哋做任何嘢。為咗信仰佢哋就算死都覺得開心。”多爾尼克弟兄解釋話：“我唔想做殉道者，不過為咗對耶和華保持忠貞，我願意懷住尊嚴，勇敢忍受逆境。噉樣做使我得到喜樂。 ……我熱切禱告親近耶和華，佢的確信實可靠，俾我適時嘅幫助。”
20． 點解我哋事奉“快樂嘅上帝”就會感到快樂？
20 如果“快樂嘅上帝”耶和華悦納我哋，噉我哋就算遭受宗教迫害、家人反對，面對疾病同衰老，都依然感到快樂。（提摩太前書1:11）耶和華係“冇可能講大話嘅上帝”。我哋亦都因為深信佢各種奇妙嘅應許必然實現而滿懷喜樂。（提多書1:2）當上帝嘅應許實現嗰時，我哋唔會再諗翻起任何面對過嘅難題。事實上，喺將臨嘅樂園，耶和華所賜嘅福分一定超出我哋嘅想像，我哋一定會體驗到前所未有嘅快樂。冇錯，我哋一定會“大享平安，滿心喜樂”。（詩篇37:11）
