全能而又體貼人嘅上帝
“［耶和華］深知我哋嘅本質，記得我哋不過係塵土。”——詩篇103:14
1,2． （甲）耶和華對待人嘅方式，同有權勢嘅人有乜嘢區别？（乙）呢篇課文會討論乜嘢？
有權有勢嘅人通常會“轄制”人，甚至壓迫人。（馬太福音20:25；傳道書8:9）不過，耶和華上帝絶對唔會噉樣做！雖然佢係全能嘅上帝，係全宇宙最有力量嘅個體，但係佢非常體貼唔完美嘅人類。佢好仁慈，亦都好關心、留意我哋嘅需要同感受。聖經話：“佢深知我哋嘅本質，記得我哋不過係塵土。”（詩篇103:13,14）
2 聖經入面有好多表明耶和華上帝關心體貼佢子民嘅事例。呢篇課文會討論其中三個例子：第一，上帝仁慈噉幫助年輕嘅撒母耳向大祭司以利傳達審判嘅信息；第二，耶和華耐心噉幫助覺得自己冇能力帶領以色列人嘅摩西；第三，上帝以體貼嘅方式帶領以色列人離開埃及。我哋會集中討論，喺呢啲例子當中耶和華點樣關心體貼佢嘅子民，以及我哋從中可以學到乜嘢。
好似慈父噉體貼年輕人
3． 年輕嘅撒母耳遇到乜嘢唔尋常嘅事？呢件事令我哋産生乜嘢疑問？（請睇吓課文開頭嘅圖片）
3 撒母耳好細嗰時就開始喺聖幕“事奉耶和華”。（撒母耳記上3:1）有一晚，撒母耳瞓着之後，發生咗一件唔尋常嘅事。 *（請讀撒母耳記上3:2-10）佢聽見有人叫佢嘅名。撒母耳以為係年老嘅大祭司以利叫佢，就即刻跑去以利嗰度，話：“你呼喚我，我喺呢度。”不過以利話，自己冇叫過佢。之後，第二次，第三次，又發生咗同樣嘅事。以利意識到，呼喚撒母耳嘅係耶和華。於是佢話俾撒母耳知應該點樣回應，而撒母耳亦都按照佢所講嘅去做。點解耶和華冇先同撒母耳講明，呼喚撒母耳嘅係佢？聖經冇解釋原因，不過好可能係耶和華體恤撒母耳嘅感受。點解噉講呢？
4,5． （甲）撒母耳對上帝俾佢嘅任務有乜嘢感覺？佢第二日朝早點樣做？（乙）關於耶和華，我哋從呢個記載學到乜嘢？
4 請讀撒母耳記上3:11-18。耶和華嘅律法規定，年輕人要尊敬老人，特别係有職責嘅人。（出埃及記22:28；利未記19:32）到咗朝早，撒母耳能唔能够鼓起勇氣，向以利講出上帝嚴厲嘅審判信息呢？呢個對佢嚟講真係一啲都唔容易！聖經話“撒母耳唔敢將異象講俾以利知”。不過，耶和華令以利清楚知道，被呼喚嘅係撒母耳。於是，以利要求撒母耳將上帝所講嘅話原原本本講翻俾佢知，一句都唔可以隱瞞。撒母耳好聽話，“將一切話都講俾以利知”。
5 以利聽完撒母耳傳達嘅信息之後，並冇感到非常驚訝，因為佢之前已經從“上帝嘅一個使者”嗰度聽過類似嘅信息。（撒母耳記上2:27-36）我哋通過呢個記載可以睇出，耶和華好有智慧，佢的確係體恤人嘅上帝。
6． 上帝用體貼嘅方式幫助年輕嘅撒母耳，我哋從中學到乜嘢？
6 年輕人，你通過撒母耳嘅呢個記載睇出乜嘢呢？耶和華了解你面對嘅困難，亦都明白你嘅感受。可能你覺得自己好怕醜，好難同其他人分享王國信息，或者因為自己同同輩唔一樣而感到有壓力。不過請相信，耶和華好想幫助你。你可以通過禱告，向耶和華傾心吐意。（詩篇62:8）你亦都可以沉思聖經當中好似撒母耳噉嘅年輕人嘅事例。你仲可以向唔同年紀嘅基督徒同工請教，因為佢哋可能曾經克服過同你一樣嘅難題。佢哋或者會話俾你知，耶和華點樣以令人意想唔到嘅方式幫助咗佢哋。
體恤摩西
7,8． 乜嘢表明耶和華真係好體恤摩西嘅感受？
7 摩西80歲嗰時，耶和華俾佢一個艱巨嘅任務，就係拯救以色列人脱離埃及嘅奴役。（出埃及記3:10）當時，摩西已經喺米甸做咗40年嘅牧羊人，佢聽到呢個任務嗰時覺得好驚訝。佢話：“我算得係咩，可以去見法老，將以色列人從埃及帶領出嚟呢？”上帝對摩西講：“我保證會同你一齊。”（出埃及記3:11,12）上帝又向摩西承諾，以色列嘅長老一定會聽摩西講。雖然係噉，摩西仲係話：“如果佢哋……唔聽我講，……噉點算呢？”（出埃及記3:18；4:1）摩西噉樣講，其實就係反駁上帝！不過耶和華依然對佢保持耐心。唔單止係噉，耶和華仲賜力量俾摩西，使佢成為聖經記載當中第一個能够施行奇迹嘅人。（出埃及記4:2-9,21）
8 摩西仲係想揾藉口，佢話自己口齒唔伶俐。耶和華回答佢話：“我必定與你同在，教你應該講嘅話。”摩西係咪噉就願意接受任務呢？唔係，佢又請求上帝派其他人去。因為噉，耶和華向摩西發怒。不過，佢仲係好體恤摩西嘅感受，於是派亞倫代摩西講話。（出埃及記4:10-16）
9． 耶和華耐心、體貼嘅態度點樣幫助摩西成為一個傑出嘅領袖？
9 關於耶和華上帝，我哋從呢個聖經記載學到乜嘢？作為全能嘅上帝，耶和華本來可以强迫摩西即刻按照佢嘅命令去做。不過，耶和華仁慈、耐心噉對待謙虛嘅摩西，設法令佢感到安心。呢種體貼嘅方式有冇效呢？好有效！摩西後來成為一個傑出嘅領袖。佢用温和、體貼嘅方式對待其他人，就好似耶和華對待佢一樣。（民數記12:3）
喺待人方面，你會唔會效法耶和華？（請睇第10段）
10． 我哋效法耶和華向人表現體恤，可以點樣得益？
10 我哋可以從中學到乜嘢呢？如果你係一個丈夫、父親或者長老，一定比其他人負有更多嘅責任。你對待妻子、兒女或會衆成員嘅時候，一定要效法耶和華，表現體恤、仁慈同耐心。（歌羅西書3:19-21；彼得前書5:1-3）如果你努力效法耶和華，同埋耶穌基督呢位更偉大嘅摩西，就會變得更加平易近人，更容易鼓勵同安慰其他人。（馬太福音11:28,29）你亦都會為其他人樹立優良嘅榜樣。（希伯來書13:7）
力量强大而又體貼人心嘅拯救者
11,12． 耶和華帶領以色列人出埃及嗰時，點樣使以色列人有安全感？
11 以色列人喺公元前1513年離開埃及嗰時，人數可能超過三百萬。喺呢群以色列人當中，可能包括三到四代人，其中有老人有細路，肯定亦都有患病或者傷殘嘅人。要帶領咁大一群人離開埃及，肯定好需要一位體諒人、為人着想嘅領袖。耶和華就係一位噉樣嘅領袖，佢通過摩西嚟帶領以色列人。雖然以色列人要離開佢哋當時唯一嘅家鄉，不過佢哋仍然覺得好安心。（詩篇78:52,53）
12 耶和華點樣使佢嘅子民感到安心？佢使以色列人“列隊”離開埃及。（出埃及記13:18）以色列人見各方面都組織得井井有條，就清楚睇出呢一切係出於耶和華嘅安排。另外，耶和華“白天用雲引導佢哋，徹夜用火光帶領佢哋”，使佢哋知道耶和華與佢哋同在，無時無刻都喺度守護住佢哋。（詩篇78:14）接住落嚟發生嘅事表明，以色列人的確好需要呢種安全感。
耶和華喺紅海點樣用體貼嘅方式拯救以色列人？（請睇第13段）
13,14． （甲）耶和華喺紅海施行嘅奇迹，點樣表明佢體貼以色列人？（乙）耶和華點樣表明佢嘅力量比埃及人强大？
13 請讀出埃及記14:19-22。想像吓，你就係其中一個以色列人，而家前有紅海，後有法老嘅追兵。跟住，上帝採取行動嘞。佢將雲柱移到以色列人同埃及人之間。埃及人嗰邊一片黑暗，而以色列人呢邊就明光照耀！跟住你見到摩西伸出佢嘅手，指向紅海。好快，强勁嘅東風就將海水分開兩邊，直至對岸。你、你嘅家人同埋你嘅家畜都同其他人一齊有秩序噉行過海床。你一踩落海床就覺得有啲不同尋常。因為海床既唔係爛泥，亦唔係濕滑嘅凍土，反而又乾又實淨。你行喺上面覺得好踏實。最後，就算行得好慢嘅人都安全噉過到對岸。
14 請讀出埃及記14:23,26-30。就喺呢陣時，高傲愚蠢嘅法老亦都衝入海床，想追上你哋。摩西再次伸出手，指向紅海。跟住，本來好似兩幅牆噉嘅海水就開始回流。海水從兩邊衝落嚟，好似兩個海嘯撞埋一齊噉。法老同佢嘅手下全軍覆沒，無一生還！（出埃及記15:8-10）
15． 關於耶和華，我哋從呢個記載學到乜嘢？
15 我哋從呢個聖經記載可以睇出，耶和華係講求秩序嘅上帝。佢嘅呢種特質使我哋感到安心。（哥林多前書14:33）呢個記載亦都表明，耶和華係一個仁愛嘅牧人，佢會用實際嘅行動關心照顧佢嘅子民。佢會保護佢哋，使佢哋免受敵人傷害。我哋而家生活喺現行制度嘅末期，知道耶和華係咁關懷體貼人嘅上帝，我哋真係好安心！（箴言1:33）
16． 回顧耶和華拯救以色列人嘅記載，可以點樣强化我哋嘅信心？
16 今日，以整體嚟講，耶和華仍然照顧佢嘅子民，幫助佢哋保持靈性健壯，亦都保護佢哋免受敵人傷害。喺即將到來嘅大患難期間，耶和華都會繼續噉做。（啟示錄7:9,10）到時，上帝嘅子民無論年輕抑或年長，健全抑或殘疾，都唔會驚慌退縮。 * 佢哋緊記耶穌講過嘅話，就係“要挺身昂首，因為你哋好快就會得救嘞”。（路加福音21:28）聖經預言，歌革將會攻擊上帝嘅子民。歌革就係聯合起嚟嘅列國，比古代嘅埃及强大好多。不過，上帝嘅子民喺攻擊之下仍然會保持沉着冷靜。（以西結書38:2,14-16）點解上帝嘅子民有咁大嘅信心？因為佢哋知道，耶和華唔會改變，佢會再次證明佢係關心體貼佢子民嘅拯救者。（以賽亞書26:3,20）
17． （甲）我哋點樣做，就可以從耶和華照顧佢子民嘅聖經記載得益？（乙）下一篇課文會討論乜嘢？
17 聖經有好多事例表明，耶和華以仁慈體貼嘅方式照顧、指引同埋拯救佢嘅子民。呢篇課文嘅事例只係其中一部分。你沉思呢啲記載嘅時候，可以嘗試從一啲之前冇留意過嘅細節當中揾出同耶和華有關嘅新發現。噉樣做，你就可以將耶和華嘅美好特質深深印喺自己嘅頭腦同内心，强化自己對上帝嘅愛同信心。下一篇課文會討論，我哋喺家庭、會衆同埋傳道工作方面可以點樣效法耶和華上帝關心體恤人。
