如果​你​想​知道​而家​係​幾​點，你​會​點樣​做？好​可能​你​會​睇​吓​個​鐘​或者​手錶。如果​一​個​朋友​問​你​而家​係​幾​點，你​會​點樣​回答​佢？其實，有​唔同​嘅​方法​可以​表示​時間。

假如，而家​係​中午​過後​一​個​半​鐘，你​可能​話​係​一點​半。如果​有啲​地方​使用​24​小時​制，可能​就​會​講​13​點​30​分。另​一啲​地方​甚至​會​講​成“兩​點​嘅​一半”，意思​係​仲​有​三十​分鐘​就​到​兩​點。

人​閲讀​聖經​嗰時​可能​會​諗，聖經​時代​嘅​人​係​點樣​劃分​時間​嘅​呢？其實，有​好多​方法。例如，希伯來語​經卷​就​用“清早”、“早上”、“中午”、“晚上”呢啲​詞​嚟​描述​時間。（創世記​8:11；19:27；列王紀上​18:26）聖經​入面​仲​有​另​一​種​更​精確​嘅​方式​用​嚟​表示​時間。

喺​聖經​時代，以色列人​通常​會​喺​晚黑​安排​人​做​看更。耶穌​出世​前​好多​個​世紀，以色列人​將​夜晚​劃分​為​三​個​時段，稱​為“更”。（詩篇​63:6）例如，士師記​7:19 就​提​到，“半夜​以前，啱啱​換​更”。到​咗​耶穌​嘅​日子，猶太人​又​採納​咗​希臘​同​羅馬​嘅​四​更​制。

福音書​好多​次​用“更”嚟​表示​時間。例如，馬太福音​14:25​提​到​耶穌​喺​海​上​行走​嘅​記載，經文​話​當時​係“天​就​光​嘅​時候”。呢度​譯​作“天​就​光​嘅​時候”嘅​希臘語​原文​意思​係“第​四​更”。耶穌​喺​一​個​比喻​入面​亦​都​話：“家主​如果​知道​幾​更​天​有​賊​嚟，就​會​保持​警醒，唔​俾​賊​挖​窿​入​嚟​屋企。”（馬太福音​24:43）

有​一​次，耶穌​同​門徒​講話​嘅​時候，分别​提​到​有​邊​四​更。佢​話：“所以，你哋​要​時刻​守望，因為​你哋​唔​知道​家主​喺​乜嘢​時候​嚟​到，可能​黃昏，可能​半夜，可能​雞​叫，可能​清晨。”（馬可福音​13:35）第​一​更“黃昏”，係​從​日落​到​大約​夜晚​9​點。第​二​更“半夜”，係​從​大約​夜晚​9​點​到​12​點。第​三​更“雞​叫”或者​叫做“黎明​前”，係​從​夜晚​12​點​到​大約​凌晨​3​點。喺​耶穌​被​捕​嗰​晚，好​可能​就係​喺​呢​一​更​有​雞​叫。（馬可福音​14:72）第​四​更“清晨”，係​從​大約​凌晨​3​點​到​日出。

所以，雖然​聖經​時代​嘅​人​冇​我哋​今日​嘅​鐘錶，但係​佢哋​都​有​表示​唔同​時間段​嘅​方式。