繼續用愛心强化人
“愛心先至能够强化人。”——哥林多前書8:1
1． 同門徒喺一齊嘅最後一個晚上，耶穌同門徒講咗乜嘢重要嘅話題？
同門徒喺一齊嘅最後一個晚上，耶穌差唔多30次提到愛呢種特質。佢特别指出，佢嘅門徒應該“彼此相愛”。（約翰福音15:12,17）佢哋互相表現嘅愛心成為一個顯著嘅標誌，使人好容易就辨認出，佢哋係真正嘅基督徒。（約翰福音13:34,35）耶穌曾經講過：“人為朋友捨棄生命，人嘅愛心冇比呢個更大㗎嘞。你哋如果照我嘅吩咐去做，就係我嘅朋友嘞。”（約翰福音15:13,14）佢所講嘅愛，唔係只係感情上嘅，而係一種有力量，願意自我犧牲嘅可貴特質。
2． （甲）上帝嘅子民有乜嘢顯著嘅特質？（乙）呢篇課文會討論邊啲問題？
2 今日，好多人都睇出，耶和華嘅子民團結和睦，有真誠同無私嘅愛。（約翰一書3:10,11）無論弟兄姊妹嚟自邊個國家，屬於邊個民族，講邊種語言，或者有乜嘢背景，整個弟兄團體都洋溢住基督徒嘅愛心。呢篇課文會討論以下三個問題：點解今日呢個世界咁需要愛心？耶和華同耶穌點樣用愛心强化我哋？我哋每個人可以點樣通過基督徒嘅愛心嚟强化其他人？（哥林多前書8:1）
點解今日呢個世界特别需要愛心？
3． “難以應付嘅非常時期”對人有乜嘢影響？
3 因為我哋身處“難以應付嘅非常時期”，生活總係有好多“煩惱痛苦”。（詩篇90:10；提摩太後書3:1-5）好多人因為噉，就想放棄自己嘅生命。每年全球有八十萬人自殺身亡，平均每四十秒就有一個。令人遺憾嘅係，都有啲基督徒因為覺得生活好痛苦而選擇結束自己嘅生命。
4． 邊啲聖經人物曾經想一死了之？
4 喺聖經時代，有啲上帝嘅忠僕都曾經諗過一死了之。例如，約伯飽受痛苦煎熬嗰時話：“我厭棄生命，唔想長壽。”（約伯記7:16；14:13）約拿因為對事情嘅結果感到失望，就話：“耶和華啊，而家就求你攞咗我嘅性命，因為我覺得生不如死。”（約拿書4:3）忠心嘅先知以利亞曾經一度感到絶望無助，話：“耶和華啊，我所受嘅已經够嘞！求你而家就取我性命”。（列王紀上19:4）其實，耶和華好珍視獻身俾佢嘅忠僕，希望佢哋可以繼續生活落去。佢冇因為呢啲忠僕有噉嘅感覺就責備佢哋，而係幫助佢哋克服輕生嘅念頭，用愛心强化佢哋，使佢哋可以繼續忠貞噉事奉佢。
5． 點解喺而家呢個日子，弟兄姊妹特别需要受到關愛？
5 就算我哋嘅弟兄姊妹冇輕生嘅諗法，佢哋大多數人仲係要面對好大嘅壓力，好需要其他人嘅關愛，從而得到强化。有啲弟兄姊妹遭受迫害同嘲笑，有啲喺工作上俾人批評或者俾同事背後中傷，有啲因為工作壓力太大或者經常要加班而感到精疲力盡，有啲就面對嚴重嘅家庭難題，例如成日俾不信嘅配偶挑剔。會衆入面有好多人因為以上或者其他難題而感到身心疲倦。邊個可以幫助呢啲人堅持落去？
耶和華嘅愛强化我哋
6． 耶和華點樣用愛嚟强化佢嘅忠僕？
6 耶和華向佢嘅忠僕保證，無論而家定係將來，佢對佢哋嘅愛都唔會改變。耶和華對忠於佢嘅以色列人講：“你喺我眼中係寶貴嘅，係我所看重嘅，我愛你。 ……你唔使怕，因為我與你同在。”（以賽亞書43:4,5）呢啲以色列人聽到耶和華嘅呢番話，一定大受鼓勵。身為上帝嘅子民，你可以確信，耶和華一定好關心愛護你。 * 聖經對嗰啲擁護正確崇拜嘅人承諾話：“佢係大能嘅主，必施行拯救。佢必因你而歡欣快樂”。（西番雅書3:16,17）
7． 耶和華點樣好似媽媽噉關愛我哋？（請睇吓課文開頭嘅圖片）
7 耶和華保證，無論佢嘅子民遭遇乜嘢患難，佢都會支持同安慰佢哋。經文話：“你哋會好似嬰兒一樣食奶，又被抱喺懷中呵護，放喺膝上逗玩。母親點樣安慰成年嘅兒子，我亦都要照樣安慰我嘅子民。”（以賽亞書66:12,13）試諗吓，媽媽滿懷愛心噉抱住仔仔，同佢一齊玩嗰時，仔仔幾咁開心，幾咁有安全感！通過呢個温馨嘅情景，我哋可以明白，耶和華幾咁關愛佢嘅子民。耶和華的確非常珍視你。（耶利米書31:3）
8,9． 耶穌嘅愛點樣强化我哋？
8 約翰福音3:16話：“上帝深愛世人，甚至賜下自己嘅獨生子，使信從佢嘅人都不致滅亡，反得永生。”因為呢個原因，真基督徒受到耶和華嘅愛所吸引。耶穌為我哋犧牲生命，亦都表明佢好愛我哋。呢份愛使我哋大受强化！聖經保證話，任何患難痛苦都唔能够“隔斷基督對我哋嘅愛”。（羅馬書8:35,38,39）
9 生活當中發生嘅好多問題，會令我哋感到身心疲累，或者喺事奉耶和華方面失去喜樂。不過請謹記，耶穌基督嘅愛可以强化我哋，使我哋有力量繼續保持忍耐。（請讀哥林多後書5:14,15）佢嘅愛亦都使我哋渴望繼續用自己嘅生命嚟事奉耶和華，即使面對災難、壓迫，或者感到失望、憂慮，都唔會輕易放棄。
弟兄姊妹需要我哋嘅關愛
學習耶穌嘅榜樣，推動你用愛心强化人（請睇第10、11段）
10,11． 强化弟兄姊妹係邊個嘅責任？請解釋。
10 耶和華會通過基督徒會衆用愛心强化我哋。如果我哋懷住愛心，喺屬靈同感情方面强化我哋嘅弟兄姊妹，就係對耶和華以愛還愛嘞。（約翰一書4:19-21）使徒保羅勸勉基督徒話：“你哋要不斷彼此鼓勵，互相强化，就好似你哋而家所做嘅噉。”（帖撒羅尼迦前書5:11）冇錯，唔單止長老，其實會衆嘅每一個人都可以效法耶和華同耶穌，鼓勵强化弟兄姊妹。（請讀羅馬書15:1,2）
11 會衆有啲成員有嚴重嘅情緒問題，可能佢哋需要一啲專業嘅幫助同埋接受治療。（路加福音5:31）長老同會衆其他成員都應該表現謙遜嘅態度，因為大多數人都冇接受過精神或心理方面嘅專業培訓。不過，佢哋都有一項極其重要嘅工作，就係要“安慰憂鬱嘅人，支持軟弱嘅人，耐心對待所有人”。（帖撒羅尼迦前書5:14）我哋好想盡力理解弟兄姊妹嘅感受。我哋要體恤佢哋，對佢哋有耐心，喺佢哋灰心沮喪嘅時候用言語安慰佢哋。你有冇盡力安慰同鼓勵其他人？你點樣做就可以更有效噉使其他人受到强化？
12． 會衆成員嘅愛心可以點樣强化人？請舉例。
12 我哋可以點樣用愛嚟强化嗰啲喺感情上飽受折磨嘅人？歐洲一個姊妹話：“有時我會想自殺。不過會衆俾咗我好大嘅支持，係佢哋救咗我。弟兄姊妹經常鼓勵我，關心我。雖然知道我有抑鬱症嘅人唔多，不過成個會衆都一直喺度幫助我。一對夫婦就好似我嘅屬靈父母噉。佢哋悉心照顧我，24小時都願意幫助我。”當然，我哋唔係每個人都可以做到噉嘅程度。不過，我哋嘅支持，可以對嗰啲喺感情上飽受折磨嘅人産生好大嘅影響。 *
用愛心强化人嘅方法
13． 如果我哋想安慰同强化其他人，可以點做？
13 用心聆聽。（雅各書1:19）懷住體恤之情用心聆聽弟兄姊妹講話係愛心嘅表現。我哋可以設身處地噉諗吓對方嘅感覺，用温和嘅語氣向佢提出問題，深入了解佢嘅感受。噉樣，你就係表現體恤，强化對方。要流露出真摯嘅感情，等對方睇出你真係關心佢。如果佢想講更多，要保持耐心，千祈唔好打斷佢講話。只要你耐心聆聽，就可以更明白對方嘅感受，而對方亦都會更加信任你。噉樣，你想安慰同强化佢嘅時候，佢就會更願意聽你講。佢感受到你真誠嘅關愛，就可以得到好大嘅安慰。
14． 點解我哋想避免挑剔嘅精神？
14 避免挑剔嘅精神。如果一個情緒低落嘅人覺得你喺度批評緊佢，噉佢内心只會更加痛苦。結果，就算你想幫助佢，都會變得好困難。聖經話：“講話不慎嘅如刀刺人，明智人嘅舌就如良藥。”（箴言12:18）當然，我哋唔會專登講啲尖酸刻薄嘅話去傷害人。不過，我哋有時無意中講出魯莽嘅話，都會好傷人心。我哋要懷住愛心去鼓勵同强化對方，盡量企喺對方嘅立場嚟理解佢嘅感受。（馬太福音7:12）
15． 我哋可以用乜嘢實用嘅工具嚟强化其他人？
15 用上帝嘅話語安慰人。（請讀羅馬書15:4,5）聖經嚟自“賜人忍耐同安慰嘅上帝”，可以使人得到好大嘅安慰。除咗安慰人心嘅經文之外，仲有好多嘅工具有助於我哋搜尋聖經資料。《守望台出版物索引》同《耶和華見證人出版物檢索手册》呢兩個工具，可以幫助我哋揾出合適嘅經文同文章，安慰同鼓勵我哋嘅弟兄姊妹。
16． 鼓勵悲傷嘅弟兄姊妹嗰時，我哋應該有點樣嘅態度？
16 温柔和藹。我哋應該懷住無私嘅愛，用温柔和藹嘅態度嚟鼓勵强化人。耶和華係“慈悲嘅父親，亦係賜一切安慰嘅上帝”，對佢嘅子民“有親切憐恤嘅心”。（請讀哥林多後書1:3-6；路加福音1:78；羅馬書15:13）保羅喺呢方面立下好好嘅榜樣，佢話：“我哋喺你哋當中温柔和藹，好似母親乳養愛護自己嘅仔女一樣。我哋既然對你哋深懷温情，就唔單止樂意將上帝嘅好消息傳俾你哋，連自己嘅性命都樂意俾你哋，因為你哋係我哋所疼愛嘅。”（帖撒羅尼迦前書2:7,8）我哋有温柔和藹嘅態度，就可以為嗰啲悲傷嘅弟兄姊妹帶嚟安慰。好可能耶和華就係用呢種方式嚟回應佢哋嘅禱告。
17． 我哋想用愛心强化弟兄姊妹，對佢哋就應該有乜嘢平衡嘅睇法？
17 唔好期望弟兄姊妹凡事完美。對弟兄姊妹要有平衡嘅睇法。期望弟兄姊妹凡事做得十全十美係唔現實嘅，只會令自己失望。（傳道書7:21,22）耶和華對佢子民嘅要求係合情合理嘅。如果我哋效法佢嘅榜樣，就會包容其他人唔完美嘅地方。（以弗所書4:2,32）如果我哋令弟兄姊妹覺得佢哋做得唔够好，或者將佢哋同其他人比較，就會令佢哋感到灰心。相反，我哋應該鼓勵佢哋，衷心稱讚佢哋付出努力。噉樣就係用愛心强化佢哋，使佢哋更加有理由繼續喜樂噉事奉耶和華。（加拉太書6:4）
18． 點解我哋要用愛心强化人？
18 喺耶和華同耶穌眼中，每一個忠僕都係極其寶貴嘅。（加拉太書2:20）我哋好愛我哋嘅弟兄姊妹，好想用温和仁愛嘅方式對待佢哋。為咗使佢哋得享安舒，“我哋應該追求促進和睦嘅事，追求彼此强化嘅事”。（羅馬書14:19）我哋所有人都對即將到來嘅新世界充滿期待，到時唔會再有人感到灰心沮喪！喺樂園入面，唔會有戰爭同迫害，唔會再有人患病或者因為遺傳嘅罪而死亡，所有人都唔需要面對家庭嘅難題，亦都唔會再有人悲觀失望。千年統治結束之後，人類已經身心完美。嗰啲渡過最後考驗嘅人就會被耶和華接納為地上嘅兒女，“得享上帝兒女榮耀嘅自由”。（羅馬書8:21）願我哋所有人繼續用愛心强化人，互相幫助，一同進入上帝美妙嘅新世界。
^ 6段 請睇《親近耶和華》第24章。
^ 12段 關於點樣幫助嗰啲有自殺念頭嘅人，請睇《警醒！》2014年4月刊“為甚麽要活下去？——三個重要理由”、2012年1月刊“假如你想輕生……”同埋2001年10月22日刊“生命無價”嘅相關文章。
