年長嘅基督徒——耶和華珍視你哋忠貞嘅服務
全球各地嘅長老都好珍惜自己嘅職責，全心為上帝嘅子民服務。佢哋的確係上帝俾我哋嘅恩賜！喺冇幾耐之前，上帝嘅組織作咗一個調整，請年長嘅長老將一啲重要職責交俾較年輕嘅長老。係邊方面嘅職責呢？
新嘅安排係，一個長老到咗70歲就唔再繼續擔任分區監督同駐外導師，到咗80歲亦都會將一啲職責，例如分部委員會或者會衆長老團協調人，交俾較年輕嘅弟兄。須要作出調整嘅長老有乜嘢反應？佢哋對耶和華同佢嘅組織表現出極大嘅忠貞！
肯恩做咗49年嘅分部委員會協調人，佢話：“我完全同意呢個決定。其實，就喺嗰朝早，我向耶和華禱告話，需要一個較年輕嘅長老嚟做協調人。之後，就得知呢個消息嘞。”世界各地好多忠心嘅年長長老都同肯恩有一樣嘅感覺。不過，因為佢哋好想喺自己嘅崗位繼續熱心噉為弟兄姊妹服務，所以佢哋啱啱聽到呢個調整嗰時覺得有啲灰心。
埃斯珮蘭迪奧曾經係會衆長老團嘅協調人，佢話：“我有啲傷感。”但係佢亦都承認：“我嘅健康狀況越來越差，需要更多時間嚟照顧自己嘅身體。”埃斯珮蘭迪奧繼續忠心噉為耶和華服務，為會衆作出好多貢獻。
嗰啲多年從事探訪工作嘅監督對自己嘅調整又有乜嘢睇法呢？艾倫從事探訪工作38年，佢承認話：“我知道呢個調整之後，成個人都呆晒。”不過佢睇出，訓練較年輕嘅弟兄真係好重要，而佢亦都繼續忠心事奉耶和華。
拉塞爾總共有40年嘅時間從事探訪會衆同埋擔任駐外導師嘅工作。佢同太太一開始聽到呢個調整嗰時都有啲失望。佢哋話：“我哋都好珍惜自己嘅崗位，亦都覺得自己有足够嘅體力同精力繼續做落去。”而家，拉塞爾同太太都善用自己嘅經驗同接受過嘅培訓去造益會衆，而會衆嘅傳道員都好鍾意同佢哋一齊工作。
可能你冇以上提到嘅感覺，不過閲讀撒母耳記下嘅記載，或者可以幫助你理解呢啲弟兄姊妹嘅感受。
表現謙遜同考慮實際情況
押沙龍發動叛亂期間，大衛從耶路撒冷逃亡到約旦河東邊嘅瑪哈念。喺嗰度，大衛同佢嘅手下好需要得到一啲生活必需品。你記唔記得當時發生乜嘢事？
當地有三個男子慷慨噉提供床、食物同餐具俾佢哋。巴西萊係其中一個。（撒母耳記下17:27-29）押沙龍叛變失敗之後，大衛起程返去耶路撒冷，巴西萊就送佢送到約旦河邊。大衛好想巴西萊同佢一齊返耶路撒冷。雖然佢知道巴西萊“係個大財主”，生活無憂，但仲係應承會提供食物俾佢。（撒母耳記下19:31-33）因為巴西萊有美好嘅特質同豐富嘅經驗，大衛好賞識佢，希望佢可以留喺自己身邊，輔助自己。對巴西萊嚟講，有機會喺王宮生活同工作的確係好大嘅殊榮！
不過，巴西萊考慮實際情況，表現出謙遜嘅態度。佢指出自己已經80歲，然後又話：“我仲能够分辨好壞咩？”佢嘅話係乜嘢意思？年老嘅巴西萊積累咗豐富嘅人生經驗，佢好有智慧，一定可以好似後來羅波安日子嘅“長老”噉，為大衛提出好多實用嘅建議。（列王紀上12:6,7；詩篇92:12-14；箴言16:31）巴西萊話自己唔能够分辨好壞，可能係指自己上咗年紀之後，能够做到嘅事好有限。佢亦都承認自己嘅味覺同聽覺越來越差。（傳道書12:4,5）最後，巴西萊推薦年輕嘅金罕同大衛一齊返耶路撒冷。呢個金罕可能係巴西萊嘅仔。（撒母耳記下19:35-40）
為將來做好準備
文章開頭提到同年齡有關嘅調整，反映出巴西萊嘅觀點。可以理解嘅係，我哋今日要考慮嘅事唔單單係一個人嘅情況同能力，亦都要從實際出發，睇吓對全球各地忠心服務嘅長老嚟講乜嘢先至係最好嘅。
年長而又謙遜嘅基督徒男子可以睇出，如果佢哋將自己多年以來一直擔任嘅職責交俾較年輕嘅弟兄，噉耶和華嘅組織就會得到强化，喺未來可以發展得更好。通常嚟講，年長嘅弟兄都會訓練年輕嘅弟兄，就好似巴西萊訓練佢嘅仔、使徒保羅訓練提摩太一樣。（哥林多前書4:17；腓立比書2:20-22）呢啲較年輕嘅弟兄的確係嚟自上帝嘅“恩賜”，可以“强化基督嘅身體”。（以弗所書4:8-12；參考民數記11:16,17,29）
有機會參與其他方面嘅服務
喺世界各地，上帝嘅好多忠僕將職責交俾其他人之後，都可以喺其他方面繼續事奉耶和華。
從事探訪工作19年嘅馬爾科話：“職責調整之後，我就有更多時間可以認識一啲姊妹嘅不信丈夫。”
熱拉爾多從事咗28年嘅探訪工作，佢話：“我哋定立咗一啲新嘅目標，包括幫助不活躍嘅弟兄姊妹同埋主持更多嘅聖經課程。”佢同太太而家主持緊15個聖經課程。喺佢哋嘅幫助下，好多不活躍嘅弟兄姊妹重新參加聚會。
文章開頭提到嘅艾倫話：“我哋而家有機會做更多傳道工作。我哋參與公衆場所見證、商業見證，亦都向隔籬鄰舍作見證，從中得到好大嘅喜樂。有兩個鄰居已經嚟過王國聚會所添。”
如果組織俾你一個新嘅委派，你都可以善用自己嘅才幹，喺會衆當中作出特别嘅貢獻。你可以同會衆嘅年輕弟兄分享自己嘅寶貴經驗，從而支持耶和華嘅工作。上文提到嘅拉塞爾話：“耶和華正喺度訓練同埋運用呢啲能幹而且年輕有為嘅弟兄。佢哋精力充沛，悉心教導同牧養上帝嘅羊群，使整個弟兄團體都大大得益！——請睇附欄“ 幫助較年輕嘅弟兄充分發揮潛能”
耶和華珍視你忠貞嘅服務
如果你嘅職責最近有所改變，請繼續保持積極嘅心態。好多人都因為你熱心工作而深受打動。你繼續噉樣做，一定可以幫助更多嘅人。無論而家定係將來，弟兄姊妹都會一直愛戴你哋。
更重要嘅係，你喺耶和華心目中留低咗深刻嘅印象。希伯來書6:10話，耶和華“絶對唔會忘記［你］所做嘅工作同［你］為佢嘅名所顯嘅愛心，就係［你］從前服事聖民，而家仍然服事佢哋”。呢個經文作出嘅保證幾咁令人安慰！喺耶和華眼中，你的確好寶貴。無論係你以前為耶和華付出嘅努力，抑或你而家繼續作出嘅忠貞服務，耶和華都一定唔會忘記！
可能你唔需要因為新嘅調整而改變崗位，不過呢個調整都可能會影響到你。點解噉講呢？
雖然一啲弟兄嘅職責有所改變，不過佢哋有豐富嘅經驗，而且靈性成熟。如果你有機會接觸一個噉樣嘅弟兄，不妨主動徵求佢嘅意見，留心觀察佢喺而家嘅崗位上點樣善用自己嘅經驗忠貞噉為會衆服務。你噉樣做，就可以從中得益。
可能你因為組織嘅調整，而家喺新嘅崗位繼續忠貞噉為耶和華服務。又或者，你好想向有經驗嘅同工請教，從而得到教導同訓練。無論你屬於邊一種情況，都請謹記，耶和華珍視所有多年為佢服務並且繼續忠貞事奉佢嘅人。
