遵行呢啲事就有福嘞
“我嘅食物就係遵行差派我嚟嗰一位嘅旨意，完成佢嘅工作。”——約翰福音4:34
1． 呢個世界嘅自私精神點樣影響我哋？
點解實踐上帝嘅話語並唔容易？一個原因係，做正確嘅事需要有謙卑嘅態度。喺呢個“最後嘅日子”，我哋周圍都係“專愛自己，貪愛錢財，自負，高傲”同“漫無自制”嘅人。（提摩太後書3:1-3）身為上帝嘅僕人，我哋憎恨呢啲不良嘅精神態度。不過，有時我哋見到呢啲自私嘅人備受推崇，睇嚟亦都生活無憂，可能會羨慕佢哋。（詩篇37:1；73:3）我哋可能會諗：“我凡事都先顧及其他人，係咪真係值得呢？如果我‘行事為人好似後輩噉’，其他人係咪會睇低我呢？”（路加福音9:48）如果我哋容許世界嘅精神影響自己，噉我哋同弟兄姊妹之間嘅親密關係就會受到損害，其他人亦都好難睇出我哋係真基督徒。只要我哋研讀上帝嘅話語，效法聖經入面嘅好榜樣，就可以從中得益。
2． 我哋可以從古代嘅上帝忠僕身上學到乜嘢？
2 如果我哋想向嗰啲忠於耶和華嘅人學習，就應該研讀並沉思佢哋所做嘅一切，使自己嘅信心受到强化。乜嘢幫助佢哋成為上帝嘅朋友？佢哋點樣蒙上帝悦納？佢哋從邊度得到力量去成就上帝嘅旨意？我哋思考呢啲問題，就可以更好噉吸收靈糧。
乜嘢幫助我哋保持信心堅强
3,4． （甲）耶和華點樣教導我哋？（乙）點解話屬靈嘅食物唔係只係獲取知識？
3 我哋通過聖經、聖經出版物、JW.ORG網站、JW電視網，以及聚會同大會得到好多好好嘅勸告同教導。不過，吸收屬靈嘅食物唔係只係獲取知識。仲包括乜嘢呢？耶穌話：“我嘅食物就係遵行差派我嚟嗰一位嘅旨意，完成佢嘅工作。”（約翰福音4:34）
4 對耶穌嚟講，屬靈嘅食物包括按照上帝嘅旨意行事。點解話呢個係食物呢？正如食物可以使我哋嘅身體得到充足嘅營養，我哋遵行上帝嘅旨意，就會有滿足感，自己嘅信心亦都受到强化。有時，我哋參加傳道前聚會嗰陣覺得好攰，不過傳道結束之後就覺得好開心。做屬靈嘅工作的確可以使我哋重新得力！
5． 按智慧行事帶嚟乜嘢益處？
5 我哋按照上帝嘅吩咐行事，就係有智慧嘞。（詩篇107:43）智慧可以帶俾我哋好多益處。聖經話：“你喜歡嘅一切都唔能够同［智慧］媲美。 ……人持守智慧，智慧就係佢哋嘅生命樹；緊守智慧嘅，必稱為有福嘅人。”（箴言3:13-18）耶穌話：“你哋既然知道呢啲事，如果遵行，就有福嘞。”（約翰福音13:17）基督徒只要繼續按照耶穌嘅吩咐去做，就可以享有恆久嘅喜樂。佢哋唔係只係一時聽從耶穌嘅教導，而係喺生活各方面都時刻效法耶穌嘅榜樣。
6． 點解我哋要不斷將自己學到嘅實踐出嚟？
6 今日，我哋應該堅持實踐學到嘅知識。例如，一個機械修理師可能有工具、物料同知識。如果佢善用呢啲資源，就可以更好噉完成工作。但係，就算佢有好多寶貴嘅工作經驗，都仲係要不斷將自己學到嘅用出嚟，先可以繼續做一個技巧精湛嘅工人。同樣，我哋啱啱認識真理嗰時，可能因為自己可以將聖經嘅教導實踐出嚟而感到開心，不過，我哋如果想得到恆久嘅喜樂，就要每一日都謙卑噉按照耶和華嘅指引嚟生活。
7． 我哋睇完聖經人物嘅榜樣之後，點樣做就係有智慧？
7 接住落嚟我哋會睇吓，一啲考驗我哋忠貞嘅情況，同埋睇吓古代嘅忠僕遇到類似考驗嘅時候點樣做。我哋唔應該只係知道呢啲記載，仲要認真沉思，然後喺生活上應用出嚟。
唔好自命不凡
8,9． 使徒行傳14:8-15嘅記載點樣表明使徒保羅有謙卑嘅態度？（請睇吓課文開頭嘅圖片）
8 上帝嘅旨意就係要“各種各樣嘅人都可以得救，確切認識真理”。（提摩太前書2:4）你對好多仲未認識真理嘅人有乜嘢睇法？雖然使徒保羅會去猶太會堂向嗰啲已經相信上帝嘅人傳道，不過佢亦都向非猶太裔嘅人傳講真理。呢啲崇拜假神嘅人對好消息嘅反應，使保羅嘅謙卑受到考驗。
9 喺保羅嘅第一次傳道旅程，利考尼亞人將保羅同巴拿巴當成神明，分别稱佢哋為宙斯同赫耳墨斯。保羅同巴拿巴有冇趁機成為大人物？喺過去兩年期間，佢哋去到唔同嘅城市都受到迫害。佢哋有冇樂觀噉認為，今次取得咗重大突破呢？佢哋會唔會以為，公開嘅方式可以促進傳道工作呢？佢哋冇噉諗過！佢哋即刻撕裂外衣，大聲噉澄清話：“各位，點解要噉樣做呢？我哋都只不過係人，同你哋一樣軟弱。”（使徒行傳14:8-15）
10． 點解保羅同巴拿巴冇覺得自己高人一等？
10 保羅同巴拿巴承認佢哋都係唔完美嘅，佢哋唔想將正確嘅崇拜同異教混為一談。佢哋唔係受上帝委派做海外傳道工作嘅咩？（使徒行傳13:2）佢哋唔係受聖靈膏立，將來可以得享榮耀嘅咩？冇錯，佢哋的確係。不過保羅同巴拿巴冇覺得自己高人一等，因為佢哋知道，呢啲利考尼亞人如果熱切響應好消息，都可以享有同樣嘅希望。
11． 喺傳道工作上，我哋可以點樣效法保羅謙卑嘅榜樣？
11 我哋可以點樣效法保羅表現謙卑？首先，好似保羅噉，我哋唔應該因為自己有特别嘅委派或者倚靠上帝嘅力量取得某啲成就，就覺得自己好犀利。我哋每個人都可以問吓自己：“我對傳道對象有乜嘢睇法？我會唔會受大衆嘅思想影響，對某啲群體懷有偏見？”值得稱讚嘅係，世界各地嘅見證人都努力向各種各樣嘅人傳講王國嘅好消息。雖然某啲種族或民族嘅人俾人睇低，但見證人為咗幫助呢啲人認識真理，甚至學習佢哋嘅語言文化。無論喺乜嘢情況下，見證人都唔會覺得自己比傳道對象更加優越。相反，佢哋為咗幫助人接受王國嘅好消息，會盡力了解每一個人。
喺禱告中提到對方嘅名
12． 以巴弗點樣表明佢無私噉關心其他人？
12 我哋謙卑噉遵行上帝旨意嘅另一個方式係，為嗰啲“同我哋一樣有幸獲得呢個信仰嘅人”禱告。（彼得後書1:1）以巴弗就係噉樣做嘅。呢個名只係喺保羅嘅書信當中出現過三次。保羅喺羅馬被軟禁嘅時候寫信俾歌羅西嘅基督徒。佢喺信入面提到，以巴弗“經常殷切為［佢哋］禱告”。（歌羅西書4:12）以巴弗好熟識佢嘅弟兄姊妹，亦都深切關心佢哋。雖然以巴弗“陪伴”保羅一齊坐監，不過佢仲係好關心其他人嘅屬靈需要，設法做啲事去幫助佢哋。（腓利門書23）佢的確無私噉關心其他人。我哋可以效法以巴弗為弟兄姊妹禱告，甚至喺禱告中提到佢哋嘅名。噉樣嘅禱告，大有力量。（哥林多後書1:11；雅各書5:16）
13． 你禱告嗰時可以點樣效法以巴弗嘅榜樣？
13 請諗吓，自己禱告嘅時候可以提到邊啲人嘅名。好似以巴弗噉，好多弟兄姊妹都為自己會衆嘅人、肩負家庭重任嘅人，同埋嗰啲要喺重大問題上做抉擇或者正受到誘惑嘅人禱告。你可以為嗰啲素未謀面嘅弟兄姊妹禱告，喺jw.org“耶和華見證人因信仰被囚”呢篇文章可以揾到佢哋嘅名單。（點擊“新聞室”> “法律訴訟”）另外，我哋可以為嗰啲痛失親友嘅人、喺災難或者戰爭倖存嘅人，同埋有經濟難題嘅人禱告。我哋可以為好多弟兄姊妹禱告，噉樣可以造益佢哋。我哋為呢啲弟兄姊妹禱告，就表明我哋唔係只關心自己，亦都關心其他人。（腓立比書2:4）耶和華會垂聽呢啲禱告。
“敏於聆聽”
14． 點解話，耶和華喺用心聆聽方面係最好嘅榜樣？
14 我哋表現謙卑嘅另一個方式係，人哋講話嘅時候，用心聆聽。雅各書1:19話，我哋要“敏於聆聽”。喺呢方面，耶和華上帝為我哋立下完美嘅榜樣。（創世記18:32；約書亞記10:14）我哋嚟睇吓出埃及記32:11-14（請讀）嘅對話。雖然耶和華唔需要摩西嘅意見都可以做最正確嘅決定，不過佢仲係俾機會摩西表達自己嘅感受。有冇人願意花好多時間去聽一個犯錯嘅人嘅建議，然後照住去做呢？耶和華就會噉做。就算一個人唔完美，只要佢懷住信心祈求，耶和華都會耐心聆聽。
15． 我哋可以點樣效法耶和華尊重人？
15 我哋每個人都可以問吓自己：“既然耶和華紆尊降貴，聆聽亞伯拉罕、拉結、摩西、約書亞、瑪挪亞、以利亞同埋希西家所講嘅話，噉我唔係都好應該尊重弟兄姊妹，重視佢哋嘅睇法咩？如果佢哋提出好嘅建議，我可唔可以按住去做呢？我係咪可以更加關心會衆或者屋企嘅某啲成員呢？我可以點樣做呢？”（創世記30:6；士師記13:9；列王紀上17:22；歷代志下30:20）
“話唔定耶和華睇見我嘅苦況”
大衛話：“由得佢咒罵喇”！你會點樣做？（請睇第16、17段）
16． 大衛受到示每辱罵同攻擊嗰時點樣做？
16 我哋俾人激嬲嗰時，謙卑有助於我哋表現自制。（以弗所書4:2）關於呢一點，撒母耳記下16:5-13（請讀）嘅記載值得我哋學習。示每係掃羅王嘅親戚，佢曾經辱罵同攻擊大衛及其手下。雖然大衛當時有能力對付示每，不過佢並冇噉樣做。點解大衛可以控制到自己嘅情緒？我哋通過詩篇3篇可以明白呢一點。
17． 大衛點解可以保持自制？我哋可以點樣效法佢？
17 詩篇3篇題記表明，呢篇詩係大衛“躲避兒子押沙龍”嘅時候寫嘅。經文第1、2節所描述嘅，同撒母耳記下16章描述嘅係同一件事。跟住，詩篇3:4强調咗大衛對耶和華嘅信心。經文話：“我要揚聲呼求耶和華，佢就從佢嘅聖山上回答我。”我哋遭受攻擊嘅時候，同樣都可以向上帝禱告。耶和華會賜我哋聖靈，幫助我哋忍受得住。我哋俾人惡意激嬲嗰陣，係咪可以付出更多努力表現自制同寬恕呢？你相唔相信耶和華會睇到你嘅難題並祝福你呢？
“最重要嘅係智慧”
18． 不斷實踐神聖嘅教導點樣使我哋得益？
18 我哋做正確嘅事就可以得到好多福分。難怪箴言4:7話，“最重要嘅係智慧”！雖然智慧係以知識為基礎嘅，不過判斷一個人係咪有智慧，唔係在於佢有幾多知識，而係睇佢有冇將知識實踐出嚟。螞蟻冇好多知識，不過佢哋喺夏天就識得為過冬準備食物。佢哋嘅行為表明，佢哋都有一啲本能嘅智慧。（箴言30:24,25）聖經話，基督係“上帝嘅智慧”，因為佢凡事都取悦耶和華。（哥林多前書1:24；約翰福音8:29）做正確嘅決定同埋按照呢個決定去做，其實係兩回事。如果我哋知道乜嘢事係啱嘅，而且以謙卑嘅態度不斷努力去做，就會得到耶和華嘅獎賞。（請讀馬太福音7:21-23）我哋每個人都可以繼續努力，使會衆充滿謙卑嘅精神。實踐學到嘅知識係需要時間嘅。如果我哋願意耐心噉做，就表明我哋有謙卑嘅態度，無論而家定係將來都可以帶俾我哋無窮嘅喜樂。
