你可以點樣適應新嘅會衆？
“搬嚟呢度之前我好擔心，”艾倫 *話，“我唔知識唔識到新嘅朋友，或者可唔可以融入到新嘅會衆。”艾倫而家喺一個離佢以前屋企超過1400公里（大約900英里）嘅新會衆。
如果你搬到一個新嘅會衆，可能都會有呢啲憂慮。有乜嘢方法可以幫助你調整呢？如果你覺得好難調整，可以點做呢？另一方面，如果你唔需要搬，可以點樣喺自己嘅會衆幫助新嚟嘅人更容易適應呢？
作出調整適應環境
舉個例:如果一棵樹移植到另一個地方，樹就會受到損傷。因為挖棵樹上嚟嘅時候，為咗方便運輸，通常都會切斷大部分嘅根。樹移植之後，好快就會生翻啲新嘅根出嚟。同樣，可能你會搬去另一個會衆而感到有壓力。因為你喺以前嘅會衆，已經有感情好深嘅朋友同埋習慣咗嘅屬靈常規，呢啲就好似你嘅“根”一樣。而家你為咗適應新嘅環境，需要生出新嘅根。乜嘢可以幫到你呢？就係實踐聖經嘅原則。我哋一齊嚟睇吓其中一啲原則。
一個經常閲讀上帝話語嘅人就“好似一棵樹種喺水邊，按時結果，枝葉不枯；凡佢所做嘅盡都成功。”（詩篇1:1-3）
一棵樹要經常得到水嘅滋養，先至可以茁壯成長。同樣，一個基督徒要經常吸收上帝嘅話語，先至可以保持靈性健壯。所以，要每日閲讀聖經，經常參加聚會，定期舉行家庭崇拜同做個人研讀。你以前係點樣同耶和華維繫親密關係嘅，喺新嘅會衆都要噉樣做。
“大方滋潤人嘅，必蒙大方滋潤。”（箴言11:25）
如果你全心投入傳道工作，就會重新得力，而且會快啲適應新嘅環境。凱文係一個基督徒長老，佢話:“我同太太搬到新嘅會衆之後冇幾耐就做輔助先驅，噉樣做可以幫助我哋快啲適應。”佢仲話:“我哋好快就熟悉會衆嘅弟兄姊妹、先驅同埋傳道地區。”羅杰搬去一個離佢以前屋企超過1600公里（1000英里）嘅地方，佢話:“適應新嘅會衆最好嘅方法就係多啲出去傳道。而且你可以話俾長老知，好多方面你都樂意幫手，例如清潔王國聚會所，臨時頂替聚會節目，或者接送參加聚會嘅人。當弟兄姊妹見到你表現出自我犧牲嘅精神，就會更加想同你做朋友。”
“開闊心胸”（哥林多後書6:13）
開闊心胸去認識弟兄姊妹。瑪麗莎同屋企人搬到一個新嘅會衆之後，都好努力認識新嘅朋友。瑪麗莎話:“我哋聚會前後都會主動同弟兄姊妹打招呼，努力認識佢哋。”噉樣可以幫佢哋一家人快啲記住會衆成員嘅名。佢又話:“我哋會交換電話號碼保持聯繫，一齊交往同參與屬靈嘅活動。”我哋開闊心胸表現慷慨嘅精神，就可以加深弟兄姊妹之間嘅友誼。
當你覺得好難認識新朋友嘅時候，可以從一啲簡單嘅事做起。例如你可以微笑。可能一開始你覺得唔容易，但係一個友善嘅眼神同微笑可以令其他人更加容易親近你。聖經話“眼睛明亮，心就歡喜”，呢句話的確有道理。（箴言15:30）瑞秋搬去一個離家鄉好遠嘅地方，佢話:“我天生就好内向，有時我要逼自己同新會衆嘅弟兄姊妹傾計。通常我會揾嗰啲坐喺度冇同人傾計嘅人，因為我覺得噉樣嘅人可能同我一樣咁内向。”不妨定下目標，喺聚會前後同新嚟嘅人傾吓計。
頭嗰幾個星期你識到新嘅朋友，可能會好興奮。但係，努力認識新朋友嘅“積極性”會隨住時間慢慢消失。到時，你可能需要更加努力先至可以繼續認識新嘅朋友。
樹經過移植會受到損傷，但移植之後，好快就會生翻啲新嘅根出嚟
適應新會衆係需要時間嘅
有啲樹喺新嘅環境扎根，比其他樹需要更長嘅時間。同樣，每個人適應新會衆需要嘅時間都唔同。如果你搬咗去一個新嘅會衆，仲喺度適應緊，實踐以下嘅聖經原則可以幫到你:
“我哋千祈唔好放棄行善，如果唔灰心鬆懈，到咗時候就會有收成。”（加拉太書6:9）
要俾自己更多時間去適應新嘅環境，可能呢個時間比你預期嘅更長。例如，好多受過基列學校培訓嘅特派傳道員，會留喺受委派嘅地區幾年，之後先至返自己國家探親。佢哋噉樣做，就可以用更多時間嚟親近當地嘅弟兄姊妹，同埋適應當地嘅文化。
亞歷杭德羅搬過幾次會衆，佢知道適應新嘅環境係需要時間嘅。佢話:“啱啱搬嚟呢個會衆嗰時，我太太話:‘我啲朋友都喺晒以前嘅會衆度！’”亞歷杭德羅提醒太太，再上一次搬會衆嗰陣，佢都講過同樣嘅話。不過事實上，佢太太喺過去嗰兩年努力關心其他人，所以後來同會衆嘅人都成為咗好好嘅朋友。
“唔好話:‘點解以前嘅日子比而家好？’你噉樣問係冇智慧嘅。”（傳道書7:10）
你要避免攞新嘅會衆同以前嘅會衆比較。例如，你已經習慣咗以前會衆嘅弟兄姊妹，所以可能你會覺得而家新會衆嘅弟兄姊妹講嘢比較直接，或者比較難親近。呢個時候，你要留意佢哋嘅優點，因為你都想人噉樣對你。有啲啱啱搬咗會衆嘅人都估唔到自己有噉嘅諗法:“我係咪真係愛‘整個弟兄團體’呢？”（彼得前書2:17）
“不斷敲門，就一定會開門俾你哋。”（路加福音11:9）
你要不斷禱告尋求幫助。戴維係個長老，佢話:“唔好倚靠自己。”佢仲話:“好多嘢只有耶和華先至幫到我哋，所以向佢禱告啦！”瑞秋話:“如果我同先生覺得融入唔到會衆，就會好具體噉向耶和華禱告話:‘求你俾我哋知道，係咪我哋做咗啲嘢使其他人好難親近我哋。’之後我哋就會努力用更多時間同弟兄姊妹一齊交往。”
如果你哋係做父母嘅，當你留意到兒女好難適應新會衆，就應該多啲同佢哋一齊為呢件事禱告。你亦都可以安排一啲有益嘅交往幫佢哋揾到新嘅朋友。
要令新人有賓至如歸嘅感覺
你可以點樣幫助新嚟嘅人？一開始就要努力同佢哋做朋友。你可以換個角度諗吓，如果自己係新搬嚟嘅人，會有咩需要呢？噉你就識得點樣去幫助佢哋嘞。（馬太福音7:12）你可唔可以邀請新嚟嘅人參加你嘅家庭崇拜呢？或者一齊睇每個月嘅JW電視節目？又或者你可唔可以邀請佢哋同你一齊傳道？如果你請佢哋食一餐便飯，佢哋會好記得你嘅慷慨。噉你仲可以提供乜嘢切合實際嘅幫助呢？
卡洛斯話:“當我哋搬到一個新會衆嘅時候，有個姊妹列咗一份店鋪嘅名單俾我。嗰啲店鋪嘅價錢好實惠，噉樣真係幫咗我好多。”新嚟嘅人可能唔係好了解本地嘅氣候，你可以話俾佢哋知唔同嘅天氣可以着咩衫，仲可以話俾佢哋知本地嘅歷史同宗教背景，幫佢哋更有效噉傳道。
努力作出調整係值得嘅
文章開頭提到嘅艾倫已經喺新嘅會衆超過一年嘞。佢回憶話:“我喺會衆主動加深對弟兄姊妹嘅認識，而家我哋好似一家人噉，我真係好開心。”艾倫發覺，離開以前嘅會衆之後，唔單止冇失去老朋友，仲識到新朋友，而且佢哋可能都會成為佢嘅終生好友。
^ 2段 本文有啲人名係化名。
