你有冇向耶和華尋求庇護？
“耶和華救贖佢僕人嘅性命，凡向佢尋求庇護嘅人都唔會被定罪。”——詩篇34:22
1． 由於有遺傳嘅罪，上帝嘅好多忠僕都有點樣嘅感受？
“我呢個人真係苦啊！”（羅馬書7:24）耶和華嘅好多忠僕都同使徒保羅有一樣嘅感受。每個人都受到遺傳嘅罪影響，所以每當我哋好想取悦耶和華，但又做唔到嘅時候，就會覺得好痛苦，好灰心。一啲有嚴重過犯嘅基督徒，甚至會覺得自己唔配得到耶和華嘅寬恕。
2． （甲）詩篇34:22點樣表明上帝嘅忠僕唔需要為自己嘅罪過度自責？（乙）呢篇課文會討論乜嘢？（請睇附欄“ 實用價值抑或預表意義？”）
2 不過經文向我哋保證，嗰啲向耶和華尋求庇護嘅人唔需要為自己嘅罪過度自責。（請讀詩篇34:22）向耶和華尋求庇護係乜嘢意思？我哋需要採取乜嘢步驟先可以得到耶和華嘅慈悲同寬恕？我哋沉思古代以色列庇護城嘅安排，就可以知道呢啲問題嘅答案。呢個安排喺律法之約下設立，而喺公元33年嘅五旬節被取代。請記住，律法係嚟自耶和華嘅。所以，我哋從庇護城嘅安排可以學到耶和華對罪、犯過者同悔改嘅睇法。首先我哋嚟睇吓，設立庇護城嘅目的以及呢啲城嘅作用。
“設立庇護城”
3． 以色列人點樣處理故意殺人嘅案件？
3 耶和華好重視喺以色列發生嘅每一單血案。受害者最親嘅男性親屬可以將故意殺人嘅罪犯處死，呢個親屬被稱為“報血仇嘅”人。（民數記35:19）將殺人犯處死就係以命償命，彌補佢所犯嘅罪。迅速處決殺人犯可以保護應許之地免受玷污，因為耶和華吩咐:“唔可以玷污你哋所在嘅地方。［殺人流］血係玷污地嘅。”（民數記35:33，34）
4． 以色列人點樣處理誤殺嘅案件？
4 但係以色列人又點樣處理誤殺嘅案件？雖然誤殺者唔係故意殺人嘅，不過佢的確奪去咗無辜人嘅性命。（創世記9:5）由於有仁慈嘅安排，誤殺者可以逃去六個庇護城嘅其中一個，免受報血仇者嘅追殺。喺嗰度，佢可以得到庇護。誤殺者一定要留喺庇護城直到大祭司去世。（民數記35:15，28）
5． 庇護城嘅安排可以點樣幫助我哋對耶和華有更深入嘅了解？
5 將呢啲城設立為庇護城並唔係出於人嘅諗法。耶和華吩咐約書亞:“你要同以色列人講:‘你哋要……設立庇護城’”。呢啲城被視為“神聖嘅地方”。（約書亞記20:1，2，7，8）既然係耶和華要將呢啲城分别開嚟作特别用途，我哋可能會問:“呢個安排點樣幫我哋更清楚認識耶和華嘅慈悲？今日我哋可以點樣向耶和華尋求庇護？”
“將事情話俾嗰個城嘅長老知”
6，7． （甲）喺審判誤殺嘅案件當中，長老擔任乜嘢角色？（請睇吓課文開頭嘅圖片）（乙）點解誤殺者向長老求助係好明智嘅？
6 如果一個人錯手殺咗人，佢就要馬上逃去庇護城，先喺城門口 “將事情話俾嗰個城嘅長老知”，而長老要仁慈收留佢。（約書亞記20:4）過咗一段時間之後，當事人要返到發生命案嘅嗰座城，接受當地長老嘅審判。（請讀民數記35:24，25）唯有等到長老將命案裁定為純屬意外之後，誤殺者先可以返去庇護城。
7 點解要牽涉到長老？因為佢哋要保持以色列會衆嘅潔淨，同埋幫助誤殺者從耶和華嘅慈悲得益。一個聖經學者提到，如果誤殺者冇去見長老，“噉佢就係自取滅亡”。學者繼續話:“因為誤殺者冇好好運用上帝為佢提供嘅保護，所以後果由佢自己嚟承擔。”雖然耶和華為誤殺者提供咗幫助，但係佢自己都要尋求同接受呢個幫助。如果佢冇去耶和華設立嘅其中一個城尋求庇護，噉死者最親嘅親屬就有權處死佢。
8，9． 點解一個基督徒犯咗嚴重嘅罪之後，應該向長老尋求幫助？
8 今日，如果一個基督徒犯咗嚴重嘅罪，想再次同耶和華恢復親密嘅關係，佢就需要向會衆嘅長老尋求幫助。點解呢個咁重要？第一，我哋從聖經睇出，由長老嚟處理嚴重過犯呢個安排係嚟自耶和華嘅。（雅各書5:14-16）第二，向長老求助可以使悔改嘅人重新得到上帝嘅悦納，避免再次犯錯。（加拉太書6:1；希伯來書12:11）第三，長老被委任同受到培訓去安慰悔改嘅人，幫助佢哋減輕痛苦同罪咎感。耶和華稱呢啲長老為“避暴雨之處［或譯:庇護所］”。（以賽亞書32:1，2；英語《新世界譯本》腳注）耶和華通過呢個安排向我哋表現慈悲。
9 上帝嘅好多忠僕喺尋求同接受咗長老嘅幫助之後，都覺得如釋重負。例如，一個叫丹尼爾嘅弟兄犯咗嚴重嘅罪，隔咗幾個月都冇向長老尋求幫助。佢承認:“件事都已經過咗咁耐，我覺得長老都幫唔到我乜嘢。但係我又成日擔心，幾時要承擔自己犯錯所帶嚟嘅後果。每次向耶和華禱告，我都要先為自己嘅過犯向耶和華道歉。”最後，丹尼爾決定向長老求助。佢諗翻轉頭話:“講真，我去見佢哋嗰時好緊張。但係，之後我覺得成個人都輕鬆晒，唔使再俾啲重擔壓住。而家，我可以放心向耶和華坦然傾訴。”丹尼爾終於有一個清白嘅良心，而佢最近亦都受委任成為助理僕人。
“要逃到呢啲城嘅其中一座”
10． 一個誤殺者需要採取乜嘢行動先可以得到慈悲？
10 一個誤殺者需要採取行動先可以得到慈悲。佢要逃到最近嘅庇護城。（請讀約書亞記20:4）我哋好難想像，誤殺者會認為呢件事係無關重要嘅，因為佢嘅性命取決於佢有幾快趕到庇護城同留喺嗰度。呢個意味到佢要作出一啲犧牲。佢要放棄以往嘅工作、離開舒適嘅屋企，亦都失去來往各地嘅自由，直到大祭司去世為止。 *（民數記35:25）不過，呢啲犧牲係好值得嘅。如果誤殺者要離開庇護城，就表明佢無視受害者嘅生命，而佢自己嘅生命亦都會受到威脅。
11． 一個悔改嘅基督徒需要採取乜嘢行動嚟表明佢冇辜負上帝嘅慈悲？
11 今日，如果悔改嘅人想得到上帝嘅寬恕，同樣都需要採取行動。佢要痛改前非，唔單止要遠離嚴重嘅罪，亦都要避免任何不潔嘅行為。喺聖靈啟示下，使徒保羅談及哥林多悔改嘅基督徒所做嘅事，佢話:“你哋出於敬神嘅態度而傷心，呢件事激勵你哋顯出幾咁大嘅熱誠！你哋努力辯白，大發義憤、敬畏、渴望、熱心，除掉污名！”（哥林多後書7:10，11）決心離棄惡行就係向耶和華表明我哋對佢嘅愛唔係無動於衷嘅，冇將佢嘅慈悲視為理所當然。
12． 一個基督徒想繼續得到上帝嘅慈悲，就可能需要放棄乜嘢？
12 如果一個基督徒想繼續得到上帝嘅慈悲，佢可能需要放棄乜嘢？如果一樣嘢會使佢犯罪，無論佢幾咁鍾意呢樣嘢，都要下定決心隨時放棄。（馬太福音18:8，9）如果有啲朋友慫恿你做耶和華唔鍾意嘅事，你會唔會同佢哋斷絶關係？如果你喺飲酒方面覺得好難保持平衡，你會唔會避開使你過度飲酒嘅場合？如果你覺得好難控制性不道德嘅慾望，你會唔會避開任何可能挑起你不潔慾望嘅電影、網站或者活動？要記住，為咗服從耶和華嘅律法而付出嘅任何犧牲都係值得嘅。最痛苦嘅事莫過於耶和華離棄我哋，相反，最令人滿足嘅就係感受到耶和華“永恆嘅忠貞之愛”。（以賽亞書54:7，8）
“呢啲城要庇護你哋”
13． 點解一個誤殺者喺庇護城裏面會感到安全同快樂？
13 誤殺者一入到庇護城就可以得到保護。耶和華話:“呢啲城要庇護你哋”。（約書亞記20:2，3）耶和華冇要求誤殺者喺同一個案件上再次受到審判，亦都唔容許報血仇嘅人入城奪取誤殺者嘅性命。誤殺者唔使再擔心遭受報復。喺城裏面，佢會得到耶和華嘅保護，感到非常安全。呢個唔係一個庇護嘅監獄。佢喺裏面可以工作、幫助其他人，同埋安心噉事奉耶和華。佢可以過又快樂又滿足嘅生活！
要相信耶和華會寬恕我哋（請睇第14-16段）
14． 一個悔改嘅基督徒可以確信乜嘢？
14 上帝嘅一啲子民曾經犯咗嚴重嘅罪，悔改之後仍然俾罪咎感“韞住”，甚至覺得耶和華會因為佢哋所犯嘅罪而永遠將佢哋視為不潔。如果你有同樣嘅感受，請你緊記，耶和華會徹底寬恕你，所以你唔需要再感到内疚。上文提到嘅丹尼爾就體會到呢一點。佢得到長老嘅糾正同幫助之後，再次恢復清白嘅良心，佢話:“我終於可以鬆一口氣喇。事情被適當處理之後，我唔再覺得内疚。罪一旦被寬恕咗就真係冇咗。就好似耶和華所講嘅，佢會使你嘅過犯離你好遠，遠到你永遠都見唔到。”喺庇護城裏面，誤殺者唔使再擔心遭受報復。同樣，一旦耶和華寬恕咗我哋嘅罪，我哋就唔使擔心耶和華會揾理由翻舊賬，喺同一件事上再次審判我哋。（請讀詩篇103:8-12）
15，16． 知道耶穌係救贖主又係大祭司，點樣使你確信耶和華會向你表現慈悲？
15 其實，我哋比以色列人有更大嘅理由要對耶和華嘅慈悲有信心。當保羅唔能够完全服從耶和華而感到痛苦嘅時候，佢感歎話:“感謝上帝通過我哋嘅主耶穌基督救咗我！”（羅馬書7:25）一方面，保羅要同錯誤嘅慾望搏鬥；另一方面，雖然保羅已經為過往嘅罪而衷心悔改，佢依然受到罪咎感所困擾。不過，佢確信耶和華已經通過耶穌嘅犧牲寬恕咗佢。作為我哋嘅救贖主，耶穌使我哋有清白嘅良心，内心得享安寧。（希伯來書9:13，14）而作為我哋嘅大祭司，“凡通過佢親近上帝嘅人，佢都能够拯救到底，因為佢永遠活着，能够為佢哋代求。”（希伯來書7:24，25）如果大祭司嘅角色係要確保以色列人嘅罪得蒙寬恕，噉我哋嘅大祭司耶穌就更加能够使我哋“可以蒙慈悲，獲得分外恩典，作為合時嘅幫助”。（希伯來書4:15，16）
16 如果想得到耶和華嘅庇護，我哋就要對耶穌嘅犧牲有信心。唔好覺得贖價只係為全人類付出嘅。相反，要相信贖價能够造益你；（加拉太書2:20，21）要相信上帝會通過贖價寬恕你嘅罪；要相信因為有贖價，所以你有永生嘅希望。耶穌嘅犧牲就係耶和華俾你嘅禮物。
17． 點解你想向耶和華尋求庇護？
17 庇護城反映出耶和華嘅慈悲。通過呢個安排，我哋睇出耶和華好重視生命，長老會點樣幫助我哋，一個真正悔改嘅人需要採取乜嘢實際嘅行動，同埋點解我哋可以完全相信耶和華會寬恕人。你有冇向耶和華尋求庇護？喺佢嘅庇護之下，我哋先會感受到真正嘅安全！（詩篇91:1，2）下一篇課文會繼續討論同庇護城有關嘅安排，同埋我哋可以點樣效法完美噉表現公正同慈悲嘅耶和華。
^ 10段 根據古代猶太文獻記載，誤殺者嘅親屬會喺庇護城同佢一齊住。
