棄絶世俗嘅思想
“你哋要小心,免得有人根據人嘅傳統,根據世人嘅膚淺諗法,……用哲學同空虚騙人嘅話將你哋擄去。”——歌羅西書2:8
1. 使徒保羅喺信中向基督徒同工提出乜嘢勸告?(請睇吓課文開頭嘅圖片)
大約公元60至61年,使徒保羅喺羅馬被囚嘅時候寫信俾歌羅西會衆。保羅同佢哋講,有“屬靈嘅悟性”係好重要嘅。(歌羅西書1:9)保羅進一步提出:“我講呢啲話,係免得有人用花言巧語蒙騙你哋。……你哋要小心,免得有人根據人嘅傳統,根據世人嘅膚淺諗法,唔以基督為依歸,用哲學同空虚騙人嘅話將你哋擄去。”(歌羅西書2:4,8)保羅跟住解釋,有啲大衆嘅主流思想點解係錯誤嘅,呢啲思想點解對唔完美嘅人嚟講可能好有吸引力。例如,世俗嘅思想可能會令人覺得自己好聰明同高人一等。呢封信嘅目的係幫助弟兄姊妹棄絶世俗嘅思想同錯誤嘅行為。(歌羅西書2:16,17,23)
2. 點解我哋要分析一啲世俗嘅諗法?
2 世俗嘅思想忽視或者貶低耶和華嘅標準,而且會逐漸削弱我哋對上帝嘅信心。今日,呢個世界充斥住世俗嘅思想,尤其喺電視、互聯網、學校同工作嘅地方,我哋
所有人都會受到影響。我哋可以點樣避免俾呢啲思想腐化呢?呢篇課文會分析五種世俗嘅諗法,睇吓我哋要棄絶呢啲思想可以點樣做。我哋需唔需要信上帝?
3. 好多人有乜嘢諗法?點解?
3 “唔使信上帝我都可以做個好人。”喺好多國家,經常會聽到有人話自己唔信上帝,認為自己係無神論者。佢哋可能冇認真諗過有冇上帝存在呢個問題,只係鍾意自由自在噉做自己想做嘅嘢。(請讀詩篇10:4)有啲人可能覺得自己好有智慧,佢哋會話:“我唔信上帝都可以有高尚嘅道德標準。”
4. 我哋可以點樣同一個聲稱冇創造主嘅人推理?
4 認為創造主唔存在嘅呢種諗法係咪符合邏輯呢?有啲人想通過科學嚟確定到底有冇創造主,佢哋好容易會喺巨量嘅信息當中迷失方向。其實答案好簡單。如果一間屋都需要有人建造,噉樣,比房屋複雜得多嘅生物唔係更需要有一個創造者咩?事實上,連地球上最簡單嘅活細胞都遠遠複雜過任何一間屋,因為活細胞可以做到任何房屋做唔到嘅嘢,就係自我複製。呢啲細胞會以某種方式將自我複製所需要嘅信息儲存並傳遞俾一個新嘅細胞。呢啲活細胞嘅設計係點樣嚟嘅呢?聖經話:“任何房屋都有人建造,但係建造萬物嘅就係上帝。”(希伯來書3:4)
5. 對於人唔需要信上帝都可以自行判斷善惡嘅呢種諗法,我哋可以點樣推理?
5 關於人唔需要信上帝都可以自行判斷善惡嘅呢種諗法,我哋可以點樣推理?上帝嘅話語承認,唔信上帝嘅人可能都會有一啲好嘅原則。(羅馬書2:14,15)例如,佢哋會尊重同愛自己嘅父母。但係,如果一個人否認是非標準係由仁愛嘅創造主制定嘅,噉佢道德標準嘅依據又有幾可靠呢?(以賽亞書33:22)今日,好多人認真思考之後睇出,人類確實需要上帝嘅幫助先至可以解決地球嘅惡劣情況。(請讀耶利米書10:23)所以我哋唔應該認為,人唔需要信上帝同埋服從上帝嘅標準,可以完全自行判斷善惡。(詩篇146:3)
我哋需唔需要有信仰呢?
6. 好多人對宗教有乜嘢睇法?
6 “就算冇信仰你都可以好開心。”好多人都有呢種世俗嘅諗法,因為佢哋覺得宗教又枯燥又唔實際。而且,好多宗教鼓吹地獄永火嘅道理、强制性收取捐款或者慫恿人參政,令人同上帝疏遠。難怪越來越多人覺得佢哋冇信仰都可以好快樂。噉樣嘅人可能會話:“我有興趣了解宗教,但唔想加入宗教團體。”
7. 正確嘅宗教點樣幫助人得到真正嘅幸福快樂?
7 人冇信仰係咪真係會快樂呢?當然,一個人冇受到錯誤宗教嘅影響係可以好開心嘅,不過佢如果冇同“快樂嘅上帝”耶和華建立友誼,就唔能够得到真正嘅快樂。(提摩太前書1:11)上帝所做嘅每一件事都為咗使人得益。佢嘅僕人亦因為專注於幫助人而感到快樂。(使徒行傳20:35)例如,請諗吓正確 嘅崇拜可以點樣促進家庭幸福。正確嘅宗教教導我哋要尊重同愛護配偶、重視婚誓、避免通姦、培養識得尊重他人嘅兒女,同埋要向家人表現真摯嘅愛。結果,正確嘅崇拜會使會衆嘅人團結一致,享有一個快樂嘅國際弟兄團體。(請讀以賽亞書65:13,14)
8. 我哋可以點樣運用馬太福音5:3同人推理真正令人快樂嘅原因係乜嘢?
8 人唔事奉上帝都可以得到真正嘅快樂,呢種世俗嘅諗法係咪啱嘅呢?試諗吓,人點解會覺得快樂?有啲人喺事業、運動、愛好方面得到滿足感,而有啲人因為照顧家人或者幫助朋友而感到滿足。雖然,呢啲嘢都可以令我哋好開心,但係我哋嘅人生有更崇高嘅目的,可以帶俾我哋恆久嘅快樂。我哋同動物唔同。耶和華創造我哋嘅時候,使我哋可以通過認識佢同埋忠心事奉佢得到快樂。(請讀馬太福音5:3)例如,真基督徒一齊聚集起嚟崇拜耶和華會得到喜樂同受到鼓勵。(詩篇133:1)佢哋仲可以享有一個團結嘅弟兄團體,過道德清白嘅生活,同埋有快樂嘅希望。
我哋需唔需要道德標準呢?
9. (甲)呢個世界嘅人普遍對性關係有乜嘢睇法?(乙)點解聖經禁止婚外性行為?
9 “點解要譴責婚外性行為?”有人可能會同我哋講:“點解要譴責婚外性行為?人生在世就係要盡情享受。”有人話基督徒對不道德嘅性行為應該寬容啲,呢種諗法係錯嘅。點解?因為聖經禁止淫亂。 *(請讀帖撒羅尼迦前書4:3-8)耶和華係我哋嘅創造主,所以佢有權為我哋制定律法。按照上帝對婚姻安排所制定嘅律法,只有結為夫婦嘅一男一女先可以有性關係。上帝出於愛心賜律法俾我哋,希望我哋遵守而享有更好嘅生活。一個家庭如果按照上帝嘅律法去做,就會充滿愛心、互相尊重、有安全感。上帝並唔會縱容嗰啲故意違反佢律法嘅人。(希伯來書13:4)
10. 我哋可以點樣避免犯性不道德?
10 上帝嘅話語教導我哋點樣避免犯性不道德。一個重要嘅方法就係約束雙眼。耶穌講過:“凡係注視婦女而動淫念嘅,心裏面已經同佢通姦。如果你嘅右眼成為你嘅絆腳石,就挖出嚟揼咗佢。”(馬太福音5:28,29)所以,我哋要避免睇色情資訊或者聽内容唔道德嘅歌。使徒保羅寫俾基督徒同工嘅信話:“要治死你哋喺地上嘅肢體,根絶淫亂”。(歌羅西書3:5)除此之外,我哋仲要控制自己嘅言談同思想。(以弗所書5:3-5)
我哋應唔應該追求世俗嘅事業?
11. 點解世俗嘅事業咁有吸引力呢?
11 “事業有成係快樂嘅要訣。”好多人鼓勵我哋以追求世俗嘅事業為人生
目標。呢啲事業可能會使我哋得到地位、權力同財富。由於好多人將追求事業成功定為佢哋人生最重要嘅目標,基督徒可能都會受到影響,有同樣嘅諗法。12. 事業有成係咪得到快樂嘅要訣呢?
12 名成利就係咪真係可以令你得到恆久嘅快樂呢?唔係。要記住,撒但好想控制人,渴望人追捧佢。喺某方面嚟講,佢已經得到想要嘅,但係佢並唔快樂,只係感到憤怒。(馬太福音4:8,9;啟示錄12:12)比起通過幫助人認識上帝同埋有機會得享永生所帶俾我哋嘅恆久喜樂,世俗事業嘅成功只可以俾到我哋短暫嘅滿足感。另外,呢個世界嘅競爭精神俾人好大壓力,使人想去超越其他人,造成妒忌。結果證明,噉樣做只不過係“捕風”。(傳道書4:4)
13. (甲)喺追求事業方面,我哋應該有乜嘢睇法?(乙)從保羅寫俾帖撒羅尼迦會衆嘅信可以睇出,乜嘢使佢得到真正嘅快樂?
13 我哋確實要維持生計,而且選擇自己鍾意嘅工作都唔係錯嘅。但係,我哋唔應該將世俗工作當成係生活嘅重心。耶穌話:“一個人唔能够做兩個主人嘅奴隸。佢唔係討厭呢個,鍾意嗰個,就係忠於呢個,輕視嗰個。你哋唔能够又做上帝嘅奴隸,又做財富嘅奴隸。”(馬太福音6:24)如果我哋先專心事奉耶和華同教導人聖經,就會體驗到無與倫比嘅喜樂。使徒保羅曾經有過噉樣嘅經歷。佢年輕嘅時候,一心想喺猶太教創出一番成就。不過,當後來保羅開始幫助人成為基督徒,見到佢哋點樣響應上帝嘅信息而改變自己人生嗰陣,佢先至得到真正嘅快樂。(請讀帖撒羅尼迦前書2:13,19,20)世上的確冇其他事業可以俾到我哋噉樣嘅滿足感。
幫助人從上帝嘅智慧得益,使我哋得到恆久嘅喜樂。(請睇第12,13段)
人類有冇能力解決自身嘅難題呢?
14. 點解話人類可以自行解決難題呢種諗法好吸引呢?
14 “人類有能力解決自己嘅難題。”點解呢種世俗嘅諗法對好多人嚟講可能好吸引?因為如果真係噉嘅話,人就
可以隨心所欲做自己鍾意嘅事,唔需要上帝嘅引導。人有能力解決自身難題呢種諗法似乎好有説服力,因為有啲報告顯示,戰爭、罪行、疾病同貧窮都喺度逐漸減少。其中一份報告話:“人類決心要令世界變得更美好,所以人類嘅情況越來越好。”呢類報告係咪表明,人類已經揾到方法解決一直以來困擾住佢哋嘅難題呢?為咗揾出答案,等我哋嚟深入分析吓。15. 乜嘢事實表明人類面對嘅難題好嚴重?
15 戰爭:兩場世界大戰奪去咗超過6000萬人嘅生命。第二次世界大戰結束以來,人類明顯冇吸取教訓避免戰爭。到2015年,因戰爭或者迫害而被迫離開家園嘅人數上升到大約6500萬人。但只係2015年期間,被迫離開家園嘅人數就有1240萬。罪行:雖然喺一啲地方某種類型嘅罪行已經減少咗,但其他類型嘅罪行,例如網絡犯罪、家庭暴力同埋恐怖襲擊就有驚人嘅增長。仲有,好多人都覺得全球嘅貪污腐敗越來越嚴重。人類並唔能够消除罪行。疾病:有啲疾病已經揾到治療嘅方法。但係一份2013年出版嘅報告指出,每年有高達900萬未到60歲嘅人死於心臟病、中風、癌症、呼吸系統疾病同埋糖尿病。貧窮:世界銀行嘅數據指出,單係喺非洲,生活極度貧困嘅人,數量從1990年嘅2億8000萬人增加到2012年嘅3億3000萬人。
16. (甲)點解只有上帝嘅王國先至可以解決人類嘅難題?(乙)以賽亞同詩篇執筆者預告上帝嘅王國會點樣造福我哋?
16 目前嘅經濟同政治制度由自私嘅勢力所操縱。好明顯,佢哋唔能够消除戰爭、罪行、疾病同貧窮,只有上帝嘅王國先至做得到。請諗吓耶和華將會為人類成就乜嘢事。戰爭:上帝嘅王國會將自私、腐敗、愛國主義、錯誤宗教同撒但呢一切引發戰爭嘅根本原因通通消除。(詩篇46:8,9)罪行:上帝嘅王國已經教導數以百萬計嘅人學識彼此相愛同互相信任,呢啲係其他政府都做唔到嘅。(以賽亞書11:9)疾病:耶和華會賜福俾佢嘅子民,使佢哋身心完美。(以賽亞書35:5,6)貧窮:耶和華會消除貧窮,使佢嘅子民喺屬靈同物質上得到滿足。呢種咁美好嘅生活比金錢財富遠遠有價值得多。(詩篇72:12,13)
“知道應該點樣回答每個人”
17. 你可以點樣棄絶世俗嘅思想呢?
17 如果你聽到一個世俗嘅諗法,而呢個諗法可能會使你嘅信心受到考驗,你可以查找相關嘅資料,睇吓聖經對呢個問題有乜嘢睇法,然後同一位成熟嘅弟兄姊妹一齊討論吓。我哋要沉思一下:點解呢個諗法聽起嚟似乎好合理?點解噉樣嘅諗法係錯嘅?為咗棄絶呢啲思想,我哋可以點樣做?實際上,我哋每個人都可以通過保羅嘅勸告嚟幫助自己抵抗世俗嘅思想。保羅喺寫俾歌羅西會衆嘅信裏面話:“你哋同教外嘅人來往,總要用智慧行事,……知道應該點樣回答每個人。”(歌羅西書4:5,6)