年輕人——“不斷努力，使你哋自己得救”
“你哋向來都好順服，……應該恐懼戰兢，不斷努力，使你哋自己得救。”——腓立比書2:12
1． 點解受浸係一個重要嘅步驟？（請睇吓課文開頭嘅圖片）
每年都有幾十萬個聖經學生受浸，當中包括好多兒童以及青少年，佢哋有啲喺真理中長大。你係咪其中一個？如果係，噉你好值得稱讚。人要成為基督徒就要受浸，呢個亦都係得救嘅重要步驟。（馬太福音28:19，20；彼得前書3:21）
2． 點解你唔應該對獻身感到恐懼而退縮？
2 你受浸之後，雖然耶和華會為你打開祝福嘅大門，不過你亦都要肩負一啲責任。乜嘢責任呢？喺受浸當日，講者問:“你係咪已經根據耶穌基督所作嘅犧牲，為自己嘅罪悔改，並獻咗身俾耶和華，要遵行佢嘅旨意呢？”你回答:“係。”你受浸表明你已經獻咗身俾耶和華，亦都表明你愛耶和華，並將佢嘅旨意放喺生活嘅首位。呢個係一個好嚴肅嘅承諾。你應唔應該後悔做咗呢個決定？將自己嘅一生交俾耶和華係絶對冇錯嘅。一個人唔係服從耶和華嘅統治就係服從撒但嘅統治。撒但一啲都唔關心你可唔可以得救。如果撒但見到你企喺佢嗰邊，因拒絶服從耶和華嘅至高統治而失去永生嘅獎賞，佢一定會好開心。
3． 獻身俾耶和華會帶嚟乜嘢福分？
3 我哋可以諗吓，獻身受浸成為基督徒之後所得到嘅福分。而家你已經將一生獻俾耶和華，你可以比以前更有信心噉講:“有耶和華喺我身邊，我唔會怕。世人可以將我點樣呢？”（詩篇118:6）喺一生當中，冇任何事比得上有耶和華喺我哋身邊支持我哋，悦納我哋所做嘅。
個人責任
4，5． （甲）點解每個人都要為自己嘅獻身負起責任？（乙）每個人都要面對乜嘢挑戰？
4 身為受咗浸嘅基督徒，你同耶和華嘅關係並唔係好似電信公司嘅一個“家庭共享套餐”，父母俾錢，人人受惠。相反，就算你同父母一齊住，你都要為自己嘅得救負責。點解記住呢點咁重要？因為你唔知道喺未來你將會遇到乜嘢挑戰。例如，如果你係一個受咗浸嘅小朋友，當你步入青春期之後會有情緒波動，亦都會面對唔同嘅壓力。一個少女話:“通常，一個小朋友唔會因為喺學校唔可以食生日蛋糕，就唔想做耶和華見證人。但係幾年之後，當性慾變得越來越强，佢就需要確信服從耶和華嘅誡命係最好嘅選擇。”
5 當然，唔係青少年先會面對新嘅挑戰。就算受咗浸嘅成年人都會喺信心方面，面對突如其來嘅考驗。呢啲考驗可能同婚姻、健康、工作有關。所以無論一個人係乜嘢年紀，佢都會遇到一啲特别需要對耶和華表現信心嘅情況。（雅各書1:12-14）
6． （甲）毫無條件噉獻身俾耶和華係乜嘢意思？（乙）你從腓立比書4:11-13學到乜嘢？
6 如果想喺任何情況下都保持忠心，就要緊記你對耶和華嘅承諾係冇附帶任何條件嘅。呢個意味到你向宇宙至高統治者保證，就算朋友或者家人放棄真理，你都會繼續事奉佢。（詩篇27:10）喺任何情況下，耶和華都會賜你力量，幫助你履行對佢所作嘅獻身承諾。（請讀腓立比書4:11-13）
7． “恐懼戰兢”使自己得救係乜嘢意思？
7 耶和華想你做佢嘅朋友，不過維持呢份友誼同得到拯救，係需要付出努力嘅。腓立比書2:12話:“你哋應該恐懼戰兢，不斷努力，使你哋自己得救。”呢節經文表明，你要沉思自己可以點樣加深同耶和華之間嘅友誼，無論遇到乜嘢挑戰都要保持忠心。唔好過度自信，就算係一啲事奉上帝多年嘅基督徒都有可能會失足。噉你可以採取乜嘢步驟使自己得救呢？
研讀聖經嘅重要性
8． 個人研讀包括乜嘢？研讀點解咁重要？
8 維持同耶和華之間嘅友誼係雙向嘅，牽涉到聽同講。研讀聖經係聆聽耶和華對我哋講話嘅主要方法。呢個包括研讀、沉思上帝嘅話語同聖經書刊。要記住研讀聖經唔係做學術研究，亦都唔係為咗應付考試而死記書上嘅知識。有意義嘅研讀應該好似一個探險旅程噉，可以幫助我哋更加深入探索耶和華嘅唔同特質。噉做可以幫助我哋親近耶和華，而佢亦都會親近我哋。（雅各書4:8）
你有冇同耶和華保持良好嘅溝通？（請睇第8-11段）
9． 有乜嘢工具可以幫助你做好個人研讀？
9 耶和華嘅組織提供咗好多工具，幫助你做好個人研讀。例如，喺jw.org“青少年”分頁標題下面嘅“看聖經動動腦”，可以幫助你通過聖經故事學到實用嘅原則；《辨明聖經的真理》研讀指南可以强化你對聖經嘅信心。呢啲研讀指南可以幫助你學識點樣向其他人解釋自己嘅信仰。喺《警醒！》2009年4月刊嘅“青年人問……怎樣才能使自己更喜歡閲讀聖經？”文章裏面亦都提到其他嘅研讀建議。我哋希望得救就一定要研讀同沉思，呢個係非常重要嘅。（請讀詩篇119:105）
禱告係必須嘅
10． 對一個受咗浸嘅基督徒嚟講，點解禱告係必須嘅？
10 既然個人研讀係我哋聽耶和華講，噉禱告就係我哋向耶和華傾心吐意。基督徒唔應該覺得禱告係一種冇咩意義嘅儀式，或者覺得禱告係一個可以帶嚟好運嘅“護身符”，使我哋事事順利。其實，禱告係我哋同造物主真正溝通嘅渠道。耶和華好想聽你嘅禱告。（請讀腓立比書4:6）無論我哋有乜嘢憂慮，聖經話最明智嘅做法就係“將重擔卸俾耶和華”。（詩篇55:22）你相唔相信噉樣做真係有效呢？有幾百萬個弟兄姊妹可以向你保證，禱告的確幫到佢哋。噉樣做亦都能够幫助你！
11． 點解我哋時時都應該感謝耶和華？
11 喺禱告裏面，除咗祈求耶和華幫助我哋之外，我哋都可以向耶和華表達我哋對佢嘅感激。聖經話:“你哋要顯出感恩之心。”（歌羅西書3:15）我哋有時由於太擔心遇到嘅難題，就忽視咗已經享有嘅福分。我哋可唔可以下定決心，每日諗吓至少三件事係值得我哋感恩嘅呢？然後就喺禱告裏面感謝耶和華。一個喺12歲就受咗浸嘅年輕姊妹叫亞比該，佢話:“我覺得喺全宇宙，最值得我哋感激嘅就係耶和華。我哋一有機會就應該多謝佢賜俾我哋咁多禮物。我曾經聽過一個好好嘅提醒，可以問吓自己:當聽日起身嘅時候，我哋仲記唔記得今日多謝咗耶和華幾多件事呢？” *
個人經歷嘅價值
12，13． 你可以點樣親自嘗到耶和華嘅良善？點解沉思耶和華為你所做嘅咁重要？
12 古代嘅大衛王經歷過好多磨難，佢喺詩歌裏面表達自己嘅感受話:“你哋嚟嘗嘗主恩，就知道耶和華係良善嘅；向佢尋求庇護嘅人幾咁有福！”（詩篇34:8）呢節經文强調個人經歷嘅價值。通過研讀聖經、聖經書刊，同參加聚會，你會聽到好多有關耶和華點樣幫助人保持忠心嘅經歷。不過隨住你不斷進步，你會親身體驗到耶和華點樣喺生活上扶持你。你有冇親自嘗到耶和華嘅良善呢？
13 其實，所有基督徒都可以嘗到耶和華嘅良善，因為人人都受到邀請親近上帝同佢嘅兒子。耶穌話:“如果唔係差我嚟嘅父親吸引人，就冇人能够嚟到我呢度。”（約翰福音6:44）你覺唔覺得呢句話都適用喺你身上？一個年輕人可能會諗:“耶和華吸引我嘅父母，而我只係跟住佢哋行。”但係你獻身受浸就表明從此以後你同耶和華有一個特别嘅關係。而家佢真正認識你。聖經向我哋保證:“人如果愛上帝，上帝就認識呢個人。”（哥林多前書8:3）所以，要永遠珍視同感激自己可以屬於耶和華嘅組織呢個殊榮。
14，15． 傳道工作點樣强化你嘅信心？
14 喺傳道或者喺學校嘅時候，每當你感受到耶和華賜你勇氣向其他人談及自己嘅信仰，就可以嘗到耶和華嘅良善。或者你覺得好難向同學作見證，因為你擔心對方會有唔好嘅反應。特别係當你要向一大班人解釋自己信仰嘅時候，壓力就更加大。你可以點樣做呢？
15 首先，要諗吓點解你對自己嘅信仰有信心。喺jw.org有冇你語言版本嘅研讀指南？如果你唔肯定，可以花啲時間喺網站度揾吓。呢啲指南嘅設計目的，係幫助你沉思自己相信乜嘢、點解你相信，同埋你可以點樣向其他人解釋自己嘅信仰。如果你有堅定嘅信心，又作妥準備，就會受到推動為耶和華嘅名作見證。（耶利米書20:8，9）
16． 乜嘢可以幫助你克服向人談論信仰嘅障礙？
16 不過，有時就算準備充足，你可能都係唔敢向其他人談論自己嘅信仰。一個18歲嘅姊妹喺13歲受浸，佢承認:“我知道自己相信乜嘢，但係有時好難將自己嘅諗法表達出嚟。”佢點樣克服呢個障礙？佢話:“我試吓自然噉帶入話題。啲同學經常講佢哋做過嘅事，噉我都可以同佢哋分享我做過嘅事。所以我同同學傾計嘅時候，傾吓傾吓就加一句‘嗰日我教人聖經嘅時候……’，之後就繼續講落去。雖然傾計嗰陣嘅話題唔係主要講聖經，不過其他人會好奇，我係點樣教人聖經嘅，有時佢哋仲會問我問題。我越經常用呢個方法，就越容易同同學打開屬靈話題。噉樣做使我覺得好開心好滿足！”
17． 你對自己信仰嘅睇法可以點樣幫助你同人講論真理？
17 如果其他人感受到你尊重同關心佢哋，好可能佢哋亦都會尊重你。17歲嘅奧莉維婭好細嘅時候就受咗浸，佢話:“我成日驚如果我一講聖經，其他人就覺得我係宗教狂。”不過，之後佢改變咗自己嘅諗法。而家奧莉維婭唔再擔心其他人點諗，佢解釋話:“好多年輕人對耶和華見證人一無所知。我哋係佢哋唯一接觸到嘅見證人，所以我哋嘅言行會影響佢哋對真理嘅反應。如果我哋好怕醜，唔敢同佢哋講自己嘅信仰，又或者同人講嘅時候畏首畏尾，佢哋就可能會覺得我哋對自己嘅身份缺乏自信，甚至唔尊重我哋。相反，如果我哋喺日常談話當中，自然又有自信噉提到自己嘅信仰，佢哋或者會更加尊重我哋。”
完成使你哋得救嘅工作
18． 我哋點做先可以使自己得救？
18 我哋從以上嘅分析睇出，使自己得救包括閲讀同沉思上帝嘅話語，向耶和華禱告，同埋諗吓耶和華點樣喺生活上祝福你。噉樣做可以使你同耶和華嘅關係更親密，亦都會推動你同人談論自己嘅信仰。（請讀詩篇73:28）
19． 點解為得救所付出嘅努力都係值得嘅？
19 耶穌話:“邊個想嚟跟從我，就應該承認唔再擁有自己，孭起自己嘅苦刑柱，不斷跟隨我。”（馬太福音16:24）冇錯，每個想跟從耶穌嘅人都要獻身受浸。呢個將會係你精彩人生嘅開始，因為噉樣做，而家就為你帶嚟數之不盡嘅福分，將來仲會使你喺上帝嘅新世界得享永遠嘅生命。所以，要竭盡全力使自己得救！
^ 11段 想得到更多建議，請睇jw.org網站嘅“青年人問——禱告對我有幫助嗎？” 以及相關學習單。
