對於​呢個​問題，基督徒​夫婦​可以​查考​有關​嘅​資料​同​聖經​原則，然後​做​決定。噉樣​佢哋​就​可以​喺​上帝​面前​保持​無​愧​嘅​良心。

耶和華​吩咐​第​一​對​男女，同​大洪水​之後​嘅​八​個​人，話:“要​繁衍​增多”。（創世記​1:28；9:1）聖經​並​冇​話​呢個​命令​適用​於​基督徒。所以，用​邊​種​方式​避孕​或者​幾時​想​懷孕，呢啲​問題​係​由​夫婦​自己​決定​嘅。佢哋​需要​考慮​邊啲​因素​呢？

關於​採用​邊​一​種​節育​方式，基督徒​應該​根據​聖經​原則​做​決定。基督徒​絶對​唔​會​採用​墮胎​呢​種​方式，因為​墮胎​同​聖經​所​講​嘅​尊重​生命​有​衝突。基督徒​唔​會​故意​終止​一​個​隨​住​時間​而​孕育​成人​嘅​生命。（出埃及記​20:13；21:22，23；詩篇​139:16；耶利米書​1:5）噉​使用​子宮環​又​適​唔​適合​呢？

《守望台》1979​年​12​月​1​日​刊​31-32​頁分析​過​呢個​問題。當時​普遍​使用​嘅​子宮環​係​用​惰​性​塑料（一​種​唔​容易​發生​化學​反應​嘅​材料）做​成​嘅，放​入​子宮​裏面​有​避孕​嘅​效果。文章​提​到，專家​喺​當時​仲​未​完全​了解​呢​種​子宮環​點樣​發揮​作用。好多​專家​話，放​入​子宮環​之後，子宮​會​産生​反應，阻止​精子​接觸​卵子。如果​卵子​冇​受​精，就​唔​會​有​生命​産生。

 但係，有啲​證據​表明​卵子​有時​仲係​會​受​精。新​嘅​受精卵​可能​會​喺​輸卵管​入面​成長（宮​外​孕）或者​進入​子宮。如果​受精卵​進入​子宮，子宮環​就​可以​妨礙​受精卵​喺​子宮​内膜​上​着​床，阻止​正常​嘅​懷孕​過程。終止​一​個​成長​緊​嘅​生命​就​等​同​墮胎。呢​篇​文章​總結​話:“如果​真​基督徒​好想​知道​使用​子宮環​係咪​適當，就​應該​認真​考慮​聖經​裏面​關於​尊重​神聖​生命​嘅​吩咐，同埋​上​述​嘅​資料。”（詩篇​36:9）

1979​年​嘅​呢​篇​文章​出版​以來，科學​同​醫學​方面​有​乜嘢​重大​嘅​發展​呢？

兩​種​新​型​嘅​子宮環​面世。1988​年，一​種​帶​銅​嘅​子宮環​喺​美國​開始​普及。另外，2001​年​又​推​出​咗​一​種​釋放​荷爾蒙​嘅​子宮環。呢​兩​種​類型​嘅​子宮環​係​點樣​發揮​作用​嘅​呢？

帶​銅​嘅​子宮環:正如​上文​所​講，子宮環​似乎​可以​使​精子​好​難​穿​越​子宮​接觸​卵子。除咗​呢個​功​能​之外，帶​銅​嘅​子宮環​會​釋放​出​銅​離子，睇嚟​銅​會​對​精子​有​害，係​一​種​殺​精​劑。 * 另外，帶​銅​嘅​子宮環​可能​會​使​子宮​内膜​發生​改變。

含​荷爾蒙​嘅​子宮環:好多​唔同​種​類​嘅​子宮環​含有​同​避孕藥​類似​嘅​荷爾蒙。呢啲​子宮環​會​喺​子宮​入面​釋放​荷爾蒙。睇嚟，呢啲​子宮環​會​抑制​某​啲​女性​嘅​排卵。當然，冇​排卵​就​唔​會​發生​受​精。除咗​呢個​作用​之外，好多​人​相信​子宮環​含有​嘅​荷爾蒙​會​令​子宮​内膜​變​薄。 * 呢啲​子宮環​亦​都​會​令​宮頸​黏液​變​得​黏​稠，噉樣​就​可以​阻礙​精子​從​陰道​進入​子宮。呢啲​避孕​效果​係​喺​普通​子宮環​嘅​基礎​上​附加​嘅。

正如​之前​所​講，呢​兩​種​子宮環​都​會​使​子宮​内膜​發生​改變。不過，如果​發生​排卵​而且​卵子​受​咗​精​嘅​話，又​點樣​呢？受精卵​可能​會​進入​子宮，但係​就​好​難​喺​内膜​着​床。噉樣​懷孕​喺​最初​階段​就​會​終止。不過，呢​種​着​床​唔​成功​嘅​情況​被​認為​係​好​罕見​嘅，甚至​連​口​服​避孕藥​睇嚟​都​有​機會​發生​噉​嘅​情況。

所以，冇​人​可以​肯定​噉​講，帶​銅​或者​含​荷爾蒙​嘅​子宮環​可以​絶對​阻止​卵子​受​精。不過，科學​證據​表明，基​於​上文​提及​嘅​多​種​避孕​效果，使用​呢啲​子宮環​後​懷孕​嘅​機率​極​低。

基督徒​夫婦​喺​考慮​使用​子宮環​嗰時，可以​同​專業​嘅​醫護​人員​討論​吓​本地​可以​選擇​邊​種​子宮環，同埋​使用​子宮環​會​對​妻子​有​乜嘢​影響。夫婦​唔​應該​期待​其他​人​甚至​醫生​幫​佢哋​做​決定。（羅馬書​14:12；加拉太書​6:4，5）夫婦​應該​一齊​商量，自己​做​決定，務求​令​上帝​喜悦，可以​喺​佢​面前​保持​清白​嘅​良心。（參考​提摩太前書​1:18，19；提摩太後書​1:3）