父母——幫助仔女“有智慧可以得救”
“你從嬰兒時期就認識聖經。……就有智慧可以得救。”——提摩太後書3:15
1,2. 知道仔女想獻身受浸,點解有啲父母會擔心?
每年,成千上萬嘅聖經學生通過受浸表明佢哋獻身俾耶和華。當中,有好多係喺真理中長大嘅年輕人,佢哋選擇咗最好嘅生活方式。(詩篇1:1-3)如果你係基督徒父母,你一定好期待仔女受浸嘅嗰一日。(參考約翰三書4)
2 不過,你可能仲係會有啲擔心。或者你見過一啲年輕人受咗浸,不過後來開始懷疑按上帝標準生活係咪真係值得,有啲甚至已經離開咗真理。你可能會擔心你嘅仔女成為基督徒之後,逐漸失去當初對真理嘅愛,就好似1世紀以弗所嘅基督徒噉。耶穌對佢哋講:“你離棄咗你最初嘅愛。”(啟示錄2:4)你可以點樣盡力避免噉樣嘅情況,同時幫助你嘅仔女“成長,以至得救”?(彼得前書2:2)等我哋嚟睇吓提摩太嘅例子。
“認識聖經”
3. (甲)提摩太喺乜嘢情況下成為基督徒?佢對所學到嘅事有乜嘢反應?(乙)保羅勸勉提摩太要留意邊三方面嘅教導?
3 公元47年左右,使徒保羅第一次探訪路司得。當時好可能係提摩太初次接觸同耶穌有關嘅教導。雖然提摩太當時仲係個青少年,但係佢已經將學到嘅應用出嚟。兩年之後,佢就同保羅到各地傳道。大約16年之後,保羅寫信俾提摩太話:“你所學到同受勸導去相信嘅事,你要持守住,因為你知道係跟邊個學嘅,又知道你從嬰兒時期就認識聖經[希伯來語經卷]。聖經能够使你因信基督耶穌,就有智慧可以得救。”(提摩太後書3:14,15)請留意保羅提到要(1)認識聖經,(2)受勸導去相信所學到嘅事,(3)通過對耶穌基督懷有信心而有智慧可以得救。
4. 喺教導年幼仔女方面,你覺得有邊啲實用嘅工具?(請睇吓課文開頭嘅圖片)
4 身為基督徒父母,你自然都好想仔女認識聖經。今日整本聖經包括希伯來語經卷同希臘語經卷。父母可以按照仔女嘅學習能力去教導佢哋,其實就算仔女嘅年紀好細,佢哋都可以學習基本嘅聖經人物同事迹。耶和華嘅組織提供咗好多工具幫助父母教導仔女。你諗到有邊啲工具有你嘅語言版本呢?要記住,聖經知識係同耶和華建立深厚友誼嘅基礎。
“受勸導去相信”
5. (甲)“受勸導去相信”係乜嘢意思?(乙)我哋點知道提摩太對耶穌嘅好消息有堅定嘅信心?
5 聖經知識係好重要嘅。不過,只係教導仔女聖經人物同事迹係唔够嘅。提摩太自己都係“受勸導去相信”。喺原文,呢句話嘅意思係“堅信不疑”或者“確信而且肯定某件事係真實嘅”。提摩太從嬰兒時期就受到教導認識希伯來語經卷。後來,佢因為確鑿嘅證據而堅信耶穌就係彌賽亞。提摩太對好消息有堅定嘅信心,所以佢決定受浸成為基督嘅門徒,後來仲同保羅一齊參與海外傳道。
6. 你可以點樣幫助仔女培養對聖經真理嘅信心?
6 你可以點樣幫助你嘅仔女建立好似提摩太一樣嘅信心?首先,要有耐心。堅强嘅信心唔係一朝一夕就可以培養到嘅。你有堅强嘅信心,唔代表你嘅信心可以自然傳俾下一代。每個小朋友都需要運用“理智”去培養對聖經真理嘅信心。(請讀羅馬書12:1)喺呢方面,父母擔任好重要嘅角色,特别係仔女問你問題嘅時候。請睇吓一個例子。
7,8. (甲)一個基督徒爸爸點樣耐心教導佢嘅女?(乙)你曾經點樣表現同樣嘅耐心?
7 湯姆斯有個11歲嘅女,佢話:“我個女有時會問,‘耶和華會唔會通過進化嚟繁殖生命?’或者‘點解我哋唔參與多啲社區活動,例如參加競選嚟
改善吓社會?’有時我要克制自己,唔好馬上同佢講應該相信乜嘢。對真理嘅信心應該建立喺好多細小嘅證據之上,而唔係夾硬要佢相信一大條道理。”8 湯姆斯知道,佢需要耐心噉去教導。其實,對於所有基督徒嚟講,耐心都係好重要嘅。(歌羅西書3:12)湯姆斯發覺通過多次嘅討論先可以幫到個女建立信心,噉樣做真係需要時間。湯姆斯同個女推理,幫助佢清楚明白從聖經學到嘅知識。湯姆斯話:“特别喺一啲重要嘅事上,我同太太都想知道個女係咪真係相信佢所學到嘅,同埋對佢嚟講聖經嘅教導合唔合理。如果佢提出問題,噉係好嘅。老實講,如果佢問都唔問就接受,我仲擔心呀。”
9. 你可以點樣反覆教導仔女上帝嘅話語?
9 通過父母不斷耐心教導,仔女就可以逐步領悟到真理嘅“長闊高深”。(以弗所書3:18)我哋可以用適合佢哋年紀,又容易明白嘅資料嚟施行教導。佢哋相信自己所學到嘅知識,就能够喺其他人,包括喺同學面前,更有信心噉解釋自己嘅信仰。(彼得前書3:15)例如,你嘅仔女可唔可以根據聖經解釋人死後嘅情況?對佢哋嚟講,聖經嘅解釋合唔合理? * 反覆教導仔女上帝嘅話語真係需要耐心,但係你付出嘅努力係非常值得嘅。(申命記6:6,7)
10. 喺教導仔女方面,乜嘢係好重要嘅?
10 當然,喺幫助仔女建立信心方面,父母嘅榜樣係好重要嘅。斯蒂芬妮有三個女,佢話:“我幾個女仲係好細嘅時候,我就問自己,‘我有冇同啲細路解釋,點解我對耶和華嘅存在,佢嘅愛,同佢正義嘅行事方式深信不疑?我啲細路有冇清楚睇出我真係好愛耶和華?’如果我自己都冇信心,我又點可以期望我啲細路有信心呢。”
“有智慧可以得救”
11,12. 智慧係乜嘢?點解我哋唔應該只係憑一個人嘅年齡去衡量佢嘅智慧?
11 上文提到,提摩太有(1)聖經知識(2)堅定嘅信心。噉保羅話,聖經可以使提摩太“有智慧可以得救”又係乜嘢意思?
12 《洞悉聖經》下册解釋,喺聖經裏面,智慧可以“使人善用知識同悟性成功解決問題,避免危險,達到某啲目標,或者勸其他人噉樣做。智慧嘅反面就係愚蠢”。聖經話,“愚昧纏住孩子嘅心”。(箴言22:15)既然智慧嘅反面係愚蠢,噉一個人行事有智慧就表明佢係成熟嘅人。一個人靈性成唔成熟,唔可以單單睇佢嘅年齡,而係要睇佢對耶和華有冇敬畏之心,係 咪樂意服從上帝嘅誡命。(請讀詩篇111:10)
13. 一個年輕人點樣表明佢有智慧可以得救?
13 一個靈性成熟嘅年輕人,唔會因為自己嘅慾望或者同輩壓力而“飄忽不定,隨波逐流”。(以弗所書4:14)相反,佢哋嘅“理解力……鍛鍊純熟,能够明辨是非”。(希伯來書5:14)就算父母同其他成年人唔喺身邊,佢哋都可以作出明智嘅決定,表明佢哋越來越成熟。(腓立比書2:12)智慧可以使佢哋得救。(請讀箴言24:14)你可以點樣幫助你嘅仔女培養智慧?首先,你要向仔女清楚解釋你持守嘅聖經標準。通過自己嘅言行同榜樣,俾佢哋知道上帝話語嘅標準就係你嘅標準。(羅馬書2:21-23)
14,15. (甲)一個打算受浸嘅年輕人需要考慮乜嘢重要問題?(乙)你可以點樣幫助仔女沉思服從上帝誡命嘅益處呢?
14 不過,淨係同仔女講乜嘢係啱,乜嘢係錯係唔够嘅。你亦都要喺一啲問題上幫助佢哋學識推理,例如:“點解聖經譴責一啲睇嚟好吸引嘅嘢?乜嘢使我確信聖經嘅標準總係對我有益?”(以賽亞書48:17,18)
15 如果你嘅仔女想受浸,你要幫助佢哋明白成為一個基督徒之後會有乜嘢責任,睇吓佢哋對呢啲責任有乜嘢感覺。佢哋知唔知道:受浸嘅益處係乜嘢?為此要付出乜嘢?得到嘅益處點樣遠遠超過所付出嘅?(馬可福音10:29,30)一個人受浸之後好多時要面對以上嘅問題,所以喺未踏出咁重要 嘅一步之前,就要先考慮清楚。要幫助你嘅仔女沉思,服從上帝嘅誡命會有乜嘢好結果,唔服從又會造成乜嘢後果。噉樣佢哋就會更加相信,按照聖經嘅標準嚟生活一定係最好嘅選擇。(申命記30:19,20)
年輕人受浸後喺信心上動搖
16. 如果仔女受浸後對真理表示懷疑,父母需要考慮乜嘢?
16 但係,如果你嘅仔女喺受浸之後對真理表示懷疑又點呢?例如,一個受咗浸嘅青少年可能會受到呢個世界嘅事吸引,或者開始懷疑按聖經原則生活係咪最好嘅。(詩篇73:1-3,12,13)作為父母,你點樣處理呢個情況關係到你嘅仔女會選擇留喺真理,抑或離開。無論佢係個細路仔,抑或已經係一個青少年,都要決心唔好為呢件事同你嘅仔女開戰。你嘅目標係要提供仁愛嘅支持同協助,贏得佢嘅心。
17,18. 如果仔女嘅信心動搖,父母可以點樣做?
17 一個受咗浸嘅年輕人,已經向耶和華承諾會將自己嘅一生獻俾佢。佢嘅獻身表明,佢愛耶和華亦都會將佢嘅旨意放喺生活嘅首位。(請讀馬可福音12:30)耶和華好重視呢個承諾,所以我哋每個人都應該有同樣嘅睇法。(傳道書5:4,5)喺一個適當嘅時間,以仁慈嘅方式提醒你嘅仔女要重視自己作過嘅承諾。同仔女討論之前,好好運用耶和華嘅組織向父母提供嘅資料。如果你噉樣做,就可以幫助仔女睇出佢哋獻身俾耶和華,並受浸成為基督徒係一件好重要嘅事,亦都會得到好多福分。
18 例如,我哋可以喺《青年人所提出嘅問題——有實效嘅答案》(英語)第1册嘅附錄“父母提出嘅問題”揾到好多實用嘅建議。附錄提到:“首先,唔好貿然認定仔女抗拒真理。好多年輕人表面睇嚟對屬靈嘅事唔再感興趣,其實係遇到一啲難題。”好可能係覺得孤單、面對同輩壓力,或者認為自己喺屬靈上冇其他年輕基督徒做得咁好。附錄亦都提到,“請留意,仔女有呢啲問題,唔係因為佢哋唔同意聖經嘅原則,而係目前嘅某啲情況令佢哋覺得好難按照聖經嘅吩咐去做。”之後,附錄亦都提供咗一啲建議俾父母,使父母可以喺仔女信心動搖嘅時候幫助佢哋。
19. 父母可以點樣幫助仔女“有智慧可以得救”?
19 身為父母,你有好重要嘅責任,亦都有榮幸“照耶和華嘅意思管教[仔女],糾正佢哋嘅思想,將佢哋撫養成人”。(以弗所書6:4)就好似呢篇課文所講嘅,父母唔單止需要教導仔女聖經知識,亦都要幫助佢哋對所學嘅培養信心。仔女培養堅强嘅信心先會受到推動獻身俾耶和華,全心全意事奉佢。願耶和華嘅話語、聖靈,以及你身為父母所付出嘅努力,能够幫助你嘅仔女“有智慧可以得救”。
^ 9段 《辨明聖經的真理》研讀指南係一個非常好嘅工具,可以幫助年輕人同成年人明白並解釋聖經真理。你可以喺jw.org網站揾到多種語言版本嘅研讀指南。點擊“聖經與生活”> “聖經研讀工具”。