“我對上帝所存嘅希望”
“末後嘅亞當成為賜人生命嘅靈體。”——哥林多前書15:45
1-3． （甲）我哋信仰嘅基本教義包括乜嘢？（乙）點解復活呢個教義咁重要？（請睇吓課文開頭嘅圖片）
如果有人問你:“你哋耶和華見證人相信啲乜嘢？”你會點樣回答？當然你會强調耶和華係造物主，係生命嘅源頭。你可能亦會提及你對耶穌基督嘅信心，因為佢犧牲咗自己嘅生命作為贖價。你可能都會好開心噉講到，上帝嘅子民會永遠生活喺未來嘅地上樂園。但係，你會唔會講復活係你最珍視嘅基本教義之一呢？
2 就算我哋希望自己可以渡過大患難，喺地上得享永生，我哋都有理由將復活視為我哋信仰嘅基本教義之一。使徒保羅表明點解復活係我哋信仰嘅基礎，佢話:“如果真係冇死人復活呢回事，噉基督就冇復活過嘞。”如果基督冇被復活，佢就唔會成為統治我哋嘅君王，而我哋教導人認識基督嘅統治就一啲意義都冇。（請讀哥林多前書15:12-19）不過，我哋知道耶穌真係被復活咗。我哋對呢件事嘅睇法同撒都該派好唔一樣，佢哋完全唔信死人會復活。即使俾其他人嘲笑，我哋都會持守對復活嘅信心。（馬可福音12:18；使徒行傳4:2，3；17:32；23:6-8）
3 保羅談及“關於基督嘅初步教義”嘅時候，佢亦都提到“死人復活……嘅道理”。（希伯來書6:1，2）保羅亦都强調佢對復活有信心。（使徒行傳24:10，15，24，25）雖然復活係一個初步教義，係“上帝聖言嘅基本道理”之一，但係我哋仍然需要清楚明白呢個教義。（希伯來書5:12）點解噉講？
4． 有關復活嘅乜嘢問題有待解答？
4 喺開始學習聖經嗰時，大多數人都會讀到古代有關復活嘅記載，例如拉撒路嘅復活。佢哋仲知道亞伯拉罕、約伯同埋但以理都確信，喺將來死去嘅人會復活。不過，假如有人問你喺聖經裏面有乜嘢證據證明，喺幾個世紀之前應許過嘅復活一定會實現，你會點樣解釋？聖經有冇講復活會喺幾時發生？呢啲問題嘅答案會强化我哋嘅信心，等我哋睇吓經文點樣講。
幾百年前預告嘅復活
5． 我哋首先會討論同復活有關嘅邊啲問題？
5 一個啱啱死去嘅人馬上被復活，可能我哋會比較容易理解。（約翰福音11:11；使徒行傳20:9，10）但係，如果有一個應許話，人死去幾年甚至幾百年之後會被復活，你相唔相信？無論呢個應許係關於一個啱啱死去嘅人，抑或一個死咗好耐嘅人，咁耐先實現嘅應許值唔值得我哋相信呢？其實，喺幾百年前就預告嘅一次復活已經應驗咗，而我哋又確信呢件事發生過。邊個嘅復活呢？而呢個同我哋期待喺將來發生嘅復活有咩關係？
6． 點解話詩篇118篇嘅預言同耶穌有關？
6 有關喺好耐之前就預告過嘅復活，請留意詩篇118篇嘅經文。呢段經文好可能係大衛寫嘅，當中包括一個懇求:“耶和華啊，求你拯救！……奉耶和華之名嚟嘅人，願佢蒙福”。喺尼散月九日，即係耶穌死之前冇幾耐，當佢騎住隻驢入耶路撒冷嘅時候，群衆就引用咗呢節同彌賽亞有關嘅經文。（詩篇118:25，26；馬太福音21:7-9）但係詩篇118篇點樣預言到喺好多年後先發生嘅復活呢？請留意另一節經文點講:“建造嘅人棄絶嘅石頭，成為屋頂嘅房角石。”（詩篇118:22）
“建造嘅人棄絶”彌賽亞（請睇第7段）
7． 猶太人棄絶耶穌到乜嘢程度？
7 “建造嘅人”，即係猶太宗教領袖，佢哋棄絶咗彌賽亞。呢啲宗教領袖棄絶耶穌唔只係鄙視佢，唔肯承認佢係基督咁簡單。事實上，好多猶太人係想殺死耶穌。（路加福音23:18-23）冇錯，佢哋要對耶穌嘅死負責。
耶穌被復活成為“房角石”（請睇第8，9段）
8． 耶穌點樣成為“房角石”？
8 如果耶穌被棄絶，又被殺，噉佢仲點樣可以成為“房角石”？只有佢被復活，呢件事先可以發生。耶穌通過一個比喻講明呢點。耶穌話啲農户惡待主人派去見佢哋嘅人，就好似以色列人惡待耶和華差派嘅先知。喺比喻入面，主人最後差派佢嘅愛子，即係佢嘅繼承人，去見佢哋。農户有冇接受主人嘅仔呢？完全冇。佢哋甚至將佢殺死。講完比喻之後，耶穌就引用咗詩篇118:22所講嘅預言。（路加福音20:9-17）當時猶太“人民嘅官長、長老、抄經士聚集喺耶路撒冷”，使徒彼得同佢哋講話嘅時候，亦都引錄咗同一節經文。佢話:“呢位［拿撒勒人］耶穌，你哋將佢處死喺木柱上，但係上帝已經使佢從死裏復活。”所以彼得清楚表明:“佢就係‘你哋建造嘅人所藐視嘅石頭，已經成為屋頂嘅房角石’。”（使徒行傳3:15；4:5-11；彼得前書2:5-7）
9． 詩篇118:22預告咗乜嘢事？
9 喺幾百年之前，詩篇118:22嘅預言就表明將會有一位被復活。彌賽亞會被棄絶同死去，不過佢會被復活成為房角石。只有復活咗嘅耶穌先有資格救贖人類，所以聖經話:“喺天下人間，冇賜下其他名，係我哋必須依靠先能够得救嘅”。（使徒行傳4:12；以弗所書1:20）
10． （甲）詩篇16:10預告咗乜嘢事？（乙）我哋點知道詩篇16:10唔係應驗喺大衛身上？
10 請睇吓另一節提到復活嘅經文。呢節經文係喺事件發生前千幾年寫成嘅。呢件事可以加强我哋嘅信心，使我哋更加堅信，就算有關復活嘅應許喺好耐之前預告，都一定會實現。喺詩篇16篇，大衛寫道:“你一定唔會將我撇喺墳墓裏，唔會俾你忠貞嘅僕人被棄於墓穴。”（詩篇16:10）大衛嘅意思唔係話佢永遠唔會死，或者唔會被埋葬喺墳墓入面。聖經清楚提到大衛亦都經歷衰老死亡。佢死咗之後，就“隨列祖長眠，葬喺大衛城”。（列王紀上2:1，10）噉詩篇16:10講嘅係乜嘢意思？
11． 彼得喺幾時解釋詩篇16:10？
11 大衛寫咗呢篇詩千幾年之後，喺耶穌復活後幾個星期，彼得向幾千個猶太人同歸信者發表演講，解釋詩篇16:10所指嘅係邊個。（請讀使徒行傳2:29-32）佢提到大衛的確死咗又被埋葬。在場嘅聽衆都知道呢件事。不過，聖經冇提到當彼得話大衛“預見基督復活，又傳講呢件事”嘅時候，有任何人提出質疑。
12． 詩篇16:10點樣得到應驗？呢個證實咗乜嘢？
12 彼得引用咗大衛喺詩篇110:1嘅話去支持佢嘅論點。（請讀使徒行傳2:33-36）彼得運用經文向聽衆推理，證實耶穌已經“做主做基督”。再加上，耶穌從死裏復活，大家就睇出詩篇16:10已經得到應驗。後來，使徒保羅喺皮西迪亞嘅安提阿，亦都用咗同樣有力嘅證據向猶太人推理。佢提出嘅證據打動咗當時嘅聽衆，推動佢哋想了解更多。（請讀使徒行傳13:32-37，42）呢個亦都使我哋對聖經預言嘅復活有信心，即使呢啲預言喺幾百年之後先應驗，都值得我哋信賴。
復活——幾時發生？
13． 有啲人可能會對復活提出乜嘢問題？
13 知道幾百年前預告嘅復活一定會發生，呢個使我哋大受鼓勵。不過，有人仲係會諗:“我係咪要等好耐，先可以見翻我深愛嘅親友呢？我盼望嘅復活幾時先會發生呢？”耶穌曾經同使徒講，有啲事係佢哋唔知道嘅，亦都冇可能會知。有啲細節係“父親憑自己嘅權能所定嘅時候時期，唔係你哋可以知嘅”。（使徒行傳1:6，7；約翰福音16:12）不過，呢個並唔係話我哋對復活嘅時間一無所知。
14． 耶穌嘅復活同發生喺佢之前嘅復活有乜嘢唔同？
14 聖經提到最重要嘅復活就係耶穌嘅復活。如果佢冇被復活，我哋就冇希望再次見翻死去嘅親友。嗰啲喺耶穌日子之前，例如以利亞同以利沙復活咗嘅人，都唔可以永遠生活落去。佢哋再次死去，歸回塵土。但係耶穌“從死裏復活，就唔再死，死亡亦都唔再係佢嘅主人嘞”。之後，耶穌“永永遠遠”生活喺天上。（羅馬書6:9；啟示錄1:5，18；歌羅西書1:18；彼得前書3:18）
15． 耶穌係“最早嘅收成”，點解呢個咁重要？
15 耶穌係第一個被復活到天上成為靈體嘅人，而佢嘅復活係最重要嘅。（使徒行傳26:23）不過，唔係只有佢有希望復活到天上。耶穌向忠心嘅使徒保證，佢哋會同佢一齊喺天上施行統治。（路加福音22:28-30）要得到獎賞，佢哋就要先死去。之後，好似基督一樣，佢哋會復活成為靈體。保羅寫道:“基督已經從死裏復活，喺長眠嘅人當中成為最早嘅收成。”保羅指出會有其他人被復活到天上，佢話:“各人都按住次序復活。基督係最早嘅收成，然後喺佢臨在期間輪到嗰啲屬於基督嘅”。（哥林多前書15:20，23）
16． 天上嘅復活會喺幾時發生？請解釋。
16 我哋從保羅所講嘅可以得知，天上嘅復活會喺幾時發生。呢件事會喺“［耶穌］臨在期間”發生。耶和華見證人喺好耐之前就已經從聖經睇出，自從1914年之後，我哋就生活喺耶穌嘅“臨在”期間，亦都睇出呢個邪惡制度好快就會結束。
17，18． 喺基督臨在期間，有啲受膏基督徒會經歷乜嘢事？
17 關於天上嘅復活，聖經進一步提供一啲細節:“關於已經長眠嘅人，有一啲事我哋唔想你哋唔明白……我哋既然相信耶穌已經死而復生，就應該相信，靠住耶穌已經長眠嘅人，上帝亦必定會將佢哋同耶穌一齊帶嚟。……主臨在嘅時候，我哋仍然生存嘅人必定唔會先於已經長眠嘅人。因為主必定親自從天而降，帶住發令嘅呼喚，……嗰啲同基督聯合嘅死人必定首先復活。然後我哋仍然生存嘅人，必定霎時間從雲中被接上去，喺空中同主會合，同佢哋喺埋一齊。噉樣，我哋就永遠同主一齊喇。”（帖撒羅尼迦前書4:13-17）
18 天上嘅復活會喺基督“臨在”之後開始。大患難期間，仍然喺地上嘅受膏基督徒會“從雲中被接上去”。（馬太福音24:31）嗰啲“被接上去”嘅人唔會“長眠”，意思係佢哋死咗之後唔使等好耐。佢哋“人人都要改變，……喺剎那間，一眨眼，最後嘅號筒吹響嘅時候”。（哥林多前書15:51，52）
19． 將來會有乜嘢“更好嘅復活”？
19 今日，大部分忠心嘅基督徒都唔係受膏嘅，唔會同基督一齊喺天上統治。不過，佢哋期待緊呢個邪惡制度會喺“耶和華嘅日子”被毁滅。雖然冇人知道呢一日係幾時，但係證據顯示終結好快就嚟到。（帖撒羅尼迦前書5:1-3）之後，另一種復活會喺地上嘅樂園發生。嗰啲被復活嘅人有希望恢復身心完美，唔再受死亡威脅。比起嗰啲以往被復活又再死去嘅人嚟講，呢個的確係“更好嘅復活”。（希伯來書11:35）
20． 點解我哋相信將來嘅復活都會以有秩序嘅方式進行？
20 提到嗰啲將會復活到天上嘅人，聖經話佢哋“各人都按住次序復活”。（哥林多前書15:23）我哋相信喺地上嘅復活都會以有秩序嘅方式進行。我哋可能會問:喺基督千年統治之前冇幾耐就死去嘅忠僕，會唔會先被復活，等嗰啲喺樂園裏面嘅親友可以迎接佢哋呢？嗰啲喺古代有領導能力嘅忠僕會唔會先被復活，使佢哋可以喺新世界管理上帝嘅子民呢？嗰啲從來都冇事奉耶和華嘅人又點呢？佢哋會喺幾時同邊度被復活呢？我哋都好想知道呢啲問題嘅答案，不過而家我哋唔需要考慮太多。只要我哋繼續拭目以待，將來就會知道答案。我哋到時可以親眼見到耶和華點樣安排呢啲事，一定會好高興！
21． 你對復活有乜嘢希望？
21 而家，我哋就要强化自己對耶和華嘅信心。耶和華通過耶穌向我哋保證，嗰啲留喺佢記憶當中嘅人，將來一定會被復活。（約翰福音5:28，29；11:23）耶穌曾經講過，亞伯拉罕、以撒同雅各“喺［上帝］眼中，佢哋都係活嘅”，呢個證明耶和華有能力復活死去嘅人。（路加福音20:37，38）而家我哋都可以好似保羅一樣，充滿信心噉話:“我對上帝所存嘅希望……就係……人都會復活。”（使徒行傳24:15）
