人物生平
放棄一切跟從耶穌
“如果你出去傳道，就唔好再返嚟。返嚟嘅話，我就打跛你隻腳。”聽到爸爸嘅恐嚇，我決定離開屋企。呢次係我第一次放棄一切嚟跟從耶穌嘅經歷。當時我只有16歲。
呢件事係點樣發生嘅呢？等我嚟解釋一下。我喺1929年7月29日出世，喺菲律賓布拉干省嘅一條村長大。當時經濟蕭條，所以我哋嘅生活都比較簡樸。我細個嗰時，日本軍隊侵略菲律賓，引發咗戰爭。但係我哋條村因為比較偏僻，就冇直接受到影響。我哋冇收音機、電視機同報紙，所知嘅戰爭信息都係聽翻嚟嘅。
喺八個兄弟姐妹當中，我排第二。我八歲嘅時候就同外公外婆一齊住。雖然我哋係天主教徒，不過外公對宗教嘅態度好開明，仲收集咗一啲朋友俾佢嘅宗教書刊。我記得佢俾我睇過他加祿語嘅《保護》、《平安》同《揭露》册子 *，仲有聖經。我好鍾意睇聖經，特别係四福音。研讀呢啲經文使我好想跟從耶穌嘅榜樣。（約翰福音10:27）
學習跟從耶穌
日軍對菲律賓嘅統治喺1945年結束。大約喺嗰個時候，父母叫我返屋企住。外公都叫我返去，所以我就返嘞。
冇幾耐之後，到咗1945年12月，昂阿特鎮嘅耶和華見證人嚟我哋條村傳道。一個年長嘅見證人嚟到我哋屋企，用聖經向我哋解釋“最後嘅日子”係點樣嘅。（提摩太後書3:1-5）佢邀請我哋參加附近村莊嘅一個聖經討論。我父母冇去，不過我有。當時大約有20人參加，其中一啲人問咗好多同聖經有關嘅問題。
我唔係好明白佢哋喺度討論啲乜嘢，所以我諗住走喇。就喺呢個時候，佢哋開始唱王國詩歌。詩歌打動咗我，所以我決定留低。唱完詩歌同禱告之後，所有人都受到邀請參加下個星期日喺昂阿特舉行嘅聚會。
我哋幾個人行咗8公里（5英里）先去到聚會嘅地方。聚會喺克魯斯弟兄屋企舉行，當時有50人參加。令我印象深刻嘅係，連一啲小朋友都可以喺好深入嘅聖經課題上發表評論。一個年長嘅先驅弟兄叫達米安·桑托斯，佢之前做過市長。喺我參加咗幾次聚會之後，佢邀請我去佢屋企過夜。我哋成晚都喺度討論聖經。
喺嗰段時期，好多人好快就將學到嘅基本聖經知識實踐出嚟。我哋參加咗幾次聚會之後，一啲弟兄就問我哋:“你哋想唔想受浸？”我回答:“我想。”我知道我好想“為主人基督效勞”。（歌羅西書3:24）1946年2月15日，我同另一個聖經學生喺附近嘅一條河受浸。
我哋意識到，受咗浸嘅基督徒需要效法耶穌基督，經常傳道。我爸爸唔鍾意我噉樣做，佢話:“你咁細個，傳咩道呀。你以為喺條河度浸吓就可以成為傳教士咩。”我向佢解釋傳講王國好消息係上帝嘅旨意。（馬太福音24:14）我仲話:“我需要履行對上帝嘅承諾。”就喺呢個時候，爸爸講出開頭嗰番恐嚇嘅話，佢想阻止我去傳道。呢次係我第一次為咗追求屬靈目標而放棄一切。
克魯斯一家邀請我同佢哋喺昂阿特一齊住。佢哋鼓勵我仲有佢哋嘅細女蘿拉參與先驅工作。1947年11月1日，我哋兩個都開始做先驅。蘿拉喺另一個鎮服務，而我就繼續留喺昂阿特支持嗰度嘅傳道工作。
再一次放棄一切
喺我做先驅嘅第三年，嚟自分部嘅厄爾·斯圖爾特弟兄喺昂阿特嘅廣場向超過500人發表咗一個演講。佢用英語發表呢個演講，之後我就用他加祿語概述佢演講嘅内容。我只係讀咗七年書，但係我哋嘅老師經常講英語。我英語水平得到提升嘅另一個原因係，他加祿語嘅聖經出版物唔係好多，所以我經常閲讀英語嘅出版物。因為噉，我累積到足够嘅英語詞匯，可以為斯圖爾特弟兄同之後嘅一啲英語講者做翻譯。
我為斯圖爾特弟兄翻譯嘅嗰一日，佢同當地嘅會衆提到，因為好多海外傳道員（現稱特派傳道員）會去美國紐約參加1950年嘅“神治國嘅擴展”大會，所以分部想邀請一兩個先驅弟兄去伯特利幫手。我係其中一個受邀請嘅弟兄。我再一次放棄一切，離開熟悉嘅環境。
1950年6月19日，我去到伯特利，開始新嘅委派。伯特利係一間好大嘅舊屋，周圍都係大樹，占地面積為1萬平方米（2.5英畝）。大概有12個獨身弟兄喺嗰度服務。每朝早，我喺廚房幫手。大約9點之後，就喺洗衣部熨衫。下晝嘅工作都係類似。海外傳道員參加完大會返嚟之後，我繼續留喺伯特利服務。後來，我負責包裝準備寄出嘅雜誌、處理雜誌訂閲單，同埋喺接待處工作。無論被委派做乜嘢工作，我都樂意去做。
離開菲律賓參加基列學校
1952年，我同另外六位嚟自菲律賓嘅弟兄受到邀請，去參加第20屆基列學校。收到呢個邀請，我哋都非常興奮。喺美國，我哋見到同體驗到嘅嘢都好新奇。呢度同我哋條村真係好唔一樣。
同其他同學喺基列
例如，我哋要學習使用從來都冇見過嘅餐具同電器。連天氣都零舍唔同。有一朝，我行出去見到一個好靚嘅白色世界。呢個係我第一次見到雪景。之後，我發覺原來落雪係好凍嘅——非常之凍！
我喺基列受到非常好嘅訓練，相比之下，要作出嘅調整根本唔算得係乜嘢。導師運用好有效嘅教導方式。我哋學識點樣做有意義嘅研讀同資料搜集。基列學校的確鞏固咗我同耶和華嘅關係。
畢業之後，我臨時被派去紐約市嘅布朗克斯做特别先驅。所以，我可以參加1953年7月喺嗰度舉行嘅大會，名為“新世界社會”。大會之後，我收到委派返去菲律賓。
離開大城市嘅舒適生活
分部嘅弟兄同我講:“從而家開始，你被委派去做分區監督。”呢個俾我一個新嘅機會實際跟從主人耶穌嘅腳蹤。佢周遊各城各村，幫助耶和華嘅綿羊。（彼得前書2:21）我負責探訪嘅分區包括布拉干省、新埃西哈省、打拉省、三描禮士省，覆蓋呂宋島中部好大嘅地區。呂宋島係菲律賓最大嘅海島。為咗探訪一啲市鎮，我需要越過崎嶇嘅馬德雷山脈。冇任何公共交通工具可以去到呢啲地方，結果我要問啲貨車司機，可唔可以坐喺佢哋裝滿木頭嘅貨車上面。好多時佢哋都俾我坐，不過呢個唔係最舒服嘅交通工具。
大部分會衆都比較新而且人數比較少，所以啲弟兄都好感激我幫助佢哋更有效噉組織聚會同傳道工作。
後來我被委派去探訪整個比科爾區。呢個分區大多數都係由特别先驅開發嘅偏遠小組組成。喺我探訪期間住嘅嗰間屋，唯一嘅厠所就係喺地下挖嘅坑，喺中間放住兩條木。我一踩上去，兩條木就跌咗落去個坑度，跟住我都跌埋落去。我用咗好耐先洗翻乾淨個身，之後就去食早餐。
就喺嗰個委派期間，我諗起蘿拉。蘿拉一開始喺布拉干做先驅，而家喺杜馬格特做特别先驅，於是我就去嗰度探佢。我哋書信來往咗一段時間，然後喺1956年結婚。結婚之後嘅第一個星期，我哋就去拉普拉普島探訪當地嘅一群會衆。我哋要翻山越嶺，行好多路，不過可以同蘿拉一齊為偏遠地區嘅弟兄姊妹服務，真係好開心！
再次返到伯特利服務
我哋一齊從事探訪工作四年之後，被邀請去分部服務。從1960年開始我哋就一直喺伯特利工作。咁多年嚟，我同一啲負有重要職責嘅弟兄一齊工作，從佢哋身上我學到好多嘢。蘿拉喺伯特利亦都有過唔同嘅工作委派。
一個宿務語翻譯員翻譯我喺大會發表嘅演講
喺伯特利，我有幸見證到喺菲律賓有越來越多人事奉耶和華。我年輕單身入伯特利嘅時候，整個菲律賓嘅傳道員人數只有1萬左右，而家已經超過20萬，當中幾百個弟兄姊妹喺伯特利服務，支持傳道工作。
隨住工作不斷擴展，伯特利嘅設施已經滿足唔到當時嘅需要。所以中央長老團委派我哋去揾吓有冇一啲物業，可以興建一個全新而且更大嘅分部。我同印刷廠嘅監督就喺分部附近逐家逐户去問，有冇人想賣地。冇人肯賣，有個屋主仲同我哋講:“我哋中國人只會買地，唔會賣地。”
為艾伯特·史勞德弟兄嘅演講傳譯
有一日，一個業主突然間問我哋想唔想買佢塊地，因為佢要搬去美國。之後發生咗一連串難以置信嘅事件。另一個鄰居亦都決定賣佢塊地，仲鼓勵埋佢嘅隔籬鄰舍都賣地俾我哋。我哋甚至可以買埋嗰個話“中國人唔會賣地”嘅人嗰塊地。喺好短嘅時間之内，分部面積增加到以前嘅三倍。我確信呢個結果係耶和華所成就嘅。
喺1950年嗰陣時，我係年紀最細嘅伯特利成員，而家我同太太係最老嘅。無論主人指示我去邊度，我都樂意去，而且從來冇後悔過。雖然父母趕我出屋企，不過耶和華俾咗我一個基督徒大家庭。無論收到點樣嘅委派，我都堅信耶和華一定會提供我哋需要嘅一切。我同蘿拉都好感激耶和華俾我哋嘅仁愛照顧，我哋都鼓勵其他人試試耶和華。（瑪拉基書3:10）
有一次，耶穌邀請一個叫馬太（又叫利未）嘅收税人，話:“嚟跟隨我啦。”馬太有乜嘢反應呢？“［佢］就放棄一切，起身跟隨耶穌。”（路加福音5:27，28）好似馬太噉，我都有機會跟從耶穌，亦都鼓勵其他人噉樣做，親自體驗耶和華所賜嘅福分。
好開心可以繼續參與菲律賓嘅擴展工作
^ 6段 由耶和華見證人出版，現已絶版。
