人物生平
忍受逆境,得享美福
“你呢個做爸爸嘅真係殘忍,”一個國安會嘅官員噉樣鬧我。 * “老婆大住個肚,個女又咁細,你居然揼低佢哋唔理。邊個嚟照顧佢哋呀?放棄你嘅信仰返屋企啦!”我話:“我冇抛棄屋企人,係你捉我嚟嘅,我犯咗咩罪呀?”官員反駁話:“你犯咩罪都好過做見證人。”
呢番對話係1959年喺俄羅斯伊爾庫茨克嘅監獄入面講嘅。等我嚟同你哋講吓,我同太太馬麗亞係點樣裝備自己“為正義受苦”,同埋我哋保持忠貞得到乜嘢福分。(彼得前書3:13,14)
1933年,我喺烏克蘭佐洛尼基嘅一條村出世。我阿姨同姨丈係見證人,1937年佢哋喺法國過嚟探我哋,留低咗兩本由守望台書社出版嘅書,叫《政府》同《拯救》(英語)。 爸爸睇咗呢啲書之後,重新恢復對上帝嘅信心。不過,喺1939年,佢病得好嚴重,去世之前佢同媽媽講:“呢個就係真理。呢啲知識你要教識啲仔女呀。”
西伯利亞——新嘅傳道地區
喺1951年4月,政府當局開始將見證人由蘇聯嘅西部放逐到西伯利亞。媽媽、我,仲有細佬格里戈雷,由烏克蘭嘅西部流放到西伯利亞。坐咗6000公里(3700英里)火車之後,我哋去到西伯利亞嘅圖倫市。兩個星期之後,哥哥博登被送到附近嘅安加爾斯克市嘅勞動營。佢被判處25年嘅勞役。
媽媽、格里戈雷同我喺圖倫市附近嘅民居傳道,不過我哋要靈活變通先得。例如,我哋會問:“呢度有冇人想賣牛呀?”當我哋揾到想賣牛嘅人嗰陣,我哋會同佢講,啲牛被設計得幾咁奇妙。好快,我哋就會將話題轉到造物主身上。嗰陣時,有份報紙報道話,見證人問人有冇牛賣,其實佢哋揾緊嘅係“綿羊”!冇錯,我哋的確揾到好似綿羊噉嘅人!我哋喺呢個新嘅傳道地區,同呢啲謙卑又好客嘅人學習聖經,真係好開心。今日,喺圖倫市有一個會衆,而呢個會衆有超過100個傳道員。
馬麗亞嘅信心受到考驗
喺二戰期間,我嘅太太馬麗亞喺烏克蘭認識真理。馬麗亞18歲嗰時,有個國安會官員開始騷擾佢,想强迫馬麗亞同佢發生性關係,但係馬麗亞堅決拒絶。有一日,馬麗亞返到屋企,發現嗰個官員竟然瞓喺佢張床度。馬麗亞即刻逃跑。嗰個官員好嬲,恐嚇馬麗亞話,要用佢係耶和華見證人呢個罪名拉佢去坐監。馬麗亞喺1952年真係被判監10年。佢覺得自己好似約瑟,因為約瑟都係為咗緊守忠義而被囚嘅。(創世記39:12,20)押送馬麗亞由法庭到監獄嘅司機同佢講:“唔使驚。好多人坐完監出嚟,都冇失去佢哋嘅尊嚴。”呢番話强化咗馬麗亞。
1952年到1956年,馬麗亞被帶到俄羅斯嘅高爾基市(今日叫下諾夫哥羅德)附近嘅勞動營服役。喺勞動營,佢哋要服嘅勞役係將樹連根挖出嚟,就算天寒地凍都要噉做。佢嘅健康大受影響,好在喺1956年,佢被釋放,之後去到圖倫市。
遠離我嘅太太同仔女
圖倫市有個弟兄話俾我知,有個姊妹會嚟。我踩單車去巴士站接佢,幫佢拎行李。我一見到馬麗亞就鍾意咗佢。我付出一番努力想贏得佢嘅芳心,最後成功咗。我哋喺1957年結婚。一年後,我哋嘅女伊琳娜出世,但係我哋喺埋一齊嘅快樂時光好短暫。1959年,我因為印刷聖經書刊而被捕。有半年時間,我被單獨囚禁。喺嗰段時期,為咗保持内心平靜,我不斷向上帝禱告,唱王國詩歌,同想像我重獲自由之後可以點樣傳道。
喺監獄,我接受審訊嘅時候,審訊員大聲噉對我講:“我哋好快會消滅晒你哋,就好似消滅啲老鼠噉!”我答佢話,“耶穌講過,王國嘅好消息一定會傳遍普天下,冇人阻止得到。”之後,審訊員改變手段,嘗試説服我放棄信仰,就好似開頭講嘅噉。當威迫利誘都唔成功,我就被判去薩蘭斯克市附近嘅勞動營做七年苦工。喺去勞動營途中,我知道二女奧爾加出咗世。雖然太太同兩個女都離我好遠,但係知道大家都忠於耶和華,我就好安慰。
馬麗亞每年一次會從圖倫坐火車到薩蘭斯克嚟探我,來回足足要12日。每次佢都會帶一對新靴俾我,仲會將近期嘅《守望台》收埋喺鞋踭嗰度。有一年,馬麗亞帶住兩個年幼嘅女嚟探我,真係好難忘。你可以想像,當時我幾咁感動!
新地區,新挑戰
喺1966年,我喺勞動營放返出嚟之後,一家四口搬到黑海附近嘅阿爾馬維爾市。我哋嘅仔雅羅斯拉夫同帕維爾都喺嗰度出世。
冇幾耐,國安會嘅官員就開始經常搜查我哋間屋,睇吓有冇聖經書刊。佢哋搜匀晒所有地方,連牛嘅飼料都揾埋。有一次,啲官員仲搞到滿頭大汗,成身都係塵。馬麗亞知道佢哋只係奉命行事,都好同情佢哋。馬麗亞倒咗啲果汁俾佢哋飲,又攞咗個衣刷,一盆水,同埋啲毛巾俾佢哋用。後來,國安會嘅長官嚟到,啲官員話俾佢知佢哋受到好友善嘅對待。佢哋走嗰陣,國安會嘅長官帶住微笑向我哋揮手。我哋好開心見到自己努力“以善勝惡”所帶嚟嘅好結果。(即使有咁多突擊搜查,我哋仍然繼續喺阿爾馬維爾傳道。我哋仲有機會强化庫爾加寧斯克市鎮附近一個小組嘅傳道員。今日,喺阿爾馬維爾有六群會衆,喺庫爾加寧斯克就有四群,我真係好開心見到呢啲發展。
咁多年來,我哋都遇到唔同嘅考驗。我哋嘅屬靈健康有時會變得軟弱,不過好感謝耶和華任用一啲忠心嘅弟兄嚟糾正我哋,强化我哋嘅靈性。(詩篇130:3)另一個嚴重嘅考驗係,國安會嘅間諜潛入會衆同我哋一齊工作。佢哋扮到好熱心,好積極噉傳道,有啲甚至喺組織入面擔負一啲職責。呢個帶俾我哋好大嘅考驗。不過最終,我哋都認清咗呢啲人嘅真面目。
1978年,馬麗亞45歲嗰年再一次懷孕。由於佢有慢性心臟病,醫生驚佢有生命危險,就想説服佢墮胎,不過馬麗亞堅決噉拒絶咗。因為噉,有啲醫生喺醫院入面拎住支針到處跟住佢,想打針迫佢早産。為咗保護未出世嘅BB, 馬麗亞就逃離醫院。
國安會命令我哋離開呢個城市。我哋就搬去愛沙尼亞塔林市附近一個村莊。愛沙尼亞當時係蘇聯嘅一部分。馬麗亞喺塔林市生咗細仔維塔利。佢哋母子都好健康,同醫生預計嘅完全唔同。
後來,我哋由愛沙尼亞搬到俄羅斯南部嘅涅兹洛布納亞。喺屋企附近嘅旅遊勝地,我哋好謹慎噉向嚟自唔同地區嘅遊客作見證。遊客去嗰度都係為咗放鬆身心,不過有啲遊客走嗰陣,就帶埋永生嘅希望離開!
教導我哋嘅仔女愛耶和華
我哋努力教導仔女愛耶和華,幫助佢哋培養渴望事奉耶和華嘅心。我哋經常邀請一啲成熟嘅弟兄姊妹嚟屋企交往,鼓勵我哋嘅仔女,我細佬格里戈雷就係其中一個常客。佢喺1970年到1995年受委任探訪唔同嘅會衆。我哋成家人都好鍾意佢嘅探訪,因為佢好樂觀,又有幽默感。有客人嚟屋企嗰時,我哋通常會玩聖經遊戲,所以啲仔女自細就好鍾意聖經嘅歷史記載。
喺1987年,我哋個仔雅羅斯拉夫搬去拉脱維亞嘅里加市。喺嗰度佢可以更公開噉傳道。不過,由於佢唔肯參軍,結果被判坐監一年半,先後監禁喺九個唔同嘅監獄。我將自己喺監獄嘅經歷話俾佢知,幫助佢喺監獄入面保持忍耐。後來,雅羅斯拉夫開始做先驅。1990年,我哋19歲嘅仔帕維爾話俾我哋知,佢想去日本以北嘅薩哈林島(庫頁島)做先驅。最初我哋唔想佢去,因為薩哈林島當時只有20個傳道員,而且距離我哋屋企有成9000公里(5500英里)咁遠。不過最後我哋都同意佢去,呢個真係一個正確嘅決定。島上嘅人都積極響應王國信息。幾年之後,嗰度就有八個會衆嘞。帕維爾一直喺薩哈林島服務,直到1995年。嗰陣時,只係得細仔維塔利留喺我哋身邊。佢自細好鍾意睇聖經,14歲就開始做先驅。我有兩年時間同佢一齊做先驅,嗰段時光真係好開心。維塔利19歲嗰年離開屋企做特别先驅。
諗翻1952年嗰時,有個國安會官員同馬麗亞講:“你一係就放棄信仰,一係就等住坐十年監。到你放監嗰陣,你肯定又老又孤獨。”但係事實就完全相反。我哋感受到好多愛心,包括上帝嘅忠貞之愛同埋啲仔女嘅愛。我哋又有榮幸幫助好多人揾到真理,我哋都感受到佢哋嘅愛。我同馬麗亞都好鍾意去我哋仔女服務嘅地方探佢哋,睇見啲仔女幫助人認識耶和華,而呢啲人又表現感激之情,我哋都好開心。
感激耶和華嘅良善
1991年,耶和華見證人嘅活動得到法律認可,呢個增添咗弟兄姊妹嘅力量,使傳道工作發展得更快。我哋會衆甚至買咗部巴士,每個週末都去附近嘅鄉村同市鎮傳道。
我好開心,雅羅斯拉夫同佢太太阿廖娜,帕維爾同佢太太拉婭都喺伯特利服務,而維塔利同佢太太斯韋特蘭娜,就做分區探訪嘅工作。我哋嘅大女伊琳娜同佢嘅家人就住喺德國。伊琳娜嘅先生弗拉基米爾同佢哋三個仔都係長老。二女奧爾加就住喺愛沙尼亞,佢成日都打電話俾我㗎。令我傷心嘅係,我嘅摯愛馬麗亞喺2014年去世。我真係好想佢快啲復活,見翻佢。我而家住喺别爾哥羅德市,呢度嘅弟兄俾我好多支持同幫助。
事奉耶和華嘅歲月使我明白到,保持忠義係有代價嘅,但係耶和華賜俾我哋嘅内心平安就係價值非凡嘅回報。我同馬麗亞因為堅定不移所得到嘅福分遠遠超過我嘅想像。蘇聯喺1991年解體之前,只有4萬個傳道員。曾經係蘇聯成員國嘅國家,今日已經有超過40萬個傳道員!我而家83歲,繼續以長老嘅身份為會衆服務。耶和華嘅支持一直都使我有力量保持忍耐。冇錯,耶和華真係大大賜福俾我。(詩篇13:5,6)
^ 4段 國安會係蘇聯國家安全委員會嘅簡稱。