“你要勇敢……即管放膽去做”
“你要勇敢堅强，即管放膽去做，唔使怕，亦都唔使驚慌，因為耶和華上帝……與你同在”——歷代志上28:20
唱詩60，29首
1，2． （甲）所羅門接受咗乜嘢重要嘅委派？（乙）點解大衛有啲擔心所羅門唔能够勝任？
所羅門受委派，負責監督有史以來最重要嘅建築工程。呢座建築物要“宏偉輝煌，聲譽要傳遍各地”。更重要嘅係，呢座“係耶和華上帝嘅殿”。耶和華委派所羅門做呢項工程嘅監督。（歷代志上22:1，5，9-11）
2 大衛王深信上帝會支持所羅門。不過，所羅門“仲年輕，冇經驗”，呢個對佢嚟講係咪一個障礙呢？佢有冇勇氣去承擔建造聖殿嘅責任呢？為咗成功完成呢個工程，所羅門需要鼓起勇氣，放膽去做。
3． 所羅門從佢父親身上學到乜嘢？
3 所羅門一定聽過好多佢父親大衛嘅英勇事迹。大衛年輕嘅時候，為咗保護羊群，要同野獸搏鬥。（撒母耳記上17:34，35）佢面對能征善戰嘅巨人歌利亞嗰陣，表現出驚人嘅勇氣。冇錯，喺上帝嘅幫助下，大衛只係用一粒石仔就擊敗咗對手。（撒母耳記上17:45，49，50）
4． 點解所羅門需要鼓起勇氣？
4 由大衛嚟鼓勵所羅門鼓起勇氣建造聖殿，真係非常合適！（請讀歷代志上28:20）如果所羅門勇氣不足，擔心失敗而冇採取行動，噉佢就完成唔到呢個委派。
5． 點解我哋需要有勇氣？
5 好似所羅門噉，我哋都需要耶和華所賜嘅勇氣，完成佢交俾我哋嘅任務。我哋可以回顧古代一啲勇敢嘅榜樣。我哋都應該諗吓，可以點樣放膽做好自己嘅工作。
勇敢嘅榜樣
6． 約瑟點樣表現勇氣？
6 我哋嚟睇吓，面對波提乏妻子嘅引誘，約瑟所表現嘅勇氣。佢肯定知道，如果拒絶波提乏嘅妻子，一定會有嚴重嘅後果。即使係噉，佢都冇妥協，反而勇敢採取行動。（創世記39:10，12）
7． 喇合點樣表現勇氣？（請睇吓課文開頭嘅圖片）
7 耶利哥城嘅喇合係另一個勇敢嘅榜樣。當以色列人嘅探子去到佢屋企嗰陣，佢冇因為恐懼而趕佢哋走。因為對耶和華有信心，喇合幫助兩個探子匿埋，仲幫佢哋安全脱險。（約書亞記2:4，5，9，12-16）喇合承認耶和華係真神，同時又確信耶和華會使以色列人得到應許之地。佢冇因為懼怕人，包括耶利哥王同埋王嘅手下，而冇採取行動。相反，佢毅然出手相助，最終拯救咗自己同家人。（約書亞記6:22，23）
8． 耶穌嘅勇氣點樣影響使徒？
8 耶穌嘅忠心使徒同樣表現勇氣，立下咗好好嘅榜樣。佢哋親眼睇到耶穌表現勇氣。（馬太福音8:28-32；約翰福音2:13-17；18:3-5）耶穌嘅榜樣幫助佢哋變得更加勇敢。所以，喺遭受撒都該派反對嗰時，使徒冇停止奉耶穌嘅名傳道。（使徒行傳5:17，18，27-29）
9． 提摩太後書1:7幫助我哋明白，邊個俾到我哋勇氣？
9 約瑟、喇合、耶穌同使徒都表現出一種内在嘅力量，推動佢哋決心做啱嘅事。佢哋嘅勇敢唔係過度自信，而係基於對耶和華嘅信賴。我哋都會面對一啲需要表現勇氣嘅情況。我哋唔會依靠自己，而係全心信賴耶和華。（請讀提摩太後書1:7）等我哋嚟睇吓，點解我哋喺屋企同會衆都需要表現勇氣。
需要勇氣嘅情況
10． 點解年輕嘅基督徒需要勇氣？
10 喺好多情況下，年輕嘅基督徒事奉耶和華都需要表現勇氣。佢哋可以學習同效法所羅門嘅榜樣。為咗完成聖殿嘅建築工程，所羅門表現勇氣，喺各種問題上作出明智嘅決定。雖然年輕嘅基督徒可以向父母尋求指引，亦都應該噉樣做，但係喺重要嘅問題上，佢哋要自己做決定。（箴言27:11）例如同乜嘢人交往，點樣選擇娛樂，點樣保持道德潔淨，同埋幾時受浸等問題，年輕人都要勇敢作出明智嘅決定。呢種勇氣可以幫助佢哋對抗譏刺上帝嘅撒但。
11，12． （甲）摩西點樣喺表現勇氣方面立下榜樣？（乙）年輕人可以點樣效法摩西？
11 年輕人必須做嘅一個重要決定就係，要立下點樣嘅人生目標。喺某啲地方，年輕人受到壓力要追求高等教育同高收入嘅工作。喺另一啲地方，當地嘅經濟情況會令年輕人過度專注於為家人提供物質方面嘅幫助。如果你有類似嘅情況，請諗吓摩西嘅榜樣。身為法老女兒嘅養子，摩西有條件去追求高官厚祿。佢嘅埃及家人、導師同謀士一定好想佢出人頭地。可想而知，佢受到嘅壓力一啲都唔少！不過摩西冇妥協，反而鼓起勇氣支持正確嘅崇拜。佢放棄咗埃及嘅財富，全心信賴耶和華。（希伯來書11:24-26）摩西做咗明智嘅決定，所以耶和華大大賜福俾佢。喺未來，佢肯定會得到更多嘅福分。
12 同樣，耶和華一定會祝福嗰啲將王國放喺生活首位，有勇氣追求屬靈目標嘅年輕人。耶和華會供應佢哋家人嘅需要。喺公元1世紀，年輕嘅提摩太可以專注於屬靈嘅目標，今日你都一定做得到。 *（請讀腓立比書2:19-22）
你有冇決心喺生活嘅所有方面表現勇氣？（請睇第13-17段）
13． 勇氣點樣幫助一個年輕姊妹達到目標？
13 美國亞拉巴馬州嘅一個姊妹需要培養勇氣先可以達到佢嘅屬靈目標。佢話:“我由細到大都好怕醜。連喺王國聚會所同人傾計都唔敢，更加唔使講要敲門向人傳道。”喺父母同弟兄姊妹嘅幫助之下，呢個年輕姊妹達到咗佢嘅目標，成為一個正規先驅。佢話:“撒但嘅世界推崇高等教育、名譽、金錢同埋物質財富，想人將追求呢啲嘢作為人生嘅目標。呢啲追求通常好難達到，往往仲帶俾人好大嘅壓力，令人痛苦失望。相反，事奉耶和華使我得到最大嘅喜樂同成就感。”
14． 基督徒父母喺邊啲情況下需要勇氣？
14 基督徒父母亦都需要勇氣。例如，你通常會喺晚上或者週末做家庭崇拜、傳道同聚會，但係你嘅老闆可能經常要求你加班。拒絶呢啲要求係需要勇氣嘅，但係噉樣做，你就可以為仔女樹立優良嘅榜樣。又或者，喺你會衆有啲父母允許佢哋嘅仔女做某啲你唔想自己仔女做嘅事。呢啲父母可能會問，你嘅仔女點解唔參加呢啲活動。你會唔會鼓起勇氣，有技巧噉同佢哋解釋呢？
15． 詩篇37:25同希伯來書13:5可以點樣幫助父母？
15 如果你想幫助仔女立下而且達到屬靈目標，就需要有勇氣。例如，有啲父母可能冇積極鼓勵仔女投身先驅工作，去需求更大嘅地區服務，加入伯特利工作，或者參與志願建築工程。呢啲父母可能擔心，老咗之後仔女冇能力照顧佢哋。不過，明智嘅父母會表現勇氣，全心信賴耶和華嘅應許。（請讀詩篇37:25；希伯來書13:5）你亦都可以幫助仔女同樣噉做。（撒母耳記上1:27，28；提摩太後書3:14，15）
16． 有啲父母點樣幫助佢哋嘅仔女立下屬靈目標？噉樣做帶嚟乜嘢益處？
16 美國嘅一對夫婦點樣幫助仔女立下屬靈目標呢？丈夫話:“喺我哋嘅仔女識行識講之前，我哋就已經同佢哋分享做先驅同為會衆服務嘅喜樂嘞。而家呢啲已經成為佢哋嘅目標。仔女立下而且實現屬靈目標，可以幫助佢哋自己應付嚟自撒但制度嘅壓力，全心事奉耶和華。”一個有兩個細路嘅弟兄話:“好多父母喺運動、教育同興趣活動等方面為仔女花費大量嘅精力同金錢。更明智嘅做法係，將精力同金錢用嚟幫助仔女同上帝培養親密嘅關係。我哋唔單止睇到仔女達到屬靈目標，仲有份參與其中，真係好有滿足感。”我哋可以肯定，耶和華上帝一定會祝福嗰啲幫助仔女立下而且達到屬靈目標嘅基督徒父母。
喺會衆表現勇氣
17． 喺表現勇氣方面，會衆裏面邊啲人係我哋嘅榜樣？
17 喺會衆裏面都需要表現勇氣。例如，長老要有勇氣，先至可以處理嚴重嘅過犯，幫助面對緊急醫療事件嘅弟兄姊妹，同埋去監獄探訪嗰啲對聖經有興趣嘅囚犯。獨身嘅姊妹又可以做啲乜嘢？佢哋而家有好多擴大服務嘅機會，例如，投身先驅工作，搬去需求更大嘅地區，參與本地設計及建築安排，參加王國傳福音者訓練班，有啲仲受到邀請去基列學校。
18． 年長嘅姊妹可以點樣表現勇氣？
18 年長嘅姊妹對會衆嚟講係好寶貴嘅。我哋好愛呢啲姊妹！雖然佢哋而家為耶和華所做嘅冇以前咁多，但係依然能够表現勇氣，繼續為耶和華服務。（請讀提多書2:3-5）如果長老請一位年長姊妹同一位年輕姊妹傾吓關於衣着得體嘅問題，呢位年長嘅姊妹就需要勇氣。佢唔會批評年輕姊妹嘅衣着打扮，而係鼓勵對方諗吓自己嘅選擇會唔會影響其他人。（提摩太前書2:9，10）呢種仁慈嘅做法能够為會衆帶嚟積極嘅影響。
19． （甲）受咗浸嘅弟兄可以點樣表現勇氣？（乙）腓立比書2:13同4:13點樣幫助弟兄培養勇氣？
19 受咗浸嘅弟兄亦都應該勇敢為耶和華服務。願意勇敢負起更多責任嘅弟兄，係會衆嘅福分。（提摩太前書3:1）不過，有啲弟兄唔係好想追求更多職責。如果一個弟兄以前犯過錯，佢可能會覺得自己冇資格成為助理僕人或者長老。又或者有啲弟兄覺得自己冇能力完成某個委派。如果你有一樣嘅感覺，耶和華能够幫助你培養勇氣。（請讀腓立比書2:13；4:13）要記住，摩西都曾經覺得自己唔能够勝任耶和華俾佢嘅委派。（出埃及記3:11）但係，由於耶和華嘅幫助，摩西培養出勇氣，成功完成佢嘅工作。如果弟兄經常向上帝懇切禱告，每日研讀聖經，就可以得到上帝嘅幫助，培養出同樣嘅勇氣。佢都可以通過沉思聖經入面嘅勇敢榜樣而得益。佢可以謙卑噉向長老提出，自己希望得到訓練，亦都願意接受會衆嘅任何工作。我哋鼓勵所有弟兄，鼓起勇氣，努力為會衆服務！
“耶和華……與你同在”
20，21． （甲）大衛向所羅門保證乜嘢？（乙）我哋可以確信乜嘢？
20 大衛王提醒所羅門，建造聖殿嘅成個過程，耶和華都會與佢同在。（歷代志上28:20）所羅門緊記父親所講嘅話，冇因為自己年輕又冇經驗而畏縮。佢表現出好大嘅勇氣，放膽去做，喺耶和華嘅幫助下，用咗七年半嘅時間成功建造好呢座宏偉嘅聖殿。
21 喺我哋嘅家庭生活同會衆事務上，耶和華會幫助我哋勇敢完成我哋嘅工作，就好似佢為所羅門做嘅一樣。（以賽亞書41:10，13）如果我哋喺崇拜耶和華方面表現勇氣，就可以確信，無論而家定係將來，耶和華都會祝福我哋。所以，“你要勇敢……即管放膽去做”。
^ 12段 如果你想立下屬靈目標，可以喺《守望台》2004年7月15日刊“確立屬靈目標以榮耀創造主”呢篇文章揾到一啲實用嘅建議。
