培養自制
“聖靈嘅果實有……自制。”——加拉太書5:22，23
唱詩83，52首
1，2． （甲）缺乏自制會有乜嘢後果？（乙）對今日嘅人嚟講，點解討論自制好恰當？
自制係一種上帝喜悦嘅特質。（加拉太書5:22，23）耶和華可以完美噉運用佢嘅自制力，而唔完美嘅人要保持自制就需要經歷一番掙扎。今日人類面對好多難題，歸根到底係由於缺乏自制。無論喺學業抑或工作方面，缺乏自制都可能會造成做事拖拉、冇效率，仲可能會導致出口傷人、醉酒、使用暴力、離婚、欠落不必要嘅債、沾染惡習、入獄、感情受創、患上性病、意外懷孕等等。（詩篇34:11-14）
2 好明顯，人缺乏自制就會為自己同其他人帶嚟好多麻煩。今日，缺乏自制嘅問題變得越來越嚴重。喺20世紀40年代就已經有人對自律進行研究，但係近年嘅研究顯示，人喺保持自律方面做得越來越差。學習聖經嘅人唔會對呢個趨勢感到意外，因為聖經早就預告，我哋身處喺“最後嘅日子”嘅一個證據就係，人會變得“漫無自制”。（提摩太後書3:1-3）
3． 點解基督徒應該培養自制？
3 點解你應該培養自制？我哋嚟睇吓兩個重要嘅原因。第一，好多人都留意到，能够表現自制嘅人通常可以避免嚴重嘅難題。佢哋更容易保持情緒穩定同建立良好嘅人際關係，而且唔會好似做事衝動嘅人噉，輕易發嬲或者容易憂慮抑鬱。第二，控制錯誤慾望同抵抗誘惑，係得蒙上帝悦納嘅基本條件。亞當夏娃嘅例子就證實咗呢一點。（創世記3:6）佢哋嘅好多後代亦都因為冇表現呢種重要嘅特質，而落得可悲嘅下場。
4． 乜嘢可以鼓勵嗰啲努力表現自制嘅人？
4 唔完美嘅人唔能够十全十美噉表現自制。耶和華清楚知道佢嘅僕人要保持自制一啲都唔容易，佢亦都好想幫助佢哋抵抗犯罪嘅傾向。（列王紀上8:46-50）有啲人好想事奉上帝，但喺生活上某啲方面唔容易表現自制。作為仁愛嘅朋友，耶和華親切噉鼓勵同扶持呢啲人。等我哋嚟考慮吓耶和華嘅完美榜樣。然後睇吓，我哋從聖經入面關於自制嘅一啲例子可以學到乜嘢。我哋都會温習一啲可以幫助我哋强化自制力嘅實用建議。
耶和華樹立榜樣
5，6． 耶和華喺自制方面樹立咗乜嘢榜樣？
5 耶和華做乜嘢都係十全十美嘅，佢可以完美噉表現自制呢種特質。（申命記32:4）雖然我哋唔完美，但只要我哋沉思耶和華點樣表現自制，就會更明白自制係一種點樣嘅特質，亦都會更好噉效法佢嘅榜樣。耶和華有邊啲表現自制嘅例子特别值得我哋留意？
6 我哋可以諗吓，面對撒但狂妄無恥嘅背叛，耶和華點樣表現自制。呢個挑戰係不容忽視嘅。面對魔鬼嘅挑戰，忠於上帝嘅靈體無疑會感到震驚、大發義憤，同埋憎恨撒但。你一諗到撒但所引起嘅苦難，可能都會有同樣嘅感受。但係，耶和華並冇衝動行事。佢考慮周全，處理得恰到好處。佢冇輕易發嬲，而係公正處理撒但嘅反叛。（出埃及記34:6；約伯記2:2-6）點解耶和華願意花時間嚟解決問題呢？原因係佢唔希望任何人遭受毁滅，“只願人人最終都悔改”。（彼得後書3:9）
7． 我哋從耶和華樹立嘅榜樣學到乜嘢？
7 從耶和華表現嘅自制，我哋學到講話同做事都要小心謹慎，唔應該行事魯莽。面對重大問題嘅時候，為咗作出明智嘅抉擇，要俾自己足够嘅時間考慮清楚。禱告求耶和華幫助我哋喺講話做事方面有智慧。（詩篇141:3）如果我哋發嬲，就好容易有過激嘅行為。好多人都曾經對自己輕率魯莽嘅言行深感後悔。（箴言14:29；15:28；19:2）
上帝子民嘅榜樣同鑑戒
8． （甲）我哋可以喺邊度揾到嗰啲表現自制嘅榜樣？（乙）波提乏嘅妻子引誘約瑟嗰陣，乜嘢推使約瑟即刻避開引誘？（請睇吓課文開頭嘅圖片）
8 從乜嘢聖經例子可以睇出表現自制係有價值嘅？你肯定記得幾個喺考驗下仲係保持自制嘅聖經人物。其中一個係雅各嘅仔約瑟。佢係法老嘅侍衛長波提乏嘅管家，其間佢一直保持自制。波提乏嘅妻子睇中約瑟“身材挺秀，容貌俊美”，就試圖勾引佢。乜嘢使約瑟面對多次引誘依然冇屈服呢？佢肯定用咗唔少時間沉思，如果自己放鬆警惕會有乜嘢後果。情況危急嘅時候，佢即刻逃離現場，避開引誘。佢話:“我點可以做出咁大嘅惡事，得罪上帝呢？”（創世記39:6，9；請讀箴言1:10）
9． 你可以點樣裝備自己抵抗引誘？
9 我哋從約瑟嘅榜樣學到乜嘢？其中一點係，要遠離任何會令我哋違反上帝律法嘅引誘。有啲弟兄姊妹未成為見證人之前曾經有過食煙、吸毒、暴飲暴食、性濫交等行為。就算受咗浸，佢哋喺呢啲方面有時仲係會受到引誘。所以，當你受到引誘想違反上帝嘅律法嗰陣，你可以沉思一下，如果自己缺乏自制，順住錯誤嘅慾望行事，會有乜嘢可悲嘅後果。你都可以事先諗吓，喺乜嘢情況下容易受到誘惑，而你可以點樣避開。（詩篇26:4，5；箴言22:3）如果你真係面對噉樣嘅考驗，就要祈求耶和華賜智慧同自制力使你抵抗得住。
10，11． （甲）好多年輕人喺學校面對乜嘢考驗？（乙）乜嘢可以幫助年輕嘅基督徒抵抗壓力，拒絶做唔正當嘅事？
10 好多年輕基督徒所面對嘅考驗同約瑟嘅類似。請睇吓金美嘅例子。佢大多數同學經常同人發生性關係，週末過後佢哋都會誇耀自己嘅經驗。金美冇參與呢啲話題。金美承認，同其他人嘅標準唔一樣，有時會令佢覺得“孤獨同埋受人冷落”。啲同學仲因為佢唔拍拖就笑佢傻。其實，金美冇噉做先至係有智慧。因為佢清楚知道，性行為對好多年輕人嚟講係一個好大嘅誘惑。（提摩太後書2:22）佢嘅同學經常問佢仲係咪處女。呢個使佢有機會向同學解釋，點解佢唔會同人隨便發生性關係。好多年輕嘅基督徒都決心抵抗壓力，保持道德潔淨。我哋都會同耶和華一樣，為佢哋感到自豪！
11 聖經提到有啲人因為缺乏自制而犯下淫亂，成為我哋嘅鑑戒。聖經亦都話俾我哋知，佢哋冇保持自制會有乜嘢可悲嘅後果。任何面對同金美類似情況嘅人，都應該沉思吓箴言第7章嗰個無知少年嘅事例。亦都請諗吓，暗嫩所做嘅事帶嚟乜嘢悲慘後果。（撒母耳記下13:1，2，10-15，28-32）喺家庭崇拜嘅時候，父母可以同仔女討論呢啲聖經記載，幫助佢哋明白喺男女關係方面要培養自制同明智行事。
12． （甲）約瑟喺佢嘅兄弟面前點樣控制自己嘅情緒？（乙）喺乜嘢情況下，我哋需要控制自己嘅情感？
12 喺另一個場合，約瑟喺自制方面再次樹立咗好榜樣。當約瑟嘅兄弟嚟埃及向佢買糧食嘅時候，佢為咗了解佢哋内心真正嘅諗法，就冇透露自己嘅身份。喺情緒特别激動嗰陣，約瑟就匿埋一邊，偷偷噉喊。（創世記43:30，31；45:1）如果一個基督徒同工或者家人對你唔好，你都可以效法約瑟表現自制，避免衝動行事。（箴言16:32；17:27）如果你嘅家人被開除，你要控制自己嘅情感，避免同佢哋有不必要嘅來往。雖然噉樣做好唔容易，但如果我哋意識到噉樣就係服從耶和華嘅吩咐同埋效法佢嘅榜樣，就可以幫助我哋保持自制。
13． 我哋從大衛王嘅例子學到乜嘢？
13 大衛王嘅例子好值得我哋留意。雖然大衛有好大嘅勢力，但係當掃羅同示每激嬲佢嘅時候，佢可以控制到自己嘅怒氣。（撒母耳記上26:9-11；撒母耳記下16:5-10）噉唔係話，大衛一直都可以保持自制。佢曾經同拔示巴通姦，亦都一時衝動想報復貪心嘅拿八。（撒母耳記上25:10-13；撒母耳記下11:2-4）我哋可以從大衛身上學到寶貴嘅一課。首先，喺上帝子民當中做監督嘅特别要表現自制，避免濫用職權。其次，任何人都唔應該過度自信，覺得自己可以抵抗得到誘惑。（哥林多前書10:12）
採取實際行動
14． 路易吉有乜嘢經歷？點解我哋喺噉嘅情況下保持自制好重要？
14 你可以做啲乜嘢嚟培養自制呢？請睇吓一個真實嘅例子。一個司機開車撞到路易吉部車。呢個司機唔單止冇認錯，仲出言侮辱路易吉，想撩交打。路易吉馬上禱告，求耶和華幫助佢保持冷靜，亦都嘗試令對方平靜落嚟，不過對方冇改變態度。於是，路易吉將對方嘅保險資料抄低之後就離開，但對方仲係不停噉鬧佢。一個星期之後，路易吉續訪一個女子，發現佢丈夫就係嗰個鬧佢嘅司機！呢個男子覺得好尷尬，為自己嘅無禮向路易吉道歉。跟住，佢又主動聯繫保險公司，幫路易吉盡快得到賠償。呢個男子仲加入太太嘅聖經討論，佢好欣賞所討論嘅内容。諗翻轉頭，路易吉睇出意外發生之後保持冷靜有幾咁重要，如果當時佢同對方嘈起嚟，結果就會完全唔同。（請讀哥林多後書6:3，4）
保持冷靜抑或衝動行事可以直接或間接噉影響到我哋嘅傳道工作（請睇第14段）
15，16． 研讀聖經可以點樣幫助你同家人培養自制？
15 認真、勤奮研讀聖經可以幫助基督徒培養自制。耶和華吩咐約書亞話:“呢部律法書唔應該離開你嘅口，你要日夜低聲細讀，使你謹慎遵行書上所寫嘅一切話。噉樣，你嘅道路就一定亨通，你一定能够明智行事。”（約書亞記1:8）研讀聖經可以點樣幫助你培養自制呢？
16 呢篇課文列出嘅聖經例子清楚表明，我哋採取嘅行動會帶嚟乜嘢益處或後果。耶和華叫人寫低呢啲事係有目的嘅。（羅馬書15:4）我哋閲讀、沉思、查考呢啲聖經例子就係明智嘅做法！我哋需要諗吓自己同家人可以點樣實踐從中所學到嘅嘢，亦都要懇求耶和華幫助你實踐佢嘅話語。如果你留意到自己喺某啲方面缺乏自制，就要承認自己嘅弱點，向耶和華禱告，喺呢啲方面努力改善。（雅各書1:5）你仲可以喺聖經書刊入面揾到相關嘅資料嚟幫助自己。
17． 喺邊啲方面，父母可以幫助仔女培養自制？
17 你可以點樣幫助仔女培養自制？好多父母都明白，年輕人唔係自然就會有自制呢種特質嘅。同幫助仔女培養其他特質一樣，父母需要以身作則。（以弗所書6:4）如果你見到仔女喺某方面好難保持自制，首先要問吓自己喺呢方面有冇立下榜樣。千祈唔好低估你經常傳道、參加聚會、舉行家庭崇拜所帶嚟嘅積極影響。如果仔女嘅要求唔合理，父母就應該拒絶。耶和華為亞當同夏娃定落一啲限制，教導佢哋對佢嘅權柄要有適當嘅尊重。同樣，父母嘅管教同榜樣係為咗教導仔女學識自制。樂意服從耶和華，並且尊重佢所定嘅標準，係父母最應該幫助仔女培養嘅態度。（請讀箴言1:5，7，8）
18． 點解你可以相信良好嘅交往會為你帶嚟福分？
18 無論你係咪為人父母，喺交往方面你都應該明智噉作出選擇。要揾嗰啲鼓勵你追求有價值嘅目標，提醒你避開危險嘅人做朋友。（箴言13:20）同有屬靈思想嘅人交往會對你産生積極嘅影響，亦都會推動你效法佢哋，喺生活上表現自制。同樣，你嘅好品格肯定都會鼓勵到你嘅朋友。我哋努力培養並表現自制，就可以得到上帝嘅悦納，每日同所愛嘅親友享有快樂嘅時光。
