“佢加力量俾疲倦嘅人”
2018年全年經文:“仰望耶和華嘅人必重新得力。”——以賽亞書40:31
1. 我哋要面對乜嘢壓力?耶和華一定會因為乜嘢而高興?(請睇吓課文開頭嘅圖片)
你一定會同意,喺呢個事物制度下,人嘅生活充滿難題。好多弟兄姊妹患有嚴重嘅疾病。另外,有啲弟兄姊妹雖然上咗年紀,不過佢哋仲要照顧年老嘅親人。而有啲就要辛苦工作,唔係想追求奢侈嘅生活,而只係為咗提供家人嘅基本需要。我哋知道大多數人唔只係面對一個難題,而係同時要面對好幾個!呢啲唔單止使佢哋要應付經濟上嘅壓力,仲要消耗好多時間同精力。雖然係噉,你對上帝嘅應許確信不疑,堅信會有一個美好嘅將來。睇到你表現嘅信心,耶和華一定會非常高興!
2. 我哋從以賽亞書40:29得到乜嘢鼓勵?但係,我哋可能會有乜嘢錯誤嘅諗法?
2 有時,你會唔會覺得生活壓力大到令你唞唔到氣?如果有嘅話,你唔係唯一一個。聖經提到,古代嘅忠僕經常覺得自己冇辦法再堅持落去。(列王紀上19:4;約伯記7:7)不過,佢哋並冇放棄,而係繼續祈求耶和華賜佢哋力 量。耶和華冇令佢哋失望,“佢加力量俾疲倦嘅人”。(以賽亞書40:29)可惜嘅係,今日上帝嘅一啲子民認為應付生活壓力嘅最好方法就係“暫停事奉耶和華,唞吓先”。佢哋覺得基督徒嘅活動係一種負擔而唔係福分。所以,佢哋唔再研讀上帝嘅話語、參加聚會同傳道,就好似撒但所希望嘅一樣。
3. (甲)我哋點樣做就可以挫敗撒但嘅陰謀?(乙)呢篇課文會討論乜嘢?
3 魔鬼唔想我哋全心投入基督徒嘅活動,因為佢知道如果我哋噉做,信心就會得到强化。當你身心疲倦、情緒低落嘅時候,千祈唔好遠離耶和華。要盡力親近佢,因為佢會“使你哋堅定剛强”。(彼得前書5:10;雅各書4:8)呢篇課文會討論,有乜嘢情況會使我哋喺事奉耶和華方面緩慢落嚟,同埋我哋可以點樣運用聖經原則去應付呢啲情況。首先嚟睇吓以賽亞書40:26-31嘅經文,留意耶和華點樣强化我哋。
仰望耶和華嘅人會重新得力
4. 我哋從以賽亞書40:26學到乜嘢?
4 請讀以賽亞書40:26。從來冇人可以數到整個宇宙到底有幾多星星。科學家相信單係銀河系就可能有大約4000億粒恆星。不過,耶和華為每一粒星都起咗名。我哋從中可以學到乜嘢?對於冇生命嘅創造物,耶和華都咁重視,更何況係你呢!你唔係好似機械人噉按住程式去做,而係真心愛佢,好想為佢服務!(詩篇19:1,3,14)仁愛嘅父親完全了解你,“就連[你]嘅頭髮都全部數過”。(馬太福音10:30)詩篇執筆者亦都向我哋保證:“耶和華知道無過嘅人所經歷嘅事”。(詩篇37:18)冇錯,耶和華知道你面對嘅所有考驗,佢會賜你力量幫助你喺每個考驗下都能够保持忍耐。
5. 點解我哋可以確信耶和華一定能够賜我哋力量?
5 請讀以賽亞書40:28。耶和華係一切力量嘅來源。請考慮吓佢供應咗幾多能量俾太陽。科學家戴維·博丹尼斯話:“太陽每秒釋放出嘅能量相當於[幾十億個原子]彈一齊爆發嘅威力。”另一個研究人員計算出太陽“一秒内産生嘅能量足以供應人類20萬年嘅需要”!既然耶和華能够供應能量俾太陽,噉我哋需唔需要懷疑佢俾唔到我哋足够嘅力量去應付任何難題?
6. 點解話耶穌嘅軛係容易負嘅?呢個同我哋有乜嘢關係?
6 請讀以賽亞書40:29。事奉耶和華為我哋帶嚟好大嘅喜樂。耶穌對佢嘅門徒講:“你哋要負起我嘅軛”。佢繼續話:“你哋嘅生命就會得享安舒。我嘅軛係容易負嘅,我嘅擔子係輕省嘅。”(馬太福音11:28-30)有時參加聚會或者出傳道之前,我哋可能會覺得筋疲力盡。但係,結束之後我哋有乜嘢感覺呢?我哋充滿力量,準備好應付生活嘅挑戰。耶穌嘅軛的確係容易負嘅!
7. 請舉例説明馬太福音11:28-30所講嘅有幾真實。
7 一個叫凱拉嘅姊妹患有慢性疲勞綜合症、抑鬱症同偏頭痛。佢有時覺得連參加聚會都好困難。但係有一次,佢作出努力去參加週末嘅聚會,之後佢話:“嗰次公衆演講嘅内容同灰心有關。演講嘅内容同表達方式深深打動咗我,令我感動到流眼淚。呢個提醒我,參加聚會非常重要。”作出努力參加聚會為凱拉帶嚟非常大嘅喜樂!
8,9. “我幾時軟弱,幾時就大有力量。”保羅呢句話係乜嘢意思?
8 請讀以賽亞書40:30。無論我哋幾咁有才幹,只係靠自己嘅能力所成就到嘅事始終好有限。呢個係我哋每個人都必須承認嘅。雖然使徒保羅好有才幹,但係佢都冇能力做到佢想做嘅一切。當保羅同上帝講佢對自己好失望嘅時候,耶和華對佢講:“我嘅力量喺人軟弱嘅時候就顯得完美。”保羅明白到呢點之後話:“我幾時軟弱,幾時就大有力量。”(哥林多後書12:7-10)佢講嘅話係乜嘢意思?
9 保羅意識到,冇耶和華嘅幫助,佢做到嘅就好有限。喺佢軟弱嘅時候,上帝嘅聖靈可以使佢有充足嘅力量。唔單止係噉,聖靈仲可以使保羅成就到一啲佢自己做唔到嘅事。同樣,有耶和華嘅幫助,我哋都會大有力量!
10. 耶和華點樣幫助大衛應付挑戰?
10 詩篇執筆者大衛多次體驗到聖靈點樣作用喺佢身上。佢唱道:“靠你嘅幫助,我能够衝擊敵軍;靠上帝嘅力量,我能够攀登城牆。”(詩篇18:29)有啲難題就好似一幅牆噉阻礙我哋,而我哋淨係靠自己嘅能力係冇辦法跨越嘅。我哋需要耶和華加强我哋嘅力量。
11. 聖靈點樣幫助我哋應付難題?
11 請讀以賽亞書40:31。一隻鷹唔係單靠自己嘅力量就能够展翅高飛。佢要借助熱氣流先可以飛得更高、更慳力。所以,我哋面對艱巨任務嗰時,要向鷹學習。祈求耶和華通過聖靈呢個“幫助者”賜力量俾我哋。(約翰福音14:26)我哋好慶幸,可以24小時隨時隨地向耶和華求助。當我哋同弟兄姊妹發生摩擦,就特别需要上帝嘅幫助。但係弟兄姊妹之間點解會發生矛盾?
12,13. (甲)點解基督徒之間會産生矛盾?(乙)有關耶和華,我哋從約瑟嘅事例學到乜嘢?
12 由於我哋都唔完美,所以彼此之間會産生矛盾。有時弟兄姊妹嘅言行可能會冒犯到我哋,或者我哋嘅言行有時激嬲咗佢哋。呢個可以成為我哋一個嚴峻嘅考驗。雖然我哋嘅同工都唔完美,但係耶和華依然好愛佢哋。盡力同弟兄姊妹保持團結,並肩工作,就表明我哋忠於耶和華。
耶和華冇離棄約瑟,佢亦都唔會離棄你(請睇第13段)
13 約瑟嘅例子表明耶和華有時會容許佢嘅忠僕遭受考驗。約瑟年輕嘅時候,俾同父異母嘅哥哥賣咗去埃及做奴隸。(創世記37:28)耶和華睇到 所發生嘅一切,佢因為自己正義嘅僕人約瑟受到唔公平嘅對待而感到心痛。不過,佢並冇干預事情嘅發展。後來,約瑟俾波提乏嘅妻子誣告强姦而被韞咗入監,耶和華依然冇插手干預。但係耶和華有冇捨棄約瑟呢?冇,相反:“耶和華使佢所做嘅事,盡都亨通。”(創世記39:21-23)
14. 我哋“放下憤怒”,就可以得到乜嘢益處?
14 請考慮另一個例子。好少人會好似大衛一樣受到咁多惡待。不過,大衛冇容許怨恨嘅情緒喺心裏面滋長,佢話:“你要放下 憤怒,離棄烈怒;唔好氣憤,噉樣只會作惡。”(詩篇37:8)“放下憤怒”最重要嘅原因係因為我哋想效法耶和華,“佢冇按照我哋嘅罪處置我哋”。(詩篇103:10)但係“放下憤怒”亦都為我哋帶嚟其他益處。怒氣會引發健康問題,例如高血壓、呼吸困難。怒氣亦都可以影響肝臟、胰臟,甚至引起消化系統嘅問題。一個人發嬲嘅時候,頭腦一般都唔清晰,所以佢所講所做嘅容易傷害其他人。呢個可能會使佢感到内疚、自責,甚至長期抑鬱。相反,聖經話“心裏平靜為身體帶嚟生命”。(箴言14:30)如果弟兄姊妹傷害咗我哋,噉我哋應該點樣同佢哋和好?我哋實踐聖經明智嘅勸告,就可以贏得弟兄。
當弟兄姊妹令我哋失望
15,16. 有人得罪我哋嘅時候,我哋可以點做?
15 請讀以弗所書4:26。世界嘅人對我哋冷酷無情,我哋唔會覺得意外。但係弟兄姊妹或者家人嘅言行傷害咗我哋,我哋就會特别難過。我哋可能對呢件事耿耿於懷,冇辦法忘記。我哋會唔會俾怨恨嘅情緒喺心裏長期滋長?抑或我哋會聽從聖經嘅勸告,盡快解決問題?件事拖得越耐,我哋就越難同弟兄姊妹和好。
16 假如一個弟兄得罪咗你,而你又放唔低呢件事,噉你可以點樣同對方和好?首先,要向耶和華懇切禱告。祈求佢幫助你同弟兄可以好好傾吓。要緊記,佢都係耶和華嘅朋友。(詩篇25:14)耶和華好愛自己嘅朋友,仁慈噉對待佢哋,佢都希望我哋噉樣對待弟兄姊妹。(箴言15:23;馬太福音7:12;歌羅西書4:6)之後,諗吓可以同弟兄講乜嘢。唔好斷定弟兄係專登傷害你嘅。或者呢個只係一個誤會,又或者你誤解咗當時嘅情況。分析吓自己喺呢件事上有冇做得唔啱嘅地方。你可以同對方講:“可能我太過敏感,不過尋日你同我講嘅時候,我覺得……”如果談話嘅結果唔係你所期望嘅,你可以揾另一個機會再同對方傾。繼續為你嘅弟兄禱告,祈求耶和華賜福俾佢。同時,亦都祈求耶和華幫助你留意弟兄嘅美好特質。無論結果點樣,耶和華都一定好開心睇到你為咗贏得你嘅弟兄而作嘅努力。
當内心受到以往嘅罪折磨
17. 我哋犯咗嚴重嘅罪之後,耶和華用乜嘢方法幫助我哋恢復同佢嘅關係?點解我哋應該好好運用呢個安排?
17 有啲人覺得自己唔配事奉耶和華,因為佢哋之前犯咗嚴重嘅罪。罪咎感會奪去我哋嘅喜樂、和平,使我哋失去力量。大衛王俾罪咎感折磨,佢噉樣講:“我緘默不言嘅時候,終日哀號,骨頭朽爛。你嘅手晝夜重重壓住我。”大衛用耶和華喜悦嘅方式去處理問題,“我終於向你承認我嘅罪……你就赦免我嘅罪過。”(詩篇32:3-5)如果你犯咗嚴重嘅罪,耶和華樂意幫助你 恢復同佢嘅關係。但係你需要接受佢通過會衆提供嘅幫助。(箴言24:16;雅各書5:13-15)千祈唔好拖延,因為呢個關乎到你能唔能够得享永生!如果你犯嘅罪喺好耐之前就已經得到寬恕,但係你嘅良心依然受到責備,噉你可以點做呢?
18. 保羅嘅例子點樣幫助嗰啲感到自責嘅人?
18 使徒保羅曾經都因為以往嘅過犯而灰心沮喪。佢承認:“我喺使徒當中係最細嘅,根本唔配稱為使徒,因為我曾經迫害過上帝嘅會衆。”但係,保羅亦都話:“憑住上帝嘅分外恩典,我先成為今日嘅我。”(哥林多前書15:9,10)耶和華並冇追究保羅以前所做嘅事,佢亦都希望保羅寬恕自己,唔好過度自責。如果你真心悔改,承認自己嘅過犯,你就可以肯定耶和華會向你表現慈悲。要接受耶和華嘅寬恕,相信佢真係已經原諒咗你!(以賽亞書55:6,7)
19. 2018年嘅全年經文係乜嘢?點解呢個咁適當?
19 呢個事物制度越接近終結,生活壓力就會越大。但係,我哋可以肯定,“[上帝]加力量俾疲倦嘅人,賜充足嘅能力俾軟弱嘅人”,佢可以賜你所需嘅力量,幫助你忠心事奉佢。(以賽亞書40:29;詩篇55:22;68:19)喺2018年,每當我哋去聚會所參加聚會,都會睇到呢一年嘅全年經文。呢節經文提醒我哋一個重要嘅真理,就係:“仰望耶和華嘅人必重新得力。”(以賽亞書40:31)