分辨事奉上帝同唔事奉上帝嘅人
“你哋必定再次睇出義人同惡人……之間有乜嘢分别。”——瑪拉基書3:18
1，2． 今日上帝嘅子民面對乜嘢挑戰？（請睇吓課文開頭嘅圖片）
好多醫護人員都會接觸到一啲患有傳染疾病嘅人。佢哋悉心照顧病人，因為佢哋真係好想幫助病人康復。不過，佢哋都需要保護自己，避免受到傳染。同樣，一啲同我哋一齊住或者一齊工作嘅人唔事奉耶和華，佢哋所表現嘅一啲態度同特質跟上帝嘅特質完全相反。對我哋嚟講，唔受呢啲態度影響可能唔係一件容易嘅事。
2 喺最後嘅日子，唔愛耶和華嘅人會無視佢嘅道德標準。使徒保羅喺寫俾提摩太嘅第二封信入面，提到嗰啲離棄上帝嘅人會有嘅思想態度，而且呢啲思想態度喺日後會更加顯而易見。（請讀提摩太後書3:1-5，13）雖然我哋可能會對大多數人表現出噉樣嘅態度而感到震驚，但係周圍嘅人所表現嘅行為態度都可能會影響我哋。（箴言13:20）呢篇課文會討論喺最後嘅日子，唔事奉上帝嘅人嘅態度同特質跟上帝子民嘅特質有乜嘢分别。另外，喺教導人認識耶和華嘅時候，我哋可以點樣保護自己免受呢啲有害嘅態度影響。
3． 提摩太後書3:2-5描述嘅係邊啲人？
3 使徒保羅話:“到咗最後嘅日子，必定有難以應付嘅非常時期。”之後，佢列出咗呢段時期嘅人所表現嘅19種有害態度同特質。雖然呢個同保羅喺羅馬書1:29-31所列出嘅好類似，但係佢喺提摩太後書所用嘅字詞，冇喺希臘語經卷其他經文出現過。不過，唔係每個人 都會有呢啲不良嘅態度同特質。基督徒就有好唔同嘅特質。（請讀瑪拉基書3:18）
對自己嘅睇法
4． 你會點樣描述嗰啲驕傲自大嘅人？
4 保羅提到好多人會專愛自己、貪愛錢財之後，跟住就話人會自負、高傲 同驕傲自大。有呢啲思想態度嘅人往往會覺得自己嘅能力、樣貌、財富或者地位都比其他人優越。呢啲人好想得到其他人嘅羨慕同敬重。一個學者講及到驕傲嘅人話:“喺佢心入面，佢認為自己就係神。”有啲人甚至話極度驕傲嘅態度令人非常反感，因為連驕傲嘅人都唔鍾意見到其他人驕傲。
5． 一啲忠僕點樣受到驕傲嘅態度所影響？
5 耶和華將驕傲嘅態度視為可憎嘅事，佢憎恨“高傲嘅眼”。（箴言6:16，17）驕傲妨礙人親近上帝。（詩篇10:4）事實上，驕傲係魔鬼嘅一個顯著特徵。（提摩太前書3:6）可惜嘅係，耶和華嘅一啲忠僕亦都受到影響而變得驕傲。猶大王烏西雅多年嚟一直表現忠貞。聖經話:“不過，佢一强盛，就心高氣傲，自招敗亡。佢對耶和華佢嘅上帝不忠，竟然闖入耶和華嘅殿，要喺香壇上燒香。”另外，希西家王有一段時間亦都變得高傲。（歷代志下26:16；32:25，26）
6． 大衛可以因為乜嘢而變得驕傲？但係點解佢能够保持謙卑？
6 有啲人因為自己生得靚、受人歡迎、有音樂天分、身體强壯有力或者受人抬舉而變得驕傲。大衛有齊晒以上所講嘅，但係佢一生都保持謙卑。殺死歌利亞之後，大衛有榮幸可以做掃羅王嘅女婿。不過，大衛話:“我係邊個？我嘅親屬同父家喺以色列算乜嘢？我點配做王嘅女婿呢？”（撒母耳記上18:18）乜嘢幫助大衛保持謙卑？大衛所擁有嘅特質、能力同殊榮，都係因為耶和華“紆尊降貴”，留意佢，向佢表現謙卑。（詩篇113:5-8）大衛知道呢一切都唔係出自佢自己，而係嚟自耶和華。（參考哥林多前書4:7）
7． 乜嘢可以幫助我哋表現謙卑？
7 好似大衛一樣，今日耶和華嘅子民都盡力表現謙卑。我哋都因為耶和華嘅知識，佢喺宇宙崇高嘅地位，同佢所表現嘅謙卑，而心生敬畏。（詩篇18:35）所以我哋都好想“穿上憐恤之情、仁慈、謙卑、温和、耐心”。（歌羅西書3:12）我哋亦都知道愛“唔吹嘘，唔自大”。（哥林多前書13:4）其他人見到我哋表現謙卑，可能都好想認識耶和華。就好似妻子通過自己嘅品行，唔使用一言一語都可以感化丈夫，我哋嘅謙卑都可以吸引人親近耶和華。（彼得前書3:1）
同其他人嘅關係
8． （甲）今日有啲人對忤逆父母有乜嘢睇法？（乙）聖經勸勉兒女要點樣做？
8 保羅描述，喺最後嘅日子人會點樣互相對待。佢寫道，喺最後嘅日子兒女會忤逆父母。今日有唔少書刊、電影同電視節目都提倡呢種反叛精神，所以有啲人覺得唔服從父母都冇問題。不過，呢種精神會破壞家庭。人好早就已經明白呢個道理。例如，喺古希臘，如果一個人打父母，佢就會失去公民權利；喺羅馬法律嘅條文裏面，打父親嘅罪名就好似謀殺咁嚴重。希伯來語同希臘語嘅經文都勸勉兒女要孝敬父母。（出埃及記20:12；以弗所書6:1-3）
9． 乜嘢可以幫助年輕人服從父母？
9 兒女經常諗吓父母為自己所付出嘅，就可以避免受到反叛精神影響。另外，如果我哋明白點解天父要求我哋表現服從，就能够培養感激嘅態度。年輕人積極噉談及自己嘅父母，就可以幫助同輩以積極嘅觀點睇佢哋自己嘅父母。當然，如果父母對兒女冇表現親情，兒女就好難真心服從佢哋。相反，如果年輕人感受到父母真摯嘅愛，佢哋喺引誘下依然會受到推動服從父母。一個叫奧斯丁嘅弟兄承認:“我經常都想逃避責任，所以父母會俾我一啲合理嘅指引，亦都會同我解釋點解要制定某啲規矩，仲會以開明嘅態度同我保持良好嘅溝通。呢個幫助我甘心服從佢哋。我睇出佢哋真係好關心我，而我亦都好想令佢哋開心。”
10，11． （甲）乜嘢思想態度表明人與人之間缺乏愛心？（乙）真基督徒表現嘅愛可以到乜嘢程度？
10 保羅列出嘅另一啲思想態度，表明人與人之間缺乏愛心。經文提到“忤逆父母”之後就係忘恩負義，呢個係好貼切嘅，因為忘恩負義嘅人唔會感激其他人為佢哋所做嘅。另外，人會唔忠貞。好多人亦都唔願意達成協議，意思係佢哋唔想同人和睦相處。人仲會褻瀆上帝、出賣其他人，講出一啲詆毁上帝或中傷人嘅話。而有啲人就毁謗人，通過散播謠言嚟破壞其他人嘅名聲。 *
11 今日，同大多數缺乏愛心嘅人相反，事奉耶和華嘅人努力對人表現真摯嘅愛。耶穌話愛鄰人呢種阿格配嘅愛，係摩西律法嘅第二大誡命，僅次於愛上帝。（馬太福音22:38，39）耶穌亦都話，人憑住彼此相愛呢種特質，就可以分辨出邊個係真基督徒。（請讀約翰福音13:34，35）真基督徒甚至會愛佢哋嘅仇敵。（馬太福音5:43，44）
12． 耶穌點樣向人表現愛心？
12 耶穌表明佢對人有真正嘅愛。佢逐城逐村向人傳講上帝王國嘅好消息。佢醫治盲眼、耳聾、跛腳嘅人同痲瘋病人，亦都復活死人。（路加福音7:22）雖然好多人都憎恨耶穌，不過佢仲係願意獻出自己嘅生命拯救全人類。耶穌完美噉反映出佢父親對人所懷嘅愛。世界各地嘅耶和華見證人都效法耶穌，對其他人表現同樣嘅愛。
13． 我哋對人表現愛心點樣吸引佢哋親近耶和華？
13 我哋表現愛心都可以吸引人親近天父。例如，泰國一個男子參加區域大會，見到弟兄姊妹彼此相愛就深受感動。返到屋企之後，佢請見證人同佢一個星期討論兩次聖經。佢向所有親戚作見證，大會之後僅僅六個月，佢就喺會衆擔任第一次經文朗讀。我哋可以分析自己喺彼此相愛方面做得點樣:“我係咪盡己所能幫助家人、弟兄姊妹同地區嘅人？我係咪盡力用耶和華嘅觀點睇其他人？”
豺狼與綿羊
14，15． 好多人點樣表現出好似野獸一樣嘅性情？但係，有啲人點樣改變佢哋嘅品格？
14 喺最後嘅日子，有啲人仲會表現其他有害嘅思想態度，所以基督徒就更應該同佢哋保持距離。例如，無視上帝嘅人唔愛良善。一啲譯本將“唔愛良善”翻譯為“憎恨良善嘅人”或者“與良善敵對”。佢哋會漫無自制 同兇悍。有啲人會剛愎自用，或者行事衝動魯莽。
15 好多人以往表現野獸一樣嘅性情，不過後來都改變咗佢哋嘅品格。聖經曾經以美妙嘅比喻預言過呢種改變。（請睇以賽亞書11:6，7）喺呢段經文，我哋睇到豺狼、獅子噉樣嘅猛獸，會同羊仔、牛仔呢啲家畜一齊和睦共處。請留意，呢種安寧、温馨嘅景象將會持續落去，“因為認識耶和華嘅知識必定遍滿大地”。（以賽亞書11:9）既然動物唔能够學習耶和華嘅知識，噉睇嚟預言所指嘅就係人會改變品格。
實踐聖經原則可以改變人嘅一生！（請睇第16段）
16． 聖經點樣幫助人改變佢哋嘅品格？
16 有啲人以往好似豺狼一樣咁兇殘，不過而家就可以同其他人和睦相處。你可以喺jw.org網站嘅“聖經真理改變人的一生”系列文章裏面，讀到好多噉樣嘅經歷。聖經預告一啲人有敬虔嘅形式，但係冇體現敬虔嘅力量，佢哋講一套做一套。相反，可能有啲認識同事奉耶和華嘅人曾經兇殘成性，但係而家佢哋“着上新品格。呢個新品格係按照上帝嘅旨意創造嘅，體現真實嘅正義同忠貞”。（以弗所書4:23，24）人越認識上帝，就越睇出自己需要按上帝嘅標準生活。跟住，佢哋會喺信仰、態度同行為上作出調整。要作出噉樣嘅改變的確唔容易，不過喺聖靈嘅幫助下，真心想遵行上帝旨意嘅人係能够做到嘅。
“你要避開噉樣嘅人”
17． 我哋可以點樣避免受到唔事奉上帝嘅人所影響？
17 今日，事奉上帝同唔事奉上帝嘅人之間嘅區别越來越明顯。我哋要小心，千祈唔好俾唔事奉上帝嘅人影響。我哋要聽從勸告，避開 提摩太後書3:2-5談及嘅思想態度。當然，我哋冇可能完全避開有呢啲思想態度嘅人。可能我哋要同佢哋一齊工作、一齊返學甚至一齊住，但係我哋可以避免同佢哋有一樣嘅思想態度同行為。我哋可以點樣做？經常研讀聖經、同決心事奉耶和華嘅人來往，鞏固自己同耶和華嘅關係。
18． 我哋嘅言行點樣幫助人認識耶和華？
18 我哋應該努力幫助人認識上帝。留意有乜嘢機會可以向人作見證，然後祈求耶和華幫助我哋喺適當嘅時候講適當嘅話。我哋應該俾其他人知道，我哋係耶和華見證人。噉樣，我哋嘅好品行就可以榮耀耶和華，而唔係榮耀自己。耶和華教導我哋“摒棄唔敬虔嘅心同世俗嘅慾望，喺現行嘅制度懷住健全嘅思想、正義、敬虔而活”。（提多書2:11-14）如果我哋以上帝嘅方式做事，其他人就會留意到，甚至有啲人會話:“我哋要同你哋一齊去，因為我哋聽講上帝與你哋同在。”（撒迦利亞書8:23）
^ 10段 “毁謗者”或“指控者”嘅希臘語詞係“迪阿博洛斯”。聖經將撒但稱為毁謗者，因為佢毁謗上帝。
