1，2． 喺​2018​年，邊個​場合​最​能够​體現​全球​弟兄​姊妹​嘅​團結​精神？請​解釋。（請​睇​吓​課文​開頭​嘅​圖片）

2018​年​3​月​31​日，上帝​嘅​子民​同​好多​感​興趣​人士​會​喺​日落​之後​聚集​埋​一齊，參加​一​年​一​度​主​嘅​晚餐。世界​各​地​千百萬​人​會​一齊​紀念​耶穌​基督​嘅​死亡。每​年​嘅​紀念​聚會，係​最​能够​體現​全球​弟兄​姊妹​團結​精神​嘅​場合！

² 喺​受難紀念​嗰​一​日，耶和華​同​耶穌​一定​好​開心​見到​地球​上​每​一刻​都​有​人​參加​呢個​特别​聚會。聖經​預言“有​一​大群人，多​到​冇​人​可以​數​得​晒，係​從​所有​國族、部族、民族、語言​嚟​嘅”。佢哋​會​呼喊​話:“我哋​得救，全​靠​坐​喺​寶座​上​我哋​嘅​上帝，同埋​綿羊羔。”（啟示錄​7:9，10）每​年​嘅​受難紀念​聚會​都​可以​使​耶和華​同​耶穌​得到​莫大​嘅​尊榮。

3． 呢​篇​課文​會​回答​乜嘢​問題？

³ 呢​篇​課文​會​回答​以​下​嘅​問題:（1）我哋​每​個​人​可以​點樣​為​參加​受難紀念​聚會​做​好​準備​並​從中​得益？（2）受難 紀念​聚會​點樣​影響​上帝​子民​嘅​團結？（3）我哋​可以​點樣​促進​基督徒​嘅​團結？（4）將來​係咪​會​有​最後​一​次​嘅​受難紀念​聚會？如果​有，係​幾時？

4． 點解​盡力​參加​受難紀念​聚會​咁​重要？

⁴ 點解​盡力​參加​受難紀念​聚會​咁​重要？一​個​原因​係，參加​會衆​聚會​係​我哋​崇拜​耶和華​嘅​一​部分，而​受難紀念​係​一​年​之​中​最​重要​嘅​聚會。耶和華​同​耶穌​一定​會​留意​每​個​人​為​參加​呢個​聚會所​付出​嘅​努力。除非​身體​或者​情況​真係​唔​允許，我哋​都​會​盡力​參加​受難紀念​聚會。如果​我哋​通過​行動​表明​自己​重視​聚會​嘅​安排，耶和華​就​有​更​多​理由​將​我哋​嘅​名“記錄​喺​佢​面前​嘅​册​上”，即​係“生命册”。呢​本“生命​册”記錄​住所​有​將​會​得​永生​嘅​人​嘅​名字。（瑪拉基書​3:16；啟示錄​20:15）

5． 喺​受難紀念​聚會​之前，我哋​可以​點樣“察驗​自己​係咪​持守​住​信仰”？

⁵ 喺​受難紀念​聚會​之前，我哋​要​撥​出​時間​禱告、仔細​察驗​自己​同​耶和華​之​間​嘅​關係。（請​讀​哥林多後書​13:5）噉​我哋​具體​可以​點樣​做​呢？要“察驗​自己​係咪​持守​住​信仰”。我哋​可以​問​吓​自己:“我​係咪​真係​相信，自己​屬於​唯一​一​個​受​耶和華​任用​嚟​成就​佢​旨意​嘅​組織？我​係咪​竭盡​全力​傳講​同​教導​人​王國​嘅​好消息？我​嘅​行動​有​冇​表明​我​真係​相信​而家​就係​最後​嘅​日子，同埋​撒但​嘅​統治​好​快​就​會​結束？而家​我​對​耶和華​同​耶穌​嘅​信心​係咪​同​獻身​受浸​嗰時​一樣？”（馬太福音​24:14；提摩太後書​3:1；希伯來書​3:14）沉思​呢啲​問題​嘅​答案，可以​幫助​我哋​不斷​驗​明​自己​到底​係​點樣​嘅​人。

6． （甲）通​往​永生​嘅​唯一​道路​係​乜嘢？（乙）一​位​長老​點樣​為​紀念​聚會​做​好​準備？你​可以​點樣​做​類似​嘅​準備？

⁶ 為​受難紀念​聚會​做​好​準備​嘅​一​個​方法​係，研讀​同​沉思​解釋​呢個​聚會​點解​咁​重要​嘅​文章。（請​讀​約翰福音​3:16；17:3）通​往​永生​嘅​唯一​道路​就係“認識”耶和華​同“信從”佢​嘅​獨生子​耶穌。我哋​可以​選擇​一啲​能够​幫助​自己​親近​耶和華​同​耶穌​嘅​資料​嚟​做​個​人​研讀。我哋​嚟​睇​吓​一​位​長老​點樣​做。多​年​來，佢​一直​收集​一啲​耶和華​同​耶穌​點樣​向​我哋​表現​愛心，以及​同​受難紀念​有關​嘅《守望台》文章。喺​紀念​聚會​之前​嘅​幾​個​星期，佢​會​重​讀​收集​到​嘅​文章​同​沉思​呢個​聚會​嘅​重要性。佢​時​不時​會​收集​多​一​兩​篇​新​文章。呢位​長老​發覺，重​讀​呢啲​文章、研讀​同​沉思​有關​耶穌​受​難​嘅​經文，每​年​都​會​有​新​嘅​體會。最​重要​嘅​係，佢​覺得​自己​對​耶和華​同​耶穌​嘅​愛​每​年​都​不斷​增加。噉樣​嘅​個​人​研讀​可以​幫助​你​加深​對​耶和華​同​耶穌​嘅​愛​同​感激，亦​都​可以​幫助​你​從​受難紀念​聚會​充分​得益。

7． （甲）喺​第​一​個​主​嘅​晚餐，耶穌​向​天父​祈求​乜嘢？（乙）乜嘢​表明​耶和華​回應​咗​耶穌​嘅​禱告？

⁷ 喺​第​一​個​主​嘅​晚​餐，耶穌​向​天 父​禱告，祈求​佢​幫助​門徒​團結​一致，就​好似​佢​同​父親​團結​一樣。（請​讀​約翰福音​17:20，21）耶和華​的確​回應​咗​愛子​嘅​禱告。受難紀念​聚會​比​其他​聚會​更​有力​證明，耶和華見證人​係​團結​一致​嘅。唔同​國族、唔同​膚色​嘅​人，喺​世界​各​地​嘅​聚會​場所​都​聚集​一齊​參加​呢個​聚會。喺​一啲​地區，唔同​種族​嘅​人​一齊​參加​宗教​集會​係​好​罕見​嘅，甚至​因此​會​俾​人​嘲笑。不過​喺​耶和華​同​耶穌​眼​中，呢​種​團結​係​非常​寶貴​嘅！

8． 關於​團結，耶和華​俾​咗​以西結​一​個​乜嘢​信息？

⁸ 睇到​上帝​嘅​子民​享有​團結，我哋​唔​會​感到​意外，因為​耶和華​早就​預告​咗​呢​件​事。佢​吩咐​以西結​先知​喺​一​條​木棍​上面​寫​住“猶大”，另​一​條​就​寫​住“約瑟”，之後​將​兩​條​木棍​合​埋​一齊。（請​讀​以西結書​37:15-17）《守望台》2016​年​7​月刊​嘅“讀者來函”解釋:“耶和華​俾​咗​以西結​一​個​充滿​希望​嘅​信息，佢​應許​以色列人​會​返​到​應許​之​地，再次​團結​起嚟​成為​一​個​國家。呢個​信息​亦​都​預告，喺​最後​嘅​日子，上帝​嘅​子民​會​團結​一致​噉​事奉​佢。”

9． 每​年​嘅​耶穌​受難紀念​聚會​點樣​表明​以西結​嘅​預言​獲得​應驗？

⁹ 從​1919​年​以來，耶和華​逐步​將​受膏基督徒​再次​組織​起嚟，使​佢哋​團結​合一。受膏基督徒​就係​象徵“猶大”嘅​木棍。而​有​希望​喺​地上​享​永生​嘅​人​就係​象徵“約瑟”嘅​木棍，佢哋​嘅​人數​不斷​增加，同​受膏基督徒​一齊​並肩​工作。呢​兩​群​人​合成“一​群”。（約翰福音​10:16；撒迦利亞書​8:23）耶和華​承諾​佢​會​將​呢​兩​條​木棍​合​埋​一齊，成為​一​條。（以西結書​37:19）而家​呢​兩​群​人​都​受​已經​得到​榮耀​嘅​耶穌​基督​統治，團結​噉​事奉​耶和華。耶穌​就係​以西結​預言​裏面​所​提​到​嘅“［上帝］嘅​僕人​大衛”。（以西結書​37:24，25）剩餘​嘅​受膏基督徒​同“另外​嘅​綿羊”，都​會​聚集​埋​一齊​參加​一​年​一​度​嘅​耶穌​受難紀念​聚會，呢個​清楚​表明​以西結書​所​描述​嘅​寶貴​團結​係​真實​嘅！我哋​每​個​人​可以​點樣​保持​同​促進​團結​呢？

10． 我哋​可以​點樣​喺​上帝​嘅​子民​當中​促進​團結？

¹⁰ 我哋​促進​上帝​子民​團結​嘅​一​個​方式​係，培養​謙卑​嘅​態度。耶穌​喺​地上​嘅​時候，勸勉​門徒​要​保持​謙卑。（馬太福音​23:12）如果​我哋​内心​謙卑，就​唔​會​表現​自高​自大​嘅​世俗​精神。謙卑​嘅​態度​可以​幫助​我哋​順從​帶頭​嘅​人，而​服從​嘅​精神​喺​促進​會衆​團結​方面​係​必​不可​少​嘅。更​重要​嘅​係，我哋​表現​謙卑​可以​令​上帝​嘅​心​歡喜，因為​佢“同​高傲​嘅​人​為​敵，但係​就​賜​分​外​恩典​俾​謙卑​嘅​人。”（彼得前書​5:5）

11． 沉思​受難紀念​象徵​物​嘅​含意​點樣​幫助​我哋​促進​團結？

¹¹ 我哋​促進​上帝​子民​團結​嘅​第​二​個​方式​係，沉思​受難紀念​象徵​物​嘅​含 意。喺​受難紀念​聚會​之前，特别​係​聚會​當​晚，要​認真​諗​吓​無酵餅​同​紅酒​嘅​含意。（哥林多前書​11:23-25）無酵餅​象徵​耶穌​為​人類​犧牲​嘅​完美​身體，而​紅酒​就​象徵​佢​留​出​嘅​寶血。不過​我哋​只係​知道​呢啲​象徵​物​代表​乜嘢​係​唔够​嘅。仲​要​記住，基督​獻​出​嘅​贖價​包含​兩​種​最​偉大​嘅​愛:一​種​係​耶和華​為​我哋​犧牲​愛子​嘅​愛，另​一​種​係​耶穌​甘願​為​我哋​犧牲​自己​生命​嘅​愛。沉思​佢哋​嘅​愛​無​疑​推​使​我哋​想​以​愛​還​愛。我哋​同​弟兄​姊妹​對​耶和華​嘅​愛，就​好似​一​條​繩​噉​將​我哋​緊​緊​連繫​埋​一齊，鞏固​我哋​之​間​嘅​團結。

12． 喺​國王​赦免​奴隸​債務​嘅​比喻​裏面，耶穌​點樣​清楚​表明​耶和華​期望​我哋​寬恕​其他​人？

¹² 我哋​促進​團結​嘅​第​三​個​方式​係，甘心​寬恕​人。我哋​寬恕​得罪​自己​嘅​人，就​表明​我哋​感激​基督​獻​出​嘅​贖價，使​我哋​嘅​罪​得​蒙​寬恕。請​睇​吓​記載​喺​馬太福音​18:23-34​耶穌​所​講​嘅​比喻，問​吓​自己:“我​有​冇​受​到​推動​實踐​耶穌​所​教​嘅？我​有​冇​對​同工​表現​忍耐​同​體恤​佢哋​嘅​感受？我​係咪​樂意​寬恕​嗰啲​得罪​我​嘅​人？”當然，人​犯​嘅​罪​有​輕​有​重。我哋​唔​完美​嘅​人​有時​好​難​寬恕​某​啲​過犯，但係​呢個​比喻​使​我哋​知道​耶和華​希望​我哋​點樣​做。（請​讀​馬太福音​18:35）耶穌​講​得​好​清楚，如果​我哋​有​理由​寬恕​弟兄​不過​又​冇​噉​做，耶和華​就​唔​會​寬恕​我哋。真係​發人深省！我哋​跟從​耶穌​嘅​教導​寬恕​其他​人，就​可以​保護​同​維繫​基督徒​寶貴​嘅​團結。

13． 我哋​點樣​表明​自己​促進​團結？

¹³ 我哋​寬恕​其他​人，就​表明​自 己​促進​和睦。使徒​保羅​曾經​提​出​勸告​話，我哋​要“用​和平​維繫​團結，竭力​持守​聖靈​所​賜​嘅​合一”。（以弗所書​4:3）喺​今年​受難紀念​嘅​月份，特别​係​聚會​嗰​晚，要​認真​諗​吓​自己​平時​點樣​對待​其他​人。問​吓​自己:“我​有​冇​表明​自己​盡力​避免​心​懷​怨恨？其他​人​係咪​覺得​我​盡力​追求​和睦​同​團結？”特别​喺​呢個​時候，我哋​需要​沉思​呢啲​重要​問題。

14． 我哋​點樣​表明​自己“用​愛心​彼此​包容”？

¹⁴ 促進​團結​嘅​第​四​個​方式​係，效法​耶和華​表現​愛心。（約翰一書​4:8）“我​或者​要​愛​佢，但係​唔​需要​鍾意​佢！”我哋​唔​應該​對​任何​弟兄​姊妹​有​噉樣​嘅​諗法。如果​我哋​噉​諗，就係​同​保羅​嘅​勸告​背道而馳，佢​話​我哋​應該“用​愛心​彼此​包容”。（以弗所書​4:2）請​留意，保羅​唔​係​只係​話“彼此​包容”，而係​話​我哋​要“用​愛心”彼此​包容。呢個​有​咩​分别？喺​會衆​裏面，我哋​可以​睇到​各種各樣​嘅​人，因為​耶和華​吸引​佢哋​親近​佢。（約翰福音​6:44）既然​耶和華​吸引​佢哋，噉​佢哋​一定​值得​耶和華​去​愛。所以​我哋​點​可以​認為​某​個​弟兄​姊妹​唔​值得​我哋​去​愛​呢？耶和華​吩咐​我哋​要​表現​愛心，噉​我哋​就​唔​應該​有​所​保留！（約翰一書​4:20，21）

15． 我哋​點​知​會​有​最後​一​次​受難紀念​聚會？

¹⁵ 終​有​一​日，我哋​會​舉行​最後​一​次​受難紀念​聚會。我哋​點​知​呢？保羅​受​聖靈​啟示，喺​寫​俾​哥林多​會衆​受膏基督徒​嘅​第​一​封​信​裏面，講​到​佢哋​每​年​紀念​耶穌​嘅​死亡​就係“顯揚​主​嘅​死，直到​佢​嚟”。（哥林多前書​11:26）呢度​講​嘅“嚟”同​耶穌​喺​談及​終結​時期​嘅​預言​裏面​所​講​嘅“嚟”係​指​同​一​件​事。關於​臨近​嘅​大患難，耶穌​話:“到時​人子​顯​現​嘅​憑證​會​喺​天上​出現，於是​地上​所有​民族​都​悲慟​捶​胸，並且​睇見​人子​ 喺​天​雲​上​帶​住​力量​同​大​榮耀​而 嚟。［耶穌］必定​差​佢​嘅​天使​用​號筒​嘅​大聲​將​蒙​揀選​嘅​人，從​四方，從​天​呢​邊​到​天​嗰邊，都​聚集​起嚟。”（馬太福音​24:29-31）蒙​揀選​嘅​人​聚集​起嚟，就係​所有​地上​剩餘​嘅​受膏基督徒​到​天上​得到​獎賞​嘅​時候。呢​件​事​會​喺​大患難​開始​之後，哈米吉多頓​大戰​爆發​之前​發生。之後​14萬4000​人​會​同​耶穌​一齊​戰勝​地上​嘅​君王。（啟示錄​17:12-14）喺​耶穌“嚟”聚集​剩餘​嘅​受膏基督徒​之前，所​舉行​嘅​受難紀念​聚會​就係​最後​一​次。

16． 點解​你​下​定​決心​出席​今年​嘅​受難紀念​聚會？

¹⁶ 願​我哋​下​定​決心​參加​2018​年​3​月​31​日​嘅​受難紀念​聚會，並​從中​得益。我哋​可以​祈求​耶和華​幫助​我哋​繼續​喺​佢​嘅​子民​當中​促進​團結！（請​讀​詩篇​133:1）終​有​一​日，我哋​會​參加​最後​一​次​受難紀念​聚會。願​我哋​盡力​出席​並且​珍惜​喺​受難紀念​聚會所​享有​嘅​團結。