邊種愛帶嚟真正嘅快樂?
“有耶和華作為上帝,噉樣嘅人先算有福!”——詩篇144:15
1. 點解話我哋而家生活喺一段特别嘅時期?
而家我哋生活喺人類歷史中一段特别嘅時期。就好似聖經所預言,耶和華正召集緊“一大群人……係從所有國族、部族、民族、語言嚟嘅”。呢啲人嘅數目超過800萬,佢哋成為一個“强盛”嘅國族,“晝夜喺[上帝]嘅聖殿裏面敬奉佢”。(啟示錄7:9,15;以賽亞書60:22)從來都未試過有咁多人愛上帝同愛弟兄姊妹。
2. 一啲唔愛上帝嘅人表現出點樣嘅愛?(請睇吓課文開頭嘅圖片)
2 不過聖經預言到,今日一啲唔愛上帝嘅人會表現出一種被扭曲嘅愛,呢種愛反映出自私嘅態度。使徒保羅寫道:“到咗最後嘅日子……人必專愛自己,貪愛錢財……愛享樂唔愛上帝”。(提摩太後書3:1-4)呢種以自我為中心嘅愛同基督徒所表現嘅愛完全相反。人以為追求自私嘅目標就能得到真正嘅快樂,但係噉樣嘅愛反而令呢個世界充滿“難以應付”嘅情況。
3. 呢篇課文會分析乜嘢?點解?
提摩太後書3:5)不過,我哋唔能够完全避免同呢啲人接觸。噉我哋可以點樣保護自己免受呢種世俗態度所影響,從而取悦我哋充滿愛心嘅耶和華上帝呢?我哋比較一下上帝嘅愛同提摩太後書3:2-4所描述嘅愛有乜嘢分别,就可以幫助我哋衡量,自己有冇表現出真正使人滿足同快樂嘅愛。
3 保羅知道呢種自私嘅愛會傳染人,會危害基督徒嘅屬靈健康。所以,佢警告基督徒要“避開”嗰啲表現錯誤嘅愛嘅人。(愛上帝抑或愛自己?
4. 點解適當噉愛自己係冇錯嘅?
4 保羅話:“人必專愛自己”。噉係咪話愛自己係錯嘅呢?唔係。愛自己係正常亦都需要嘅,因為耶和華將我哋設計成噉樣。耶穌話:“要愛人如己”。(馬可福音12:31)如果我哋唔愛自己,就唔會愛其他人。另一節經文話:“丈夫應該愛妻子,就好似愛自己嘅身體 噉。愛妻子就係愛自己 嘞。從來冇人恨惡自己嘅身體,只會餵養愛護”。(以弗所書5:28,29)所以,適當噉愛自己係冇錯嘅。
5. 你會點樣形容嗰啲專愛自己嘅人?
5 提摩太後書3:2提到專愛自己。呢種愛唔係一種正常、健康嘅愛,而係一種自私、被扭曲嘅愛。一個專愛自己嘅人會自視過高。(請讀羅馬書12:3)佢哋最關心嘅就係自己,而好少去關心其他人。出現問題嘅時候,佢哋往往會推卸責任。一個聖經評注講到嗰啲專愛自己嘅人就好似一隻“刺蝟……佢會卷成一個球噉,用自己柔軟嘅毛嚟取暖……但係佢嘅尖刺就會對住人。”呢啲以自我為中心嘅人唔會得到真正嘅快樂。
6. 我哋愛上帝會得到乜嘢好結果?
6 有啲聖經學者認為,保羅之所以先提出專愛自己,係因為呢種態度會引致之後佢所提到嘅其他態度。不過,愛上帝嘅人會結出好唔同嘅果實。聖經將愛上帝同“喜樂、和平、耐心、仁慈、良善、信心、温和、自制”呢啲特質聯繫埋一齊。(加拉太書5:22,23)詩篇執筆者話,“有耶和華作為上帝,噉樣嘅人先算有福!”(詩篇144:15)耶和華係快樂嘅上帝,佢嘅子民都反映出呢種特質。另外,專愛自己嘅人只係會諗自己可以得到乜嘢,而耶和華嘅僕人就好樂意為其他人付出,所以佢哋好快樂。(使徒行傳20:35)
7. 有乜嘢問題可以幫助我哋分析自己對上帝嘅愛?
7 一個人點樣知道佢係咪愛自己過於愛上帝?請考慮吓腓立比書2:3,4嘅勸告:“凡事都唔好好辯爭勝,唔好自命不凡,要謙卑,睇其他人比自己優越。各人唔好只係顧住自己嘅事,亦要顧及其他人嘅事。”我哋可以問吓自己:“我有冇喺生活上聽從呢個 勸告?我係咪盡力遵行上帝嘅旨意?我有冇主動幫助弟兄姊妹同其他人?”為其他人付出有時唔容易,因為付出係需要不斷努力同自我犧牲。但係噉做能够得到宇宙至高統治者嘅認可,有乜嘢可以比呢個更能够使我哋快樂呢?
8. 對上帝嘅愛推動一啲人點樣做?
8 由於愛上帝,一啲基督徒甘願放棄高薪嘅職業,想為耶和華作更多服務。住喺美國嘅埃麗卡係一個醫生,佢冇喺醫學方面追求更大嘅成就,而係選擇做正規先驅,佢同丈夫曾經去過幾個國家服務。諗翻轉頭,佢話:“我哋喺外語地區幫手,有好多美好嘅經歷,亦都結識咗好多朋友。我哋嘅生活變得多姿多彩。我依然係一個醫生,但係而家我將大部分嘅時間同精力用嚟教導人認識耶和華同幫助弟兄姊妹,呢個使我嘅内心得到真正嘅喜樂同滿足。”
天上嘅財寶定係地上嘅財寶?
9. 點解貪愛錢財嘅人唔會真正快樂?
9 保羅話人會“貪愛錢財”。若干年前,愛爾蘭一位先驅同一個男子談及上帝。呢個男子拎出佢嘅銀包,攞住啲錢,舉高,跟住話:“呢個就係我嘅上帝!”雖然好多人都唔承認自己愛金錢同嗰啲用錢買得到嘅嘢,但係佢哋對錢財嘅睇法同呢個男子一樣。聖經警告話:“貪愛銀子嘅人,有咗銀子亦唔會滿足;貪愛錢財嘅人,收入再多都唔會知足。”(傳道書5:10)呢啲人總係想要更多錢,佢哋不斷追求財富,結果將自己刺得“遍體鱗傷”。(提摩太前書6:9,10)
10. 關於富有同貧窮,聖經提到乜嘢?
10 當然,我哋人人都需要錢。因為錢可以喺某程度上保護人。(傳道書7:12)但係一個人只係滿足到生活嘅基本需要,佢會唔會真正快樂呢?絶對會!(請讀傳道書5:12)雅基嘅兒子亞古珥話:“求你使我既唔貧窮亦唔富有,等我可以開懷食分俾我嘅食物”。我哋好明白點解佢話唔想貧窮。佢繼續解釋話,佢擔心由於貧窮就受引誘去偷竊,結果羞辱耶和華嘅名。但係點解佢唔祈求上帝使佢富有呢?佢話:“免得我飽足之後就唔認你,話:‘耶和華係邊個?’”(箴言30:8,9)你可能會諗到有啲人信賴自己嘅財富過於信賴上帝。
11. 關於金錢,耶穌提出乜嘢勸告?
11 一個愛金錢嘅人唔能够取悦耶和華。耶穌話:“一個人唔能够做兩個主人嘅奴隸。佢唔係討厭呢個,鍾意嗰個,就係忠於呢個,輕視嗰個。你哋唔能够又做上帝嘅奴隸,又做財富嘅奴隸。”佢講呢句之前亦都話:“你哋唔好再為自己喺地上積存財寶,地上有蛾蛀,有銹蝕,亦都有賊挖洞嚟偷。你哋要為自己喺天上積存財寶,天上冇蛾蛀,冇銹蝕,亦都冇賊挖洞嚟偷。”(馬太福音6:19,20,24)
12. 過簡樸嘅生活點樣使我哋更好噉為耶和華服務?請舉例。
12 好多人都發現,過簡樸嘅生活使佢哋更加開心,亦都使佢哋有更多時間為耶和華服務。住喺美國嘅杰克賣咗間大屋同佢盤生意,因為佢知道自己噉樣做先能够同太太一齊做先驅。佢話:“我覺得真係好難去放棄一間咁靚嘅屋同喺郊區嘅物業,不過以往咁多年來,我返到屋企一諗到工作上嘅難題就覺得好煩。而我太太係一位正規先驅,佢就成日都好開心。佢同我講,‘我嘅老闆係最好嘅!’而家我都係一位先驅,我哋兩個一齊為同一個老闆工作,佢就係耶和華。”
13. 我哋點樣知道自己對金錢嘅真正睇法?
13 如果想知道自己對金錢嘅真正睇法,就需要誠實噉問吓自己:“聖經提到關於金錢方面嘅原則,我係咪真係相信而且應用出嚟?揾錢係咪我一生中最重要嘅事?我重視物質多啲,定係重視同耶和華、同其他人嘅關係多啲?我係咪真係相信耶和華會照顧我?”我哋可以肯定上帝唔會令信賴佢嘅人失望。(馬太福音6:33)
愛耶和華抑或愛享樂?
14. 對享樂有平衡嘅觀點係乜嘢意思?
14 聖經預言,今日好多人會“愛享樂”。我哋會以平衡、合理嘅觀點睇自己同金錢。同樣,我哋亦都需要以平衡嘅觀點睇享樂。耶和華唔係想我哋做一個苦行者,或者避開一啲使人快樂又有益嘅活動。聖經鼓勵上帝嘅忠僕話:“你即管歡歡樂樂噉食嘢,開開心心噉飲酒,因為上帝已經悦納你所做嘅事。”(傳道書9:7)
15. “愛享樂”係乜嘢意思?
15 提摩太後書3:4提到追求享樂嘅人會棄絶上帝。請留意,經文唔係 話人愛享樂多過 愛上帝,因為呢種講法表明人多少都仲係愛上帝嘅。經文話佢哋“唔愛 上帝”。一位學者解釋:“經文絶對唔係話佢哋仍然對上帝有某種程度嘅愛,而係話佢哋完全唔愛上帝。”對於嗰啲愛享樂嘅人嚟講,呢個係好嚴厲嘅警告!聖經形容“愛享樂”嘅人就好似俾“享樂擄去”一樣。(路加福音8:14)
16,17. 喺享樂方面,耶穌立下咗乜嘢榜樣?
16 耶穌喺享樂方面有平衡嘅觀點。佢參加過一個“婚宴”同一個“盛宴”。(約翰福音2:1-10;路加福音5:29)喺婚宴現場,由於冇足够嘅酒供應,耶穌就施行奇迹將水變成酒。喺另一個場合,有啲自以為義嘅人批評耶穌貪食好酒,不過耶穌清楚表明呢啲人並冇平衡嘅觀點。(路加福音7:33-36)
17 不過,耶穌並冇將享樂視為佢一生中最重要嘅事。佢將耶和華放喺首位,亦都毫無保留噉為其他人服務。為咗拯救人類,佢甘願喺苦刑柱上痛苦死去。耶穌提到跟從佢嘅人話:“人因為我嘅緣故,侮辱你哋,迫害你哋,用各種邪惡嘅話誣衊你哋,你哋就有福嘞。要歡喜雀躍,因為你哋喺天上嘅獎賞係大嘅。喺你哋之前嘅先知,人都係噉樣迫害佢哋。”(馬太福音5:11,12)
18. 有邊啲問題可以幫助我哋分析自己愛享樂到乜嘢程度?
18 我哋可以點樣分析自己愛享樂到乜嘢程度?我哋可以問吓自己:“對我嚟講,娛樂係咪比聚會同傳道更重要?為咗事奉耶和華,我願唔願意犧牲一啲自己鍾意嘅娛樂?喺選擇娛樂活動嘅時候,我有冇考慮耶和華嘅觀點?”如果我哋真係愛上帝,就會盡力避開一啲肯定或者有可能令佢不悦嘅事。(請讀馬太福音22:37,38)
快樂之道
19. 邊啲人唔會有真正嘅快樂?
19 人類已經經歷咗六千年嘅苦難,而撒但嘅世界好快就會結束。今日地球到處都係專愛自己、貪愛錢財同愛享樂嘅人。呢啲人只會諗佢哋想得到嘅嘢,將自己嘅慾望睇得比乜嘢都重要。噉樣嘅人永遠都唔會有真正嘅快樂。不過,正如詩篇執筆者所講:“邊個倚靠雅各嘅上帝幫助,又仰望耶和華佢嘅上帝,邊個就有福嘞!”(詩篇146:5)
20. 愛上帝點樣使你快樂?
20 耶和華嘅子民當中洋溢住對佢嘅愛,而且我哋人數每年都有增無減。呢個證明上帝嘅王國正施行統治,好快就會為我哋帶嚟難以置信嘅福分。如果想得到長久、真正嘅快樂,我哋就要遵行上帝嘅旨意,取悦最偉大嘅耶和華。愛耶和華嘅人會永遠快樂!喺下一篇課文,我哋會討論自私嘅愛所引發嘅不良態度同特質,跟住會比較呢個同耶和華嘅僕人所表現嘅特質有乜嘢分别。