點解我哋要向擁有一切嘅上帝奉獻？
“我哋嘅上帝啊，而家我哋要感謝你，頌揚你嘅美名。”——歷代志上29:13
1，2． 耶和華點樣慷慨噉運用佢嘅資源？
耶和華係非常慷慨嘅上帝。我哋擁有嘅一切都係源於佢嘅。所有金銀同其他地球上嘅自然資源都屬於耶和華，佢運用呢啲資源嚟維持地上嘅生命。（詩篇104:13-15；哈該書2:8）聖經記載咗好多例子，係關於耶和華點樣施行奇迹，運用呢啲資源去幫助佢嘅子民。
2 以色列人喺曠野40年期間，耶和華一直提供嗎哪同水俾佢哋。（出埃及記16:35）結果，“佢哋毫無缺乏”。（尼希米記9:20，21）耶和華通過先知以利沙施行奇迹，使一個忠心嘅寡婦家裏嘅食油增加多倍。嚟自上帝嘅禮物使婦人可以還清債務，而且仲有足够嘅錢使佢同兩個仔繼續生活。（列王紀下4:1-7）喺耶和華嘅幫助下，耶穌施行過奇迹提供食物，甚至金錢。（馬太福音15:35-38；17:27）
3． 呢篇課文會討論乜嘢？
3 耶和華擁有無限嘅資源，可以用嚟維持受造物嘅生命。但係，上帝依然鼓勵佢嘅子民用自己嘅資財嚟支持佢地上組織嘅運作。（出埃及記36:3-7；請讀箴言3:9）點解耶和華希望我哋將自己寶貴嘅資財獻俾佢？喺聖經時代，耶和華嘅僕人點樣運用物質嚟支持佢嘅工作？今日上帝嘅組織點樣運用捐款？呢篇課文會回答呢啲問題。
點解我哋要向耶和華奉獻？
4． 我哋支持耶和華嘅工作就向佢表明乜嘢？
4 我哋向耶和華作出奉獻，因為我哋愛佢亦都感激佢。當我哋諗翻耶和華為我哋所做嘅一切，内心就深受感動。大衛王解釋建造聖殿工程嘅需要嗰時，佢承認我哋所擁有嘅一切都嚟自耶和華，所以我哋獻俾耶和華嘅一切，都係佢賜俾我哋嘅。（請讀歷代志上29:11-14）
5． 聖經點樣表明無私奉獻喺耶和華眼中係好重要嘅？
5 奉獻係崇拜耶和華嘅一種方式。使徒約翰喺一個異象裏面聽到耶和華嘅僕人喺天上話:“耶和華我哋嘅上帝，你配得榮耀、尊崇、力量，因為你創造咗一切，一切都係因為你嘅旨意先至存在，先至被創造嘅。”（啟示錄4:11）冇錯，耶和華配得一切榮耀同尊崇，所以我哋要將自己最好嘅獻俾佢。耶和華通過摩西吩咐以色列人每年要喺耶和華面前舉行三次節期。喺呢啲節期嘅崇拜活動當中，包括向耶和華奉獻。當時嘅以色列人受到提醒，唔可以“空手到耶和華面前”。（申命記16:16）今日都一樣，無私奉獻喺耶和華眼中係好重要嘅。我哋噉樣做就表明自己重視同支持耶和華地上組織嘅工作。
6． 點解表現慷慨對我哋嚟講係好嘅？（請睇吓課文開頭嘅圖片）
6 我哋慷慨施與而唔係只係接受，其實係對我哋好嘅。（請讀箴言29:21）我哋可能諗到一個細路仔平時從父母嗰度收到小小零用錢，佢就買翻份禮物送俾爸爸媽媽。你認為佢父母收到呢份禮物嘅時候有乜嘢感覺呢？又或者一個做緊先驅嘅弟兄或姊妹同父母一齊住，佢俾一筆錢父母去支持屋企嘅開銷。雖然父母未必期望仔女噉樣做，但係佢哋可能都會接受呢筆錢，因為仔女可以通過呢個機會向父母表現感恩之心。同樣，耶和華知道我哋將最寶貴嘅獻俾佢係對我哋有益。
聖經時代嘅奉獻
7，8． 喺聖經時代，耶和華嘅子民點樣喺以下兩方面作出捐獻，立下榜樣:（甲）某啲項目上？（乙）上帝嘅工作上？
7 我哋從聖經學到，耶和華嘅子民會作出奉獻支持佢嘅工作。有時佢哋會為某啲項目作出捐獻。例如，摩西建造聖幕嘅時候，佢鼓勵人民作出奉獻。後來大衛王為建築聖殿做準備嗰時，佢亦都噉樣做。（出埃及記35:5；歷代志上29:5-9）喺約阿施王在位期間，祭司用收集到嘅錢嚟修葺耶和華嘅殿。（列王紀下12:4，5）公元1世紀，猶地亞發生饑荒，當地嘅弟兄好需要得到援助。其他基督徒知道後就按照自己嘅能力，獻出物資捐助受災嘅弟兄。（使徒行傳11:27-30）
8 耶和華嘅子民亦都會資助嗰啲喺上帝工作上帶頭嘅人。根據摩西律法，利未部族同其他部族唔一樣，佢哋唔會得到産業。不過，以色列人會捐出佢哋嘅十分之一，使利未人可以喺聖幕專心工作。（民數記18:21）類似嘅係，一啲慷慨嘅婦女幫助耶穌同佢嘅門徒，“呢啲婦女都用自己嘅財物資助佢哋”。（路加福音8:1-3）
9． 以往嘅捐獻係點樣嚟嘅呢？
9 當然，呢啲捐獻嚟自唔同嘅來源。喺曠野建造聖幕嘅時候，以色列人可能將佢哋從埃及帶走嘅貴重物品都捐獻出嚟。（出埃及記3:21，22；35:22-24）喺1世紀，有啲基督徒變賣自己嘅田地、房屋等財物，將賣到嘅錢交俾使徒。使徒就將收集到嘅錢分俾有需要嘅人。（使徒行傳4:34，35）其他人亦都會經常撥出一啲錢去支持上帝嘅工作。（哥林多前書16:2）所以，無論係好有錢嘅抑或係好貧窮嘅，每個人都可以作出捐獻。（路加福音21:1-4）
今日嘅奉獻
10，11． （甲）喺表現慷慨方面，我哋可以點樣效法耶和華嘅古代僕人？（乙）你對支持王國工作呢件事有乜嘢感覺？
10 今日，我哋都會受到鼓勵喺一啲特别嘅安排上作出捐獻。例如，你會衆係咪計劃起個新嘅聚會所？又或者你而家用嘅聚會所係咪裝修緊？我哋可能會聽到宣布話，本地嘅分部辦事處需要裝修、受天災影響嘅弟兄需要幫助，或者我哋需要支持大會嘅開銷。我哋嘅捐款可以支持喺世界總部同埋全球各個分部工作嘅弟兄姊妹，以及特派傳道員、特别先驅同從事分區探訪工作嘅弟兄姊妹。你嘅會衆亦都可能會經常捐款支持世界各地嘅建築工程，例如興建大會堂同聚會所。
11 喺最後嘅日子，我哋每個人都可以支持耶和華正喺度成就嘅工作。大部分嘅捐款都係匿名嘅。我哋可以暗中將捐款放喺聚會所嘅捐款箱，或者可以上jw.org網站捐款。我哋可能會覺得自己小小嘅捐款冇乜價值。不過，組織收到嘅捐獻其實大部分嚟自好多筆細少嘅數額，而唔係幾筆巨款。雖然有啲弟兄姊妹好似馬其頓人一樣“極度貧困”，但係佢哋仍然渴望有機會表現慷慨，作出捐獻。（哥林多後書8:1-4）
12． 組織點樣盡力以妥善嘅方式使用捐款？
12 對於點樣使用組織嘅捐款，中央長老團會事先禱告、慎重考慮，盡力表現忠信同睿智。（馬太福音24:45）佢哋會小心處理收集到嘅捐款，並按照預算好好運用。（路加福音14:28）喺聖經時代，忠心嘅管家會跟從指示確保所得嘅捐獻只用喺指定嘅用途。例如，以斯拉重返耶路撒冷嘅時候帶住波斯王嘅捐獻，呢啲捐獻包括金、銀同其他物料，總值超過今日嘅1億美元。以斯拉將呢啲物資視為獻俾耶和華嘅禮物，考慮到會途經危險路段，佢採取咗一啲詳細嘅步驟嚟保護財物。（以斯拉記8:24-34）使徒保羅曾經收集過一啲用嚟救濟猶地亞基督徒嘅捐款。佢實行措施，確保嗰啲派送物資嘅人“喺耶和華睇嚟處事誠實，喺人睇嚟亦都處事誠實”。（請讀哥林多後書8:18-21）今日，我哋嘅組織效法以斯拉同保羅嘅榜樣，跟從指示，小心謹慎處理同運用捐款。
13． 我哋應該點樣睇組織簡化運作嘅安排？
13 一個家庭可能會作出調整去平衡收入同開支，或者考慮點樣減少支出，過簡樸嘅生活，以求為耶和華作更多嘅服務。耶和華嘅組織亦都一樣。近年來，有好多令人興奮嘅新安排，不過資金有時會入不敷出。所以，組織會經常考慮可以點樣減少開支同簡化工作程序，目的係善用你哋慷慨嘅捐款嚟成就更多事。
從你哋嘅捐款得益
你嘅捐獻能够支持全球工作（請睇第14-16段）
14-16． （甲）你嘅捐款成就緊乜嘢事呢？（乙）你點樣從呢啲安排得益？
14 好多事奉耶和華多年嘅弟兄姊妹都話，從未見過有一段時期好似而家噉，可以得到咁多靈糧。請諗吓，近年來，我哋有jw.org網站同JW電視網。《聖經新世界譯本》以越來越多嘅語言版本發行。2014至2015年，組織喺全球14個城市嘅大型體育館，舉行咗為期3日題名為“不斷先追求上帝嘅王國”嘅國際大會。有機會出席呢啲大會嘅人都非常興奮。
15 好多人都感激耶和華嘅地上組織提供豐富嘅靈糧，使佢哋得益不淺。例如，一對喺亞洲服務嘅夫婦提到JW電視網話:“我哋受到委派，喺一個小城市服務。所以，我哋有時覺得好似同外界隔絶，好容易忘記耶和華嘅工作規模遍及全球。但係我哋收睇JW電視網嘅節目嗰陣，就意識到自己都係呢個國際弟兄團體嘅一分子。本地嘅弟兄姊妹都好鍾意JW電視網。我哋經常都會聽到佢哋講，睇完每月嘅電視節目之後，覺得自己同中央長老團成員更親近。而家，佢哋因為自己可以屬於耶和華嘅組織而感到更加自豪。”
16 而家全球興建或者翻新緊嘅聚會所差唔多有2500個。洪都拉斯嘅一群會衆開始使用新嘅聚會所之後，會衆嘅一位成員話:“我哋真係好開心可以成為耶和華宇宙大家庭嘅一分子，而且能够屬於一個咁好嘅國際弟兄團體。我哋一直都好希望喺自己嘅社區有聚會所，而家終於美夢成真。”好多人都因為收到自己語言嘅聖經同聖經書刊，或者受天災影響時得到弟兄姊妹嘅幫助，又或者睇到自己社區嘅都市見證工作同公衆場所見證工作有好好嘅成果，而表達出類似嘅感激。
17． 今日組織嘅運作點樣表明背後有耶和華嘅支持？
17 一般人唔明白，點解我哋只係靠自願捐獻都能够成就咁多事。一間大公司嘅總裁參觀完我哋嘅印刷設施之後就覺得好驚訝，因為呢啲工作都係由志願人員同自願捐款維持嘅，完全冇銷售冇集資。佢話照計我哋噉樣做係唔會成功嘅。我哋都同意！我哋知道因為有耶和華喺背後支持我哋，先可以成就到呢啲事。（約伯記42:2）
向耶和華奉獻而得福
18． （甲）支持上帝嘅王國使我哋得到乜嘢福分？（乙）我哋可以點樣訓練仔女同新人支持上帝嘅王國？
18 今日，耶和華使我哋有榮幸可以支持呢項偉大嘅王國工作。佢保證，如果我哋支持佢嘅王國就會得到福分。（瑪拉基書3:10）耶和華承諾嗰啲慷慨嘅人必得豐盈。（請讀箴言11:24，25）表現慷慨亦都會令我哋開心，因為“施與比接受更快樂。”（使徒行傳20:35）我哋仲可以通過自己嘅言行訓練仔女同新人，使佢哋知道點樣作出奉獻支持上帝嘅王國，從而得享福分。
19． 你從呢篇課文得到乜嘢鼓勵？
19 我哋嘅一切都係耶和華所賜嘅。我哋將所得到嘅用嚟支持佢嘅王國就表明我哋愛佢，亦都感激佢為我哋所做嘅一切。（歷代志上29:17）當以色列人建造聖殿嘅時候，“衆人自願奉獻，人民就歡喜，因為佢哋全心自願奉獻俾耶和華”。（歷代志上29:8，9）願我哋繼續將耶和華賜俾我哋嘅一切都奉獻俾佢，噉樣我哋就能够得到真正嘅快樂同滿足。
為你推薦
電子轉帳捐款說明
來看看有哪些方法可以捐助耶和華見證人的全球工作。
