LECCIÓN 2
¿Tú ná Dios?
1. ¿Xhi ní na par guynnu adorar Dios?
Dios beinché irate. Desd auyak nuʼni ne kɨt chuʼti dxi initloni (Salmo 90:2). Dios bní irate de didx zák ni ka laʼn xhtidxni (1 Timoteo 1:11). Pur ni bnidxni galnabáin dunún, tubyzy laani na par guynnu servir ne adorar. Bily Apocalipsis (Revelación) 4:11.
2. ¿Xha ná Dios?
Nik tuby bniety kɨt cheleʼti guienló laani te nani tuby spirít, kɨt natini zik bniety guixliú (Juan 1:18; 4:24). Releʼ gakbenu xha ná xhmodni chi rguienu irate ni beincheni. Zik ná iralote de naxh ne de guiea ni beincheni rliuʼni dek rkazduuxhni dunún ne mazruʼ nanni ke dunún. Zikza irate ni beincheni rliuʼ dek rapduuxhni poder. Bily Romanos 1:20.
Stuby form ni ruynben Dios ná chi rulnu xhtidxni. Nde rní xha ná xhmodni kun de bniety, xhi de kos riulaazni ne xhi kɨt riulaazni, ne xha ná xhmodni lo irate de ni rak. Bily Salmo 103:7-10.
3. ¿Á nuʼ lá Dios?
Jesús bní: «Xtadnɨ Dios, laabiu ni rbezbiu llayabaa, quesentiand riáld idxapnɨ didxdoo lábiu» (Mateo 6:9). Mazk nuʼ zien de títulos xhte Dios, nuʼpak tuby láni. Kad de didx irenka rní de bniety láni. Dixhtil láni Jehová, per zikza rak us Yavé. Bily Salmo 83:18 (82:19 nuʼ de Biblia).
Zien de bniety ni rkuá xhtidx Dios, kɨt rkuatideb lá Dios rzakadebni, chik rkuadeb de títulos zik Dios ne Señor. Per chi kuapak xhtidx Dios bdika láni zik gadz mil güelt. Chi Jesús bliuʼ de bniety de Dios, zien güelt bzetni lá Dios. Bily Juan 17:26 TNM.
Bguie videu ¿Á nuʼ lá Dios?
4. ¿Á ruʼ Dios garzáʼ pur dunún?
Zik dad ni rkáz chuʼ zak xiʼnni, Dios rkaz kueznu nasáʼ.
Bel rkazduuxh Dios dunún, ¿xhi ni rsanní nuʼduuxh galzí? Nuʼ de bniety rní dek Dios ruyn prueb dunún chi rdednu galzí. Per kɨt didxlitiní. Bily Santiago 1:13.
Jehová rsan kuén lo nez ni chonalnu lo galnabáin xhtennu. Ná güen guynu us libertá ki par guynu servir laani (Josué 24:15). Per zien de bniety ruyndeb usni par guyndeb kos mal, pur nii nuʼ de galzí. Per Jehová rzieeni chi rdednu lo de galzí. Bily Génesis 6:5, 6.
Pur ni Jehová rkáz dunún ne rkazni kueznu nasáʼ, a zedial izikani galnaa kun de ni ná mal. Per rapni de rson pur ni rsanni nuʼ galzí. Lo lección 8 kixhleʼ kun ni ná de rson ki. Bily 2 Pedro 2:9 ne 3:7, 13.
5. ¿Xha ibigaxhnu ló Dios?
Jehová rsan ibigaxhnu lóni kun oración. Laani ruʼ garzáʼ pur kad tubynu (Salmo 65:2; 145:18). Zikza, ruynni perdón dunún ne rguieni fuérz ni riennu pur ruynnu voluntá xhtenni, mazk kɨt raty güelt ruynnu gan. Mazk, nanu bniety duld, releʼ raknu xhamiguni. Bily Salmo 103:12-14 ne Santiago 4:8.
Pur ni bnidxni galnabáin, soltiz laani na par ikazduuxhnu (Marcos 12:30). Rliuʼnu dek rkaznu laani chi rzednu ne chi rkuadiagnu ni rní lo xhtidxni. Chi ruynnu zik, rbigaxhnu ló Dios. Bily 1 Timoteo 2:4 ne 1 Juan 5:3.
