LECCIÓN 9
¿Xha gak kuez nasáʼ de famíl?
1. ¿Xhi ní napak par guchnaa de bniety lo ley?
Jehová ná tuby Dios nasáʼ, de laani zied zien de didx zák, ne laani rkazni dek de famíl kuez nasáʼ (1 Timoteo 1:11). Laani blekxti gelruchnaa. Tuby bniety nguiu ne tuby bniety gunaa na par guchnaadeb lo ley, par itiozakdeb de xiʼndeb nde rakneni par ibaindeb nasáʼ. De cristianos na par ikuadiagdeb ley ni rní de guxtisy guixliú par guchnaa de bniety. Bily Lucas 2:1, 4, 5.
Dios rnini dek bniety nguiu ne bniety gunaa ni a bichnaa na par kueznedeb chieldeb idubtiempte. Ne rnini dek kɨt nati par gatné o gaizné tuby bniety ni kɨt nati chielb (Hebreos 13:4). Jehová kɨt riulaazti gak de bniety ni a bichna divorcy (Malaquías 2:16). Per Dios rsani gak de ni a bichna divorcy ne guchnab stuby bel chielb a bein duld kun tuby bniety ni kɨt nati chielnb. Bily Mateo 19:3-6, 9.
2. ¿Xha na par kuezné de bniety nguiu chielni ne de bniety gunaa chielni?
Jehová beinché bniety nguiu ne bniety gunaa par gakné saʼdeb chi a bichnaadeb (Génesis 2:18). Bniety nguiu na par guynb dzuin par chu ni ikindeb ne iliuʼb xhfamílb xhtidx Dios. Zikza ikazb ne chub garzáʼ pur chielb. De ni a bichnaa na par ikázdeb ne gapdeb dixdoo saʼdeb. Zikza, pur ni iropdeb nadeb bniety duld, na par guyndeb perdón chieldeb par kuezdeb nasáʼ. Bily Efesios 4:31, 32; 5:22-25, 33, ne 1 Pedro 3:7.
3. ¿Á na par ilaʼsaʼ de bniety ni a bichnaa bel kɨt nuʼdeb nasáʼ?
Bel ni a bichnaa napdeb de problem iropdeb na par guyndeb tuby fuérz par chizaa ikazdeb chieldeb (1 Corintios 13:4, 5). Xhtidx Dios rní dek kɨt nati par ilaʼsaʼdeb chi ni rapdeb problem lo famíl xhtendeb. Bily 1 Corintios 7:10-13.
4. ¿Xhi rkaz Dios par xiʼn de bniety?
Jehová rkaz dek xiʼn de bniety kuezdeby nasáʼ. Pur ni kaliuʼni laadeby xha na par guyndeby naʼ ni nadeby bniʼn. Ne rkazni chanaldeby sabiduría ne ejémpl xhte xhtaddeby (Colosenses 3:20). Ne Dios, rkazpakni nasáʼ duuxh iziendeby chi guyndeby servir laani ne xiʼnni. Bily Eclesiastés 11:9–12:1; Mateo 19:13-15, ne 21:15, 16.
5. ¿Xha gaknepak de dad xiʼndeb par chuzaklaazdeby?
De dad na par guyndeb tuby fuérz par ideddeb ni ikin de xiʼndeb, rut chudeby ne xhabdeby (1 Timoteo 5:8). Per kɨt soltiz niy na par guyndeb, zikza na par iliuʼdeb de xiʼndeb ikazdeby Dios ne guyndeby zik ni ruynni (Efesios 6:4). Chi de dad rkazpakdeb Dios nadeb tuby ejémpl par de xiʼndeb, nde rakné laadeby par guyndeby ni rní lo xhtidx Dios. Bel gakbezakdeby ni rní lo xhtidx Dios laani gakné laadeby par guynzakdeby xhgab. Bily Deuteronomio 6:4-7 ne Proverbios 22:6.
De dad rkin guyndeb animar ne felicitár de xiʼndeb pur de kos güen ni ruyndeby. Nuʼ güelt rkinpak de dad ininedeb ne kuxhnezdeb laadeby, nde gakné par kɨt guntydeby ni ná mal (Proverbios 22:15). Per kɨt nati par guynadeb laadeby. Bily Colosenses 3:21.
De testigu xhten Jehová rapdeb zien de librɨ par pak de dad ne de xiʼndeb. Loni rní ni zed laʼn Biblia. Bily Salmo 19:7, 11.
